TITUS
Genesis
Part No. 3
Previous part

Chapter: 3  
III.

Manuscript page: 2r  


Biblical chapter: 18 
Verse: 739     Thuo habdun im eft sô suuîðo   Sodomoliudi,
Verse: 740     uueros sô faruuerkot,   that im uuas ûsa uualdand gram,
Verse: 741     mahtig [drohtin,]   [huuand] sia mên driƀun,
Verse: 742     fremidun firindâdi,   habdun im sô [filu] fîunda barn
Verse: 743     uuammas geuuîsid:   thuo ni uuelda that uualdand god,
Verse: 744     thiadan tholoian,   ac hiet sie threa faran,
Verse: 745     is engelos ôstan   an is ârundi,
Verse: 746     sîðon te Sodoma,   endi uuas im selƀo thar mið.

Verse: 747     Thuo sea oƀar Mambra   mahtige fuorun,
Verse: 748     thuo fundun sia Abrahama   bi ênum [alah] standan,
Verse: 749     uuaran ênna [uuîhstedi,]   endi scolda ûsas uualdandas
Verse: 750     geld gifrummian,   endi scolda thar goda theonan
Verse: 751     an middean dag   manna thie bezto.

Verse: 752     Thuo antkenda he craft godas,   sô he sea cuman gisach:
Verse: 753     geng im thuo tigegnes   endi goda selƀun hnêg,
Verse: 754     bôg endi bedode   endi bad gerno,
Verse: 755     that hie is [huldi] forđ   hebbian muosti:
Verse: 756     "[huuarod] uuilthu nu,   uualdand, frô mîn,
Verse: 757     [alomahtig] fadar?   ik biun thîn êgan scalc,
Verse: 758     hold endi gihôrig;   thu bist [mi hêrro] sô guod,
Verse: 759     mêðmo sô mildi:   uuilthu mînas [uuiht,]
Verse: 760     [drohtin,] hebbian?   [huat!] it all an thînum duoma stêd,
Verse: 761     ik libbio bi thînum lêhene,   endi ik [gilôƀi] an thi,
Verse: 762     frô mîn the guoda:   muot ik thi frâgon nu,
Verse: 763     [huuarod] thu, sigidrohtin,   sîðon uuilleas?"
Verse: 764     Thuo quam im eft tegegnes   godas anduuordi,
Verse: 765     [mahtig] muotta:   "Ni uuilli ik is thi mîðan nu," quað he,
Verse: 766     "helan holdan man,   hû mîn hugi gengit.

Verse: 767     Sîðan sculun uui sûðar hinan:   hebbiat [im] umbi Sodomaland
Verse: 768     uueros sô foruuerkot.   Nu hruopat [thea uuardas] te mi
Verse: 769     dages endi nahtes,   the the iro dâdi telleat,
Verse: 770     seggiat [iro] sundeon.   Nu uuilli ik selƀo uuitan,
Verse: 771     ef thia mann under [im]   sulic mên fremmiat,
Verse: 772     uueros uuamdâdi.   Thanna scal sea uuallande
Verse: 773     fiur [bifallan,]   sculun sia [ira] firinsundeon
Verse: 774     suâra bisenkian:   sueƀal fan himile
Verse: 775     fallit mid fiure,   fêknia stereƀat,   775
Verse: 776     mêndâdige men,   reht sô morgan kumit."
Verse: 777     Abraham thuo gimahalda   ([habda] im ellian guod,
Verse: 778     uuîsa [uuordquidi]),   endi uuiðer is uualdand sprak;
Verse: 779     "Huuat! thu gôdas sô [filu,]" quat hie,   "god heƀanrîki,
Verse: 780     drohtin giduomis,   all bi thînun dâdiun stêd
Verse: 781     thius uuerold an thînum uuillean;   thu giuuald haƀas
Verse: 782     oƀar thesan middilgard   manna kunnias,
Verse: 783     sô that gio uuerðan ni scal,   [uualdand] frô mîn,
Verse: 784     that thu thar te [ênum] duoas   uƀila endi guoda,
Verse: 785     lioƀa endi lêða,   [huuand] sia gilîca ni sind.

