TITUS
Otfrid von Weissenburg, Evangelienbuch
Part No. 62
Previous part

Chapter: 4  
p. 76v    

IV. PROPE ERAT PASCHA JUDAEORUM.


Verse: 1     Thio zíti sih bibráhtun   \   thaz óstoron tho náhtun;
Verse: 2     fúar tho druhtin héilant   \   in Hierosólimono lant.
Verse: 3     Thar quád man thaz tho wári   \   fihuwíari,
Verse: 4     so iz thio búah thar zéllent,   \   in kríahhisgon nan nénnent;
Verse: 5     Wánta man sus wánne   \   wuasg thaz fléisg tharinne,
Verse: 6     thánne man so wólta,   \   zemo óphere scolta.
Verse: 7     Thén bifiangun úmbi   \   pórzicha fínfi,
Verse: 8     thie lagun fól al mannes   \   síaches inti hámmes.
Verse: 9     Thie selbun béitotun thár   \   (wízist thaz in álawar),
Verse: 10     thes warun fárenti   \   thaz sih thaz wázar ruarti.
Verse: 11     Engil gótes guato   \   fuar thar ín gimuato,
Verse: 12     thaz wázar er yrscútita   \   joh in zi héile iz gárota.


p. 77r    


Manuscript page: 77r 
Verse: 13     Ther thánne thaz gisítota,   \   thar érist inne bádota:
Verse: 14     so ward er sar io gánzer   \   fon so wíu so er er was hálzer.
Verse: 15     Thar zi thén gizaltan   \   gisáh er einan áltan
Verse: 16     kúmigan suaro   \   ju mánagero járo.
Verse: 17     Wangta zuéin (ih sagen thir tház)   \   thero jaro fíarzug ni was,
Verse: 18     tház er lag zi wáre   \   in thémo selben sére.
Verse: 19     Thie langun zíti Krist gisáh   \   jóh ouh selbo zi ímo sprah,
Verse: 20     ób inan giwúrti   \   thaz er héil wurti?
Verse: 21     Ódo er wanta, méinti,   \   zi themo wázare imo zéinti;
Verse: 22     tho kúmt er sina fréisun   \   sus in thésa wisun:
Verse: 23     "Drúhtin", quad er, "gúato!   \   nist níaman thero fríunto,
Verse: 24     thaz mír zi thiu gihélfe,   \   in thaz wázar mih firwérfe;
Verse: 25     Ih ílu thara in thráti,   \   min úmmaht duit iz spáti,
Verse: 26     thara ándere er gigáhent,   \   thaz bád mir untarfáhent."
Verse: 27     "Stant úf", quad er, "gihori mír,   \   joh nim thin bétti mit thir,
Verse: 28     thes sár nu thu ginéndes,   \   joh gáng ouh thines síndes!"
Verse: 29     So er érist sinu wórt insuab,   \   er thaz bétti sar irhúab,
Verse: 30     joh sar iz thána fuarta   \   so slíumo er thiu gihórta.
Verse: 31     Yrstuant er úf tho snello,   \   so was Krístes willo;
Verse: 32     er sar zi thíu tho gifíang,   \   mit themo bétte thana giang.
Verse: 33     Thes dáges was in wára   \   sámbazdages fíra,


p. 77v    


Manuscript page: 77v 
Verse: 34     tho drúhtin thiọ únganzi nám   \   fon themo kúmigen man.
Verse: 35     Quádun tho thie líuti,   \   er únrehto dati,
Verse: 36     thaz er únnotag   \   intéreta then díuren dag.
Verse: 37     "Ther míh", quad er, "héilta,   \   er sús iz al giméinta;
Verse: 38     giwisso ságen ih iz iu:   \   er hiaz mih gángan mit thiu."
Verse: 39     Frágetun se thuruh nót,   \   wer ther wári theiz gibót;
Verse: 40     er sar zi théra fristi   \   quad es wíht ni westi.
Verse: 41     Drúhtin selbo in wára   \   giang sár in eina fíara,
Verse: 42     ér joh sin githígini   \   súntar fon ther ménigi.
Verse: 43     Fand er áfter thiu then mán,   \   thó er in thaz hús quam
Verse: 44     thar ther líut io bétota,   \   gináda gotes thígita.
Verse: 45     "Ja bístu", quad er, "héiler,   \   nu ni súnto thu mér;
Verse: 46     mit thiu thin múat sih wérie,   \   thir wírs ni gibúrie."
Verse: 47     Er tho in álawari   \   then líutin deta mári,
Verse: 48     tház iz was ther héilant   \   ther inan thes séres inbant.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.