TITUS
Hartmann von Aue, Erec
Part No. 9
Previous part

Verse group: (9) 
Verse: 800    er begunde ein wênic rîten
Verse: 801    ûz gegen vrouwen ênîten

Verse: 802    dâ er si weinende sach.
Verse: 803    über des schiltes rant er sprach:

Verse: 804    ʽgehabet iuch wol, guot vrouwe maget.
Verse: 805    ich bin noch vil unverzaget:

Verse: 806    iuwer sorge sol sich enden.'
Verse: 807    daz ros begunde er wenden

Verse: 808    daz ez in gegen dem ritter truoc.
Verse: 809    daz sper er undern arm sluoc.

Verse: 810    der ritter im engegen kam
Verse: 811    wol gewarnet alsam.

Verse: 812    si liezen zesamene strîchen
Verse: 813    alsô krefteclîchen

Verse: 814    sô si meiste von ir sinnen
Verse: 815    ûz den rossen mohten gewinnen.

Verse: 816    sô sêre zesamene si stâchen
Verse: 817    daz dem ritter brâchen

Verse: 818    die darmgürtel beide
Verse: 819    (dô gelebete erm nie sô leide),

Verse: 820    surzengel und vürbüege.
Verse: 821    doch er guot ellen trüege,

Verse: 822    Êrec in von dem rosse schiet
Verse: 823    ze spotte aller der diet.

Verse: 824    als Êrecke dô sô wol geschach
Verse: 825    daz er den ritter nider stach,

Verse: 826    von im enthielt er hôher baz.
Verse: 827    daz tete er umbe daz

Verse: 828    daz ieman des möhte jehen
Verse: 829    daz im diu schande wære geschehen

Verse: 830    daz er in ligende hete erslagen.
Verse: 831    er wolde bezzer wort bejagen:

Verse: 832    er erbeizte und hiez in ûf stân.
Verse: 833    zesamene liezen si dar gân.

Verse: 834    dô sach man si vehten
Verse: 835    gelîch zwein guoten knehten.

Verse: 836    daz viur in ûz den helmen vlouc.
Verse: 837    si vâhten als den liuten touc

Verse: 838    dies diu grimme nôt gebat:
Verse: 839    wan si hâten gesat

Verse: 840    umbe den sige vil hôhez phant:
Verse: 841    ez galt ze gebenne dâ zehant

Verse: 842    minner noch mêre
Verse: 843    wan beide lîp und êre.

Verse: 844    dem tâten si vil gelîch.
Verse: 845    ir vehten was manlîch.

Verse: 846    des triben si vil und genuoc,
Verse: 847    unz daz îdêrs Êrecken sluoc

Verse: 848    ûf den helm, daz er gie
Verse: 849    von dem slage ûf diu knie.

Verse: 850    als vrouwe ênîte daz ersach,
Verse: 851    grôz wart ir ungemach.

Verse: 852    si begunde ir gesellen klagen.
Verse: 853    si wânde er wære erslagen

Verse: 854    und er belibe des slages dâ.
Verse: 855    ûf spranc er und begunde sâ

Verse: 856    den schilt ze rücke wenden
Verse: 857    und gap ze beiden henden

Verse: 858    daz swert mit grimmen muote
Verse: 859    und vaht sam er wuote.

Verse: 860    er machete in des schiltes bar
Verse: 861    und hiu in im von der hant gar:

Verse: 862    des im vil lützel der vertruoc
Verse: 863    der slac engegen slage sluoc.

Verse: 864    sît daz er im entlêch sîn guot,
Verse: 865    daz galt er als jener tuot

Verse: 866    der dâ mêre entnemen wil.
Verse: 867    si beide spilten ein spil

Verse: 868    daz lîhte den man beroubet,
Verse: 869    der vünfzehen ûf daz houbet.

Verse: 870    ouch wurden si eteswenne gegeben
Verse: 871    beidiu dâ vür und ouch dâ eneben.

Verse: 872    mit grimme si verbunden.
Verse: 873    einer ellenlanger wunden

Verse: 874    möhte er vil wol sîn bekomen
Verse: 875    derz phantreht solde hân genomen.

Verse: 876    dâ wart vil manec gebot geleit
Verse: 877    und dem ein widergelt geseit.

Verse: 878    ir ietweder enwoldez lâzen:
Verse: 879    wan dem wære verwâzen

Verse: 880    beidiu sîn êre und ouch daz leben.
Verse: 881    dar nâch sô wart daz spil gegeben

Verse: 882    mit manegem viurînen slage
Verse: 883    von vruo unz hin nâch mittem tage,

Verse: 884    daz in der gebote zeran
Verse: 885    sô sêre daz die zwêne man

Verse: 886    muoden begunden.
Verse: 887    si enmohten noch enkunden

Verse: 888    ir gebot mit kreften niht gelegen
Verse: 889    noch die arme alsô geregen

Verse: 890    als si tâten unze dar.
Verse: 891    nû hâten si sich alsô gar

Verse: 892    erwüetet und ervohten
Verse: 893    daz si niht mêre enmohten.

Verse: 894    ir slege wîplîchen sigen:
Verse: 895    sô garwe wâren si erwigen

Verse: 896    daz dâ von niht schade geschach.
Verse: 897    îdêrs dô zÊrecke sprach:

Verse: 898    ʽenthalt dich, edel ritter guot.
Verse: 899    wir velschen beide ritters muot
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.