TITUS
Lamprecht, Alexander (Basler Bearbeitung)
Part No. 91
Previous part

Chapter: 184  
Alexander und Candacis


Verse: 3577    Da nebent ein schoͤni burg lag,
Verse: 3578    ein wilder schroff anne hag

Verse: 3579    hat sy werlich umbgeben,
Verse: 3580    ein besser ich nie geschach noch bekant.

Verse: 3581    zuͦ der burg hort ein lant,
Verse: 3582    daz gros richtums wielt,

Verse: 3583    die burg Moros den namen hielt.
Verse: 3584    daz volk was herlich getan;

Verse: 3585    mit willen warens undertan
Verse: 3586    einer froͮwen Candatis genant;

Verse: 3587    die was kungin übers lant,
Verse: 3588    wittwen lebens sy wielt;

Verse: 3589    zwen ir süne sy bi ir hielt,
Verse: 3590    die waren an wird unbetrogen.

Verse: 3591    hie ward min gezelt uf gezogen;
Verse: 3592    ich sant min botten alldar

Verse: 3593    und enbot minen friden gar
Verse: 3594    und hies ir sagen 'guͦt heil'.

Verse: 3595    durch ir er enteil
Verse: 3596    min gab ich ir dar sant:

Verse: 3597    ein bilde mit gemelde bekant
Verse: 3598    noch minem got Demone.

Verse: 3599    ich hies ir sagen schone,
Verse: 3600    daz sy kem enteil gen mir

Verse: 3601    uf den berg, durch daz wir
Verse: 3602    ze ratte wurden anne wank

Verse: 3603    umb miner gotter opffer gang.
Verse: 3604    min botten komen mir her wider

Verse: 3605    und ir botten mit in,
Verse: 3606    die mir ir gabe brachten.

Verse: 3607    ob ich die gab niut nante,
Verse: 3608    so wer wicz unverdacht:

Verse: 3609    hundert gotte wurden bracht
Verse: 3610    gar von gold her;

Verse: 3611    ir botten brachten mir mer
Verse: 3612    anderhalb hundert Moͤren,

Verse: 3613    hatten guldin ring in den oren
Verse: 3614    und hundert schoͤner goldfas,

Verse: 3615    niunzig helffang ...
Verse: 3616    sechszig banttier

Verse: 3617    und hundert lechpart.
Verse: 3618    fünff hundert vogel sy mir sant,

Verse: 3619    sittich und spengelin genant.
Verse: 3620    besunder ein botte

Verse: 3621    bracht Amonen minem gotte
Verse: 3622    ein guldin kronen rich

Verse: 3623    und ein tier,
Verse: 3624    daz den karfunkel treit

Verse: 3625    und sich für die maget leit
Verse: 3626    und lat sich vachen in ir schos,

Verse: 3627    wie es sy an krefften gros,
Verse: 3628    Menoceros ist es genannt.

Verse: 3629    mit den gaben si do sant
Verse: 3630    ein man, der mallens ein meister was;

Verse: 3631    daz det die frow umb daz
Verse: 3632    daz er min gestalt und min lib

Verse: 3633    heimlich malit, daz dem wibe
Verse: 3634    min kuntschafft wurde gegeben,

Verse: 3635    des ich sider kam in angest und in not min leben.
Verse: 3636    hie mit die botten [fuoren] dan.

Verse: 3637    des andren dages do kan
Verse: 3638    der eine ir sun her Candalus,

Verse: 3639    sin muͦt stuͦnd alsus
Verse: 3640    daz er mir klagen wolt

Verse: 3641    gross leit, daz er dolt.
Verse: 3642    da er zuͦ kam gerannt,

Verse: 3643    die minen fiengen in ze hant,
Verse: 3644    die miner huͦtte pflagen;

Verse: 3645    sy fuͦrtten in und truͦgen,
Verse: 3646    da Polomeus sas

Verse: 3647    under sin gezelt, da er da was
Verse: 3648    der nechste und oͮch der best.

Verse: 3649    'sag mir was ist din gewerb ?
Verse: 3650    was wundret dir?' sprach Pottolomeus.

Verse: 3651    Candalus antwurt alsus
Verse: 3652    'Candattis mine muͦtter ist.

Verse: 3653    sid du ein werder küng bist,
Verse: 3654    so wil ich dir klagen:

Verse: 3655    schand und schaden muͦs ich tragen,
Verse: 3656    mir ist genomen min wib,

Verse: 3657    die mir ist lieber den der lib.
Verse: 3658    ein [küng] gar vermessen,

Verse: 3659    nit vere hin dan gessesen,
Verse: 3660    der hat mir sy mit gewalt genomen.