Verse: 786     Thu ruomes sô [rehtes,]   rîki drohtin,
Verse: 787     sô thu ni uuili, that thar [antgeldan]   guoduuillige mann
Verse: 788     uuamscaðono uuerek,   [thoh] thu is giuuald habes
Verse: 789     te gifrummianna.   Muot ik thi frâgon nu,
Verse: 790     sô thu mi thiu gramara ni sis,   god heƀanrîki?
Verse: 791     ef thu thar fîðis fîftig   ferahtaro manno,
Verse: 792     liuƀigaro liodo,   muot thanna that land gisund,
Verse: 793     uualdand, an thînum uuillean   giuuerid standan?"
Verse: 794     Thuo quam im eft tegegnes   godas anduuordi:
Verse: 795     "Ef ik thar findo [fîftig]" quað he,   "[ferahtara] manno,
Verse: 796     guodaro gumono,   thea te goda hebbian
Verse: 797     fasto gifangan,   thanna uuilli ik [im] iro ferah fargeƀan
Verse: 798     thuru that ik thea [hluttron] man   [haldan] uuille."
Verse: 799     Abraham thuo gimahalda   [âðarsîðe,]
Verse: 800     forđ frâgoda   frâhon sînan:
Verse: 801     "Huuat duos thu is thanna," quað he,   "drohtin frô mîn,
Verse: 802     ef thu thar [thrîtig] maht   thegno fîðan,
Verse: 803     uuamlôsa uueros?   uuilthu sia noh thanna
Verse: 804     lâtan [te lîba,]   that sia muotin that land uuaran?"
Verse: 805     Thuo im the guoda,   god heƀanrîki,
Verse: 806     sniumo gisagda,   that hie sô uueldi
Verse: 807     lêstian an [then] landa:   "Ef ik thar luƀigaro mag," quað he,
Verse: 808     "thrîtig undar thero thiodo   thegno fîðan,
Verse: 809     [godforohta] gumon:   thanna uuilli ik im fargeƀan allum
Verse: 810     that mên endi thea misdâd   endi lâtan that manno folc
Verse: 811     sittian umbi Sodoma   endi gesund uuesan."
Verse: 812     Abraham thuo gimahalda   agalêtlîco
Verse: 813     - folgoda is frôian -,   filo uuorda gisprac:
Verse: 814     "Nu scal ik is thi biddean", quað he,   "that thu thi ni belges ti mi,
Verse: 815     frô mîn thie guoda,   hû ik sus filu mahlea,
Verse: 816     uueslea uuiðer thi mid mînum uuordum:   ik uuêt, that ik thas uuirðig ni bium,
Verse: 817     ni sî that thu it uuilleas bi thînaro [guodo,]   god heƀanrîki,
Verse: 818     thiadan, githoloian:   mi is tharaf mikil
Verse: 819     te uuitanna thînne uuillean,   hueðer that uuerad gisund
Verse: 820     libbian muoti,   the sea liggian [sculun,]
Verse: 821     fêgia [bifallan:]   huuat uuilis thu is thanna, frô mîn, duoan,
Verse: 822     ef thu thar [tehani]   [treuhafte maht]
Verse: 823        fîðan under themo folca, [ferahtera manno,] uuilthu im thanna [iro] ferh fargeƀan,
Verse: 824     that sia umbi Sodomaland   sittian muotin,
Verse: 825     bûan an them burugium, sô thu im abolgan ni sîs?"
Verse: 826     Thuo quam im eft tegegnes   godas anduuordi:
Verse: 827     "Ef ik thar tehani," quað he,   "treuhaftera mag,
Verse: 828     an them [landeß noh   ]liodi\ fîðan,
Verse: 829     thanna lâtu ik sia alla thuru thie [ferahtun] man   ferehas brûkan."
Verse: 830     Thuo ni dorste [Abraham] leng   drohtin sînan
Verse: 831     furður frâgon,   ac he fell im after te bedu
Verse: 832     an kneo craftag;   quað he gerno
Verse: 833     is geld [gereuuedi]   endi gode theonodi,
Verse: 834     uuarahti after is uuillian.   Giuuêt im eft thanan
Verse: 835     gangan te is gestseli;   godes engilos [forđ]
Verse: 836     sîđodun te Sodoma,   sô im selƀo gebôd
Verse: 837     uualdand mid is uuordo,   thuo hie sea hiet an thana uueg faran.

