TITUS
Lamprecht, Alexander (Strassburger Bearbeitung)
Part No. 24
Previous part

Chapter: 44  
Alexanders erste Schlacht mit den Persern (Granicus)


Verse: 1667       Den herzogen beiden

Verse: 1668    wart vil leide,
Verse: 1669    dô in der bote sagete,

Verse: 1670    waz er vernomen habite.
Verse: 1671    si ne tursten is niwit lâzen,

Verse: 1672    si ne wereten di strâzen
Verse: 1673    dem stolzen Alexandro.

Verse: 1674    ze râte gingen si dô,
Verse: 1675    Marios und Tybotes.

Verse: 1676    ze râte wurden si dô des,
Verse: 1677    daz si santen algerihte

Verse: 1678    ubir al ir gerihte;
Verse: 1679    di si ze samene brâhten,

Verse: 1680    di mohte man ahten
Verse: 1681    ane vierzich tûsunt.

Verse: 1682    dar nâh in curzer stunt
Verse: 1683    genante sih Alexander

Verse: 1684    und mit ime manic ander,
Verse: 1685    wande si hâten stâten mût.

Verse: 1686    si schiffeten ubir di eufrateischen flût.
Verse: 1687    ze êrist si ze stade quâmen.

Verse: 1688    dô di herzogen daz vernâmen,
Verse: 1689    mit zorne vôren si ime ingagen

Verse: 1690    und wolden ime flîzlîchen scaden.
Verse: 1691    dâ hûb sih ein sturm grôz,

Verse: 1692    ein dûsunt blieb dâ tôt
Verse: 1693    von kriechischeme kunne,

Verse: 1694    ê Alexander den vort gwunne.
Verse: 1695       Alexandro mûwete daz.

Verse: 1696    ûf Bucifale er saz.
Verse: 1697    er ne wolde niwit bîten,

Verse: 1698    er begunde rîten,
Verse: 1699    ergremet was ime sîn mût.

Verse: 1700    er slûc alse der donre tût
Verse: 1701    sîne vîande.

Verse: 1702    swaz ir ime quam ze hande,
Verse: 1703    der ne genas nie nehein mûter barn.

Verse: 1704    sih ne mohte nieman bewarn
Verse: 1705    von den slegen, die er slûch,

Verse: 1706    wander ein tûre swert trûch.
Verse: 1707    ouh was sîn scaft starc und grôz;

Verse: 1708    sweme sîn wart slach oder stôz,
Verse: 1709    der nembeiz niemer mêr brôtes,

Verse: 1710    wander was des gwissen tôtes.
Verse: 1711       Mennes der wîgant,

Verse: 1712    den Darius hete gesant
Verse: 1713    Alexandro ingagen,

Verse: 1714    alsih daz bûch hôrte sagen,
Verse: 1715    der hete manlîchen mût

Verse: 1716    und was ouh ein rîter gût.
Verse: 1717    dô er di mêre vernam,

Verse: 1718    stolzer rîter er nam
Verse: 1719    ze sih zehen hundrit

Verse: 1720    ûz sîneme here gesundrit,
Verse: 1721    di sîn solden hûten

Verse: 1722    mit ellenthaften mûten.
Verse: 1723    der karte Alexandro ingagen.

Verse: 1724    dô daz Alexander hôrte sagen,
Verse: 1725    umbe karter sînen vanen

Verse: 1726    und begunde sîne helede manen.
Verse: 1727    Bucifale er verhancte,

Verse: 1728    Mennese er zô sprancte.
Verse: 1729    durh sîne rîtere er dô brach.

Verse: 1730    ir iegweder den anderen stach
Verse: 1731    nider zô der erden.

Verse: 1732    dô griffen si zô den swerten.
Verse: 1733    dô slûgen di recken

Verse: 1734    mit den brûnen ecken,
Verse: 1735    daz daz fûr dar ûz spranc.

Verse: 1736    ir iegweder dranc
Verse: 1737    vaste zô dem andren.

Verse: 1738    dô slûch doh Alexandren
Verse: 1739    Mennes nider an daz gras.

Verse: 1740    ob di rede alsô was,
Verse: 1741    des mach uns al besunder

Verse: 1742    nemen michel wunder.
Verse: 1743       Dô hûbin sih ir lûte dare

Verse: 1744    beidenthalben mit der scare,
Verse: 1745    dâ di helede junge

Verse: 1746    mit nîde insamt rungen,
Verse: 1747    dâ was michele nôt.

