TITUS
Heliand
Part No. 14
Previous part

Chapter: XIV 
XIV


Verse: 1121    Uuas im [an] them sinuueldi   sâlig barn godes
Verse: 1122    lange huîle,   untthat im thô [lioƀora] uuarð,
Verse: 1123    that he is craft mikil   cûðien uuolda
Verse: 1124    uueroda te uuillion.   Thô forlêt he uualdes hlêo,
Verse: 1125    ênôdies ard   endi sôhte im eft erlo gemang,
Verse: 1126    mâri meginthiode   endi manno drôm,
Verse: 1127    geng im thô bi [Iordanes] staðe:   thar ina Iohannes antfand,
   
Verse: 1128    that friðubarn godes,   frôhan sînan,
Verse: 1129    [hêlagana] heƀencuning,   endi them heliðun sagda,
Verse: 1130    Iohannes is iungurun,   thô he ina gangan gesah:
Verse: 1131    "thit is that lamb godes,   that thar lôsean scal
Verse: 1132    af thesaro uuîdon uuerold   uurêða sundea,
Verse: 1133    mancunneas mên,   mâri drohtin,
Verse: 1134    cuningo craftigost."   Krist im forð giuuêt
Verse: 1135    an Galileo land,   godes êgan barn,
Verse: 1136    fôr im te them friundun,   thar he afôdit uuas,
Verse: 1137    tîrlîco atogan,   endi talda mid uuordun
Verse: 1138    Krist undar is cunnie,   cuningo rîkeost,
Verse: 1139    huuô sie scoldin iro selƀoro   sundea bôtean,
Verse: 1140    hêt that sie im iro harmuuerc manag   hreuuan lêtin,
Verse: 1141    [feldin] iro firindâdi:   "nu is it all [gefullot] sô,
Verse: 1142    sô hîr alde man   êr huuanna sprâcun,
Verse: 1143    gehêtun eu te helpu   [heƀenrîki]:
Verse: 1144    nu is it [giu] ginâhid thurh thes neriandan craft:   thes môtun gi neotan forð,
Verse: 1145    sô huue sô gerno uuili   gode theonogean,
Verse: 1146    uuirkean aftar is uuilleon."   Thô uuarð thes uuerodes [filu],
Verse: 1147    thero liudeo an lustun:   uurðun im thea lêra Cristes,
Verse: 1148    sô suôtea them gisîðea.   He bigan im samnon thô
Verse: 1149    [gumono] te iungoron,   gôdoro manno,
Verse: 1150    uuordspâha uueros.   Geng im thô bi ênes uuatares staðe,
Verse: 1151    that [thar] habda Iordan   aneƀan Galileo land
Verse: 1152    ênna sê geuuarhtan.   Thar he sittean fand
Verse: 1153    Andreas endi Petrus   bi them ahastrôme,
Verse: 1154    bêðea thea gebrôðar,   thar sie an brêd uuatar
Verse: 1155    suuîðo [niudlîco]   netti thenidun,
Verse: 1156    fiscodun im an them flôde.   Thar sie that friðubarn godes
Verse: 1157    bi thes sêes staðe   selƀo [grôtta],
Verse: 1158    hêt that sie im folgodin,   quað that he [im] sô filu uuoldi
Verse: 1159    godes rîkeas forgeƀen;   "[al] sô git hîr an [Iordanes] strôme
Verse: 1160    fiscos [fâhat],   sô sculun git noh firiho barn
Verse: 1161    halon te incun handun,   that sie an heƀenrîki
Verse: 1162    thurh inca lêra   lîðan môtin,
Verse: 1163    faran folc    manag."   Thô uuarð frômôd hugi
Verse: 1164    [bêðiun] them gibrôðrun:   antkendun that barn godes,
Verse: 1165    lioƀan hêrron:   forlêtun al [saman]
Verse: 1166    Andreas endi Petrus,   sô huuat sô sie bi theru ahu habdun,
Verse: 1167    [geuunstes] bi them uuatare:   uuas im uuilleo mikil,
Verse: 1168    that sie mid them godes barne   gangan môstin,
Verse: 1169    samad an is gisîðea,   scoldun sâliglîco
Verse: 1170    lôn antfâhan:   sô dôt liudeo so huuilic,
Verse: 1171    sô thes hêrran uuili   [huldi] githionon,
Verse: 1172    geuuirkean is uuilleon.   Thô sie bi thes uuatares staðe
Verse: 1173    furðor quâmun,   thô fundun sie [thar] ênna frôdan man
Verse: 1174    sittean bi them sêuua   endi is suni tuuêne,
Verse: 1175    Iacobus endi Iohannes:   uuârun im iunga man.

Verse: 1176    Sâtun im thâ gesunfader   an ênumu sande uppen,
Verse: 1177    brugdun endi bôttun   [bêðium] handun
Verse: 1178    thiu netti niudlîco,   thea sie habdun nahtes êr
Verse: 1179    forsliten an them sêuua.   Thar sprac im selƀo tô
Verse: 1180    sâlig barn godes,   hêt that sie an thana sîð mid im,
Verse: 1181    [Iacobus] endi Iohannes,   gengin bêðie,
Verse: 1182    kindiunge man.   [Thô] uuârun im Kristes uuord
Verse: 1183    sô [uuirðig] an thesaro uueroldi,   that sie bi thes uuatares staðe
Verse: 1184    iro aldan fader   ênna forlêtun,
Verse: 1185    frôdan bi them flôde,   endi al that sie thar fehas êhtun,
Verse: 1186    nettiu endi [neglitskipu],   [gecurun im] thana neriandan Krist,
Verse: 1187    hêlagna te hêrron,   uuas im [is helpono] tharf
Verse: 1188    [te githiononne:   sô is allaro thegno gehuuem,]
Verse: 1189    uuero an thesero uueroldi.   Thô giuuêt im the uualdandes sunu
Verse: 1190    mid them fiuuariun forð,   endi im thô thana fîfton gicôs
Verse: 1191    Krist an ênero côpstedi,   cuninges iungoron,
Verse: 1192    môdspâhana man:   Mattheus uuas he hêtan,
Verse: 1193    uuas im ambahteo   eðilero manno,
Verse: 1194    scolda thar te is hêrron   handun antfâhan
Verse: 1195    tins endi [tolna];   treuua habda he gôda,
Verse: 1196    âðalandbâri:   forlêt al [saman]
Verse: 1197    gold endi siluƀar      endi geƀa managa,
Verse: 1198    diurie mêðmos,   endi uuarð im ûses drohtines man;
Verse: 1199    côs im the cuninges [thegn]   Crist te hêrran,
Verse: 1200    [milderan mêðom]geƀon,   than êr is [mandrohtin]
Verse: 1201    [uuâri] an thesero uueroldi:   feng im uuôðera thing,
Verse: 1202    langsamoron râd.   Thô uuarð it allun them liudiun cûð,
Verse: 1203    fon allaro burgo gihuuem,   huuô that barn godes
Verse: 1204    samnode gesîðos   endi selƀo gesprac
Verse: 1205    sô manag uuîslîc uuord   endi uuâres sô filu,
Verse: 1206    torhtes gitôgde   endi têcan manag
Verse: 1207    geuuarhte an thesero uueroldi.   Uuas that an is uuordun scîn
Verse: 1208    iac an is dâdiun sô same,   that he drohtin uuas,
Verse: 1209    himilisc hêrro   endi te helpu quam
Verse: 1210    an thesan middilgard   manno barnun,
Verse: 1211    liudiun te thesun liohta.




Next part


This text is part of the TITUS edition of Heliand.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.