TITUS
Ulrich von Eschenbach, Alexander
Part No. 35
Previous part

Chapter: 59a  
Alexander über das Glück


Verse: 5039       Der getriuwe und der reine
Verse: 5040    kniet clagende bî dem steine.

Verse: 5041    dô sîn ungehabe was sô grôʒ,
Verse: 5042    die ritter haldens dâ verdrôʒ.

Verse: 5043    mit rede sie in bestieʒen,
Verse: 5044    niht langer sie in dâ liegen,

Verse: 5045    mit in reit der werde man
Verse: 5046    durch den vorst gegen Tyrôn dan.

Verse: 5047    Alexander dirre rede began
Verse: 5048    rîdende wider sîne man

Verse: 5049    'eʒ dunket etslîche wie ich tobe,
Verse: 5050    daʒ ich mir selbe sô wol gelobe

Verse: 5051    und von mir ist noch niht geschehen,
Verse: 5052    dâ von man mir muge manheit jehen:

Verse: 5053    dem gelücke ich mich bevil,
Verse: 5054    an daʒ ich mich lâʒen wil.

Verse: 5055    ist mîn gelücke hiute kranc,
Verse: 5056    eʒ tuot lîht morgen widerwanc,

Verse: 5057    daʒ eʒ sich an mir êret
Verse: 5058    und mir mîn sælde mêret.

Verse: 5059    daʒ gelücke daʒ ist snel,
Verse: 5060    reht als ein kugel sinewel.

Verse: 5061    hiute gît eʒ dem manne guot
Verse: 5062    morgen trûrigen muot.

Verse: 5063    eʒ welzet her unde dar.
Verse: 5064    der niuwan glückes næme war

Verse: 5065    und eʒ niht gewâgen tar:
Verse: 5066    dâ vor ich mich wol bewar

Verse: 5067    der niht kan sûres lîden,
Verse: 5068    der muoʒ daʒ süeʒe vermîden.

Verse: 5069    eʒ ist ofte geschehen,
Verse: 5070    daʒ wir alle hân gesehen,

Verse: 5071    den eines tages gelücke lieʒ,
Verse: 5072    daʒ eʒ des andern in in sælde stieʒ.

Verse: 5073    waʒ ob mir alsam geschiht?
Verse: 5074    dar umb solt ir verzagen niht.

Verse: 5075    dem gelücke ich getriuwen sol.
Verse: 5076    eʒ sol mich machen liebes vol.'

Verse: 5077       Alexander aber sprach,
Verse: 5078    als im sîn menlich art verjach.

Verse: 5079    'daʒ ir mir deste baʒ geloubet
Verse: 5080    und iuch selbe niht trôstes roubet,

Verse: 5081    sô wil ich iu ein dinc sagen,
Verse: 5082    daʒ ir doch heimelich sult tragen,

Verse: 5083    wie eʒ mir quam
Verse: 5084    ze der zît, dô mîn muoter nam

Verse: 5085    Pausônias mit gewalde.
Verse: 5086    mit tôde ich den valde,

Verse: 5087    wênic ich im des vertruoc.
Verse: 5088    mînen vater er ze tôde sluoc,

Verse: 5089    er was starc und ich kranc:
Verse: 5090    an im mir doch alsô gelanc.

Verse: 5091    eʒ solde wol der starke man
Verse: 5092    mîner zwên gebunden hân.

Verse: 5093    dô sluoc des gelückes kür
Verse: 5094    mir ze guote, im ze arge vür.

Verse: 5095    wie eʒ mir halt hernâch ergê,
Verse: 5096    noch wil ich iu sagen mê,

Verse: 5097    dar nâch dô daʒ geschach,
Verse: 5098    waʒ ich in eime troume sach,

Verse: 5099    dô ich sus in sorgen was
Verse: 5100    und in mînem herzen las

Verse: 5101    waʒ ich tuon wolde,
Verse: 5102    ob ich mich heben solde

Verse: 5103    oder ob ich blîben mohte,
Verse: 5104    waʒ mir zem besten tohte.

Verse: 5105    der slâf und trâcheit mir geriet
Verse: 5106    daʒ von iu ze gemache schiet.

Verse: 5107    mit den ougen ich slâfende lac,
Verse: 5108    daʒ herze dannoch sorgen phlac.

Verse: 5109    mir kam vür in slâfe
Verse: 5110    ein man in grôʒem zâfe.

Verse: 5111    ich kôs an im rîche kleit,
Verse: 5112    grôʒ zierde was dar an geleit

Verse: 5113    mit golde und mit gesteine
Verse: 5114    ûf wîʒe lînwât reine.

