TITUS
Hartmann von Aue, Erec
Part No. 58
Previous part

Verse group: (58) 
Verse: 5700    cadoc vuor hin ze hove und tete
Verse: 5701    al nâch Êreckes bete.

Verse: 5702    er bôt der künegîn êre
Verse: 5703    rehte nâch der lêre,

Verse: 5704    als er im hâte vor gezalt:
Verse: 5705    er ergap sich in ir gewalt.

Verse: 5706    Êrecke wunschte ze lône
Verse: 5707    diu vrouwe mit der krône,

Verse: 5708    diu vil edel künegîn,
Verse: 5709    daz er sælic müeste sîn.

Verse: 5710    ouch schiet harte balde
Verse: 5711    wider ûz dem walde

Verse: 5712    der tugentrîche Êrec
Verse: 5713    unde suochte den wec

Verse: 5714    dâ er vrouwen ênîten
Verse: 5715    sîn gehiez bîten

Verse: 5716    nû hâte er sich ervohten
Verse: 5717    daz im niene mohten

Verse: 5718    die wunden ganz bestân:
Verse: 5719    die wâren wider ûf gegân.

Verse: 5720    des bluotes was er gar ersigen,
Verse: 5721    die slege heten in erwigen

Verse: 5722    daz im diu varwe gar erbleich
Verse: 5723    und im diu kraft sô nâch entweich

Verse: 5724    daz er mit grôzer arbeit
Verse: 5725    hin widere gereit

Verse: 5726    dâ sîn diu vrouwe hâte erbiten:
Verse: 5727    solde er iht vürbaz sîn geriten,

Verse: 5728    sô müeste er beliben sîn.
Verse: 5729    daz wart hier an wol schîn.

Verse: 5730    als sich der halptôte man
Verse: 5731    zuo neigen began,

Verse: 5732    als er erbeizen wolde,
Verse: 5733    wan er ruowen solde,

Verse: 5734    dô was er sô betoubet
Verse: 5735    daz im daz houbet

Verse: 5736    vor den vüezen nider kam.
Verse: 5737    einen solhen val er nam

Verse: 5738    daz er lac vür tôt.
Verse: 5739    nû huop sich ein bitter nôt

Verse: 5740    und alles leides galle
Verse: 5741    von disem valle

Verse: 5742    in vrouwen ênîten muote.
Verse: 5743    von jâmer huop diu guote

Verse: 5744    ein klage vil barmeclîche,
Verse: 5745    herzeriuweclîche.

Verse: 5746    ir wuof gap alsolhen schal
Verse: 5747    daz ir der walt widerhal.

Verse: 5748    nû enhalf ir niemen mêre
Verse: 5749    klagen ir herzesêre

Verse: 5750    niuwan der widergelt
Verse: 5751    den ir der walt ûz an daz velt

Verse: 5752    mit gelîchem galme bôt.
Verse: 5753    der half ir klagen ir nôt,

Verse: 5754    wan ir enwas niemen mêre bî.
Verse: 5755    diu guote, nû viel sî

Verse: 5756    über in unde kusten.
Verse: 5757    dar nâch sluoc si sich zen brusten

Verse: 5758    und kuste in aber unde schrê.
Verse: 5759    ir ander wort was ʽwê ouwê.'

Verse: 5760    daz hâr si vaste ûz brach,
Verse: 5761    an ir lîbe si sich rach

Verse: 5762    nâch wîplîchem site,
Verse: 5763    wan hie rechent si sich mite.

Verse: 5764    swaz in ze leide geschiht,
Verse: 5765    dâ wider entuont die guoten niht,

Verse: 5766    wan daz siz phlegent enblanden
Verse: 5767    ougen unde handen

Verse: 5768    mit trehenen und mit hantslegen,
Verse: 5769    wan si anders niht enmegen.

Verse: 5770    dâ von müeze er unsælic sîn
Verse: 5771    (des wünschet im der wille mîn)

Verse: 5772    swer den wîben leide tuot,
Verse: 5773    wan ez enist manlîch noch guot.

Verse: 5774    frouwe ênîte zurnte vaste an got.
Verse: 5775    si sprach: ʽherre, ist diz dîn gebot

Verse: 5776    daz ein ritter alsô guot
Verse: 5777    durch sînen reinen muot

Verse: 5778    sînen lîp hât verlorn,
Verse: 5779    sô hât ein wunderlîcher zorn

Verse: 5780    dîner genâden barmunge genomen.
Verse: 5781    daz ich hân von dir vernomen

Verse: 5782    daz dû barmherzic sîst,
Verse: 5783    wie swachez bilde dû des gîst

Verse: 5784    an mir vil armen!
Verse: 5785    mahtû dich nû erbarmen

Verse: 5786    über mich, sich, des ist zît.
Verse: 5787    nû warte wâ mîn man lît

Verse: 5788    gar oder halp tôt.
Verse: 5789    nû erbarme dich, des ist nôt,

Verse: 5790    wan ich ein tôtez herze hân.
Verse: 5791    nû sich wie trûric ich stân.

Verse: 5792    erbarme dich, herre, über mich,
Verse: 5793    wan ez ist erbarmeclich

Verse: 5794    daz ich verweisetez wîp
Verse: 5795    langer habe mînen lîp

Verse: 5796    in solhem ellende.
Verse: 5797    wan daz âne missewende

Verse: 5798    allez dîn werc stât,
Verse: 5799    herre, ich zige dich missetât
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.