TITUS
Hartmann von Aue, Erec
Part No. 66
Previous part

Verse group: (66) 
Verse: 6500    immer gerne trîben.
Verse: 6501    ich rietez allen wîben,

Verse: 6502    wanz enmöhte in niht gewerren
Verse: 6503    daz si einen rîchen herren

Verse: 6504    næmen vür einen solhen man.
Verse: 6505    iuwer tumpheit ich iu verban.

Verse: 6506    nû ezzet durch den willen mîn.'
Verse: 6507    dô sprach diu edel künegîn:

Verse: 6508    ʽherre, ir habet mir genuoc gesaget,
Verse: 6509    daz wære doch als guot verdaget.

Verse: 6510    vil kurze ich iu antwürten wil.
Verse: 6511    ir muget wol rede verliesen vil.

Verse: 6512    bî dem eide geloubet daz,
Verse: 6513    in mînen munt kumt nimmer maz,

Verse: 6514    mîn tôter man enezze ê.'
Verse: 6515    nû enmohte der grâve mê

Verse: 6516    im selben meister gesîn,
Verse: 6517    er entæte sîn untugent schîn:

Verse: 6518    sîn zorn in verleite
Verse: 6519    ze grôzer tôrheite

Verse: 6520    und ûf grôzen ungevuoc,
Verse: 6521    daz er si mit der hant sluoc

Verse: 6522    alsô daz diu guote
Verse: 6523    harte sêre bluote.

Verse: 6524    er sprach: ʽir ezzet, übel hût!'
Verse: 6525    beide stille und überlût

Verse: 6526    sô dûhtez si alle gelîche,
Verse: 6527    arme unde rîche,

Verse: 6528    ein michel ungevuoge.
Verse: 6529    ouch wizzenz im genuoge

Verse: 6530    under sîniu ougen:
Verse: 6531    die andern redetenz tougen,

Verse: 6532    ez wære tœrlîch getân
Verse: 6533    und er möhtez gerne lâzen hân.

Verse: 6534    er wart dar umbe gestrâfet vil:
Verse: 6535    si wizzen imz unz ûf daz zil

Verse: 6536    daz der schalchafte man
Verse: 6537    vil sêre zürnen began.

Verse: 6538    ir strâfen was im ungemach.
Verse: 6539    vil unsenfteclîche er sprach:

Verse: 6540    ʽir herren, ir sît wunderlich,
Verse: 6541    daz ir dar umbe strâfet mich

Verse: 6542    swaz ich mînem wîbe tuo.
Verse: 6543    dâ bestât doch niemen zuo

Verse: 6544    ze redenne übel noch guot,
Verse: 6545    swaz ein man sînem wîbe tuot.

Verse: 6546    si ist mîn und bin ich ir:
Verse: 6547    wie welt ir daz erwern mir,

Verse: 6548    ich entuo ir swaz mir gevalle?'
Verse: 6549    dâ mite gesweicte er si alle.

Verse: 6550    dô diu vrouwe wart geslagen,
Verse: 6551    ir gebærde ensuln wir iuch verdagen:

Verse: 6552    von dem slage wart si vrô
Verse: 6553    und ouch des tages nie mê wan dô.

Verse: 6554    wâ si die vreude möhte nemen?
Verse: 6555    daz muget ir gerne vernemen,

Verse: 6556    wan slege tuont selten iemen vrô.
Verse: 6557    ir vreude schuof sich alsô:

Verse: 6558    si wære gerner tôt gewesen
Verse: 6559    tûsentstunt dan genesen:

Verse: 6560    und als si den slac emphie
Verse: 6561    (wan er von mannes krefte gie),

Verse: 6562    dô hete si gedingen unde trôst
Verse: 6563    si würde des lîbes belôst,

Verse: 6564    und swaz si mêre gespræche
Verse: 6565    daz erz mit slegen ræche

Verse: 6566    unz er si gar erslüege.
Verse: 6567    des wart vil ungevüege

Verse: 6568    ir klage, und schrê wider dem site,
Verse: 6569    und wânde den tôt gedienen mite.

Verse: 6570    si stuont von im vil verre
Verse: 6571    und sprach: ʽgeloubet, herre,

Verse: 6572    ich enahte ûf iuwer slege niht
Verse: 6573    und swaz mir von iu geschiht,

Verse: 6574    unde nemet ir mir den lîp,
Verse: 6575    ichn wirde doch nimmer iuwer wîp.

Verse: 6576    des nemet iu ein zil.'
Verse: 6577    der rede treip si sô vil

Verse: 6578    unz er si anderstunt
Verse: 6579    sêre sluoc an den munt.

Verse: 6580    sînen slac si niht envlôch:
Verse: 6581    vil sêre si sich drunder zôch,

Verse: 6582    daz si ir mêre emphienge.
Verse: 6583    si wânde ir wille ergienge.

Verse: 6584    si sprach: ʽwê mir vil armen wîbe!
Verse: 6585    wære mîn geselle bî lîbe,

Verse: 6586    diz bliuwen wære vil unvertragen.'
Verse: 6587    dô si sô lûte begunde klagen,

Verse: 6588    Êrec fil de roi lac
Verse: 6589    dannoch unversunnen lac

Verse: 6590    in des tôdes wâne,
Verse: 6591    und doch des tôdes âne.

Verse: 6592    geruowet was er etewaz
Verse: 6593    unde doch niht vil baz.

Verse: 6594    er lac in einem twalme
Verse: 6595    und erschrihte von ir galme

Verse: 6596    als der dâ wirt erwecket,
Verse: 6597    von swærem troume erschrecket.

Verse: 6598    er vuor ûf von der bâre
Verse: 6599    in vremder gebâre
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.