TITUS
Hartmann von Aue, Erec
Part No. 18
Previous part

Verse group: (18) 
Verse: 1700    der wunsch was an ir garwe.
Verse: 1701    als der rôsen varwe

Verse: 1702    under wîze liljen güzze,
Verse: 1703    und daz zesamene vlüzze,

Verse: 1704    und daz der munt begarwe
Verse: 1705    wære von rôsen varwe,

Verse: 1706    dem gelîchete sich ir lîp.
Verse: 1707    man gesach nie ritterlîcher wîp.

Verse: 1708    alsô si dô under die
Verse: 1709    von êrste zuo der tür in gie

Verse: 1710    und si sitzen gesach,
Verse: 1711    schame tete ir ungemach.

Verse: 1712    diu rôsen varwe ir entweich,
Verse: 1713    nû rôt und danne bleich

Verse: 1714    wart si dô vil dicke
Verse: 1715    von dem aneblicke,

Verse: 1716    ze gelîcher wîse als ich iu sage:
Verse: 1717    als diu sunne in liehtem tage

Verse: 1718    ir schîn vil volleclîchen hât,
Verse: 1719    und gâhes dâ vür gât

Verse: 1720    ein wolken dünne und niht breit,
Verse: 1721    sô enist ir schîn niht sô bereit

Verse: 1722    als man in vor sach.
Verse: 1723    sus leit kurzen ungemach

Verse: 1724    diu juncvrouwe ênîte
Verse: 1725    von schame unlange zîte.

Verse: 1726    dô si zer tür in gie,
Verse: 1727    ir schœnez antlütze gevie

Verse: 1728    der wünneclîchen varwe mê
Verse: 1729    und wart schœner dan ê:

Verse: 1730    ei wie wol ez ir gezam
Verse: 1731    dô ir varwe wandel nam!

Verse: 1732    von grôzer schame daz geschach:
Verse: 1733    wan si nie mê gesach

Verse: 1734    sitzen ensamt sô manegen helt
Verse: 1735    von ganzen tugenden ûz erwelt.

Verse: 1736    dô diu maget in gie,
Verse: 1737    von ir schœne erschrâken die

Verse: 1738    zer tavelrunde sâzen
Verse: 1739    sô daz si ir selber vergâzen

Verse: 1740    und kapheten die maget an.
Verse: 1741    dâ enwas dehein man,

Verse: 1742    ern begunde ir vür die schœnsten jehen
Verse: 1743    die er hæte gesehen.

Verse: 1744    der künec gegen ir gie:
Verse: 1745    bî der hant er si vie,

Verse: 1746    vrouwen ênîten,
Verse: 1747    und sazte si besîten

Verse: 1748    unde anderhalp sîn
Verse: 1749    die tugenthaften künegîn.

Verse: 1750    nû gedûhte ouch den künec zît
Verse: 1751    daz er den ritterlîchen strît

Verse: 1752    zehant enden wolde.
Verse: 1753    ir wizzet daz er solde

Verse: 1754    sîn reht hân genomen
Verse: 1755    (daz habet ir ê wol vernomen),

Verse: 1756    von diu daz imz sô wol ergie
Verse: 1757    daz er den wîzen hirz gevie,

Verse: 1758    diu mit gelîchem mære
Verse: 1759    diu schœniste dâ wære,

Verse: 1760    daz er die kuste an ir munt.
Verse: 1761    des hâte er unz an die stunt

Verse: 1762    durch die künegîn erbiten.
Verse: 1763    nû enwart niht dâ wider gestriten,

Verse: 1764    si enwære diu schœniste dâ
Verse: 1765    und über die werlt ouch anderswâ.

Verse: 1766    wan ich sage iu rehte wie
Verse: 1767    ir schœne vür die andern gie:

Verse: 1768    als ob an einer vinstern naht
Verse: 1769    die sterne wæren unbedaht,

Verse: 1770    daz man si möhte wol gesehen,
Verse: 1771    sô müeste man von schulden jehen,

Verse: 1772    si wæren wol genæme
Verse: 1773    ob in schœners niht enkæme.

Verse: 1774    und sô den mânen sîn zît
Verse: 1775    in der naht her vür gît,

Verse: 1776    sô hât man die wolgetânen
Verse: 1777    ze nihte bî dem mânen:

Verse: 1778    si dûhten lobebære,
Verse: 1779    ob der mâne niene wære

Verse: 1780    und ob er si niht enlaschte
Verse: 1781    mit sînem liehten glaste.

Verse: 1782    sus swachete ir varwe
Verse: 1783    die vrouwen begarwe.

Verse: 1784    ouch vuor der künec ungebeit
Verse: 1785    behalten sîn gewonheit,

Verse: 1786    als im si sîn vater liez
Verse: 1787    (sîn vater utpandragôn hiez),

Verse: 1788    daz er den kus næme dâ
Verse: 1789    und ouch niender anderswâ

Verse: 1790    wan swâz die guoten knehte
Verse: 1791    gesageten im ze rehte.

Verse: 1792    ûf stuont der künec dâ:
Verse: 1793    sîn reht nam er sâ

Verse: 1794    von sînes neven vriundîn.
Verse: 1795    daz mohte wol âne haz sîn,

Verse: 1796    wan Êrec was sîn künne.
Verse: 1797    nû huop sich michel wünne

Verse: 1798    ûf dem hûs ze karadigân.
Verse: 1799    daz was ze liebe getân
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.