TITUS
Ulrich von Eschenbach, Alexander
Part No. 36
Previous part

Chapter: 93  
Alexander erobert Tyrus


Verse: 5191       Dô er den hêrren alsô gesagte,
Verse: 5192    die rede in wol behagte.

Verse: 5193    sie wâren komen sô nâhen,
Verse: 5194    daʒ sie Tyrôn sâhen.

Verse: 5195    nû was eʒ ouch gegen vesperzît.
Verse: 5196    ûf einem schœnen anger wît

Verse: 5197    wol eine mîle von der stat
Verse: 5198    leite sich der künic unde bat

Verse: 5199    Dîmum, daʒ er versuochte
Verse: 5200    ob daʒ inner volc geruochte

Verse: 5201    im die stat mit guote geben,
Verse: 5202    oder ob sie vîntlîcheʒ leben

Verse: 5203    gegen im erzeigen wolde:
Verse: 5204    ervarn er daʒ solde

Verse: 5205    Dîmus sich niht sûmte,
Verse: 5206    den anger er dannoch rûmte,

Verse: 5207    ze Tyrôn er mit fride reit
Verse: 5208    sîne botschaft er niht vermeit.

Verse: 5209    jâ heten die innern wol vernomen
Verse: 5210    Alexanders zuo komen,

Verse: 5211    daʒ volc sich strîtes gegen im bewuoc.
Verse: 5212    die stat was veste genuoc.

Verse: 5213    sie heten sich mit wer
Verse: 5214    wol bereit gegen dem her.

Verse: 5215       Dô Dîmus fride genam
Verse: 5216    und er dem tor sô nâhen kam,

Verse: 5217    ritter er gnuoc dar ûfe sach,
Verse: 5218    ze den er dise rede sprach.

Verse: 5219    'mich hât der künic her gesant.
Verse: 5220    er spricht erbeschaft ûf diz lant

Verse: 5221    und gibt, daʒ ir im dienen sult
Verse: 5222    und sîn gebot dar an erfult,

Verse: 5223    daʒ ir im die stat wellent geben:
Verse: 5224    sô mugt ir mit gemache leben;

Verse: 5225    ob ir in diser rede entwert,
Verse: 5226    sô wiʒʒet daʒ er an iuch strîtes gert;

Verse: 5227    er giht daʒ ir eʒ im arnet.'
Verse: 5228    'er ist getriwe, daʒ er uns warnet

Verse: 5229    und stêt wol ze lobene'
Verse: 5230    sprach ein grâve dort obene;

Verse: 5231    'nû rîtent hin und sagt im daʒ
Verse: 5232    wir wellen haben sînen haʒ.

Verse: 5233    wir förhten in harte cleine.
Verse: 5234    die wîle der admirât lebt eine,

Verse: 5235    sô muge wir wol vor im genesen.
Verse: 5236    wil er gegen uns in strîte wesen,

Verse: 5237    er sol daʒ schier bevinden,
Verse: 5238    daʒ im muoʒ fröide swinden.

Verse: 5239    wir suln in machen strîtes sat
Verse: 5240    und sagen sîner tumpheit mat.

Verse: 5241    Ob der keiser niht enwære,
Verse: 5242    dannoch wær eʒ im sware,

Verse: 5243    daʒ er uns wolde twingen.
Verse: 5244    im sol hie übel gelingen.

Verse: 5245    heiʒent in uns tuon swaʒ er müge:
Verse: 5246    ob er iht ze strîte tüge,

Verse: 5247    daʒ wellen wir ervarn baʒ.
Verse: 5248    rîtent hin und sagt im daʒ.'

Verse: 5249    Mit zühten sprach der werde man
Verse: 5250    'welt ir niht ander rede hân

Verse: 5251    wann dise, die ich hân gehôrt?'
Verse: 5252    'rîtent hin, sagt im die wort,

Verse: 5253    als ir habt vernomen ê.
Verse: 5254    ir mugt im ouch wol sagen mê.

Verse: 5255    kan er vor tumpheit sich bewarn,
Verse: 5256    sô sol er drâte von hinnen varn.'

Verse: 5257    'ir beginnent eʒ weiʒgot beclagen,
Verse: 5258    sol ich im die mære sagen.'

Verse: 5259    'wir biten ir iuch verswîgen niht,
Verse: 5260    waʒ halt uns dar umb geschiht.'

Verse: 5261    der herzoge Dîmus reit sân
Verse: 5262    wider ze sîme hêrren dan.

Verse: 5263    er sagt im die rehten mære
Verse: 5264    waʒ der burger wille wære.

Verse: 5265       dô er vernam daʒ widerbot,
Verse: 5266    er swuor zehant der burger tôt

Verse: 5267    und daʒ er die stat wolde brechen.
Verse: 5268    alsô wolt er daʒ rechen.

Verse: 5269    dô was von tambûren grôʒ braht.
Verse: 5270    mit schalle vertriben sie die naht

Verse: 5271    und mit grôʒer hôchvart.
Verse: 5272    nû bleip ungespart,

Verse: 5273    Des morgene, dô sie des dûhte
Verse: 5274    daʒ der tac erlûhte,

Verse: 5275    mit her er vürbaʒ ructe,
Verse: 5276    mit sturme er an die stat dructe.

Verse: 5277    er begunde vast die sînen manen.
Verse: 5278    die innern sâhen des fürsten vanen,

Verse: 5279    den Permêniô vaste hin an truoc,
Verse: 5280    der sich stürmens dâ bewuoc.

Verse: 5281    die innern sich vaste werten,
Verse: 5282    als die sich gerne nerten.

Verse: 5283    Alexander die stat zerfuorte.
Verse: 5284    sîn zorn daʒ volc sô ruorte,

Verse: 5285    er hieʒ eʒ slâhen, vâhen.
Verse: 5286    gegen Jhêrusalêm er begunde gâhen,

Verse: 5287    gegen der er des selben willen was.
Verse: 5288    die âventiure mir sô las,

Verse: 5289    wie im sîn zorn wart vertriben
Verse: 5290    daʒ sie ungemüet bliben.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.