TITUS
Hartmann von Aue, Erec
Part No. 16
Previous part

Verse group: (16) 
Verse: 1500    ze komenne an dem selben tage.
Verse: 1501    nâch der küneginne sage

Verse: 1502    westen die guoten knehte
Verse: 1503    alle vil rehte

Verse: 1504    die zît wenne er solde komen:
Verse: 1505    ouch hâten siz vernomen

Verse: 1506    von dem ritter der dâ kam,
Verse: 1507    an dem er den sige nam.

Verse: 1508    diu ros wâren in bereit.
Verse: 1509    dô genôz er sîner vrümekeit.

Verse: 1510    mit dem künege artûse
Verse: 1511    riten von dem hûse

Verse: 1512    gâwein und persevâus
Verse: 1513    und ein herre genant alsus,

Verse: 1514    der künec iels von gâlœs,
Verse: 1515    und estorz fil roi ares,

Verse: 1516    lucâns der schenke schein in der schar,
Verse: 1517    dar zuo diu massenîe gar,

Verse: 1518    daz sin emphiengen alle
Verse: 1519    mit ritterlîchem schalle,

Verse: 1520    geselleclîchen unde wol,
Verse: 1521    als man lieben vriunt sol

Verse: 1522    der verlorner vunden ist.
Verse: 1523    gegen im was zer selben vrist

Verse: 1524    über den hof gegangen,
Verse: 1525    daz er würde emphangen,

Verse: 1526    mîn vrouwe diu künegîn.
Verse: 1527    si hiez in willekomen sîn:

Verse: 1528    sîner âventiure was si vrô.
Verse: 1529    vrouwen ênîten nam si dô,

Verse: 1530    si sprach: ʽvrou maget wol getân,
Verse: 1531    dirre kleider sult ir wandel hân.'

Verse: 1532    nû vuorte si diu rîche
Verse: 1533    in ir heimlîche.

Verse: 1534    dâ was ir ein bat bereit,
Verse: 1535    und wart nâch ir arbeit

Verse: 1536    gebadet vaste schône.
Verse: 1537    diu vrouwe mit der krône,

Verse: 1538    ir lieben gast si kleite:
Verse: 1539    wan dâ was bereite

Verse: 1540    vil rîchez gewant.
Verse: 1541    si nâte selbe mit ir hant

Verse: 1542    in ein hemde daz magedîn:
Verse: 1543    daz was wîz sîdîn.

Verse: 1544    daz hemde si bedahte,
Verse: 1545    daz manz loben mahte,

Verse: 1546    mit einem rocke wol gesniten
Verse: 1547    nâch kerlingischen siten,

Verse: 1548    weder zenge noch ze wît:
Verse: 1549    der was ein grüener samît

Verse: 1550    mit spannebreiter lîste,
Verse: 1551    dâ si si in brîste,

Verse: 1552    mit gespunnem golde
Verse: 1553    beidenthalp sô man solde,

Verse: 1554    von ietweder hende
Verse: 1555    an der sîten ende.

Verse: 1556    ouch wart vrouwen ênîten
Verse: 1557    gegurt umbe ir sîten

Verse: 1558    ein rieme von îberne:
Verse: 1559    den tragent die vrouwen gerne.

Verse: 1560    vür ir brust wart geleit
Verse: 1561    ein haftel wol hande breit,

Verse: 1562    daz was ein gelpher rubîn:
Verse: 1563    doch überwant im sînen schîn

Verse: 1564    diu maget vil begarwe
Verse: 1565    mit ir liehten varwe.

Verse: 1566    der roc was bevangen,
Verse: 1567    mit einem mantel behangen

Verse: 1568    der im ze mâze mohte sîn,
Verse: 1569    daz geville hermîn,

Verse: 1570    daz dach ein rîcher sigelât.
Verse: 1571    disiu küneclîche wât

Verse: 1572    was gezobelt ûf die hant.
Verse: 1573    ein borte ir hâr zesamene bant:

Verse: 1574    der was ze mâze breit,
Verse: 1575    kriuzwîs überz houbet geleit.

Verse: 1576    sô guot was des schapels schîn,
Verse: 1577    ez enmohte borte bezzer sîn.

Verse: 1578    ir kleit was rîch, si selbe guot.
Verse: 1579    nû bedahte vrouwe armuot

Verse: 1580    von grôzer schame daz houbet,
Verse: 1581    wan si was beroubet

Verse: 1582    ir stat vil vrevenlîchen.
Verse: 1583    si muoste danne entwîchen,

Verse: 1584    von ir hûse sî vlôch:
Verse: 1585    rîcheit sich in ir gesæze zôch.

Verse: 1586    alsô schœne schein diu maget
Verse: 1587    in swachen kleidern, sô man saget,

Verse: 1588    daz si in sô rîcher wât
Verse: 1589    nû vil wol ze lobe stât.

Verse: 1590    vil gerne ich si wolde
Verse: 1591    loben als ich solde:

Verse: 1592    nû enbin ich niht sô wîser man,
Verse: 1593    mirn gebreste dar an.

Verse: 1594    solh sin ist mir unkunt.
Verse: 1595    ouch hât sich manec wîser munt

Verse: 1596    in wîbes lobe gevlizzen,
Verse: 1597    daz ich niht möhte wizzen

Verse: 1598    welhen lop ich ir vunde,
Verse: 1599    ez ensî vor dirre stunde
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.