TITUS
Seifrit, Alexander (Strassburger Fassung)
Part No. 117
Previous part

Chapter: 269  
Eine monströse Geburt in Babylon

Das ain weib ain wunderlich chind gewann pey Allexandro.


Verse: 8119       Aber churczlich darnach

Verse: 8120    ein selczam wunder da geschach,
Verse: 8121    das ist ze sagen wunderlich.

Verse: 8122    vor seinem tad chuerczlich
Verse: 8123    ain fraw in der stat fuerbar

Verse: 8124    ainen sun pey im gepar,
Verse: 8125    des form und sein gestalt

Verse: 8126    was wunderlich und manigvalt.
Verse: 8127    der leib uncz dem napel was

Verse: 8128    ain schoner mensch (gelaubt das!);
Verse: 8129    das selb tail was tod gar.

Verse: 8130    das nyder taill was fur war
Verse: 8131    lebentig und wunderlich;

Verse: 8132    das was an allen enden geleich
Verse: 8133    manigem mer wunder

Verse: 8134    und manigem fromden chunder.
Verse: 8135    die muetter und die frawen

Verse: 8136    liessen das chindt niemant schawen;
Verse: 8137    sy verpurgens so gar

Verse: 8138    das sein nyemant wart gewar.
Verse: 8139    si enputens taugenleichen

Verse: 8140    Allexandro dem reichen.
Verse: 8141    do er sein ward gewar,

Verse: 8142    er rait haymelichen dar.
Verse: 8143    da er sein gestalt sach,

Verse: 8144    in wundert ser und sprach
Verse: 8145    aldo zu den leutten:

Verse: 8146    'was mag dicz ding bedeutten?'
Verse: 8147    nach den maistern sein er sanndt,

Verse: 8148    den die chunst was bekanntt
Verse: 8149    von den swarczen puechen,

Verse: 8150    und hies die her suechen.
Verse: 8151    er hies in haymelich fuͤr tragen

Verse: 8152    das chind und pat im zu sagen
Verse: 8153    tawgenlich vor den leutten

Verse: 8154    was das wunder mocht bedeutten.
Verse: 8155    da es der maister an sach,

Verse: 8156    er ersewft ser und sprach:
Verse: 8157    'edler chaiser reich,

Verse: 8158    ich sag dier werlich,
Verse: 8159    wie gewaltig du pist,

Verse: 8160    das dir dein ent so nahant ist
Verse: 8161    und das du schyer sterben muest.

Verse: 8162    davon wart wie du tuest!'
Verse: 8163    da im der maister das verjach,

Verse: 8164    Allexander zu im sprach:
Verse: 8165    'sag mir, lieber maister mein,

Verse: 8166    wie dem also muͤg gesein!'



Das im der maister sagt was das chind bedeutt.


Verse: 8167       Der maister sagt im zu der frist:

Verse: 8168    'das halbe taill das do ist
Verse: 8169    ain mensch und ist tod,

Verse: 8170    das bedewt das gar dratt
Verse: 8171    ain endt haben dein lebttẽg

Verse: 8172    (merkch recht was ich dier sag!).
Verse: 8173    aber das ander halb taill

Verse: 8174    das da lebett und ist gaill
Verse: 8175    das manigem tier ist so geleich,

Verse: 8176    das bedeut zaichenlich:
Verse: 8177    die chunig die nach dir chumftig sindt,

Verse: 8178    sind gegen dir als ain wintt.
Verse: 8179    und als ain willdes tier ist

Verse: 8180    gegen ainem menschen zu aller frist,
Verse: 8181    also wiert gegen deiner chraft

Verse: 8182    zu nichtew nach deiner herschaft.'
Verse: 8183    do er des maisters ernst vernam,

Verse: 8184    der chaiser ser davon ercham
Verse: 8185    und gehabt sich trawriklich

Verse: 8186    und ersewft permiklich.
Verse: 8187    den fuersten er es verdagt,

Verse: 8188    also das er es nymant sagt.
Verse: 8189    er gie an ain haymelich stat

Verse: 8190    mit disen warten und pat:
Verse: 8191    'Jupiter, allmechtiger gott,

Verse: 8192    ich bekenn dir sunder spot,
Verse: 8193    das ich in meinem muett gedacht

Verse: 8194    das ich das gern hiet volbracht,
Verse: 8195    ob von den gnaden dein

Verse: 8196    des lebens und der teg mein
Verse: 8197    mer solten sein gewesen.

Verse: 8198    seint ich nit lenger sol genesen,
Verse: 8199    so pitt ich ainer pet von dir,

Verse: 8200    das du mir verleichest schier
Verse: 8201    das ich nach dem ende mein

Verse: 8202    muess ewigklich pey dir sein.'



Next part


This text is part of the TITUS edition of Seifrit, Alexander (Strassburger Fassung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.