TITUS
Hartmann von Aue, Erec
Part No. 15
Previous part

Verse group: (15) 
Verse: 1400    als im erschein der ander tac,
Verse: 1401    Êrec fil de roi lac

Verse: 1402    der enwolde dâ niht langer tweln.
Verse: 1403    sîn unmuoze begunde er zeln

Verse: 1404    und sprach er müeste rîten
Verse: 1405    und vüeren vrouwen ênîten.

Verse: 1406    dô bat in ir œheim,
Verse: 1407    der herzoge von tulmein,

Verse: 1408    daz er si müeste vazzen baz:
Verse: 1409    Êrec der widerredete daz.

Verse: 1410    golt und silber er im bôt.
Verse: 1411    er sprach des wære im unnôt:

Verse: 1412    beide ros und gewant,
Verse: 1413    dar zuo beslôz Êrec die hant,

Verse: 1414    wan daz er ein phert nam,
Verse: 1415    daz ir ze rîtenne gezam,

Verse: 1416    von ir nifteln, einer maget:
Verse: 1417    diu was, sô man saget,

Verse: 1418    mit dem herzogen dâ
Verse: 1419    unde sîn niftel nâ.

Verse: 1420    vil güetlîche si in es bat,
Verse: 1421    alsô lange unz ûf die stat

Verse: 1422    daz er ez von ir emphie.
Verse: 1423    und wizzet wol daz vordes nie

Verse: 1424    in der werlde dehein man
Verse: 1425    schœner phert mê gewan.

Verse: 1426    ez was ze michel noch ze kranc,
Verse: 1427    sîn varwe rehte harmblanc,

Verse: 1428    sîn man tief unde reit,
Verse: 1429    sîn brust starc unde breit,

Verse: 1430    mit ganzem gebeine,
Verse: 1431    ze grôz noch ze kleine.

Verse: 1432    sîn houbet truocz ze rehte hô.
Verse: 1433    ez was senfte unde vrô,

Verse: 1434    mit langen sîten
Verse: 1435    (man mohtez wol gerîten)

Verse: 1436    rücke und vuoz guot genuoc:
Verse: 1437    hei wie rehte sanfte ez truoc!

Verse: 1438    ez gienc vil drâte über velt
Verse: 1439    schône sam ein schef enzelt:

Verse: 1440    dar zuo und ez sanfte gie,
Verse: 1441    sô gestrûchetez doch nie.

Verse: 1442    der satel was alsam,
Verse: 1443    daz ez dem pherde wol gezam:

Verse: 1444    daz gesmîde sam ez solde
Verse: 1445    von rôtem golde.

Verse: 1446    waz sol des langiu mære
Verse: 1447    wie daz geworht wære?

Verse: 1448    des muoz ich iuch vil verdagen:
Verse: 1449    wan solde ichz iu allez sagen,

Verse: 1450    sô würde der rede ze vil.
Verse: 1451    den lop ich iu enden wil

Verse: 1452    mit vil kurzen worten:
Verse: 1453    die darmgürtel wâren borten.

Verse: 1454    alz ez im gezogen wart,
Verse: 1455    diu reise enwart niht mê gespart.

Verse: 1456    vrouwe ênîte urloup nam,
Verse: 1457    als einem kinde wol gezam,

Verse: 1458    vil heize weinende,
Verse: 1459    ze rîten in ellende

Verse: 1460    von ir lieben muoter.
Verse: 1461    diu sprach: ʽrîcher got vil guoter,

Verse: 1462    dû geruoche mînes kindes phlegen.'
Verse: 1463    mit triuwen langer wart der segen.

Verse: 1464    nû errahte daz scheiden
Verse: 1465    manegen trahen in beiden

Verse: 1466    unde dar zuo ir vater.
Verse: 1467    unsern herren got bater

Verse: 1468    daz er ir müeste walten.
Verse: 1469    Êrec sagete dem alten,

Verse: 1470    swenne im sîn bote kæme,
Verse: 1471    swaz er von dem vernæme,

Verse: 1472    daz er dar nâch tæte:
Verse: 1473    wan er den willen hæte

Verse: 1474    ze tuone sîner armuot buoz.
Verse: 1475    dô neic er im an den vuoz

Verse: 1476    und was des gedingen vrô.
Verse: 1477    urloup nâmen si dô

Verse: 1478    von allem dem gesinde dâ
Verse: 1479    unde schieden sich sâ

Verse: 1480    unde riten von dan.
Verse: 1481    Êrec enwolde nieman

Verse: 1482    mit im von stete rîten lân:
Verse: 1483    mit heile bat er si dâ bestân.

Verse: 1484    alsô si dô beide
Verse: 1485    kâmen ûf die heide,

Verse: 1486    Êrec begunde schouwen
Verse: 1487    sîne juncvrouwen.

Verse: 1488    ouch sach si vil dicke an
Verse: 1489    bliuclîchen ir man.

Verse: 1490    dô wehselten si vil dicke
Verse: 1491    die vriuntlîchen blicke.

Verse: 1492    ir herze wart der minne vol:
Verse: 1493    si gevielen beide ein ander wol

Verse: 1494    und ie baz unde baz.
Verse: 1495    dâ envant nît noch haz

Verse: 1496    ze blîbenne dehein vaz:
Verse: 1497    triuwe und stæte si besaz.

Verse: 1498    nû riten si vil drâte,
Verse: 1499    wan er gelobet hâte
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.