TITUS
Otfrid von Weissenburg, Evangelienbuch
Part No. 60
Previous part

Chapter: 2  
p. 75r    

II. ERAT QUIDAM REGULUS.


Verse: 1     Tho Kríst in Galiléa quam,   \   ward thaz tho mári sos iz zám,
Verse: 2     joh ward gikúndit sin giwált   \   ubar állaz thaz lant.
Verse: 3     Ein kuning giéiscot iz in wár   \   joh fúar ingegin ímo sar;
Verse: 4     waz mag ih zéllen thir es mér?   \   sin sún was filu síecher.
Verse: 5     Bat ér sih sar irhúabi,   \   mit imo héim fuari,
Verse: 6     thaz er thár gimeinti,   \   then sún imo gihéilti.
Verse: 7     Quad er io bi nóti   \   lagi dáwalonti,
Verse: 8     joh wári in theru súhti   \   mit grozeru únmahti.
Verse: 9     Gab er mo ántwurti   \   mit míhileru mílti;
Verse: 10     mit wórton wolt er súazen   \   thia gilóuba in imo búazen:
Verse: 11     "Ir zéichan ni giscówot   \   thanne iu wírdit so nót,
Verse: 12     wuntar séltsanu,   \   ni gilóubet ir zi wáru."
Verse: 13     Wanta ob er gilóubti ubar ál   \   só ịz bi rehte wésan scal,
Verse: 14     in hérza imo quámi   \   so iz fora góte zami:
Verse: 15     Gilóubt er selbo thánne   \   so zimit gótes manne,
Verse: 16     thaz íagiwar ist drúhtin   \   mit sínes selbes máhtin;
Verse: 17     Thaz thén ni tharf man béiten,   \   after stétin leiten,


p. 75v    


Manuscript page: 75v 
Verse: 18     ther so kréftiger íst,   \   bihábet thaz in wórolti ist.
Verse: 19     "Drúhtin", quad er, "zilo thín,   \   oba thu ginádon wili mín;
Verse: 20     thin gúatiz er biwérbe   \   er mir ther sún irsterbe."
Verse: 21     Sprah druhtin zi ímo sinaz wórt,   \   tház er fuari héimort,
Verse: 22     tház er fuari thárasun;   \   quad, funti gánzan sinan sún.
Verse: 23     Gilóubt er themo wórte   \   joh kérta sih zi lánte,
Verse: 24     sar bi thémo thinge   \   zi themo héiminge.
Verse: 25     Unz ér fuar áhtonti   \   thes sélben wortes máhti,
Verse: 26     gágantun imo blíde   \   thie holdun scálka sine;
Verse: 27     Záltun imo ouh innan thés   \   thráto filu líebes,
Verse: 28     thaz rehto in álawari   \   sin sun ginéran wari.
Verse: 29     Thia zít er éiscota tho   \   (was er es hárto filu fró),
Verse: 30     thia stúnta ouh mit giwúrti   \   wanne imo báz wurti.
Verse: 31     "Hérero, zéllen wir thir tház:   \   tho síbunta zit thes dáges was,
Verse: 32     gésteren, so sie sáhun,   \   tho ward er gánzer gahun.
Verse: 33     Ni zuivolo múat thinaz,   \   sus fíndist thu iz gidánaz;
Verse: 34     findist zi álaware   \   then liobon dróst sus tháre."
Verse: 35     Yrkánta tho ther fater sár   \   theiz thiu zít was in wár,
Verse: 36     thaz imo iz drúhtin so gilíaz,   \   thia selbun gánzida gihíaz;
Verse: 37     Gilóubta sar tho sélbo   \   ther kuning írdisgo tho
Verse: 38     mit sínemo githígine   \   themo hímilisgen kúninge.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.