TITUS
Edda
Part No. 22
Previous part

Song: Gdhr.I 
Strophe: 1 
GUÐRÚNARQVIÐA (IN FYRSTA).


Verse: 1    Ár var, þaz Guðrún gorðiz at deyia,
Verse: 2    er hon sat sorgfull yfir Sigurði;
Verse: 3    gerðit hon hiúfra né hǫndom slá,
Verse: 4    né qveina um sem konor aðrar.

Strophe: 2 
Verse: 1    Gengo iarlar alsnotrir fram,
Verse: 2    þeir er harðz hugar hána lǫtto;
Verse: 3    þeygi Guðrún gráta mátti,
Verse: 4    svá var hon móðug, mundi hon springa.

Strophe: 3 
Verse: 1    Sáto ítrar iarla brúðir,
Verse: 2    gulli búnar, fyr Guðrúno;
Verse: 3    hver sagði þeira sinn oftrega,
Verse: 4    þann er bitrastan um beðit hafði.

Strophe: 4 
Verse: 1    Þá qvað Giaflaug, Giúca systir:
Verse: 2    "Mic veit ec á moldo munar lausasta;
Verse: 3    hefi ec fimm vera forspell beðit,
Verse: 4    þriggia dotra, þriggia systra,
Verse: 5    átta broðra, þó ec ein lif."

Strophe: 5 
Verse: 1    Þeygi Guðrún gráta mátti;
Verse: 2    svá var hon móðug at mǫg dauðan
Verse: 3    oc harðhuguð um hrer fylkis.

Strophe: 6 
Verse: 1    Þá qvað þat Herborg, Húnalanz drótning:
Verse: 2    "Hefi ec harðara harm at segia:
Verse: 3    mínir siau synir sunnan lanz,
Verse: 4    verr inn átti, í val fello;

Strophe: 7 
Verse: 1    faðir oc móðir, fiórir broðr,
Verse: 2    þau á vági vindr of léc,
Verse: 3    barði bára við borðþili.

Strophe: 8 
Verse: 1    Siálf scylda ec gǫfga, siálf scylda ec gǫtva,
Verse: 2    siálf scylda ec hǫndla helfor þeira;
Verse: 3    þat ec alt um beið ein misseri,
Verse: 4    svá at mér maðr engi munar leitaði.

Strophe: 9 
Verse: 1    Þá varð ec hapta oc hernuma
Verse: 2    sams misseris síðan verða;
Verse: 3    scylda ec screyta oc scúa binda
Verse: 4    hersis qván hverian morgin.

Strophe: 10 
Verse: 1    Hon ogði mér af afbrýði,
Verse: 2    oc hǫrðom mic hǫggom keyrði;
Verse: 3    fann ec húsguma hvergi in betra,
Verse: 4    enn húsfreyio hvergi verri."

Strophe: 11 
Verse: 1    Þeygi Guðrún gráta mátti;
Verse: 2    svá var hon móðug at mǫg dauðan
Verse: 3    oc harðhuguð um hrer fylkis.

Strophe: 12 
Verse: 1    Þá qvað þat Gullrǫnd, Giúca dóttir:
Verse: 2    "Fá kanntu, fóstra, þótt þú fróð sér,
Verse: 3    ungo vífi annspioll bera."
Verse: 4    Varaði hon at hylia um hrør fylkis.

Strophe: 13 
Verse: 1    Svipti hon blæio af Sigurði
Verse: 2    oc vatt vengi fyr vífs kniám:
Verse: 3    "Líttu á liúfan, legðu munn við grǫn,
Verse: 4    sem þú hálsaðir heilan stilli."

Strophe: 14 
Verse: 1    Á leit Guðrún eino sinni;
Verse: 2    sá hon dǫglings scǫr dreyra runna,
Verse: 3    fránar siónir fylkis liðnar,
Verse: 4    hugborg iofurs hiorvi scorna.

Strophe: 15 
Verse: 1    Þá hné Guðrún hǫll við bólstri;
Verse: 2    haddr losnaði, hlýr roðnaði,
Verse: 3    enn regns dropi rann niðr um kné.