Verse: 3661    durch drost bin ich zuͦ dir komen,
Verse: 3662    daz mir sy gewine die helffe din

Verse: 3663    oder ich muͦs jemer trurig sin.'
Verse: 3664    als Polomeus die red vernam,

Verse: 3665    us sinem gezelt gieng er dan
Verse: 3666    zuͦ dem küng Allexandro

Verse: 3667    und seit im die red also.
Verse: 3668    Allexander sin krone gevie,

Verse: 3669    er saczte sy Pottolomeus hie
Verse: 3670    schon uf sin huͦbet;

Verse: 3671    er sprach 'dir sy erluͦbet,
Verse: 3672    daz du dich küng solt nenen;

Verse: 3673    gib mich im niut ze erkenen:
Verse: 3674    send etwen nach mir hie by,

Verse: 3675    als ob ich din diener sy,
Verse: 3676    Achmus heis mich bi namen,

Verse: 3677    sprich "ich muͦs michs jemer schamen,
Verse: 3678    ob ich niut wider schaff die klage

Verse: 3679    nach dis jungheren sage ;''
Verse: 3680    gebiut mir bi dem lib,

Verse: 3681    daz ich im wider gewine sin wib'.
Verse: 3682    Potolomeus die kron enpfieng,

Verse: 3683    von dan er in sin gezelt gieng,
Verse: 3684    ze Kandolo sprach er ze hant

Verse: 3685    'ich bin Allexander genant
Verse: 3686    von Medcedoni ein küng rich,

Verse: 3687    daz dienet mir gar gewalttenklich,
Verse: 3688    Persya Indea Partus.

Verse: 3689    ich muͦste michs jemer schamen,
Verse: 3690    schüeff ich niut din fromen.

Verse: 3691    ich bin ze guͦtte dir har komen:
Verse: 3692    ich wil [dir] lichen einen man,

Verse: 3693    der dir wol getar und kan
Verse: 3694    helffen von der not,

Verse: 3695    oder er lit dar umb dot.
Verse: 3696    der ist Achmus genant.

Verse: 3697    für [in] in des künges lant,
Verse: 3698    er gewinet dir wider din wib

Verse: 3699    oder hab dir min lip'.
Verse: 3700    Candulo dem helt guͦt

Verse: 3701    ward erfroͮwet sin muͦt,
Verse: 3702    daz er soͤlich hilff gewan.

Verse: 3703    scheire bereitten [si] sich dan;
Verse: 3704    Achmus fuͦr mit dem kint

Verse: 3705    und alles sin gesind.
Verse: 3706    wie sin name verwandelt were,

Verse: 3707    selber nam der helt mere
Verse: 3708    den sturm van in die hant.

Verse: 3709    Candulus fuͦrtte si in daz land.
Verse: 3710    in drien tagen mit ir scharn

Verse: 3711    komens vür die hoͮbt stat gevarn,
Verse: 3712    Bala was sy genenet,

Verse: 3713    die man noch erkenet.
Verse: 3714    daz her gar nidelich besas

Verse: 3715    die stat, da die jungfrow was,
Verse: 3716    ir gemuͦtte daz was vest.

Verse: 3717    so getaner gest
Verse: 3718    waren die burger ungewan,

Verse: 3719    vil ser erschraken sy da,
Verse: 3720    wond der küng was niut ze lant,

Verse: 3721    der was durch sin and
Verse: 3722    gezogen uf einen sin genos,

Verse: 3723    dem wolt er fügen schaden gros
Verse: 3724    und zwingen ze dienst sid;

Verse: 3725    daz land volk was alles mit:
Verse: 3726    daz was der burger not,

Verse: 3727    sy vorchten kiessen da den dot,
Verse: 3728    sy wonden, Porus der gros

Verse: 3729    aller küng über genos,
Verse: 3730    daz der noch lepte,

Verse: 3731    mit zorne gen in streptte,
Verse: 3732    wand er der jung fruͦwen gesip was

Verse: 3733    durch [die] man si besas.
Verse: 3734    ein fride ein wille gebotten ward;

Verse: 3735    ir rat do niut spart.
Verse: 3736    sy fragtten uns der meren,

Verse: 3737    was unser geverte weren;
Verse: 3738    da wider was unser sprechen,

Verse: 3739    wir woltten an inen rechen,
Verse: 3740    daz der küng hette dar in

Verse: 3741    ein jungfruͦwen,
Verse: 3742    die hette er Kandulo genomen:

Verse: 3743    dar umb weren wir dar komen,
Verse: 3744    die wollten wir balde wider han

Verse: 3745    oder in wurde der schad getan,
Verse: 3746    den sy verklagen niemer me.