Verse: 1748    dâ bleib manic helt tôt.
Verse: 1749    sêre stoub dâ der melm.

Verse: 1750    dâ wart Alexandro sîn helm
Verse: 1751    von dem houbete gebrochen. -

Verse: 1752    dâ was vil nâh gerochen
Verse: 1753    Darius der tûre degen.

Verse: 1754    Alexandro wart dâ gegeben
Verse: 1755    manic stôz unde slach.

Verse: 1756    di wîle, di er der nider lac,
Verse: 1757    leit er ein bittere nôt.

Verse: 1758    er was vil nâh tôt.
Verse: 1759    doh half in, daz er genas,

Verse: 1760    daz er sô wol gewâfent was.
Verse: 1761    vil schîre ime ouh ze helfen quam

Verse: 1762    Daclym ein rîter lobesam.
Verse: 1763    der was mit Alexandro dare comen.

Verse: 1764    der stunt ime ze grôzen fromen,
Verse: 1765    dâ er was bestanden

Verse: 1766    von sînen vîanden.
Verse: 1767    sîn swert daz heter bare

Verse: 1768    und hûb sih îlende dare.
Verse: 1769    der hiu umbe sih

Verse: 1770    einen helede gelîch.
Verse: 1771    des danctime sint Alexander.

Verse: 1772    dâ was ouh ein ander,
Verse: 1773    ein rîter, der hîz Jubal,

Verse: 1774    der sih ungerne verhal,
Verse: 1775    swâ iz in di nôt ginc.

Verse: 1776    der was ein edele jungelinc.
Verse: 1777    der was in andre sîte

Verse: 1778    in den selben strîte
Verse: 1779    mit den zwein herzogen.

Verse: 1780    sîn swert heter irzogen.
Verse: 1781    der quam gedrungen dar zû

Verse: 1782    und wolde Alexandro
Verse: 1783    in den hals slân einen slach,

Verse: 1784    dâ er in blôz sach.
Verse: 1785    Daclym wart der êrre

Verse: 1786    und lôste sînen hêren.
Verse: 1787    er slûc Jubale

Verse: 1788    zô dem selben mâle
Verse: 1789    obene von den zenden

Verse: 1790    nidene durh di lenden
Verse: 1791    und machete zwêne halbe man.

Verse: 1792    vil michil lob er des gwan.
Verse: 1793       Daclym der ellenthafte man

Verse: 1794    vil schîre er dô nam
Verse: 1795    den helm mit sîner hant,

Verse: 1796    Alexandro er in ûf bant.
Verse: 1797    sîn houbit was ime verschellet,

Verse: 1798    dâ er nider was gevellet,
Verse: 1799    von den michelen slagen.

Verse: 1800    ih wil û wêrlîchen sagen:
Verse: 1801    er nerwîlt sih niwit sîner rede,

Verse: 1802    ime wâren zeblûwen sîne lide.
Verse: 1803    des wart Daclym innen

Verse: 1804    unde rief mit hôer stimmen:
Verse: 1805    'Alexander, hêre kuninc,

Verse: 1806    gedenket hûte an ûwer tugint
Verse: 1807    und manet ûwer gesellen,

Verse: 1808    daz si diz here irschellen,
Verse: 1809    wandir ein tûre kneht sît.

Verse: 1810    nû reget daz swert, des ist zît.'
Verse: 1811       Dô Alexander wart lôs,

Verse: 1812    dô spranc er ûf sîn ros.
Verse: 1813    sîn gebêre daz was eislîch,

Verse: 1814    sîn ougen wâren freislîch;
Verse: 1815    dar umbe vorhte in manic man.

Verse: 1816    dô er zime selbin wider quam,
Verse: 1817    dô heter michelen zorn.

Verse: 1818    sîn ros nam er mit den sporn
Verse: 1819    unde sagite Daclyme danc

Verse: 1820    und frumete manigen swertis swanc
Verse: 1821    undir daz here, daz dâ was,

Verse: 1822    daz slûch er nider alsein gras.
Verse: 1823    di menige was vil grôz,

Verse: 1824    di er irslûch und irschôz.
Verse: 1825    unzallîch wâre uns ze sagen,

Verse: 1826    umbe di dâ lâgen irslagen
Verse: 1827    Persen unde Kriechen

Verse: 1828    sunder gewunten unde siechen.
Verse: 1829    dâ was weinen unde clagen.

