TITUS
Ulrich von Eschenbach, Alexander
Part No. 37
Previous part

Chapter: 37c  
In Jhêrusalêm


Verse: 5291       die von Jhêrusalêm wurden gewar
Verse: 5292    daʒ Alexander kæme dar.

Verse: 5293    der ir hœhster bischof hieʒ
Verse: 5294    mit den andern des niht lieʒ,

Verse: 5295    die ouch dâ priester wâren,
Verse: 5296    mit solichen cleidern clâren

Verse: 5297    als er den man gecleidet sach,
Verse: 5298    der in dem troume wider in sprach,

Verse: 5299    dâ von im zwîvel was worden kranc;
Verse: 5300    nû was der priester tweln niht lanc,

Verse: 5301    gegen dem künec sie giengen
Verse: 5302    mit den burgern sie in enphiengen

Verse: 5303    nâch fürsten rehte schône.
Verse: 5304    sie jâhen daʒ er die crône

Verse: 5305    in Palestîne solde tragen.
Verse: 5306    nû hœrt von Alexandrô sagen

Verse: 5307    waʒ sîn wirde dâ begienc.
Verse: 5308    dô in daʒ volc mit liebe enphienc

Verse: 5309    und er den bischof vor im sach,
Verse: 5310    sîn zuht im alsô verjach,

Verse: 5311    der fürste von dem pherde saʒ.
Verse: 5312    er trat ein wênic vürbaʒ,

Verse: 5313    dem volke bôt er sînen gruoʒ,
Verse: 5314    dem bischof viel er an den fuoʒ.

Verse: 5315    wîsheit in daʒ lêrte.
Verse: 5316    sîn gelücke sich dô mêrte.

Verse: 5317    dô sîne hêrren daʒ gesâhen,
Verse: 5318    etlîchen eʒ begunde versmâhen,

Verse: 5319    daʒ er sô dêmüetic sich dâ erbôt.
Verse: 5320    sie sprâchen 'waʒ ist dise nôt?

Verse: 5321    er wil sich unwitze nieten.
Verse: 5322    solich êre im muostes bieten

Verse: 5323    waʒ er der liute noch ie betwanc.'
Verse: 5324    er lac vor in gestrecket lanc.

Verse: 5325    der bischof zucte alzehant
Verse: 5326    den fürsten ûf bî der hant.

Verse: 5327    zühteclîchen gegen der stat
Verse: 5328    der bischof an sîner hant trat.

Verse: 5329    dô sie nâheten dem tor,
Verse: 5330    Alexander hieʒ dâ vor

Verse: 5331    der sînen blîben ein teil.
Verse: 5332    die von der stat wâren geil,

Verse: 5333    des hêrren fröuten sie sich sêre.
Verse: 5334    mit gesange erbuten sie im êre.

Verse: 5335    aller hande seitenspil
Verse: 5336    hôrte man dâ erclingen vil.

Verse: 5337    Alexander hete sîner man
Verse: 5338    wol hundert mit im heiʒen gân,

Verse: 5339    die ouch missewende vlôch:
Verse: 5340    die phert man nâch den werden zôch.

Verse: 5341    wol vierhundert dar nâch riten,
Verse: 5342    die andern vor der stat erbiten.

Verse: 5343    von den wurden die gezelt
Verse: 5344    schiere geslagen ûf daʒ velt.

Verse: 5345       Die priester den geprîsten
Verse: 5346    in daʒ tempel wîsten.

Verse: 5347    er gap sô rîche cleinôt dar,
Verse: 5348    der man sît lange nam dâ war.

Verse: 5349    mit sîner venje und mit gebet
Verse: 5350    Alexander got die êre tet.

Verse: 5351    Salomône jach er wirde,
Verse: 5352    wen er in solicher zirde

Verse: 5353    daʒ betehûs sach erbiuwen.
Verse: 5354    sîn tôt begunde in riuwen.

Verse: 5355    der bischof tet dem hêrren kunt
Verse: 5356    in wie langer stunt

Verse: 5357    der tempel wart volbrâht
Verse: 5358    von Salomône, der sîn erdâht.

Verse: 5359    'vierundvierzic jâr worht man dar an'
Verse: 5360    alsô seit im der werde man.

Verse: 5361    Alexandern den geêrten
Verse: 5362    ir ê die bischof lêrten.

Verse: 5363    vierzehen tage er dâ bleip.
Verse: 5364    die zît er mit in wol vertreip.

Verse: 5365    sie hielten in vil schône.
Verse: 5366    des gap er in ze lône

Verse: 5367    siben jâr lieʒ er sie frî
Verse: 5368    und was in güetlîchen bî.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.