Verse: 3747    die forchtte det in also we
Verse: 3748    daz sy sich bereitten, an der stund

Verse: 3749    gabens uns die jungfrwͦen wol gesunt.
Verse: 3750    sust ritten wir dannen. an der wider ker

Verse: 3751    bot mir michel er
Verse: 3752    Candulus und begerte,

Verse: 3753    daz ich mit im kertte
Verse: 3754    heim ze husse durch daz er mir

Verse: 3755    er erbut nach sinen gir.
Verse: 3756    sin muͦtter west er des willen,

Verse: 3757    daz sy niut kond bevilen,
Verse: 3758    wie vil eren sy im biut.

Verse: 3759    min gesinde lies ich ritten dan
Verse: 3760    mit Candulo reit ich dan.

Verse: 3761    under wegen bei der strasse
Verse: 3762    hoch berg gar anne masse

Verse: 3763    het jet weder sit neben sich;
Verse: 3764    waz dar uffe wer, daz wundret mich.

Verse: 3765    ich sach oͮch da mer,
Verse: 3766    daz land het er,

Verse: 3767    die frucht die man dar an zoch,
Verse: 3768    die was so michel und so guͦt.

Verse: 3769    win triubel sach ich,
Verse: 3770    der ein man ze tragen het;

Verse: 3771    ich sach oͮch mer nüsse,
Verse: 3772    also gros beben sind.

Verse: 3773    alsus ritten wir dry dag
Verse: 3774    bis wir komen ze Meros.

Verse: 3775    jr früede ward gros;
Verse: 3776    Candacis die kungin

Verse: 3777    fruͦte sich in irem sin,
Verse: 3778    daz irem sun Kandolo

Verse: 3779    so wol gelungen was also.
Verse: 3780    vil schoͤne sy uns engegen gieng,

Verse: 3781    gar wirdenklich sy uns enpeing;
Verse: 3782    ir sun fragte sy der mer,

Verse: 3783    durch was sines der gast komen wer,
Verse: 3784    wer er wer

Verse: 3785    und wie sin ger
Verse: 3786    ze hoffe wer.

Verse: 3787    er sprach 'muͦtter es ist ein man,
Verse: 3788    daz die welt nie triuweren gewan.

Verse: 3789    Allexander mit ernst im gebot,
Verse: 3790    daz er mir hulff zuͦ not

Verse: 3791    gewinen min wib, daz ist beschechen:
Verse: 3792    ich wil es offenlichen jhehen,

Verse: 3793    daz ein so triulicher man
Verse: 3794    nie in din hus kan.'

Verse: 3795    do kuste mich die kungin
Verse: 3796    und fuͦrtte mich in ir balas

Verse: 3797    [der] wol gebuwen und gezieret was;
Verse: 3798    ein wasser ran da under;

Verse: 3799    sin boden was goldes rich.
Verse: 3800    die küngin fuͦrtte mich

Verse: 3801    in einen andren palas,
Verse: 3802    da sy selb ze tische sas

Verse: 3803    und fünf hundert jung fruͦwen,
Verse: 3804    die ir nachgiengen;

Verse: 3805    uf ir spur fünf hundert getwerg giengen.
Verse: 3806    ir vor ich gesach nie groͤsser herschafft

Verse: 3807    mit richtums über krafft
Verse: 3808    an keiner fruͦwen den da.

Verse: 3809    den dag ward min schon enpflegen,
Verse: 3810    daz ich es müesti gen wirde wegen.

Verse: 3811    Des nechsten morgens da nach,
Verse: 3812    do was der fruͦwen vil gach,

Verse: 3813    daz sy mir dette bas bekant
Verse: 3814    ir heimlich gemach: all ze hant

Verse: 3815    fuͦrtte sy mich vil drat
Verse: 3816    in ein schone keminat;

Verse: 3817    da nach wist mich die kûngin
Verse: 3818    ze der dritten keminaten in;

Verse: 3819    da nach fuͦrtte sy mich do
Verse: 3820    in ein keminatten hoch,

Verse: 3821    die was gericht uf schiben,
Verse: 3822    hin und her ze triben,

Verse: 3823    war man gert;
Verse: 3824    affen daz waren gelert,

Verse: 3825    daz sy es zugen noch ir ger,
Verse: 3826    sechs und drissig waren der;

