TITUS
Ulrich von Eschenbach, Alexander
Part No. 34
Previous part

Chapter: 59  
Alexander besichtigt Trôjâ


Verse: 4803       dô er von den landen schiet,
Verse: 4804    sîn vart gegen Trôjâ geriet.

Verse: 4805    die vant er der liute blôʒ.
Verse: 4806    die stat was gewesen grôʒ,

Verse: 4807    niun künege sie behielt,
Verse: 4808    der ieglîcher sunder rîches wielt:

Verse: 4809    wolt ir die ahte erkennen,
Verse: 4810    Homêrus kan sie wol genennen

Verse: 4811    und genuoc von in sagen,
Verse: 4812    daʒ ich durch in wil verdagen.

Verse: 4813    der niunde der hieʒ Laumedôn,
Verse: 4814    der hielt daʒ rîche Iliôn.

Verse: 4815    der künic grôʒer rîcheit phlac.
Verse: 4816    ze bûwen er sich bewac

Verse: 4817    ein hûs, daʒ er nande
Verse: 4818    Iliôn nâch sînem lande.

Verse: 4819    er hete nâch meistern gesant
Verse: 4820    allenthalben in die lant.

Verse: 4821    er bôt zwei mâʒ mit golde,
Verse: 4822    wer imʒ volbringen wolde.

Verse: 4823    zwêne daʒ vernâmen
Verse: 4824    wîser manne, die dar quâmen;

Verse: 4825    vür den künec sie giengen,
Verse: 4826    daʒ gelübde sie enphiengen.

Verse: 4827    wie man sie vür mûrer sach,
Verse: 4828    grôʒer wirde man in doch jach

Verse: 4829    dâ heim in irme lande,
Verse: 4830    dâ man sie hêrren nande.

Verse: 4831    der eine hieʒ Phêbus,
Verse: 4832    der ander hieʒ Neptûnus.

Verse: 4833    von irm zouber, des sie wielden,
Verse: 4834    vür gote die liute sie hielden.

Verse: 4835    dô daʒ werc wart volbrâht,
Verse: 4836    Laumedôn sich alsô bedâht,

Verse: 4837    daʒ er sie wolde triegen
Verse: 4838    und an dem gelübde liegen

Verse: 4839    alsô, daʒ er in niht engap.
Verse: 4840    des wuohs im sorgen urhap;

Verse: 4841    wir hœren von dem künege sagen
Verse: 4842    daʒ er dar umbe wurde erslagen

Verse: 4843    und Iliôn zerbrochen:
Verse: 4844    alsô daʒ liegen wart gerochen.

Verse: 4845    von Achille daʒ geschach.
Verse: 4846    Alexander die burc zerbrochen sach

Verse: 4847    und ander türne ouch gar vil.
Verse: 4848    noch mêr ich iu sagen wil,

Verse: 4849    daʒ Alexander vernam.
Verse: 4850    ze Idâ in den walt er quam,

Verse: 4851    dâ Ganimêdes hete gejagt.
Verse: 4852    als uns die âventiure sagt,

Verse: 4853    daʒ sîn reine süeʒe art
Verse: 4854    von einem arn gezucket wart

Verse: 4855    ûf in die lüfte hôch,
Verse: 4856    dar umbe manegen vröide vlôch,

Verse: 4857    ob eʒ im mohte sîn geschehen
Verse: 4858    daʒ er in bî im hete gesehen.

Verse: 4859    iedoch sie rou sîn ûfvart,
Verse: 4860    wie er der gote schenke wart,

Verse: 4861    des Êbê die juncvrowe phlac
Verse: 4862    unz an Ganimêdes tac.

Verse: 4863    Alexander aber sach
Verse: 4864    ein papelboum im sô verjach,

Verse: 4865    dar an er geschriben las
Verse: 4866    ein dinc, daʒ vor geschehen was,

Verse: 4867    ê Trôjâ wart zestœret.
Verse: 4868    geruochet ir sô hœret.

Verse: 4869    dâ was ein brunne,
Verse: 4870    ich wæne ouch dâ ein bach runne,

Verse: 4871    der des brunnen vluʒ enphienc,
Verse: 4872    wan er in daʒ waʒʒer gienc.

Verse: 4873    des waʒʒers vluʒ der ist tief.
Verse: 4874    Pariʒ ein juncvrowen dâ beslief,

Verse: 4875    (Oeônês die clâre hieʒ)
Verse: 4876    die er durch Elenam sint lieʒ.

