TITUS
Hartmann von Aue, Erec
Part No. 20
Previous part

Verse group: (20) 
Verse: 1900    diu brûtlouft wart gesprochen
Verse: 1901    in der phingestwochen.

Verse: 1902    nû nenne ich iu die grâven gar
Verse: 1903    unde ouch der vürsten schar

Verse: 1904    diu zuo den hôchzîten kam
Verse: 1905    dâ Êrec vroun ênîten nam.

Verse: 1906    ez wâren rîche geste:
Verse: 1907    grâve brandes von doleceste

Verse: 1908    (der brâhte in sîner schar
Verse: 1909    vünf hundert gesellen dar,

Verse: 1910    der geziuc was lobelîch,
Verse: 1911    zuo im gekleit alle gelîch)

Verse: 1912    unde grâve margôn,
Verse: 1913    geboren von glufiôn,

Verse: 1914    die herren von alte montanje
Verse: 1915    (deist nâhen bî britanje)

Verse: 1916    und grâve libers von treverîn
Verse: 1917    mit zehenzec gesellen sîn,

Verse: 1918    der rîche grâve gundregoas
Verse: 1919    und der herre maheloas,

Verse: 1920    von dem glesînen werde genant.
Verse: 1921    sus stuont ez umbe sîn lant

Verse: 1922    daz dar über benamen nie
Verse: 1923    dehein ungewiter ergie:

Verse: 1924    ouch was dâ grôzer gemach,
Verse: 1925    wan man dâ nie wurm gesach:

Verse: 1926    dâ enwart nie kalt noch heiz,
Verse: 1927    als manz von der wârheit weiz.

Verse: 1928    gresmurs fîne posterne
Verse: 1929    (den sach man dâ gerne)

Verse: 1930    und sîn bruoder gimörs genant
Verse: 1931    (der wert avalôn hiez sîn lant):

Verse: 1932    des sælde enwas niht kleine,
Verse: 1933    wan er minnete ein feine,

Verse: 1934    diu hiez margül.
Verse: 1935    ouch kam dâvît von luntagül:

Verse: 1936    der herzoge gülgüzins kam dar
Verse: 1937    mit hêrlîcher schar:

Verse: 1938    der hôhe bois sô hiez sîn gewalt.
Verse: 1939    nû sint iu die herzogen gezalt

Verse: 1940    und die grâven über al.
Verse: 1941    nû vernemet ouch der künege zal.

Verse: 1942    ir wâren zehene, sô man zalt,
Verse: 1943    vünve junc und vünve alt,

Verse: 1944    alle gewaltic unde rîch.
Verse: 1945    besunder hâten si sich

Verse: 1946    gesellet ritterlîchen,
Verse: 1947    die jungen zir gelîchen,

Verse: 1948    die alten zuo den alten:
Verse: 1949    diu mâze wart behalten.

Verse: 1950    die jungen wâren, sô man seit,
Verse: 1951    gelîch geriten und gekleit:

Verse: 1952    die alten wâren rehte alsam,
Verse: 1953    zer mâze als ouch in gezam.

Verse: 1954    nû prüeve ich iu der jungen wât:
Verse: 1955    samît unde sigelât

Verse: 1956    zesamene geparrieret,
Verse: 1957    enmitten gezieret

Verse: 1958    mit vêhen gevillen,
Verse: 1959    vil rehte nâch ir willen

Verse: 1960    ze enge noch ze wît gesniten.
Verse: 1961    diu ros diu die jungen riten

Verse: 1962    garwe swarz sam ein raben,
Verse: 1963    diu enkunden niht wan draben.

Verse: 1964    dise riten vor in daz lant.
Verse: 1965    ir iegelîch vuorte ûf der hant

Verse: 1966    vier mûze einen sparwære.
Verse: 1967    diu schar was lobebære:

Verse: 1968    ir brâhte iegelîcher dar
Verse: 1969    driu hundert gesellen in sîner schar.

Verse: 1970    an ir wât was der vlîz.
Verse: 1971    der êrste künec carnîz

Verse: 1972    (schorces sîn lant hiez)
Verse: 1973    und der künec von schotten angwisiez

Verse: 1974    mit zwein sünen sîn
Verse: 1975    (genant was einer côîn

Verse: 1976    und der ander goasilröt)
Verse: 1977    und künec bêals von gomoret.

Verse: 1978    diz was diu junge ritterschaft.
Verse: 1979    nû kâmen dar mit hêrschaft

Verse: 1980    vünf alte künege rîche.
Verse: 1981    die wâren ouch gelîche

Verse: 1982    beide geriten und gekleit.
Verse: 1983    si hâten an sich geleit

Verse: 1984    ir alter ein gezæme wât,
Verse: 1985    als manz von in vernomen hât,

Verse: 1986    den besten brûnât den man vant
Verse: 1987    über allez engellant.

Verse: 1988    diu geville wâren grâ,
Verse: 1989    daz nieman anderswâ

Verse: 1990    dehein bezzer enmohte hân,
Verse: 1991    ze riuzen noch ze pôlân.

Verse: 1992    si was lanc unde breit,
Verse: 1993    allenthalben drûf geleit

Verse: 1994    dickiu blech von golde,
Verse: 1995    daz gewürhte als ez solde,

Verse: 1996    guot unde wæhe
Verse: 1997    unde alsô spæhe

Verse: 1998    daz man ez volprîsen muoz,
Verse: 1999    gezobelt breit ûf den vuoz.
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.