TITUS
Hartmann von Aue, Erec
Part No. 59
Previous part

Verse group: (59) 
Verse: 5800    daz dû mich langer leben lâst,
Verse: 5801    sît dû mir den benomen hâst

Verse: 5802    dem ich eine solde leben.
Verse: 5803    mahtû des, herre, bilde geben

Verse: 5804    daz dir aller herzen grunt
Verse: 5805    ist gesihteclîchen kunt

Verse: 5806    (wan dir enmac niht verborgen sîn),
Verse: 5807    daz tuo durch dîne bermde schîn.

Verse: 5808    unde habe ich mînen man,
Verse: 5809    sît ich in von êrste gewan,

Verse: 5810    verworht an ihtes ihte
Verse: 5811    mit muote oder von geschihte

Verse: 5812    alsô daz ez niht wol gezimt,
Verse: 5813    ob mir in dîn gewalt danne nimt,

Verse: 5814    daz selbe reht vinde ich mir,
Verse: 5815    wan ichs von rehte danne enbir.

Verse: 5816    enhân aber ich des niht getân,
Verse: 5817    des soltû mich geniezen lân:

Verse: 5818    herre, sô erbarme dich
Verse: 5819    durch dîne güete über mich

Verse: 5820    unde heiz mir in leben.
Verse: 5821    wil aber dû mirs niht wider geben,

Verse: 5822    sô wis, herre got, gemant
Verse: 5823    daz aller werlde ist erkant

Verse: 5824    ein wort daz dû gesprochen hâst,
Verse: 5825    und bite dich daz dûz stæte lâst,

Verse: 5826    daz ein man und sîn wîp
Verse: 5827    suln wesen ein lîp,

Verse: 5828    und ensunder uns niht,
Verse: 5829    wan mir anders geschiht

Verse: 5830    von dir ein unreht gewalt.
Verse: 5831    sî dîn erbermde manecvalt,

Verse: 5832    sô hilf ouch mir des tôdes hier.
Verse: 5833    wâ nû hungerigiu tier,

Verse: 5834    beide wolf unde ber,
Verse: 5835    lewe, iuwer einez kom her

Verse: 5836    und ezze uns beide,
Verse: 5837    daz sich sô iht scheide

Verse: 5838    unser lîp mit zwein wegen!
Verse: 5839    und ruoche got unser sêlen phlegen,

Verse: 5840    die enscheident sich benamen niht,
Verse: 5841    swaz dem lîbe geschiht.'

Verse: 5842    der si deheinez komen sach,
Verse: 5843    si rief in aber unde sprach:

Verse: 5844    ʽir tier vil ungewizzen,
Verse: 5845    nû habet ir erbizzen

Verse: 5846    manec schâf unde swîn,
Verse: 5847    armer liute vihelîn,

Verse: 5848    die ius niht engunden
Verse: 5849    noch überwinden kunden.

Verse: 5850    wæret ir nû wîse,
Verse: 5851    ir holtet iuwer spîse

Verse: 5852    hie mit vollem munde,
Verse: 5853    wan ich iu mîn wol gunde:

Verse: 5854    dâ von müeste ich iu wol gezemen.
Verse: 5855    nû kumt, ir muget mich gerne nemen.

Verse: 5856    wâ sît ir nû? jâ bin ich hie.'
Verse: 5857    daz laden si niht vervie

Verse: 5858    daz dehein tier ez vernæme
Verse: 5859    oder dar kæme.

Verse: 5860    ob aber deheinez kæme
Verse: 5861    und ob ez rehte vernæme

Verse: 5862    ir trûrige gebâre,
Verse: 5863    sô weiz ich wol zewâre,

Verse: 5864    swie hungeric ez wære,
Verse: 5865    ez müeste ir die swære

Verse: 5866    ze jungest helfen weinen
Verse: 5867    und daz wol bescheinen

Verse: 5868    daz si zerbarmenne was.
Verse: 5869    über ir willen si genas.

Verse: 5870    alsô si rehte ersach
Verse: 5871    daz ir ze sterben niene geschach,

Verse: 5872    dô begunde si von êrste klagen
Verse: 5873    und hete sich selben nâch erslagen.

Verse: 5874    man sach nie jâmer merre.
Verse: 5875    si sprach: ʽlieber herre,

Verse: 5876    sît ich dich muoz verliesen,
Verse: 5877    sô wil ich hie verkiesen

Verse: 5878    alle man immer mêre
Verse: 5879    wan einen den ich sêre

Verse: 5880    in mînem herzen minne
Verse: 5881    von allem mînem sinne.

Verse: 5882    dem bin ich gâhes worden holt.
Verse: 5883    hæte ich umbe den versolt

Verse: 5884    daz im geviele mîn lîp,
Verse: 5885    dem wolde ich sîn ein stætez wîp.

Verse: 5886    vil lieber tôt, nû meine ich dich.
Verse: 5887    von dîner liebe kumt daz ich

Verse: 5888    alsô verkêre den site
Verse: 5889    daz ich wîp mannes bite.

Verse: 5890    nâch dîner minne ist mir sô nôt.
Verse: 5891    nû geruoche mîn, vil reiner tôt.

Verse: 5892    ouwê wie wol ich arme
Verse: 5893    gezim an dînem arme!

Verse: 5894    dû bist vil wol ze mir gehît.
Verse: 5895    wan nimestû mich enzît?

Verse: 5896    sît daz dû mich doch nemen muost,
Verse: 5897    sô râte ich daz dûz iezuo tuost.

Verse: 5898    ich gezim dir wol ze wîbe:
Verse: 5899    ich hânz noch an dem lîbe,
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.