TITUS
Hartmann von Aue, Erec
Part No. 7
Previous part

Verse group: (7) 
Verse: 602    sô hete ich ie einen site
Verse: 603    daz ich im selbe dâ mite

Verse: 604    vil willeclîchen was bereit,
Verse: 605    unz mir daz alter an gestreit:

Verse: 606    daz hât mir gar die kraft benomen.
Verse: 607    nû ist ez uns ze staten komen,

Verse: 608    daz ez uns vremder bete erlât
Verse: 609    und tuot uns unwirde rât.

Verse: 610    ouch hân ich unze her
Verse: 611    beide schilt unde sper

Verse: 612    zesamene behalten.'
Verse: 613    des genâdete er dem alten.

Verse: 614    er bat im ez zeigen dar,
Verse: 615    durch daz er næme war

Verse: 616    ob ez im reht wære,
Verse: 617    ze enge noch ze swære.

Verse: 618    dô was ez behende unde guot.
Verse: 619    des gewan er vil rîchen muot,

Verse: 620    Êrec fil de roi lac.
Verse: 621    vil schiere gienc ûf der tac

Verse: 622    daz si solden rîten
Verse: 623    hin zen hôchzîten.

Verse: 624    dô der tac vol erschein,
Verse: 625    dô riten si ûf tulmein.

Verse: 626    dâ hiez si der herzoge îmâîn
Verse: 627    grôze willekomen sîn.

Verse: 628    ir komennes nam in wunder.
Verse: 629    nû nâmen si in besunder

Verse: 630    und sageten im ir geverte gar,
Verse: 631    war umbe Êrec was komen dar,

Verse: 632    und bâten in râtes dar zuo.
Verse: 633    er sprach: ʽich sage iu waz ich tuo.

Verse: 634    beide lîp unde guot
Verse: 635    unde willeclîcher muot

Verse: 636    sol iu dar zuo sîn bereit,
Verse: 637    her gast, durch iuwer vrümekeit

Verse: 638    und durch mîner nifteln êre.
Verse: 639    ouch volget mîner lêre

Verse: 640    und lât mich si vazzen baz.'
Verse: 641    Êrec der widerredete daz.

Verse: 642    er sprach: ʽdes ensol niht geschehen.
Verse: 643    er hæte harte missesehen,

Verse: 644    swer ein wîp erkande
Verse: 645    niuwan bî dem gewande.

Verse: 646    man sol einem wîbe
Verse: 647    kiesen bî dem lîbe

Verse: 648    ob si ze lobe stât
Verse: 649    unde niht bî der wât.

Verse: 650    ich lâze ouch hiute schouwen
Verse: 651    ritter unde vrouwen,

Verse: 652    und wære si nacket sam mîn hant
Verse: 653    unde swerzer dan ein brant,

Verse: 654    daz mich sper unde swert
Verse: 655    volles lobes an ir wert,

Verse: 656    oder ich verliuse daz leben.'
Verse: 657    ʽgot sol iu gelücke geben'

Verse: 658    sprach der herzoge îmâîn:
Verse: 659    ʽouch sult ir des gewis sîn

Verse: 660    daz iuwer ellenthafter muot
Verse: 661    iu gevüeget allez guot.'

Verse: 662    mit dirre rede si kâmen
Verse: 663    dâ si messe vernâmen

Verse: 664    von dem heiligen geiste:
Verse: 665    des phlegent si aller meiste

Verse: 666    die ze ritterschefte sinnent
Verse: 667    und turnieren minnent.

Verse: 668    dô was bereit der imbîz.
Verse: 669    man dienete in in allen vlîz.

Verse: 670    alsô der dô ergie,
Verse: 671    menneclîch ze vreuden vie

Verse: 672    dar nâch als in dûhte guot
Verse: 673    und in lêrte sîn muot.

Verse: 674    ir spil was umbe die stat
Verse: 675    dâ der sparwære was ûf gesat.

Verse: 676    nû nâmen si alle besunder war,
Verse: 677    wenne îdêrs fil niut dar

Verse: 678    mit sîner âmîen kæme
Verse: 679    und den sparwære næme,

Verse: 680    als er ouch ê hete getân.
Verse: 681    nû sâhen si dort zuo gân

Verse: 682    Êrecken mit vrouwen ênîten.
Verse: 683    er vuorte si an sîner sîten

Verse: 684    hin dâ er den sparwære sach.
Verse: 685    ze des ritters gehœrde er sprach:

Verse: 686    ʽvrouwe, lœset diu bant
Verse: 687    und nemet den sparwære ûf die hant.

Verse: 688    wan daz ist wâr âne strît,
Verse: 689    hiest niemen schœner dan ir sît.'

Verse: 690    dem ritter was daz ungemach.
Verse: 691    vil unwirdeclîche er sprach:

Verse: 692    ʽlât den sparwære stân!
Verse: 693    ez ensol iu niht sô wol ergân,

Verse: 694    ir dürftiginne.
Verse: 695    war tuot ir iuwer sinne?

Verse: 696    lânt in ir der er baz gezeme
Verse: 697    und diu in von rehte neme.

Verse: 698    daz ist hie mîn vriundîn:
Verse: 699    der sol er billîchen sîn.'
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.