TITUS
Heliand
Part No. 65
Previous part

Chapter: LXV 
LXV


Verse: 5427    Thuo uuarð thas thie uurêðo giuuaro,   uuamscaðono mêst,
Verse: 5428    Satanas selƀo,   thuo thiu seola quam
Verse: 5429    Iudases an grund   grimmaro helliun -
Verse: 5430    thuo uuissa hie te uuâren,   that that uuas uualdand Crist,
Verse: 5431    barn drohtines,   that thar gibundan stuod;
Verse: 5432    uuissa thuo te uuâron,   that hie [uuelda] thesa uuerold alla
Verse: 5433    mid is henginnia   hellia githuinges,
Verse: 5434    liudi alôsian   an lioht godes.

Verse: 5435    That uuas Satanase   sêr an muode,
Verse: 5436    tulgo harm an is hugie:   uuelda is helpan thuo,
Verse: 5437    that im liudio barn   lîf ne binâmin,
Verse: 5438    ne quelidin an crûcie,   ac hie uuelda, that hie quic liƀdi,
Verse: 5439    te thiu that [firiho] barn   fernes ne uuurðin,
Verse: 5440    sundiono sicura.   [Satanas giuuêt im thuo,]
Verse: 5441    thar thes heritogen   hîuuiski uuas
Verse: 5442    an thero burg innan.   Hie thero is brûdi bigann,
Verse: 5443    thera idis opanlîco   unhiuri fîond
Verse: 5444    uuunder tôgian,   that sia an uuordhelpon
Verse: 5445    Criste uuâri,   that hie muosti [quic] libbian,
Verse: 5446    drohtin manno   - hie uuas iu than te dôðe giscerid -
Verse: 5447    uuissa that te uuâron,   that hie im scoldi thia giuuald biniman,
Verse: 5448    that hie sia oƀar thesan middilgard   sô mikila ni haƀdi,
Verse: 5449    oƀar uuîda uuerold.   That uuîf uuarð thuo an forahton,
Verse: 5450    suîðo an sorogon,   thuo iru thiu gisiuni quâmun
Verse: 5451    thuru thes dernien [dâd]   an dages liohte,
Verse: 5452    an heliðhelme bihelid.   Thuo siu te iru hêrren anbôd,
Verse: 5453    that uuîf mid iro uuordon   endi im te uuâren hiet
Verse: 5454    selƀon seggian,   huat iro thar te gisiunion quam
Verse: 5455    thuru thena hêlagan mann,   endi im helpan bad,
Verse: 5456    formon is ferhe:   "ik hebbiu hier sô filo thuru ina
Verse: 5457    seldlîkes giseuuan,   sô ik uuêt, that thia sundiun sculun
Verse: 5458    allaro erlo gihuem   uƀilo githîhan,
Verse: 5459    sô im fruocno tuo   ferahes âhtið."
Verse: 5460    Thie segg uuarð thuo an [sîðe],   antat hie sittian fand
Verse: 5461    thena heritogon   an [huaraƀe] innan
Verse: 5462    an them stênuuege,   thar thiu strâta uuas
Verse: 5463    felison gifuogid.   Thar hie te is frôhon geng,
Verse: 5464    sagda im thes uuîƀes uuord.   Thuo uuarð im [uurêð] hugi,
Verse: 5465    them heritogen,   - huaraƀoda an innan -,
Verse: 5466    giblôðit briostgithâht:   uuas im bêðies uuê,
Verse: 5467    gie that sea ina sluogin   sundia lôsan,
Verse: 5468    gie it bi them liudion thuo   forlâtan ne gidorsta
Verse: 5469    thuru thes uuerodes uuord.   Uuarð im giuuendid thuo
Verse: 5470    hugi an herten   after thero hêri Iudeono,
Verse: 5471    te uuerkeanne iro uuillion:   ne uuardoda im nieuuiht
Verse: 5472    thia suârun sundiun,   thia hie im thar thuo selƀo gideda.

