TITUS
Edda
Part No. 21
Previous part

Song: Br. 
Strophe: 1 
(BROT AF SIGURÐARQVIÐO)


Verse: 1    "Hvat hefir Sigurðr til saca unnit,
Verse: 2    er þú frocnan vill fiorvi næma?"

Strophe: 2 
Verse: 1    "Mér hefir Sigurðr selda eiða,
Verse: 2    eiða selda, alla logna;
Verse: 3    þá vélti hann mic, er hann vera scyldi
Verse: 4    allra eiða einn fulltrúi."

Strophe: 3 
Verse: 1    "Þic hefir Brynhildr bǫl at gerva
Verse: 2    heiptar hvattan, harm at vinna;
Verse: 3    fyrman hon Guðrúno góðra ráða,
Verse: 4    enn síðan þér sín at nióta."

Strophe: 4 
Verse: 1    Sumir úlf sviðo, sumir orm sniðo,
Verse: 2    sumir Gothormi af gera deildo,
Verse: 3    áðr þeir mætti, meins um lystir,
Verse: 4    á horscom hal hendr um leggia.

Strophe: 6 
Verse: 1    Úti stóð Guðrún, Giúca dóttir,
Verse: 2    oc hon þat orða allz fyrst um qvað:
Verse: 3    "Hvar er nú Sigurðr, seggia dróttinn,
Verse: 4    er frondr mínir fyrri ríða?"

Strophe: 7 
Verse: 1    Einn því Hǫgni andsvor veitti:
Verse: 2    "Sundr hǫfom Sigurð sverði hǫgginn,
Verse: 3    gnapir æ grár iór yfir gram dauðom."

Strophe: 8 
Verse: 1    Þá qvað þat Brynhildr, Buðla dóttir:
Verse: 2    "Vel scolot nióta vápna oc landa;
Verse: 3    einn myndi Sigurðr ǫllo ráða,
Verse: 4    ef hann lengr litlo lífi heldi.

Strophe: 9 
Verse: 1    Væria þat somt, at hann svá réði
Verse: 2    Giúca arfi oc Gota mengi,
Verse: 3    er hann fimm sono at fólcræði,
Verse: 4    gunnar fúsa, getna hafði."

Strophe: 10 
Verse: 1    Hló þá Brynhildr - bor allr dunði -
Verse: 2    eino sinni af ǫllom hug:
Verse: 3    "Lengi scoloð nióta landa oc þegna,
Verse: 4    er þér frocnan gram falla létoð."

Strophe: 11 
Verse: 1    Þá qvað þat Guðrún, Giúca dóttir:
Verse: 2    "Mioc mælir þú miclar firnar;
Verse: 3    gramir hafi Gunnar, gǫtvað Sigurðar!
Verse: 4    heiptgiarns hugar hefnt scal verða."

Strophe: 5 
Verse: 1    Soltinn varð Sigurðr sunnan Rínar,
Verse: 2    hrafn at meiði hátt kallaði:
Verse: 3    "Ycr mun Atli eggiar rióða,
Verse: 4    muno vígscá of viða eiðar."

Strophe: 12 
Verse: 1    Fram var qvelda, fiolð var druccit,
Verse: 2    þá var hvívetna vilmál talið;
Verse: 3    sofnoðo allir, er í sæing qvómo,
Verse: 4    einn vacþi Gunnarr ǫllom lengr.

Strophe: 13 
Verse: 1    Fót nam at hrora, fiolð nam at spialla,
Verse: 2    hitt herglǫtuðr hyggia téði,
Verse: 3    hvat þeir í bǫðvi báðir sǫgðo,
Verse: 4    hrafn ey oc ǫrn, er þeir heim riðo.

Strophe: 14 
Verse: 1    Vacnaði Brynhildr, Buðla dóttir,
Verse: 2    dís scioldunga, fyr dag litlo:
Verse: 3    "Hvetið mic eða letið mic - harmr er unninn -,
Verse: 4    sorg at segia eða svá láta!"

Strophe: 15 
Verse: 1    Þǫgðo allir við því orði,
Verse: 2    fár kunni þeim flióða látom,
Verse: 3    er hon grátandi gorðiz at segia,
Verse: 4    þat er hlæiandi hǫlða beiddi.

Strophe: 16 
Verse: 1    "Hugða ec mér, Gunnarr, grimt í svefni,
Verse: 2    svalt alt í sal, ættac sæing kalda;
Verse: 3    enn þú, gramr, riðir, glaums andvani,
Verse: 4    fiotri fatlaðr í fiánda lið.
Verse: 5    Svá mun ǫll yðor ætt Niflunga
Verse: 6    afli gengin: eroð eiðrofa.

Strophe: 17 
Verse: 1    Mantattu, Gunnarr, til gorva þat,
Verse: 2    er þit blóði í spor báðir rendot;
Verse: 3    nú hefir þú hánom þat alt illo launat,
Verse: 4    er hann fremstan sic finna vildi.

Strophe: 18 
Verse: 1    Þá reyndi þat, er riðit hafði
Verse: 2    móðigr á vit mín at biðia,
Verse: 3    hvé herglǫtuðr hafði fyrri
Verse: 4    eiðom haldit við inn unga gram.

Strophe: 19 
Verse: 1    Benvǫnd of lét, brugðinn gulli,
Verse: 2    margdýrr konungr á meðal occar;
Verse: 3    eldi vóro eggiar útan gorvar,
Verse: 4    enn eitrdropom innan fáðar."

Strophe: S. 
Verse: 1    Frá dauða Sigurðar.

Verse: 2    Hér er sagt í þessi qviðo frá dauða Sigurðar, oc
Verse: 3    vícr hér svá til, sem þeir dræpi hann úti. Enn sumir
Verse: 4    segia svá, at þeir dræpi hann inni í reccio sinni sofanda.
Verse: 5    Enn þýðverscir menn segia svá, at þeir dræpi hann úti
Verse: 6    í scógi. Oc svá segir í Guðrúnar qviðo inni forno,
Verse: 7    at Sigurðr oc Giúca synir hefði til þings riðit, þá er hann
Verse: 8    var drepinn. Enn þat segia allir einnig, at þeir svico hann
Verse: 9    í trygð oc vógo at hánom liggianda oc óbúnom.

Verse: 10    Guðrún sat yfir Sigurði dauðom. Hon grét eigi sem
Verse: 11    aðrar konor, enn hon var búin til at springa af harmi. Til
Verse: 12    gengo bæði konor oc karlar at hugga hana; enn þat var
Verse: 13    eigi auðvelt. Þat er sǫgn manna, at Guðrún hefði etið
Verse: 14    af Fáfnis hiarta oc hon scilði því fugls rǫdd. Þetta er
Verse: 15    enn qveðit um Guðrúno:




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.