Verse: 838     Scoldun sie befîðan,   [huuat thar] ferahtera
Verse: 839     umbi Sodomaburg,   sundeono [tuomera]
Verse: 840     manna uuâri,   thie ni habdin mênes filu,
Verse: 841     firinuuerco gifrumid.   Thô gihôrdun [sie fêgere] karm
Verse: 842     an allaro [seliða gihuuen,]   sundiga liudi
Verse: 843     firinuuerk fremmian:   uuas thar fîundo gimang,
Verse: 844     uurêðaro uuihteo,   thea an that uuam habdun
Verse: 845     thea liudi farlêdid:   that lôn uuas thuo [at] handum
Verse: 846     mikil mið morðu,   that sia oft mên driƀun.

Biblical chapter: 19 
Verse: 847     Thanna sat im thar [an innan burug]   aðalburdig man,
Verse: 848     Loth mið them liudium,   thie oft lof [godas]
Verse: 849     [uuarahte] an [thesaro uueroldi:]   habda im thar uuelono ginuog,
Verse: 850     guodas giuunnan:   he uuas gode uuirðig.

Verse: 851     He uuas Abrahamas   [aðaliknôslas,]
Verse: 852     [is] brôðer barn:   ni uuas betara man
Verse: 853     umbi Giordanas staðos   mið gumkustium,
Verse: 854     giuuerid mið geuuittio:   [im] uuas ûsa uualdand hold.

Verse: 855     Thuo te sedla hnêg   sunna thiu huuîta,
Verse: 856     alloro bôkno [berahtost,]   thuo stuond hie fore [thes] buruges dore.

Verse: 857     Thuo [gisah] he an [âƀand]   engilos tuêne
Verse: 858     gangan an thea gardos,   sô sea fan gode quâmun
Verse: 859     geuueride mid geuuittio:   thuo sprak he im sân mid is uuordum tuo.

Verse: 860     Geng thuo tegegnes   endi gode thankade,
Verse: 861     heƀankuninga,   thes he im thea helpa ferlêch,
Verse: 862     that he muosta sea mið is ôgum   an luokoian,
Verse: 863     iac he sea an kneo kusta   endi kûsco bad,
Verse: 864     that sea [suohtin] his seliđa:   quat that he im selƀas duom
Verse: 865     gâbi sulicas guodas,   sô im god habdi
Verse: 866     farliuuen an them landa.   Sea ni uurðun te lata huuerigin,
Verse: 867     ac se gengun im an is gestseli,   [endi] he im giungarduom
Verse: 868     fremide [ferahtlîca,]   Manuscript page: 2v   sea im filo sagdun
Verse: 869     uuâraro [uuordo.]   Thar he an uuahtu sat,
Verse: 870     held is hêrran bodan   hêlaglîca,
Verse: 871     godas engilos.   Sia [im] guodas sô filo,
Verse: 872     [suoðas] gisagdun.   Suart furður skrêd,
Verse: 873     narouua naht an skion,   nâhida moragan
Verse: 874     an allara [seliða gihuuem.]   [Ûhtfugal] sang
Verse: 875     [fora dagahruoma.]   Thô habdun ûsas drohtinas bodon
Verse: 876     thea fîrina bifundan,   thea thar fremidun men
Verse: 877     umbi [Sodomaburug.]   Thô sagdun sia Loða,
Verse: 878     that thar morð mikil   manno barno,
Verse: 879     scolda thera liodio [uuerðan]   endi ôk thes landas sô samo.