Verse: 5473    Hiet im thuo te is handon dragan   hluttran brunnion,
Verse: 5474    uuatar an [uuêgie],   thar hie furi them uuerode sat,
Verse: 5475    thuôg ina thar for thero thioda   thegan kêsures,
Verse: 5476    hard heritogo   endi thuo fur thero hêri sprac,
Verse: 5477    quað that hie ina thero sundiono thar   sicoran dâdi,
Verse: 5478    uurêðero uuerco:   "ne uuilliu ik thes uuihtes plegan", quathie,
Verse: 5479    "umbi thesan hêlagan mann,   ac [hleotad] gi thes alles,
Verse: 5480    gie uuordo gie uuerco,   thes gi im hêr te uuîtie giduan."
Verse: 5481    Thuo hreop all saman   heriscipi Iudeono,
Verse: 5482    thiu mikila menigi,   quâðun that sia uueldin umbi thena man plegan
Verse: 5483    deraƀoro dâdio:   "fare is drôr oƀar ûs,
Verse: 5484    is bluod endi is baneði   endi oƀar ûsa barn sô samo,
Verse: 5485    oƀar ûsa aƀaron thar after -   uui [uuilliat] is alles plegan", quaðun sia,
Verse: 5486    "umbi thena slegi selƀon, -   ef uui thar êniga sundia giduan!"
Verse: 5487    Ageƀan uuarð thar thuo furi them Iudeon   allaro gumono besta
Verse: 5488    hettendion an hand,   an herubendion
Verse: 5489    [narauuo] ginôdid,   thar ina nîðhuata,
Verse: 5490    fîond antfengun:   folc ina [umbihuarf],
Verse: 5491    mênscaðono megin.   Mahtig drohtin
Verse: 5492    tholoda githuldion,   sô huat sô im thiu thioda deda.

Verse: 5493    Sia hietun ina thuo fillian,   êr than sia im ferahes tuo,
Verse: 5494    aldres âhtin,   endi im undar is ôgun spiuuun,
Verse: 5495    [dedun] im that te hoske,   that sia mid iro handon slôgun,
Verse: 5496    uueros an is uuangun   endi im is giuuâdi binâmun,
Verse: 5497    rôƀodun ina thia [reginscaðon],   rôdes lacanes
Verse: 5498    dedun im eft ôðer an   thuru unhuldi;
Verse: 5499    hietun thuo hôƀidband   hardaro thorno
Verse: 5500    [uuundron] uuindan   endi an uualdand Crist
Verse: 5501    selƀon settean,   endi gengun im thia gisîðos tuo,
Verse: 5502    queddun ina an cuninguuîsu   endi thar an knio fellun,
Verse: 5503    hnigun im mid iro hôƀdu:   all uuas im that te hoske giduan,
Verse: 5504    thoh hie it all githolodi,   thiodo drohtin,
Verse: 5505    [mahtig] thuru thia minnia   manno cunnies.

Verse: 5506    Hietun sia thuo uuirkian   uuâpnes eggion
Verse: 5507    heliðos mid iro handon   hardes [bômes
Verse: 5508    craftiga] crûci   endi hietun sia Cristan thuo,
Verse: 5509    sâlig barn godes   selƀon fuorian,
Verse: 5510    dragan hietun sia ûsan drohtin,   thar hie [bedrôragad scolda]
Verse: 5511    sueltan sundiono lôs.   Sîðodun Iudeon,
Verse: 5512    uueros an uuillon,   lêddun uualdand Crist,
Verse: 5513    drohtin te dôðe.   Thar mohta man thuo dereƀi thing
Verse: 5514    harmlîc gihôrian:   hioƀandi thar after
Verse: 5515    gengun uuîf mid uuôpu,   uueros [gnornodun,]
Verse: 5516    thia fan Galilea   mid im gangan quâmun,
Verse: 5517    folgodun oƀar ferruuegos:   uuas im iro frôhon dôð
Verse: 5518    suîðo an soragan.   Thuo hie selƀo sprak,
Verse: 5519    barno that besta   endi under bac besah,
Verse: 5520    hiet that sia ni uuêpin:   "ni tharf iu uuiht tregan", quathie,
Verse: 5521    "mînero hinferdio,   ac gi mid hofnu mugun
Verse: 5522    iuuua uurêðan uuerc   uuôpu cûmian,
Verse: 5523    tornon trahnon.   Noh uuirðið thiu tîd cuman,
Verse: 5524    that thia [muoder thes]   mendendia sind,
Verse: 5525    brûdi Iudeono,   them gio barn ni uuarð
Verse: 5526    ôdan an aldre.   Than gi iuuua inuuid sculun
Verse: 5527    grimmo angeldan;   than gi sô gerna sind,
Verse: 5528    that iu hier bihlîdan   hôha bergos,
Verse: 5529    diopo bedelƀan;   dôð uuâri iu than allon
Verse: 5530    lioƀera an theson lande   than sulic liudio [qualm]
Verse: 5531    te githolianne,   sô hier than thesaro thioda cumid."


Next part


This text is part of the TITUS edition of Heliand.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.