TITUS
Hartmann von Aue, Erec
Part No. 52
Previous part

Verse group: (52) 
Verse: 5100    ginovêr diu künegîn
Verse: 5101    tete süezen willen schîn,

Verse: 5102    dô ir vrouwe ênîte kam.
Verse: 5103    in ir phlege si si nam

Verse: 5104    und vuorte si von danne
Verse: 5105    besunder von ir manne

Verse: 5106    in ir heimlîche
Verse: 5107    dâ wart vil wîplîche

Verse: 5108    von in beiden geklaget,
Verse: 5109    vil gevrâget und gesaget

Verse: 5110    von ungewonter arbeit
Verse: 5111    die vrouwe ênîte erleit.

Verse: 5112    sô kumberlîcher sache
Verse: 5113    ergazte si mit gemache

Verse: 5114    diu vil edel künegîn
Verse: 5115    die wîle und daz mohte sîn.

Verse: 5116    ouch wart her Êrec
Verse: 5117    von den rittern enwec

Verse: 5118    gevüeret besunder
Verse: 5119    dâ er alsô wunder

Verse: 5120    sîner müede ruowe emphie.
Verse: 5121    diu ritterschaft zuo im gie

Verse: 5122    und entwâfenten in sâ.
Verse: 5123    er gewan vil rîcher knaben dâ,

Verse: 5124    der deheiner dâ ze stunde
Verse: 5125    dem andern niht engunde

Verse: 5126    daz er wære vür in guot.
Verse: 5127    sich vleiz von in ein gelîcher muot

Verse: 5128    swaz im dienest mohte sîn.
Verse: 5129    vil schiere kam diu künegîn

Verse: 5130    in klagen unde schouwen
Verse: 5131    mit allen ir vrouwen.

Verse: 5132    ein phlaster wart mit ir getragen.
Verse: 5133    dâ von wil ich iu sagen

Verse: 5134    wie guot ez ze wunden was:
Verse: 5135    manec verchwunder sîn genas.

Verse: 5136    swem ez wart gebunden
Verse: 5137    über sîne wunden,

Verse: 5138    den geswar si nie mêre,
Verse: 5139    und enheilte niht ze sêre,

Verse: 5140    wan ze rehter mâze genuoc.
Verse: 5141    dehein übel nie dar zuo gesluoc.

Verse: 5142    allez argez ez vertreip:
Verse: 5143    swaz ez guotes vant, daz beleip,

Verse: 5144    und die dâ von genâsen,
Verse: 5145    die überhuop ez mâsen,

Verse: 5146    daz man die lîch ebene sach
Verse: 5147    als dâ nie wunde geschach.

Verse: 5148    mit disem phlaster verbant
Verse: 5149    der küneginne hant

Verse: 5150    des ritteres sîten.
Verse: 5151    diu werlt ze deheinen zîten

Verse: 5152    bezzer phlaster nie gewan.
Verse: 5153    wundert nû deheinen man,

Verse: 5154    derz gerne vernæme
Verse: 5155    von wanne diz phlaster kæme,

Verse: 5156    daz hâte fâmurgân,
Verse: 5157    des küneges swester, dâ verlân

Verse: 5158    lange vor, dô si erstarp.
Verse: 5159    waz starker liste an ir verdarp

Verse: 5160    unde vremder sinne!
Verse: 5161    si was ein gotinne.

Verse: 5162    man enmac diu wunder niht gesagen
Verse: 5163    von ir, man muoz ir mê verdagen,

Verse: 5164    der diu selbe vrouwe phlac.
Verse: 5165    doch sô ich meiste mac,

Verse: 5166    sô sage ich waz si kunde.
Verse: 5167    swenne si begunde

Verse: 5168    ougen ir zouberlist,
Verse: 5169    sô hâte si in kurzer vrist

Verse: 5170    die werlt umbevarn dâ
Verse: 5171    unde kam wider sâ.

Verse: 5172    ich enweiz wer siz lêrte.
Verse: 5173    ê ich die hant umbe kêrte

Verse: 5174    oder zuo geslüege die brâ,
Verse: 5175    sô vuor si hin und schein doch sâ.

Verse: 5176    si lebete ir vil werde:
Verse: 5177    in lufte als ûf der erde

Verse: 5178    mohte si ze ruowe sweben,
Verse: 5179    ûf dem wâge und drunder leben.

Verse: 5180    ouch was ir daz untiure,
Verse: 5181    si wonte in dem viure

Verse: 5182    als sanfte als ûf dem touwe.
Verse: 5183    diz kunde diu vrouwe.

Verse: 5184    und sô si des gern began,
Verse: 5185    sô machete si den man

Verse: 5186    ze vogele oder ze tiere.
Verse: 5187    dar nâch gap si im schiere

Verse: 5188    wider sîne geschaft:
Verse: 5189    si kunde et zoubers die kraft.

Verse: 5190    si lebete vaste wider gote,
Verse: 5191    wan ez warte ir gebote

Verse: 5192    daz gevügel zuo dem wilde
Verse: 5193    an walde und an gevilde,

Verse: 5194    und daz mich daz meiste
Verse: 5195    dunket, die übelen geiste,

Verse: 5196    die dâ tiuvel sint genant,
Verse: 5197    die wâren alle under ir hant.

Verse: 5198    si mohte wunder machen,
Verse: 5199    wan ir muosten die trachen
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.