TITUS
Hartmann von Aue, Erec
Part No. 10
Previous part

Verse group: (10) 
Verse: 900    dâ mit und wir ie mitten tuon:
Verse: 901    ez ist sunder prîs und âne ruom.

Verse: 902    unser blœdez vehten
Verse: 903    enzimt niht guoten knehten.

Verse: 904    unser slege engânt niht manlîchen,
Verse: 905    wir vehten lasterlîchen.

Verse: 906    obz iuwer muot niht vervât
Verse: 907    vür zageheit, sô ist mîn rât,

Verse: 908    daz wir diz blœde vehten lân
Verse: 909    und eine wîle ruowen gân.'

Verse: 910    dô was Êrec der rede vrô.
Verse: 911    ze ruowe sâzen si dô:

Verse: 912    ir houbet si enbunden.
Verse: 913    und als si des emphunden

Verse: 914    daz si geruowet hâten,
Verse: 915    zesamene si dô trâten

Verse: 916    und griffen an ir altez spil,
Verse: 917    als ich iu nû sagen wil.

Verse: 918    mit guoter kunst, mit niuwer kraft
Verse: 919    und mit alsô gelîcher meisterschaft

Verse: 920    si spilnde beliben.
Verse: 921    dâ siz vil lange getriben,

Verse: 922    daz witzige unde tumbe
Verse: 923    die stuonden dar umbe

Verse: 924    mit nihte erkiesen kunden
Verse: 925    weder zuo den stunden

Verse: 926    eins ougen wæger hæte.
Verse: 927    diz beleip lange stæte:

Verse: 928    wederm geviele der gewin,
Verse: 929    des was zwîvel under in,

Verse: 930    unz daz Êrec der unge man
Verse: 931    begunde denken dar an

Verse: 932    waz im ûf der heide
Verse: 933    ze schanden und ze leide

Verse: 934    von sînem getwerge geschach.
Verse: 935    und als er dar zuo ane sach

Verse: 936    die schœnen vrouwen ênîten,
Verse: 937    daz half im vaste strîten:

Verse: 938    wan dâ von gewan er dô
Verse: 939    sîner krefte rehte zwô.

Verse: 940    ûf den helm er verbant
Verse: 941    mit vil williger hant.

Verse: 942    doch jener die besten würfe warf
Verse: 943    der kein zabelære bedarf,

Verse: 944    dô half disen daz ern nie
Verse: 945    ûz den slegen komen lie,

Verse: 946    und gewan ez eine wîle
Verse: 947    sô sêre mit der île

Verse: 948    unz er doch daz spil verlôs
Verse: 949    und gelac vor im sigelôs.

Verse: 950    sînen geiselstreich er rach.
Verse: 951    als erm den helm abe brach,

Verse: 952    dô lôste erm ouch daz hüetelîn
Verse: 953    als er solde erslagen sîn,

Verse: 954    wan daz er des geruochte
Verse: 955    daz er genâde suochte.

Verse: 956    ʽdurch got erbarme dich,
Verse: 957    edel ritter, über mich.

Verse: 958    êre an mir elliu wîp
Verse: 959    unde lâz mir den lîp

Verse: 960    und gedenke dar an
Verse: 961    daz ich dir, tugenthafter man,

Verse: 962    solh herzenleit niht hân getân:
Verse: 963    dû maht mich wol bî lîbe lân.'

Verse: 964    des antwurte im Êrec dô.
Verse: 965    er sprach: ʽwie redet ir nû sô?

Verse: 966    ir spottet mîn âne nôt.
Verse: 967    jâ woldet ir niuwan mînen tôt:

Verse: 968    sô stüende iuch ze ringe
Verse: 969    iuwer vürgedinge

Verse: 970    und iuwer grôzer übermuot.
Verse: 971    jâ næmet ir dehein guot

Verse: 972    an disem strîte vür mîn leben.
Verse: 973    doch hât mir got die sælde gegeben

Verse: 974    daz sich diu rede verkêret hât:
Verse: 975    sehet, nû getuon ich guoten rât

Verse: 976    daz ich deheine miete
Verse: 977    vür mînen lîp biete:

Verse: 978    swie mirn got anderswâ bewar,
Verse: 979    ich bins vor iu sicher gar.

Verse: 980    hetet ir iuwer hôchvart
Verse: 981    ein lützel baz an mir bewart,

Verse: 982    sehet, daz wære iu nû guot.
Verse: 983    nû hât iuch iuwer übermuot

Verse: 984    hiute hie gevellet
Verse: 985    und dem schaden gesellet.'

Verse: 986    er sprach: ʽwie meinet ir daz?
Verse: 987    ich gediente nie iuwern haz,

Verse: 988    wan ich iuch nie mêre gesach.'
Verse: 989    Êrec aber dô sprach:

Verse: 990    ʽnû schamet iuch durch mîne bete,
Verse: 991    als ich mich gester tete,

Verse: 992    dô ich von iuwern schulden
Verse: 993    die schame muoste dulden

Verse: 994    diu mînem herzen nâhen gie.
Verse: 995    ouch geheize ich iu hie

Verse: 996    daz iu iuwers getwerges tuht
Verse: 997    und sîn grôziu unzuht

Verse: 998    nimmer alsô vil gevrumt
Verse: 999    sô si iu ze schaden hiute kumt.'
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.