Verse: 3827    die geschicht ducht mich wunderlich,
Verse: 3828    'und het ich ze Kriechen dich,

Verse: 3829    des wer ich fro.'
Verse: 3830    des lacht die fruͦwe do;

Verse: 3831    'Allexander' sprach sy zehant
Verse: 3832    'ich wenne daz kein man ie bekant

Verse: 3833    soͤliche werk in dinem land'.
Verse: 3834    daz sy mich sus bi namen nant,

Verse: 3835    des erschrak ich ser,
Verse: 3836    ich vorchte verlieren lib und er;

Verse: 3837    von leid und zorn ich mich schalt.
Verse: 3838    do sprach die fruͦwe wis

Verse: 3839    'dis dunket mir ein unpris,
Verse: 3840    ob du loͤgnest dins namen.

Verse: 3841    du darfft dich oͮch niut schamen,
Verse: 3842    wie ich dich erkant han:

Verse: 3843    daz wil ich dich wissen lan.'
Verse: 3844    do truͦg si daz bild har,

Verse: 3845    daz mit irem willen und gar
Verse: 3846    mit mallen was nach mir bereit;

Verse: 3847    si sprach 'Allexander sich,
Verse: 3848    erkenest du dich?

Verse: 3849    was hilffet nun din gewalt
Verse: 3850    und din land manigvalt,

Verse: 3851    Persyam und Indea daz lant guͦt,
Verse: 3852    nun stat din hocher muͦt

Verse: 3853    in eins wibes hand,
Verse: 3854    din lib und all din macht,

Verse: 3855    ob din hand ie wol gevacht
Verse: 3856    in strit, daz ist dir wild.

Verse: 3857    hie an so nim ein bild:
Verse: 3858    wer sich ze hoch wil heben,

Verse: 3859    dem wirt genidret sin leben;
Verse: 3860    wen im die seld ist wider,

Verse: 3861    si wirfet in da nider:
Verse: 3862    als ist oͮch dir geschehen.'

Verse: 3863    si sprach gar froͤlich
Verse: 3864    'was hilffet din gros rich,

Verse: 3865    din wissheit und din ellend bald,
Verse: 3866    din leben stat in minem gewalt.'

Verse: 3867    ich sprach,'daz wer mir unwert
Verse: 3868    und het ich min swert.'

Verse: 3869    do sprach die künginne
Verse: 3870    'ich bin wol worden inen

Verse: 3871    grosse wisheit an dir;
Verse: 3872    nun solt du wol gettriuwen mir,

Verse: 3873    daz dir niut werden kan,
Verse: 3874    wond du als ein küener man

Verse: 3875    mim sun sin liebes wib,
Verse: 3876    daz sol behaltten din lib.

Verse: 3877    erkanten dich die lant liut,
Verse: 3878    kein man ernertte dich hiut,

Verse: 3879    es dette den ein gewalttig got.
Verse: 3880    minem sun Krater,

Verse: 3881    dem ist mit zorn uf dich ger,
Verse: 3882    du slüegt Borum sinen sweher dot,

Verse: 3883    er kam oͮch da in michel not,
Verse: 3884    wand daz im glüke halff von dan,

Verse: 3885    daz er von der not endran.
Verse: 3886    daz ich dir wol ze leben gan,

Verse: 3887    des bring ich dich wol inen.'
Verse: 3888    da fuͦrte sy mich fürbas,

Verse: 3889    da ir slaff gaden was.
Verse: 3890    von irem bette ein süsser gesmak

Verse: 3891    gen mir brach.
Verse: 3892    do sprach sy an den stunden,

Verse: 3893    daz sy vil gerne dette,
Verse: 3894    wes ich sy bette.

Verse: 3895    des fuͦrcht ich mich sinen,
Verse: 3896    daz ich si soltte minen.

Verse: 3897    sy sprach 'nun bist du min; nun sorge niut,
Verse: 3898    lieber herre, daz dir iut

Verse: 3899    arges were' und bat mich schiere komen wider
Verse: 3900    oder ich leitte all ir sorg nider.

Verse: 3901    nun giengen wir zuͦ dem gesinde dar.
Verse: 3902    sy sprach 'nun nemen alle war,

Verse: 3903    wie wir geven des künges botten hie,
Verse: 3904    der uns wol gedienet hat:

Verse: 3905    hetten wir iut daz im gezem,
Verse: 3906    und sinen eren wer genem,

Verse: 3907    die gab wil ich des ersten heben
Verse: 3908    .............................'

