TITUS
Otfrid von Weissenburg, Evangelienbuch
Part No. 57
Previous part

Chapter: 24  
p. 71r    

XXIV. CONCLUSIO LIBRI SECUNDI.


Verse: 1     Thiz lerta Kríst in wara   \   joh mánagfalto méra;
Verse: 2     ih ságen thir zi wáre:   \   maht sélbo iz lesan tháre,
Verse: 3     Sina mánunga álla   \   joh léra filu fólla,
Verse: 4     thráwa ouh filu suára,   \   thaz ságen ih thir in wára.
Verse: 5     Ni mág man thaz irzéllen,   \   thóh wir es bigínnen;
Verse: 6     thera léra guati   \   was hárto thiu gimuati.
Verse: 7     So er zi thíu tho gifíang,   \   fon themo bérge er nídar giang,
Verse: 8     fólgete mo githíuto   \   al ménigi thero líuto.
Verse: 9     Er sélbo tho giméinta,   \   thar hórngibruader héilta
Verse: 10     mit sinen wórton gahun,   \   thar al thie líuti iz sahun;
Verse: 11     Tház sies wola lústi,   \   thiu léra in wari fésti,
Verse: 12     thia se thár innan thés   \   hortun míthontes;
Verse: 13     Thaz síe irwáchetin frúa   \   joh hogtin hárto tharazua,
Verse: 14     jóh iz wari fésti   \   ínnan iro brústi;
Verse: 15     Thaz in thiu múat ni wánkon,   \   sin fástọ in then githánkon,
Verse: 16     in húge joh in múate   \   zi allemo ánaguate.


p. 71v    


Manuscript page: 71v 
Verse: 17     Dua drúhtin uns zi núzze,   \   thaz uns iz wóla sizze;
Verse: 18     biscírmi unsih thes léides,   \   fon thínen ni giscéides;
Verse: 19     Tház wir ni bifállen   \   fon thinen líobon allen,
Verse: 20     fon selben drúten thinen,   \   thia zála wir bimíden!
Verse: 21     Giréino uns thia githánka,   \   wir bírun thine scálka,
Verse: 22     mit ginádono ginúhti   \   fon súntono súhti;
Verse: 23     Hált unsih in nótin   \   fon allen wídarmuatin,
Verse: 24     thaz múazin wir biwánkon   \   then ábahen githánkon!
Verse: 25     Biscírmi unsih in thráti   \   fon alleru úndati,
Verse: 26     fon égislichen súhtin   \   mit thínes selbes máhtin!
Verse: 27     Thinu wórt hiar óbana,   \   thi uns zéllent alla rédina --
Verse: 28     tharạzúa firlih uns múates   \   joh húges filu gúates;
Verse: 29     Firlíh uns, druhtin, állen,   \   thaz wir thaz thín io wollen,
Verse: 30     mit wérkon io irfúllen   \   thaz thínu wort uns zéllen;
Verse: 31     Thaz wir tharzúa húggen,   \   in hérzen uns iz léggen,
Verse: 32     wíht es ni firléiben   \   ni wir iz thár gikleiben!
Verse: 33     Firdríb fon uns in thráti   \   allo míssodati,
Verse: 34     thiz féstino uns in múate,   \   theiz úns irge zi gúate,
Verse: 35     Thaz wír tharana wérkon   \   mit wákaren githánkon,
Verse: 36     joh wír thaz io áhton   \   mit lúteren gidráhton!
Verse: 37     Ther scádo fliehe in gáhe,   \   joh thíz sih uns io náhe,


p. 72r    


Manuscript page: 72r 
Verse: 38     joh mit thíu giwerkon   \   thaz thu úns es muazis thánkon;
Verse: 39     Thaz wir mánahoubit   \   zi thínen sin gifúagit,
Verse: 40     thie thíonost thin hiar dátun,   \   so síe thih, druhtin, bátun;
Verse: 41     Jóh wir wesen blíde   \   in themo éwinigen líbe,
Verse: 42     mit scalkon thínen iamer   \   (wir ni géron wihtes mér),
Verse: 43     Mit éngilon thínen;   \   thaz wir then wéwon miden,
Verse: 44     in hímilriche in ríhti   \   in thíneru gisíhti;
Verse: 45     Fon éwon unz in éwon   \   mit then drútselon,
Verse: 46     fon wórolti zi wórolti   \   sín thih iamer lóbonti! Amen.
   Explicit liber secundus.



Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.