TITUS
Otfrid von Weissenburg, Evangelienbuch
Part No. 61
Previous part

Chapter: 3  
p. 76r    

Manuscript page: 76r 
III. MORALITER.


Verse: 1     Thiz íst uns úngizami,   \   so íh iz nu firnámi,
Verse: 2     noh ni químit uns thiz gúat   \   in unser ármilichaz múat;
Verse: 3     Thoh hábet er uns gizéigot,   \   joh ouh mit bílide gibót,
Verse: 4     wio wir thoh dúan scoltin,   \   óba wir iz wóltin.
Verse: 5     Ju quam ein scúldheizo   \   bi nótthurfti héizo,
Verse: 6     bat ér sin wórt gimeinti,   \   er sinan skálk heilti;
Verse: 7     Er quad er sélbo quami,   \   then úmmahtin binámi,
Verse: 8     thoh géner thara ni géroti   \   sin selbes géginwerti.
Verse: 9     Ther kúning bat er quámi:   \   ni was Kríste thaz gizámi;
Verse: 10     ther scúldheizo es ni gérota:   \   er thara thoh fáran wolta!
Verse: 11     Hiar stréwit thiu sin gúati   \   in uns thio úbarmuati,
Verse: 12     thia únsera dúmpheit,   \   so wár so iz io zi thíu gigeit.
Verse: 13     Wir lázemes uns líchan   \   mán then filu ríchan,
Verse: 14     firmónames zi nóti   \   anderero ármuati;
Verse: 15     In ín ist uns gimúati   \   góld joh diuro wáti,
Verse: 16     ni némen in thía ahta   \   manno scálkslahta.
Verse: 17     Ni bidráhtot unser súmilih,   \   thaz wir bírun al gilih,
Verse: 18     éinera gibúrti,   \   thoh íz sid súlih wurti;
Verse: 19     In súmen duen zi nídiri   \   thera giscéfti ébini,
Verse: 20     in súmen thuruh thia éra   \   ist uns ther scáz mera.


p. 76v    


Manuscript page: 76v 
Verse: 21     Bi thiu hábet unz iz selbo gót   \   hiar fórna nu gibílidot,
Verse: 22     natúra in uns ni flíehen   \   joh zi ébine gizíehen:
Verse: 23     Er wolta sínes thankes   \   wíson thar thes scálkes;
Verse: 24     zemo súne, sih nu zálta,   \   giládoter ni wólta.
Verse: 25     Ob únsih avur ladot héim   \   man ármer thehéin,
Verse: 26     thuruh úbarmuati in wár   \   so suíllit uns thaz múat sar;
Verse: 27     Thes wizun thánk thanne   \   ríchemo manne,
Verse: 28     githankon wórton sinen   \   joh díofo imo ouh ginígen.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.