Verse: 880     Hietun ina thuo gereuuian,   endi hietun thô gangan thanan,
Verse: 881     firrian [ina] fon them fîundum   endi lêdian is frî mið [im,]
Verse: 882     idis aðalborana.   He ni habda thar is [aðalias] than mêr,
Verse: 883     botan is dohtar tua,   mid them [gihietun] sie, that hie êr daga uuâri
Verse: 884     an ênum berga uppan,   that [ina] brinnandi
Verse: 885     fiur ni [bifengi.]   Thô he te there ferdi uuarð
Verse: 886     gâhun gigereuuid,   gengun engilos,
Verse: 887     habdun [ina] bi [handum]   heƀankuningas bodon,
Verse: 888     lêddun [ina] endi lêrdun   lango huîla,
Verse: 889     [untat] sea ina gibrâhtun   bi thera burug ûtan.

Verse: 890     Hietun, that [sie] io ni gehôrdin   sulic gehlunn mikil,
Verse: 891     brâkon an them burugium,   that sia io under bak sâuuen,
Verse: 892     an thiu thie sea an them [lande]   libbian uueldin.

Verse: 893     Thuo \huuruƀun eft uuiðer   hêlega uuardos,
Verse: 894     godas engilos,   gengun sniumo,
Verse: 895     sîðodun te Sodomo:   thanan sûðar fuor
Verse: 896     Loth [thoro ira lêra,]   flôh thera liodio gimang,
Verse: 897     dereƀioro manno:   thô uuarð dag kuman.

Verse: 898     Thuo uuarð thar [gihlunn] mikil   himile bitengi,
Verse: 899     brast endi brâcoda,   uuarð thero burugeo [gihuuilîc]
Verse: 900     [rôkas] gifullit,   uuarð thar fan radura sô [filu]
Verse: 901     fiures gifallin,   uuarð fêgero karm,
Verse: 902     lêðaro liodio:   logna all [bifeng]
Verse: 903     brêd burugugisetu:   bran all samad,
Verse: 904     stên endi erða,   endi sô manag strîdin man
Verse: 905     suultun endi sunkun:   sueƀal brinnandi
Verse: 906     uuel after uuîkeom;   uuaragas tholodun
Verse: 907     lêðas lôngeld.   That land inn bisank,
Verse: 908     thiu erða an afgrundi;   al uuarð farspildit
Verse: 909     Sodomarîki,   that [is ênig seg ni ginas,]
Verse: 910     [iac sô bidôdit] an dôðseu,   sô it noh te daga stendit
Verse: 911     fluodas gifullit.   Thuo habdun [iro] firindâdi
Verse: 912     all Sodomothiod   sêro antgoldan,
Verse: 913     botan that thar iro ênna   ût entlêdde
Verse: 914     uualdand an is uuillian   endi thiu uuîf mid im,
Verse: 915     thriu mið them thegna.   Thô [gihôrdun] sea thero thiodo qualm,
Verse: 916     burugi brinnan.   Thô thar under bac bisach
Verse: 917     idis aðalboren:   siu ni [uuelde] thera engilo
Verse: 918     lêra lêstian   (that uuas [Loðas] brûd),
Verse: 919     than lang the siu an them landa   libbian muosta.

Verse: 920     Thuo siu an them berega gistuod   endi under bak bisach,
Verse: 921     thuo uuarð siu te stêne,   thar siu standan scal
Verse: 922     mannum te mârðu   oƀar middilgard
Verse: 923     after [te êuuandage,]   sô lango sô thius erða lêƀot.

This text is part of the TITUS edition of Genesis.

Copyright TITUS Project, Frankfurt a/M, 6.11.2010. No parts of this document may be republished in any form without prior permission by the copyright holder.