TITUS
Hartmann von Aue, Erec
Part No. 21
Previous part

Verse group: (21) 
Verse: 2000    der zobel was daz nie dehein man
Verse: 2001    deheinen bezzern gewan

Verse: 2002    noch tiurern envant
Verse: 2003    über allez connelant.

Verse: 2004    des landes phliget der soldân,
Verse: 2005    wan ez ist im undertân:

Verse: 2006    ez ist lanc unde wît.
Verse: 2007    conne beslozzen lît

Verse: 2008    zwischen den landen beiden,
Verse: 2009    den kriechen und den heiden.

Verse: 2010    der beste zobel kumt von dan
Verse: 2011    den diu werlt ie gewan.

Verse: 2012    diz was der vürsten kleit.
Verse: 2013    dar under hâten si geleit

Verse: 2014    rîche bellize alsam
Verse: 2015    als ez der obern wât gezam.

Verse: 2016    ir iegelîches huot
Verse: 2017    was von zobel harte guot.

Verse: 2018    geriten wâren si vil wol,
Verse: 2019    als ich iu sagen sol,

Verse: 2020    ir phert blanc snêwîz.
Verse: 2021    an in was aller der vlîz

Verse: 2022    der rîchen alten wol gezam:
Verse: 2023    ir gereite guot alsam,

Verse: 2024    von guotem golde was sîn schîn.
Verse: 2025    daz daz gesmîde solde sîn,

Verse: 2026    daz was von silber durchslagen,
Verse: 2027    mit liehtem golde übertragen,

Verse: 2028    ir darmgürtel borten breit.
Verse: 2029    dô disiu schar reit

Verse: 2030    ze britanje in daz lant,
Verse: 2031    ir iegelîchem ûf der hant

Verse: 2032    ein schœner habech saz,
Verse: 2033    sehs mûze oder baz.

Verse: 2034    dô was guot kurzwîle
Verse: 2035    des weges drî mîle.

Verse: 2036    si vunden guote beize dâ:
Verse: 2037    beide bach unde lâ

Verse: 2038    lâgen antvogele vol.
Verse: 2039    swaz ein habech vâhen sol,

Verse: 2040    des vunden si dâ vil.
Verse: 2041    man gesach ouch nie vederspil

Verse: 2042    sô manegen schœnen vluc getuon.
Verse: 2043    den antvogel und daz huon,

Verse: 2044    den reiger und den vâsân
Verse: 2045    sâhen si vor in ûf stân,

Verse: 2046    den kranech an dem gevilde
Verse: 2047    und die gans wilde.

Verse: 2048    ouch vuorten ir knappen
Verse: 2049    des tages von den trappen

Verse: 2050    ir satel vol behangen,
Verse: 2051    wan dâ was gar gevangen

Verse: 2052    swaz ir wart gestoubet.
Verse: 2053    vil garwe beroubet

Verse: 2054    wart daz gevilde
Verse: 2055    an vogelen und an wilde:

Verse: 2056    swâ der hase erschrecket wart,
Verse: 2057    daz was sîn jungeste vart.

Verse: 2058    dô si nâch der beize riten
Verse: 2059    unde vriuntlîchen striten,

Verse: 2060    under in was ein bescheiden haz:
Verse: 2061    ir iegelîch wolde daz dâ baz

Verse: 2062    sîn habech gevlogen hæte,
Verse: 2063    als man ouch noch tæte.

Verse: 2064    nû reit der künec artûs
Verse: 2065    engegen in von sînem hûs

Verse: 2066    mit sîner massenîe gar
Verse: 2067    und emphienc die hêrlîchen schar

Verse: 2068    mit vil grôzer werdekeit:
Verse: 2069    ir komennes was er vil gemeit.

Verse: 2070    ez wurden die guoten knehte
Verse: 2071    emphangen nâch ir rehte

Verse: 2072    und vil baz behalten.
Verse: 2073    nû nenne ich iu die alten.

Verse: 2074    daz was der künec jernîs
Verse: 2075    von riel, biderbe unde wîs.

Verse: 2076    der brâhte mit im dar
Verse: 2077    eine lobelîche schar,

Verse: 2078    driu hundert gesellen.
Verse: 2079    der alter hœret zellen:

Verse: 2080    in was daz houbet gar
Verse: 2081    und der bart snêvar,

Verse: 2082    nider gewahsen alsô tief
Verse: 2083    daz er in ûf die gürtel swief.

Verse: 2084    der aller jungest, daz ist wâr,
Verse: 2085    der hete vierzic und hundert jâr.

Verse: 2086    nû vernement waz ir mêre sî.
Verse: 2087    der getwerge künec bîl êî1

Verse: 2088    und sîn bruoder brîans genant:
Verse: 2089    antipodes hiez ir lant.

Verse: 2090    ez enwurden einer muoter kint,
Verse: 2091    die bruoder geheizen sint,

Verse: 2092    nie ungelîcher danne sî,
Verse: 2093    brîans und bîlêî.

Verse: 2094    uns saget daz wâre mære
Verse: 2095    daz brîans langer wære

Verse: 2096    dan iemen bî sînen zîten
Verse: 2097    in allen landen wîten

Verse: 2098    anderhalbe spanne:
Verse: 2099    sô saget man uns danne
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.