TITUS
Lamprecht, Alexander (Strassburger Bearbeitung)
Part No. 30
Previous part

Chapter: 53  
Alexander besiegt Darius' Feldherrn Amunta


Verse: 2129       An dem wege, dâ Alexander

Verse: 2130    heim reit ze lande
Verse: 2131    in mitten Arabia,

Verse: 2132    dâ bestunt in Amenta,
Verse: 2133    der was Daries man

Verse: 2134    und was ein herzoge lobesam.
Verse: 2135    des nêhesten morgenis frû

Verse: 2136    mit volcwîge reit er ime zû
Verse: 2137    und vohten allen einen tach,

Verse: 2138    sô dâ nieman gesach
Verse: 2139    neheinen man entwîchen.

Verse: 2140    si vohten freislîchen
Verse: 2141    zwêne tage al in ein,

Verse: 2142    daz di sunne nit ne geschein,
Verse: 2143    wande si ne wolde belûhten niht den mort.

Verse: 2144    alsus fâhten si vort,
Verse: 2145    unze die helede gûte

Verse: 2146    wûten in den blûte
Verse: 2147    vaste biz an di knî.

Verse: 2148    si vohten langer tage drî.
Verse: 2149    vil manich in den blûte ertranc,

Verse: 2150    daz ime nie nehein swanc
Verse: 2151    ne wart von swerte noh von spere.

Verse: 2152    manic tûsint was dere,
Verse: 2153    di dâ irslagen lâgen.

Verse: 2154    dô Arabite daz gesâgen,
Verse: 2155    si entwichen Alexandro

Verse: 2156    und fluhen wider ze Dario.
Verse: 2157       Alexander der rîche

Verse: 2158    hîz dô flîzlîche
Verse: 2159    sîne liebe wîcgnôze begraben,

Verse: 2160    di dâ lâgen irslagen.
Verse: 2161    di gwunten hîz er binden

Verse: 2162    und arzâte in gwinnen
Verse: 2163    und hîz, daz man ir wol plêge,

Verse: 2164    biz daz er gesêge,
Verse: 2165    ob si mohten genesen;

Verse: 2166    alsô lange wolder dâre wesen.
Verse: 2167    des siges was er vil frô:

Verse: 2168    rûwech was er dar zô,
Verse: 2169    wander dâ habete verlorn,

Verse: 2170    di ime dicke dâ bevorn
Verse: 2171    hulfin sîner êren

Verse: 2172    zô Tyre der mêren.



Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.