Verse: 1830    von einen volcwîge hôre wir sagen,
Verse: 1831    der ûf Wulpinwerde gescach

Verse: 1832    dâr Hilden vater tôt lach,
Verse: 1833    inzwischen Hagenen unde Waten:

Verse: 1834    der ne mohte sih hî zô niht gegaten.
Verse: 1835    Herwîch unde Wolfwîn

Verse: 1836    ne mohten ime niwit gelîch sîn,
Verse: 1837    noh nehein man ander;

Verse: 1838    alsô freislîch was Alexander.
Verse: 1839    man sagit von gûten knehten,

Verse: 1840    di wol getorsten vehten,
Verse: 1841    in der Troiêre liede,

Verse: 1842    ê sich der sturm geschiede,
Verse: 1843    Achilles unde Hector,

Verse: 1844    Aiax unde Nestor,
Verse: 1845    di manic tûjsint irslûgen

Verse: 1846    unde ouh scarfe gêre trûgen:
Verse: 1847    iz ne mohte undir in allen

Verse: 1848    ze Alexandro niht gevallen.
Verse: 1849       Pynchun was ein grêbe genant,

Verse: 1850    der fûrte den vanen an der hant,
Verse: 1851    den er Alexandro abe brach,

Verse: 1852    dô in Mennes der nider stach.
Verse: 1853    dô in Alexander hete irkorn,

Verse: 1854    er rûrte daz ros mit den sporn:
Verse: 1855    ingagen den grâben er reit.

Verse: 1856    er sprach: 'daz was michil kintheit,
Verse: 1857    daz mîn vane ie quam an dîner hant;

Verse: 1858    daz sol dir werden noh gewant
Verse: 1859    ze leide und ze rûwen,

Verse: 1860    des mahtu mir getrûwen.'
Verse: 1861    der grâbe dô erz gehôrte,

Verse: 1862    Alexandro er antworte.
Verse: 1863    er sprach: 'nû varet scône,

Verse: 1864    daz û mîn trehtîn lône.
Verse: 1865    daz ih fôren ûweren vanen,

Verse: 1866    daz sol û werden ze banen.
Verse: 1867    mûzih behalden mînen leben,

Verse: 1868    ih wil in û sô wider geben,
Verse: 1869    daz man der vone reden mac

Verse: 1870    biz an den jungisten tac.'
Verse: 1871    er stach nâh dem worte

Verse: 1872    Alexandrum mit dem orte,
Verse: 1873    daz an sînen spere was.

Verse: 1874    des stichis er wol genas,
Verse: 1875    wander was ime getân

Verse: 1876    obenwendich sînen ouchbrân.
Verse: 1877       Alexander der sprah,

Verse: 1878    dô in Pynkun gestah:
Verse: 1879    'du salt lugenêre wesen,

Verse: 1880    ih sal des stichis wol genesen.'
Verse: 1881    mit dem selben worte

Verse: 1882    slûch er in mit dem swerte.
Verse: 1883    ûffe sîn houbit er in slûch

Verse: 1884    durh den stêlînen hût
Verse: 1885    einen sô freislîchen slach,

Verse: 1886    daz er an der erden tôt lach.
Verse: 1887       Dô nam Alexander sînen vanen

Verse: 1888    und reit rîterlîche danen,
Verse: 1889    dâ er wisse sîne man.

Verse: 1890    Mennes ime aber zû quam,
Verse: 1891    der in dâ vore der nider stach.

Verse: 1892    er gab ime einen swertslach:
Verse: 1893    ûf den arm er in slûc,

Verse: 1894    dâ er daz sper mite trûc.
Verse: 1895    er slûch in mit grôzer craft,

Verse: 1896    durh den arm und durh den schaft
Verse: 1897    quam daz swert gedrungen

Verse: 1898    und irwant ime an der lungen.
Verse: 1899    Mennes der viel dâ tôt nider.

Verse: 1900    di Perses vohten niwit sider,
Verse: 1901    si fluhin von den velde

Verse: 1902    und ne getrûweten an sih selben
Verse: 1903    neheiner manheite mê

Verse: 1904    unde riefen ach unde wê.



Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.