Verse: 5115    mit im ein lieht erlûhte,
Verse: 5116    daʒ mich in slâfe des dûhte

Verse: 5117    wie der sunnen glanzer schîn
Verse: 5118    mit im drunge zen wenden în.

Verse: 5119    grôʒer schônheit er wielt.
Verse: 5120    daʒ cleit sich eben umb in vielt.

Verse: 5121    wol mich des ze sehen luste.
Verse: 5122    umb den hals und ze der bruste

Verse: 5123    was er vol gehêret,
Verse: 5124    vil rîcheit dar an gekêret,

Verse: 5125    dâ der soum ein ende nam
Verse: 5126    vorn und hinden ûf den fuoʒ alsam:

Verse: 5127    ob ich in rehte merken kan,
Verse: 5128    deiswâr er was ein himelsch man.

Verse: 5129    eben geschürzet lac im der schôʒ.
Verse: 5130    manger varwe sîn gewant genôʒ.

Verse: 5131    in der wîse sach ich in stên
Verse: 5132    als die priester ze dem alter gên.

Verse: 5133    ein rîche snuor sîn houbt bevienc,
Verse: 5134    ze tal sie über die ahsel hienc.

Verse: 5135    dar obe ich eine crône sach,
Verse: 5136    der grôʒer schônheit niht gebrach:

Verse: 5137    die gap von liehte solicheʒ brehen,
Verse: 5138    daʒ ich kûm mohte ûf gesehen.

Verse: 5139    wunnenclîchen was sîn hâr,
Verse: 5140    lanc reide nâch golde gevar.

Verse: 5141    die rubîn an im brunnen
Verse: 5142    rœter dann die sunnen.

Verse: 5143    an sîner stirne ich zeichen vant,
Verse: 5144    als got mit namen ist genant.

Verse: 5145    ich was in grôʒen sorgen.
Verse: 5146    ich wânde mir wære verborgen

Verse: 5147    sîn rede, ob er begunde,
Verse: 5148    daʒ ich der niht enkunde,

Verse: 5149    ouch wolt ich in gefrâget hân
Verse: 5150    wer er wære, der werde man,

Verse: 5151    oder von wannen er wære,
Verse: 5152    daʒ er mir sagte die mære,

Verse: 5153    oder daʒ er geruochte
Verse: 5154    mir sagen waʒ er suochte.

Verse: 5155       Dô ich des gedâhte,
Verse: 5156    sîne wort er gegen mir brâhte.

Verse: 5157    mit diser rede kam er mir vür:
Verse: 5158    'dir ist gegeben der sælden kür.

Verse: 5159    du hâst der krancheit an gesiget.
Verse: 5160    dîner craft kein fürste gelîche wiget.

Verse: 5161    waʒ die erde begrîfet der rîche,
Verse: 5162    die mach ich alle gelîche

Verse: 5163    daʒ sie dir dienen müeʒen
Verse: 5164    und sich erbieten ze dînen füeʒen.'

Verse: 5165    er gebôt mir ouch alsô
Verse: 5166    ô du starker Macedô,

Verse: 5167    du solt rehte merken mich.
Verse: 5168    wol ûf, niht lenger sûme dich!

Verse: 5169    der lande wîte du solt durchvarn
Verse: 5170    und der vînde wênic sparn.

Verse: 5171    du solt mîne helfe hân,
Verse: 5172    die werlt wirt dir undertân.

Verse: 5173    dar zuo du erkorn bist.
Verse: 5174    wen du in solichem gewande sihst,

Verse: 5175    als ich vor dir gecleidet bin,
Verse: 5176    der sol in dînem fride sîn.'

Verse: 5177    dâ mit sprach er 'got hüete dîn'
Verse: 5178    und fuor gegen den lüften hin.

Verse: 5179    ich weiʒ wol er ist ein gotes bote
Verse: 5180    und ist mîner fröiden tote.

Verse: 5181    die hât er hôch an mir erhaben
Verse: 5182    und mîne sorge tief begraben.

Verse: 5183    wol der werde mir gehieʒ.
Verse: 5184    in guotem trôste er mich lieʒ.

Verse: 5185    dar nâch er daʒ hûs begôʒ
Verse: 5186    mit süeʒem ruche, der was grôʒ,

Verse: 5187    den ich noch gerne vernæme,
Verse: 5188    ob sîn wirde des gezæme

Verse: 5189    daʒ sô süeʒer smac noch ze einer stunt
Verse: 5190    von sîner güete mir wurde kunt.'




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.