TITUS
Hartmann von Aue, Erec
Part No. 6
Previous part

Verse group: (6) 
Verse: 500    getuon deheiner slahte rât
Verse: 501    (ich sage iu wie mîn muot stât),

Verse: 502    sô enwürde er strîtes niht vermiten.
Verse: 503    mit rosse bin ich wol geriten:

Verse: 504    sô soldet ir mich lân rîten
Verse: 505    mit iuwer tohter ênîten

Verse: 506    ûf die selben hôchzît.
Verse: 507    ich behabete den strît

Verse: 508    daz si schœner wære
Verse: 509    (und næme den sparwære)

Verse: 510    dan des ritters vriundîn.
Verse: 511    nû sehet ob ez müge sîn

Verse: 512    und tuotz ûf daz gedinge,
Verse: 513    ob mir alsô gelinge

Verse: 514    daz mir der sige belîbe,
Verse: 515    sô nim ich si ze wîbe.

Verse: 516    dar umbe endurfet irz niht lân,
Verse: 517    si enhât an mir niht missetân,

Verse: 518    ez mac wol mit êren sîn.
Verse: 519    ich künde iu den vater mîn:

Verse: 520    der ist der künec lac genant.
Verse: 521    beide liute unde lant,

Verse: 522    lîp und allez daz ich hân
Verse: 523    mache ich ir undertân,

Verse: 524    daz si des muoz walten.'
Verse: 525    dô begunden dem alten

Verse: 526    von jâmer vil tougen
Verse: 527    truoben diu ougen:

Verse: 528    weinens sîn herze wart gemant
Verse: 529    mit dirre rede sâ zehant

Verse: 530    daz er kûme vür brâhte
Verse: 531    die rede der er gedâhte.

Verse: 532    er sprach: ʽherre, disen spot
Verse: 533    sult ir lâzen durch got.

Verse: 534    iuwer rede ist vil verlâzenlich.
Verse: 535    nû hât got über mich

Verse: 536    verhenget swes er wolde:
Verse: 537    anders dan ez solde

Verse: 538    sô ist mîn leben nû getân.
Verse: 539    daz wil ich von gote hân:

Verse: 540    des gewaltes ist alsô vil,
Verse: 541    er mac den rîchen swêne er wil

Verse: 542    dem armen gelîchen
Verse: 543    und den armen gerîchen.

Verse: 544    sîn gewalt ist an mir worden schîn.
Verse: 545    durch got sult ir erbeten sîn

Verse: 546    daz dirre schimph belîbe.
Verse: 547    ir getuot ze wîbe

Verse: 548    mîner tohter wol rât,
Verse: 549    wan si des guotes niht enhât.

Verse: 550    swie grôzen bresten ich nû dol,
Verse: 551    doch sult ir mir gelouben wol,

Verse: 552    ich hân gesehen ê den tac
Verse: 553    daz iuwer vater der künec lac

Verse: 554    mich gesellen nande.
Verse: 555    wir nâmen in sînem lande

Verse: 556    beide mit ein ander swert.
Verse: 557    daz ir nû mîner tohter gert,

Verse: 558    mich entriege mîn wân,
Verse: 559    daz hânt ir durch schimph getân.'

Verse: 560    Êrec wart von der rede rôt.
Verse: 561    er sprach: ʽherre, welch nôt

Verse: 562    twinget iuch ûf den wân
Verse: 563    daz ichz durch schimph habe getân?

Verse: 564    daz sult ir ûz dem muote lân
Verse: 565    und mîniu wort vür ernest hân.

Verse: 566    waz solde mir iezuo der spot?
Verse: 567    jâ bite ich mir sô helfen got

Verse: 568    ze sêle und ze lîbe,
Verse: 569    als ich mir ze wîbe

Verse: 570    iuwer tohter gerne nemen wil.
Verse: 571    des engibe ich iu kein langer zil

Verse: 572    wan an die selben hôchzît,
Verse: 573    daz sich endet der strît,

Verse: 574    ob mir nû iuwer helfe vrumt
Verse: 575    daz mir mîn dinc ze heile kumt.

Verse: 576    ir armuot hœre ich iuch klagen:
Verse: 577    der sult ir stille gedagen.

Verse: 578    ez enschadet iu niht gegen mir,
Verse: 579    wan ich ir guotes wol enbir.

Verse: 580    ouch hete ich einen swachen muot,
Verse: 581    næme ich vür mînen willen guot.

Verse: 582    nû gedenket dar zuo.
Verse: 583    sît daz der strît sol wesen vruo,

Verse: 584    sô ensûmet uns niht mêre.
Verse: 585    an iu stât gar mîn êre:

Verse: 586    und wizzet rehte âne wân,
Verse: 587    ich leiste als ich gelobet hân.'

Verse: 588    der alte was der rede vrô.
Verse: 589    er sprach: ʽsît irz meinet alsô,

Verse: 590    sô haben wir hie zehant
Verse: 591    vil schœnez îsengewant,

Verse: 592    beidiu behende unde guot.
Verse: 593    des kunde mich diu armuot

Verse: 594    noch nie betwingen
Verse: 595    noch ûf den zwîvel bringen

Verse: 596    daz ichs würde âne,
Verse: 597    ichn behieltez nâch wâne,

Verse: 598    ob es mînem vriunde würde nôt,
Verse: 599    (der selbe wille mirz gebôt

Verse: 600    daz ichz im lîhen solde)
Verse: 601    unz mirs got gunnen wolde.
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.