TITUS
Lamprecht, Alexander (Strassburger Bearbeitung)
Part No. 29
Previous part

Chapter: 51  
Alexanders 2. Brief an Darius (Pfefferkorn)


Verse: 2093    ze Darien boten er dô sprach:

Verse: 2094    'diz ezze dîn hêre, ob er mach.
Verse: 2095    dise corner sint niht manicfalt,

Verse: 2096    si sint vil schiere gezalt:
Verse: 2097    alsus bitter ist mîn here,

Verse: 2098    er ne mah sih niemer mih irweren.
Verse: 2099    ouh sage du dîneme hêren:

Verse: 2100    ih wil nû wider kêren,
Verse: 2101    alse mir mîn mûter enbôt,

Verse: 2102    andirs durh neheine nôt,
Verse: 2103    iz sî ime leit oder lieb,

Verse: 2104    dar umbe ne lâz ih is niet,
Verse: 2105    ih wil schiere wider comen:

Verse: 2106    des gewinnet er lutzelen fromen.
Verse: 2107    di wîle mah er bî dem mere

Verse: 2108    gesamenen ein grôz here,
Verse: 2109    daz er mir frumelîche

Verse: 2110    erwere sîne rîche.'
Verse: 2111       Dô reit der bote von Alexandro

Verse: 2112    wider hin ze Dario
Verse: 2113    unde sagetime daz,

Verse: 2114    daz Alexander den mâhen az,
Verse: 2115    den er ime hete gesant,

Verse: 2116    und gab ime den peffer in di hant.
Verse: 2117    den enfienc er mit zorne

Verse: 2118    und warf di peffercorner
Verse: 2119    nîtlîchen in sînen munt

Verse: 2120    unde beiz si an der stunt.
Verse: 2121    dô begunder sih cremfen

Verse: 2122    und di nase remfen,
Verse: 2123    wand in der pheffer sêre beiz.

Verse: 2124    sîn lîb di wart ime allir heiz.
Verse: 2125    er neigete sih nidere

Verse: 2126    unde wolde, daz Alexander widere
Verse: 2127    wêre ân sîne scande

Verse: 2128    heim in sînem lande.



Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.