TITUS
Lamprecht, Alexander (Strassburger Bearbeitung)
Part No. 23
Previous part

Chapter: 49  
Darius' Hauptleute berichten in einem Brief


Verse: 1612    dô der brieb wart gelesen,
Verse: 1613    dô sprachen di herzogen:

Verse: 1614    'Darius ist harte betrogen.
Verse: 1615    er heizet uns den man vân,

Verse: 1616    dem alle di lant sint undirtân
Verse: 1617    und der di fursten hât gevangen

Verse: 1618    und des wille ist irgangen
Verse: 1619    ubir Jherusalem und ubir Tyre.

Verse: 1620    sînes selbes ist er gîre.
Verse: 1621    Rôme und Egiptelant

Verse: 1622    stânt beide an sîner hant.
Verse: 1623    er bedwanc Kartaginen di burch.

Verse: 1624    mit gwalt reit er dâ durh.
Verse: 1625    er hât ouh manic ander lant

Verse: 1626    verwunnen und verbrant,
Verse: 1627    bedwungen und zestôret,

Verse: 1628    der ein teil Dario hôret.
Verse: 1629    daz hât Darius al versezzen.

Verse: 1630    Alexander hât sich vermezzen,
Verse: 1631    iz gê ze scaden oder ze fromen,

Verse: 1632    wil ime Darius ingagen comen,
Verse: 1633    er wil in menlîchen entfân

Verse: 1634    unde mit volcwîge bestân.
Verse: 1635    er wil unsen hêren

Verse: 1636    aller sîner êren
Verse: 1637    verstôzen oder crenken.

Verse: 1638    Darius sol sih bedenken
Verse: 1639    und handeliz noh mit sinnen.

Verse: 1640    er mah sîn lîhte gwinnen
Verse: 1641    scaden unde scande

Verse: 1642    in sînes selbis lande.'
Verse: 1643       Von den zwein herzogen dô

Verse: 1644    reit ein bote ze Dario.
Verse: 1645    unde alser vor ime quam

Verse: 1646    und dise botescaf vernam,
Verse: 1647    sêre zurneter des.

Verse: 1648    einen herzogen, der hîz Mennes,
Verse: 1649    und dar zô hundirt tûsint man

Verse: 1650    er vil schiere gwan.
Verse: 1651    di santer dô

Verse: 1652    dem hêren Alexandro
Verse: 1653    wol ze strîte gare ingagen

Verse: 1654    und hîz den zwein herzogen sagen,
Verse: 1655    liezen si in ubir daz wazzer comen,

Verse: 1656    si ne gwunnen is niemer fromen,
Verse: 1657    wen laster unde cumber;

Verse: 1658    daz wesset in dar under
Verse: 1659    und scade unde scande.

Verse: 1660    ob der mûlîche Alexander
Verse: 1661    sînen willen dâ geendet,

Verse: 1662    si werdent is geschendet
Verse: 1663    vil lîhte an irn lîbe

Verse: 1664    unde an kinden unde an wîbe
Verse: 1665    unde ouh an irn gûte.

Verse: 1666    'sus ist mir ze mûte.'



Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.