TITUS
Anna von Koeln, Liederbuch
Part No. 30
Previous part

Song: 39.  
Manuscript page: 59a-63b 
Carmen


Strophe: 1  
Verse: 1     Hyff op dyn cruytz, myn alrelieffste bruyt,
Verse: 2     volge myr na ind ganck dyns selffs ws;
Verse: 3     want ich gedragen haen vur dich,
Verse: 4     haistu mych leiff, so ganck na myr.

Strophe: 2  
Verse: 1     O Jhesus, alrelieffste her,
Verse: 2     ich bin noch ionck ind alto teer,
Verse: 3     ich haen dich lieff, dat is ommer wair,
Verse: 4     mer dat cruytz is myr vil zo swair.

Strophe: 3  
Verse: 1     Ich was ionger, do ic dat droich;
Verse: 2     clage neit, du bis stairck genoech,
Verse: 3     wanne du bis alt ind calt,
Verse: 4     so en haistu des crucis geyne gewalt.

Strophe: 4  
Verse: 1     Wie moecht ich lyden dit betwanck,
Verse: 2     der dage is vil, dat iair is lanck;
Verse: 3     ich byn des crucis ongewoen,
Verse: 4     och schoen, myn alrelieffste, schoen!

Strophe: 5  
Verse: 1     Wie bistu, lieff, so balde verlegen?
Verse: 2     du mois noch stryden als eyn degen,
Verse: 3     ich wil castien dynen iongen lyff,
Verse: 4     du wirtz myr anders vil zo styff.

Strophe: 6  
Verse: 1     Her, dattu woult, dat mois all wesen,
Verse: 2     mer des crucis en mach ich neit genesen;
Verse: 3     moit it syn ind sal ich it draegen,
Verse: 4     so mois ich krencken ind vertzagen.

Strophe: 7  
Verse: 1     Weenstu in den rosen baden?
Verse: 2     Du mois noch druch die dorne waden!
Verse: 3     Suych an dyn cruytz ind ouch dat myn,
Verse: 4     wie ongelich swair sy syn.

Strophe: 8  
Verse: 1     Wir lesen in der hilger schryfft:
Verse: 2     dyn ioch is suesse, dyn burden licht;
Verse: 3     wie bistu myr alsus enxstlichen hart,
Verse: 4     myn alrelieffste brudegom tzart.

Strophe: 9  
Verse: 1     Ongewoenden besweirt den moet,
Verse: 2     lyt ind swich, it wirt noch goit;
Verse: 3     myn cruytz is eyn so kostlich pant,
Verse: 4     weme ich it gan, der is myn vrunt.

Strophe: 10  
Verse: 1     Dynen vrunden geiffstu wenich rast,
Verse: 2     my gruwelt vur den swaren last;
Verse: 3     ich sorgen, ich en sals neit moegen herden,
Verse: 4     och lieff her, wat sal myns gewerden?

Strophe: 11  
Verse: 1     Dat hemelrich lyt gewalt,
Verse: 2     mer du bis noch van mynnen kalt;
Verse: 3     hetzstu mych lieff, it wurde noch goit,
Verse: 4     want myn mynne macht allen arbeit suess.

Strophe: 12  
Verse: 1     O her, gyff myr der mynnen brant,
Verse: 2     myn kranckeit is dir bekant;
Verse: 3     liestu mych op myr selver staen,
Verse: 4     so weiss ich wail, ich mois vergaen.

Strophe: 13  
Verse: 1     Ich byn swartz ind suverlich,
Verse: 2     ich byn suver ind minnentlich;
Verse: 3     ich geve arbeit inde rast,
Verse: 4     betruwe up mich, so steistu vast.

Strophe: 14  
Verse: 1     O her, off it ommer wesen mach,
Verse: 2     des crucis neme ich gerne verdrach;
Verse: 3     mer woltu it haven ind mois it syn,
Verse: 4     dyn will geschie ind neit der myn.

Strophe: 15  
Verse: 1     Tzo dem hemelrich is eyn wech alleyn,
Verse: 2     dat is der cruytzwech ind anders geyn;
Verse: 3     all dyn wailvart inde ewich heil
Verse: 4     steit an den cruytz: nu kuysser eyn.

Strophe: 16  
Verse: 1     Sulde ich dyn hulde ind dyn rich verliesen,
Verse: 2     er hondert cruytz wulde ich kiesen;
Verse: 3     her, gyff myr macht ind lidsamheit
Verse: 4     ind crucige mych, it sy myr lieff off leit.

Strophe: 17  
Verse: 1     Als dir dat cruytz zo hartzen geit,
Verse: 2     so denck, wat ich dir haen bereit:
Verse: 3     mych selver geven ich dir zo loen,
Verse: 4     mit den engelen die ewiche cron.

Strophe: 18  
Verse: 1     O myn alrelieffste sele,
Verse: 2     mynne Got ind lais die werelt heel;
Verse: 3     sich an dat goit, dat Jhesus is,
Verse: 4     des hemels bistu gans gewys.

Strophe: 19  
Verse: 1     Dan wil ich dich omvangen
Verse: 2     ind vur dir an den dantze gaen,
Verse: 3     da du mir na volgen salt
Verse: 4     ind ontfangen van myr dat dusent valt.

Strophe: 20  
Verse: 1     O myn lieffste brudegom tzart,
Verse: 2     dit is dynre mynnen art,
Verse: 3     lieff zo haen, die dich hie mynnen
Verse: 4     myt rynen hertzen int myt luteren synnen.

Strophe: 21  
Verse: 1     Du salt rasten na der arbeit dyn
Verse: 2     ind myt myr in ewicher vrouden syn;
Verse: 3     nu sal haven dyn lyden eyn ende
Verse: 4     ind syn verloist van allen ellende.

Strophe: 22  
Verse: 1     Des dancke ich dir van allem hertzen,
Verse: 2     dat ich verloist byn allen smertzen;
Verse: 3     dyn barmherzicheit is ongetzalt
Verse: 4     ind dyn genad mannychvalt.

Strophe: 23  
Verse: 1     Nu saltu leven na dyme willen
Verse: 2     ind syn allewege in suesser stillen;
Verse: 3     nu saltu haven wunssches gewalt
Verse: 4     ind ewiger vrouden alle tzyt behalt.

Strophe: 24  
Verse: 1     Nu wil ich alle wege vroelich syn
Verse: 2     ind loven dich van der genaden dyn,
Verse: 3     die du hais gegeven mir,
Verse: 4     des dancken ich van ganssem hertzen dir.

Strophe: 25  
Verse: 1     Nu saltu eweclich vroelich syn
Verse: 2     sonder leit ind eynich pyn;
Verse: 3     ich wil syn dyn ewiche crone
Verse: 4     nu ind alle wegen in des hemels throne.



Next part


This text is part of the TITUS edition of Anna von Koeln, Liederbuch.

Copyright TITUS Project, Frankfurt a/M, 27.11.2008. No parts of this document may be republished in any form without prior permission by the copyright holder.