Strophe: 16 
Verse: 1    Þá grét Guðrún, Giúca dóttir,
Verse: 2    svá at tár flugo tresc í gognom,
Verse: 3    oc gullo við gæss í túni,
Verse: 4    morir fuglar, er mær átti.

Strophe: 17 
Verse: 1    Þá qvað þat Gullrǫnd, Giúca dóttir:
Verse: 2    "Ycrar vissa ec ástir mestar
Verse: 3    manna allra fyr mold ofan;
Verse: 4    unðir þú hvárki úti né inni,
Verse: 5    systir mín, nema hiá Sigurði."

Strophe: 18 
Verse: 1    "Svá var minn Sigurðr hiá sonom Giúca,
Verse: 2    sem væri geirlaucr ór grasi vaxinn,
Verse: 3    eða væri biartr steinn á band dreginn,
Verse: 4    iarcnasteinn yfir ǫðlingom.

Strophe: 19 
Verse: 1    Ec þóttac oc þióðans reccom
Verse: 2    hverri hærri Herians dísi;
Verse: 3    nú em ec svá lítil, sem lauf sé
Verse: 4    opt í iolstrom, at iofur dauðan.

Strophe: 20 
Verse: 1    Sacna ec í sessi oc í sæingo
Verse: 2    míns málvinar, valda megir Giúca;
Verse: 3    valda megir Giúca míno bǫlvi
Verse: 4    oc systr sinnar sárom gráti.

Strophe: 21 
Verse: 1    Svá ér um lýða landi eyðit,
Verse: 2    sem ér um unnoð eiða svarða;
Verse: 3    mana þú, Gunnarr, gullz um nióta,
Verse: 4    þeir muno þér baugar at bana verða,
Verse: 5    er þú Sigurði svarðir eiða.

Strophe: 22 
Verse: 1    Opt var í túni teiti meiri,
Verse: 2    þá er minn Sigurðr sǫðlaði Grana,
Verse: 3    oc þeir Brynhildar biðia fóro,
Verse: 4    armrar vættar, illo heilli."

Strophe: 23 
Verse: 1    Þá qvað þat Brynhildr, Buðla dóttir:
Verse: 2    "Vǫn sé sú vættr vers oc barna,
Verse: 3    er þic, Guðrún, gráz um beiddi
Verse: 4    oc þér í morgon málrúnar gaf."

Strophe: 24 
Verse: 1    Þá qvað þat Gullrǫnd, Giúca dóttir:
Verse: 2    "Þegi þú, þióðleið, þeira orða!
Verse: 3    urðr ǫðlinga hefir þú æ verið;
Verse: 4    recr þic alda hverr illrar scepno,
Verse: 5    sorg sára siau konunga,
Verse: 6    oc vinspell vífa mest.

Strophe: 25 
Verse: 1    Þá qvað þat Brynhildr, Buðla dóttir:
Verse: 2    "Veldr einn Atli ǫllo bǫlvi,
Verse: 3    of borinn Buðla, bróðir minn;

Strophe: 26 
Verse: 1    þá er við í hǫll húnscrar þióðar
Verse: 2    eld á iofri ormbeðs litom,
Verse: 3    þess hefi ec gangs goldit síðan,
Verse: 4    þeirar sýnar, sámc ey."

Strophe: 27 
Verse: 1    Stóð hon und stoð, strengði hon elvi;
Verse: 2    brann Brynhildi, Buðla dóttur,
Verse: 3    eldr ór augom, eitri fnæsti,
Verse: 4    er hon sár um leit á Sigurði.

Verse: 5    Guðrún gecc þaðan á braut til scógar á eyðimercr oc
Verse: 6    fór alt til Danmarcar oc var þar með Þóro, Háconar
Verse: 7    dóttur, siau misseri.
Verse: 8    Brynhildr vildi eigi lifa eptir Sigurð. Hon lét drepa
Verse: 9    þræla sína átta oc fimm ambóttir. Þá lagði hon sic
Verse: 10    sverði til bana, svá sem segir í Sigurðarqviðo inni
Verse: 11    scǫmmo.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.