TITUS
Otfrid von Weissenburg, Evangelienbuch
Part No. 59
Previous part

Chapter: 1  
p. 74r    

Manuscript page: 74r 
I. PRAEFATIO LIBRI TERTII.


Verse: 1     Mit selben Krístes segenon   \   wíll ih hiar nu rédinon
Verse: 2     in einan lívol suntar   \   thiu séltsanun wuntar
Verse: 3     (Fon themo wúntarliche)   \   thiu er déta hiar in ríche,
Verse: 4     unz ér was hiar in wórolti,   \   er tóthes bi unsih kóroti;
Verse: 5     Thiu zéichan séltsanu,   \   súmu thoh zi wáru,
Verse: 6     wanta, thoh er wólle,   \   nist mán ther siu al irzélle.
Verse: 7     Ni scríbu ih nu in alawár   \   so sih ther órdo dregit thár,
Verse: 8     súntar so thie dáti   \   mir quément in githáhti.
Verse: 9     Gináda ih sina férgon   \   mit fórahtlichen suórgon,
Verse: 10     er ouh in thésemo werke   \   zéichan sinaz wírke;
Verse: 11     In thesen búachon wanne   \   ih áwiggon ni gánge,
Verse: 12     ih réhto joh hiar scóno   \   giscribe dáti frono.
Verse: 13     Er déta thaz hálze líafun   \   joh stúmme man ouh ríafun:
Verse: 14     er dúe theih hiar ni hínke,   \   thes sénses ouh ni wénke;
Verse: 15     Hórngibruader héile:   \   er míh ouh hiar giréine
Verse: 16     fon éitere joh fon wúnton:   \   fon mínen suaren súnton!
Verse: 17     In ín irhuggu ih léwes   \   léides filu séres;
Verse: 18     ríuzit mir thaz hérza,   \   thaz dúat mir iro smérza.
Verse: 19     Drúhtin, fon then stánkon,   \   thaz muaz ih sér biwánkon,
Verse: 20     mih ním (ni dua iz zi spáti!),   \   so Lázarum thu dáti!


p. 74v    


Manuscript page: 74v 
Verse: 21     Fon tóthe inan irquíctos,   \   then líchamon irwáctos:
Verse: 22     irquicki in mír, theist méra,   \   thia mína muadun séla,
Verse: 23     Theih híar in libe irwízze,   \   zi thinemo dísge ouh sizze,
Verse: 24     so er déta after thíu:   \   ih muazi thíngen zi thiu;
Verse: 25     Tház ih io mit rúachon   \   zi góumon si in then búachon,
Verse: 26     tharana húgge ouh fóllon   \   thínes selbes wíllon!
Verse: 27     Joh tház ih hiar nu zéllu,   \   thin gíft ist iz mit állu;
Verse: 28     thie wízzi dua mir méron   \   zi thínes selbes éron;
Verse: 29     Ni rih súnta, druhtin, mino in thíu,   \   suntar mir wízzi lih zi thíu;
Verse: 30     ni fréwit wiht hiar unser múat   \   so thin áblazi dúat!
Verse: 31     Líndo, liobo druhtin mín,   \   laz thia késtiga sin;
Verse: 32     gilóko mir thaz minaz múat,   \   so muater kíndiline dúat.
Verse: 33     Thóh si iz sero fílle,   \   níst ni si ávur wolle
Verse: 34     (súntar si imo múnto),   \   theiz íaman thoh ni wúnto.
Verse: 35     Thia hánt duat si fúri sar,   \   ob íaman rámet es thar;
Verse: 36     gihúgit sar thés sinthes   \   thes íra lieben kíndes.
Verse: 37     Mit hénti siu mo scírmit   \   mit theru si iz míthont fillit;
Verse: 38     ni mag giséhan ira muat   \   thaz imo fíant giduat.
Verse: 39     Ther selbo fáter ouh so dúat;   \   thoh er mo sére sinaz múat,
Verse: 40     thoh dúat er mo avur bithérbi   \   thaz sinaz ádalerbi.
Verse: 41     Scírmi, druhtin, mir ouh só,   \   theih sí thin scálk giwisso;


p. 75r    


Manuscript page: 75r 
Verse: 42     thin hánt mih ouh biwérre,   \   thaz fíant mir ni dérre!
Verse: 43     Firlíh ouh mir githínges,   \   thes mines héiminges;
Verse: 44     wis fáter mir joh múater,   \   thu bist min drúhtin guater!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.