Verse: 4877    Pêleôn hieʒ die selbe stat,
Verse: 4878    dâ selbes Pêleus ouch hôchzît hat

Verse: 4879    mit Achilles muoter die er nam.
Verse: 4880    Pêleus des gezam

Verse: 4881    daʒ er drî küniginne
Verse: 4882    (man nante sie gotinne)

Verse: 4883    dar zuo der hôchzît hete geladen.
Verse: 4884    dâ von sît in jâmer baden

Verse: 4885    sich muoste manic herze,
Verse: 4886    daʒ des jâmers smerze

Verse: 4887    und grôʒe riuwe sô versneit,
Verse: 4888    daʒ eʒ ein sterben niht vermeit.

Verse: 4889    Jûnô unde Pallas,
Verse: 4890    die drite gotinne Vênus was.

Verse: 4891    Discordia was dâ heime bliben.
Verse: 4892    von der ein apfel wart geschriben.

Verse: 4893    dâ sie in der ouwe sâʒen,
Verse: 4894    die gotinne, unde âʒen,

Verse: 4895    Discordia des gedâhte
Verse: 4896    den apfel sie dar brâhte

Verse: 4897    unsehende sie den ûf den tisch warf.
Verse: 4898    niht vil ich dâ von sagen darf:

Verse: 4899    Ovîdius der geprîset
Verse: 4900    der rede iuch baʒ bewîset.

Verse: 4901    guldîn der apfel was,
Verse: 4902    dar an man geschriben las,

Verse: 4903    daʒ daʒ wunneclîche golt
Verse: 4904    under in die schœnste haben solt.

Verse: 4905    an Paris die urteil wurden lân,
Verse: 4906    der sich unreht dar an versan.

Verse: 4907    Pallas wîsheit im gehieʒ,
Verse: 4908    daʒ er ir den apfel lieʒ;

Verse: 4909    Jûnô die bôt im rîcheit,
Verse: 4910    daʒ er ir den apfel niht verseit;

Verse: 4911    Vênus der apfel wart gegeben
Verse: 4912    durch der minne süeʒeʒ leben.

Verse: 4913    alsô ergienc die hôchzît,
Verse: 4914    von der wart sît vil vröiden quît.

Verse: 4915    die zwô gotinne des gewuogen,
Verse: 4916    den rât sie sint an truogen,

Verse: 4917    daʒ Trôjâ zestœret wart.
Verse: 4918    mich riwet des werden Achilles vart,

Verse: 4919    der ritterlîcheʒ ende dâ kôs
Verse: 4920    manec wert man den lîp dâ verlôs.

Verse: 4921       Dô er reit schouwen alsô,
Verse: 4922    dô kam der edel Macedô,

Verse: 4923    dâ er vil alter greber sach.
Verse: 4924    ieglich epitafium verjach

Verse: 4925    sînes namen und sîner tât,
Verse: 4926    als mich daʒ buoch bewîset hât.

Verse: 4927    er vant der werden vil dâ ligen,
Verse: 4928    den lebens vor Trôjâ wart verzigen.

Verse: 4929    'nâhe mir daʒ ze herzen gât,
Verse: 4930    daʒ an sô swacher stat

Verse: 4931    die werden recken sîn begraben,
Verse: 4932    die bî irn tagen haben

Verse: 4933    werden prîs geüebet.
Verse: 4934    mîn herz daʒ sêre betrüebet.'

Verse: 4935    dô er alsô in rede was,
Verse: 4936    ein epitafium er ouch las

Verse: 4937    wie dâ Achilles was verlorn.
Verse: 4938    sîn herze stach des jâmers dorn,

Verse: 4939    daʒ waʒʒer ûʒ gegen berge wiel,
Verse: 4940    über die wangen eʒ im viel,

Verse: 4941    daʒ eʒ die cleider nazte.
Verse: 4942    ze dem grabe er sich sazte.

Verse: 4943    im was umb den hêrren leit,
Verse: 4944    grôʒe clage er niht vermeit.

Verse: 4945    er sprach: Ð du werder man,
Verse: 4946    dîn leben mit wirde hâst vertân.

Verse: 4947    von dir man vil der tugent seit.
Verse: 4948    mîn herze jâmer nâch dir jeit.

Verse: 4949    soltestu noch bî mir genesen
Verse: 4950    oder wær ich doch bî dir gewesen,

Verse: 4951    ich wolde diz leben verliesen
Verse: 4952    und gern durch dich verkiesen;

Verse: 4953    solt ich dich zeimâl hân gesehen,
Verse: 4954    mir mohte nimmer baʒ geschehen.

Verse: 4955    menlîcher tât dîn herze phlac,
Verse: 4956    an dir vil hôher wirde lac.

Verse: 4957    er muoʒ sîn verfluochet,
Verse: 4958    der des ie geruochet

Verse: 4959    dâ von dîn küniclîche art
Verse: 4960    ze dem tôde gegeben wart.

