TITUS
Hartmann von Aue, Erec
Part No. 19
Previous part

Verse group: (19) 
Verse: 1800    im und sîner vriundîn.
Verse: 1801    wâ möhte grœzer vreude sîn

Verse: 1802    dan man dâ hâte zaller zît?
Verse: 1803    si vlizzen sich enwiderstrît,

Verse: 1804    alle die dâ wâren,
Verse: 1805    vrœlîchen gebâren.

Verse: 1806    dô gedâhte der tugentrîche
Verse: 1807    Êrec vil ritterlîche

Verse: 1808    an sînes swehers armuot
Verse: 1809    unde sande im schœnez guot

Verse: 1810    bî sînem boten in sîn hûs
Verse: 1811    (daz gap im der künec artûs),

Verse: 1812    zwêne soumære,
Verse: 1813    der bürde was vil swære.

Verse: 1814    si truogen silber unde golt
Verse: 1815    (wan er was der tohter holt),

Verse: 1816    daz er sich schône kleite
Verse: 1817    und er sich wol bereite

Verse: 1818    ze varne in sînes vater lant:
Verse: 1819    daz was destregâles genant.

Verse: 1820    bî sînem boten bater
Verse: 1821    den künec lac sînen vater

Verse: 1822    daz er sînen sweher alten
Verse: 1823    zweier hiuser lieze walten,

Verse: 1824    diu er im benande
Verse: 1825    in sînem lande,

Verse: 1826    und daz si wæren sîn eigen.
Verse: 1827    mit namen begunder si zeigen,

Verse: 1828    montrevel und rôadân.
Verse: 1829    daz was allez getân.

Verse: 1830    als er diu hiuser zim gewan,
Verse: 1831    dô wart der edel man

Verse: 1832    ergetzet swes im ie gewar:
Verse: 1833    unnôtic wart er gar.

Verse: 1834    man tete in alsô rîche
Verse: 1835    daz er sich hêrlîche

Verse: 1836    mit in begân mohte,
Verse: 1837    als sînem adel tohte.

Verse: 1838    nû grîfe wir wider an die vart
Verse: 1839    dâ von der rede begunnen wart.

Verse: 1840    dô Êrec hin ze hove kam
Verse: 1841    und der künec sîn reht genam,

Verse: 1842    vrouwe ênîte reizte daz,
Verse: 1843    diu dort als ein engel saz

Verse: 1844    mit schœne und ouch mit güete,
Verse: 1845    daz Êreckes gemüete

Verse: 1846    vil herzenlîche nâch ir ranc.
Verse: 1847    der tage dûhte in ze lanc,

Verse: 1848    daz er ze langern zîten
Verse: 1849    ir minne solde bîten

Verse: 1850    dan unz an die næhsten naht.
Verse: 1851    ouch truoc si im bedaht

Verse: 1852    einen willen dem gelîch,
Verse: 1853    daz ez wære wætlîch,

Verse: 1854    und hetez nieman gesehen,
Verse: 1855    daz dâ wære geschehen

Verse: 1856    ein vil vriuntlîchez spil.
Verse: 1857    zewâre ich iu daz sagen wil,

Verse: 1858    dâ was der minnen gewin:
Verse: 1859    diu minne rîchsete under in

Verse: 1860    und vuocte in grôzen ungemach.
Verse: 1861    dô einz daz ander ane sach,

Verse: 1862    dô enwas in beiden niht baz
Verse: 1863    dan einem habeche, der im sîn maz

Verse: 1864    von geschihte zougen bringet,
Verse: 1865    sô in der hunger twinget:

Verse: 1866    und als ez im gezeiget wirt,
Verse: 1867    swaz ers dâ vür mêre enbirt,

Verse: 1868    dâ von muoz im wirs geschehen
Verse: 1869    dan ob ers niht enhete gesehen.

Verse: 1870    alsô tete in daz bîten wê
Verse: 1871    zuo der mâze und dannoch mê.

Verse: 1872    ir beider gedanc stuont alsô:
Verse: 1873    ʽjâ enwirde ich nimmer vrô,

Verse: 1874    ich engelige dir noch bî
Verse: 1875    zwô naht oder drî.'

Verse: 1876    ez gerten ir sinne
Verse: 1877    anderre minne

Verse: 1878    (dar nâch si gemâzet sint)
Verse: 1879    danne dâ ein sunder kint

Verse: 1880    sich nâch sîner muoter sent,
Verse: 1881    diu ez guotes hât gewent,

Verse: 1882    sô si im ir gruoz diutet
Verse: 1883    und im die hende biutet

Verse: 1884    vor dem dâ von im leit geschiht.
Verse: 1885    untiurre engerten si des niht

Verse: 1886    des si doch gewunnen sît.
Verse: 1887    nû was ouch briutennes zît,

Verse: 1888    wan ez wære in beiden liep getân.
Verse: 1889    nû enwolde in des niht erlân

Verse: 1890    der tugenthafte artûs,
Verse: 1891    er enbrûte in sînem hûs

Verse: 1892    ze vreuden sînem lande.
Verse: 1893    zehant er ûz sande,

Verse: 1894    swar er mohte gereichen,
Verse: 1895    brieve und wortzeichen,

Verse: 1896    daz im die vürsten kæmen
Verse: 1897    und alle diez vernæmen

Verse: 1898    von allen landen wîten
Verse: 1899    ze sînen hôchzîten.
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.