TITUS
Lamprecht, Alexander (Strassburger Bearbeitung)
Part No. 27
Previous part

Chapter: 50  
Darius' 2. Brief an Alexander (Mohnsamen)


Verse: 2044    Darius under des screib
Verse: 2045    einen brieb Alexandro

Verse: 2046    unde hîz ime dar zô
Verse: 2047    eine wâge mâhenes fur tragen

Verse: 2048    unde hîz ime sagen,
Verse: 2049    daz er zalte die korn.

Verse: 2050    iz wâre ime leit oder zorn,
Verse: 2051    er neconde si nit gezellen:

Verse: 2052    alsô ne mohter sîne gesellen
Verse: 2053    gezelen noh sîne heriscraft,

Verse: 2054    di er ime gagen hête brâht.
Verse: 2055    ouh sagite ime der brieb,

Verse: 2056    Dario ne wêre niwit lieb,
Verse: 2057    daz er mit sulher gwalt

Verse: 2058    wolde ze Persiam in daz lant.
Verse: 2059    er ne woldiz ime rûmen,

Verse: 2060    er vernême ein sulh gestrûme,
Verse: 2061    dâ er imer vone mohte zellen

Verse: 2062    in lîde und in bîspellen.
Verse: 2063       Dô Alexander gelas,

Verse: 2064    daz an den brieb gescriben was,
Verse: 2065    der wol geborne jungelinc,

Verse: 2066    den mâhen er frôlîche entfienc
Verse: 2067    unde warf in an der stunt

Verse: 2068    in sînes selbis munt
Verse: 2069    und az sîn ein vil michil teil

Verse: 2070    und sprach: 'wir haben gût heil:
Verse: 2071    dise corner sint sô manicfalt,

Verse: 2072    si ne werdent von mir niemer gezalt.'
Verse: 2073    in sînen munt er si streich

Verse: 2074    und sprah: 'si sint sô weich
Verse: 2075    und smeckint sô wole,

Verse: 2076    ih hoffe, daz ih sîn here sole
Verse: 2077    harte wol verwinnen

Verse: 2078    mit mînen jungelingen.'



Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.