Verse: 4961    ich enweiʒ niht wie ich sprechen mac,
Verse: 4962    wen verfluochet sî der tac,

Verse: 4963    dô des phîles wart gedâht,
Verse: 4964    der dich von dem leben brâht.

Verse: 4965    swie man dich siht begraben ligen,
Verse: 4966    noch ist dir wirde niht verzigen.

Verse: 4967    dîn lop des noch die volge hât,
Verse: 4968    daʒ nie menlîcher tât

Verse: 4969    von deheinem ritter sî geschehen,
Verse: 4970    als von dir, hêrre, ist gesehen.

Verse: 4971    des ist vil cleine dîn geschônet.
Verse: 4972    die werlt alsô lônet;

Verse: 4973    sie biutet süeʒe dâ nâch sûr.
Verse: 4974    mînes herzen nâchgebûr

Verse: 4975    wil die sorge belîben,
Verse: 4976    durch dich mîn vröide vertrîben.

Verse: 4977    west ich, wer eʒ der gote schult,
Verse: 4978    sie vernæmen dar umb mîn ungedult.'

Verse: 4979       Grôʒe swære sîn herze leit.
Verse: 4980    nû hete er heiʒen dar bereit

Verse: 4981    niwe milch mit honege gemischet,
Verse: 4982    (sîn herze in jâmer hischet)

Verse: 4983    der dürre sant der milch genôʒ,
Verse: 4984    Alexander sie in daʒ grab gôʒ

Verse: 4985    und allenthalben ûf den stein.
Verse: 4986    sîn triuwe was niht clein,

Verse: 4987    dier ze dem gebeine truoc.
Verse: 4988    'unsælic sî der ie gesluoc

Verse: 4989    slac ze dem phîle'!
Verse: 4990    er sprach: 'Unsælic sî die wîle,

Verse: 4991    in der erdâht wart die nôt,
Verse: 4992    dâ von du bist begraben tôt.'

Verse: 4993    er truoc im triuwe, die was starc.
Verse: 4994    dar nâch berouchte er den sarc

Verse: 4995    mit wîrouch und mit mirre.
Verse: 4996    alsus was dirre

Verse: 4997    Alexander bî dem grabe
Verse: 4998    in vil grôʒer ungehabe.

Verse: 4999    'du hâst noch grôʒer êren vil,
Verse: 5000    des ich dîn sêle bescheiden wil,

Verse: 5001    daʒ Homêrus des gedâhte,
Verse: 5002    daʒ er dîn lob volbrâhte

Verse: 5003    und nâch dînem tôde gewîtet hât.
Verse: 5004    du hâst gesagt den schanden mat,

Verse: 5005    sît dâ dîn name von sînem lobe
Verse: 5006    vil wirdikeit liget obe

Verse: 5007    und hôhe ob allem prîse swebt
Verse: 5008    und immer in der werlde lebt,

Verse: 5009    wie dir der lîp ist erstorben:
Verse: 5010    daʒ hâstu, helt, erworben.

Verse: 5011    deste ringer ist mîn swære
Verse: 5012    und ouch mîn sorge wære,

Verse: 5013    ob ich nâch mir lieʒe
Verse: 5014    den mîn lop in wirde stieʒe

Verse: 5015    und nâch tôde prîset sân,
Verse: 5016    als Homêrus dir hât getân.

Verse: 5017    sô mir die werlt genâhet
Verse: 5018    und überal mîn gebot enphâhet

Verse: 5019    und ich bin gewaltic worden
Verse: 5020    ôsten, westen, sunden, norden

Verse: 5021    und als die werlt der sunnen clâr
Verse: 5022    nimt ir liehten schînes war,

Verse: 5023    die ein lieht der werlt gît;
Verse: 5024    daʒ erwirbet noch mîn strît

Verse: 5025    daʒ der werlt orte alle vier
Verse: 5026    müeʒen eine warten mir:

Verse: 5027    wen daʒ mîn sælde erwirbet,
Verse: 5028    sô mir der lîp erstirbet

Verse: 5029    daʒ ich dan ieman hæte,
Verse: 5030    der mîn tât ze wiʒʒen tæte,

Verse: 5031    daʒ næm ich vür den paradîs.
Verse: 5032    got füege mir den man so wîs,

Verse: 5033    der nâch mîns lebens letze
Verse: 5034    mich in hôhe wirde setze

Verse: 5035    und dar nâch ân alle scham
Verse: 5036    unwandelbære lebe mîn nam.

Verse: 5037    der hât zwîvaltige nôt
Verse: 5038    des nam blîbet mit dem lîbe tôt.'




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.