Verse: 3909    [do] sprach ir sun Karater
Verse: 3910    'ich gib ein gab im also swer:

Verse: 3911    mit minem swert einen slag,
Verse: 3912    den er niut über winden mag,

Verse: 3913    durch sines heren unfuͦg,
Verse: 3914    der mir minen sweher sluͦg;

Verse: 3915    das got im hie an daz leben:
Verse: 3916    daz sy von mir min erstes geben.'

Verse: 3917    Candalus mit zorne sprach
Verse: 3918    'wer im hie duͦt ungemach

Verse: 3919    (mir berste den min swert)
Verse: 3920    der wirt des wider slages gert

Verse: 3921    hie von minen handen.
Verse: 3922    er rach mir min anden

Verse: 3923    und gewan mir wider min wib:
Verse: 3924    mag ich, ich frist im hie sin lib.'

Verse: 3925    Cratter zuͦ dem bruͦder sprach
Verse: 3926    'dis ist mir leid und ungemach,

Verse: 3927    daz du dem wilt bi gestan,
Verse: 3928    der mir leid hat getan;

Verse: 3929    ich bring in hiut in not:
Verse: 3930    sülen wir bede kiessen den dot.'

Verse: 3931    die bruͤder griffen bede ze wer.
Verse: 3932    Candattis sprach, die küngin, 'Allexander,

Verse: 3933    la din wer werden schin,
Verse: 3934    der man gicht dem herczen din,

Verse: 3935    und scheide etwen dissen strit.'
Verse: 3936    ..............................

Verse: 3937    do sprach ich zuͦ den heren
Verse: 3938    'ir hant des lüczel eren,

Verse: 3939    daz ir vechtten uf ein man,
Verse: 3940    da bejagen ir niut ruͦmes an:

Verse: 3941    ich ward des nie wert,
Verse: 3942    daz soͤllicher heren swert

Verse: 3943    wurden über [mich] gezagen.
Verse: 3944    min her hat mangen herzogen,

Verse: 3945    des eigen ich wol moͤcht wesen,
Verse: 3946    da von land mich hie genessen;

Verse: 3947    ich wil iuch sweren daz,
Verse: 3948    daz ir mir getriuwen dester bas,

Verse: 3949    daz ich bring in iuweren gewalt
Verse: 3950    Allexander den held bald;

Verse: 3951    land ir in genessen, so tuͦnd ir wol.
Verse: 3952    ungern ich den dot dol.'

Verse: 3953    Candacis sprach 'waz wellend ir rechen,
Verse: 3954    iuwer hus er zerbrechen

Verse: 3955    an dissem ellenden man.
Verse: 3956    hat sin her iuch iut getan,

Verse: 3957    des het er unschuld.
Verse: 3958    geben im iuwer huld,

Verse: 3959    des bitt ich dich Kratter.'
Verse: 3960    do lies er nider sin swert

Verse: 3961    und gewan einen senften muͦt.
Verse: 3962    der geheis duch in guͦt,

Verse: 3963    den ich in hotte geton,
Verse: 3964    sust lie er mich fride han.

Verse: 3965    mich liessen da vil friuntlich
Verse: 3966    die heren bede glich,

Verse: 3967    ir gab sy mir teiltten mit
Verse: 3968    ..............................

Verse: 3969    gold, gestein anne zal genuͦg,
Verse: 3970    ein halsberg man mir dar truͦg,

Verse: 3971    daz nie keins so guͦt ward;
Verse: 3972    er waz lutter und hart,

Verse: 3973    kein swert mocht in gewinen:
Verse: 3974    den gaben sy mir dar

Verse: 3975    und einen mantel liecht var.
Verse: 3976    Candacis die küngin,

Verse: 3977    die gab mir oͮch durch min
Verse: 3978    ein krone von stahel bereit,

Verse: 3979    vil demant dar in geleit.
Verse: 3980    ..............................

Verse: 3981    mit iren wissen henden
Verse: 3982    saczte sy mirs uf min huͦbt eben

Verse: 3983    'nun müessest du lange leben.'
Verse: 3984    bi der hant nam sy mich do;

Verse: 3985    urlob nam ich also.
Verse: 3986    ..............................

Verse: 3987    des mich mit züchtten wert
Verse: 3988    die küngin und ir kint.





Next part


This text is part of the TITUS edition of Lamprecht, Alexander (Basler Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.