TITUS
Hartmann von Aue, Erec
Part No. 65
Previous part

Verse group: (65) 
Verse: 6400    ez ist ein unbiderber strît,
Verse: 6401    dâ ir doch ane sô stæte sît.

Verse: 6402    iuwer schade enist niht sô grôz:
Verse: 6403    ich bin vil wol sîn übergenôz

Verse: 6404    oder doch wol als vrum als er.
Verse: 6405    vrouwe mîn, nû tuot her.

Verse: 6406    ich wil geben in iuwer hant
Verse: 6407    mich unde mîn lant

Verse: 6408    und sô kreftigez guot
Verse: 6409    daz ir iuwer armuot

Verse: 6410    und leides müget vergezzen.
Verse: 6411    noch gât dan mit mir ezzen.'

Verse: 6412    si sprach: ʽdaz ensol got wellen,
Verse: 6413    daz ich mînen gesellen

Verse: 6414    alsô muoz hân verlorn'.
Verse: 6415    des wart vil tiure dô gesworn:

Verse: 6416    ʽê erwel ich daz ich der erde
Verse: 6417    mit im bevolhen werde.

Verse: 6418    ich hân immer manne rât
Verse: 6419    sît mir in got benomen hât.'

Verse: 6420    er sprach: ʽnû lât die rede sîn
Verse: 6421    immer durch die liebe mîn

Verse: 6422    und gât dan ezzen mit mir,
Verse: 6423    wan ichs benamen niht enbir.'

Verse: 6424    swie vil er doch si gebat,
Verse: 6425    sô enwolde si niht von der stat,

Verse: 6426    unz er si alsô betwanc:
Verse: 6427    er zôch si hin sunder danc,

Verse: 6428    wan si enmohte im niht gestrîten.
Verse: 6429    er ensazte si niht besîten:

Verse: 6430    ir wart ein valtstuol vor gesat
Verse: 6431    ze tische engegen, als er bat,

Verse: 6432    daz er die vrouwen
Verse: 6433    deste baz möhte schouwen.

Verse: 6434    er bat si dicke ezzen.
Verse: 6435    nû enmohte si aber niht vergezzen

Verse: 6436    ir lieben gesellen.
Verse: 6437    trehene begunde si vellen:

Verse: 6438    der tisch wart von ir ougen naz
Verse: 6439    al des endes dâ si saz.

Verse: 6440    von jâmer want si ir hende,
Verse: 6441    diu vil ellende,

Verse: 6442    ir klage was vil stæte.
Verse: 6443    swie vil der wirt gebæte

Verse: 6444    daz si sichs wolde mâzen,
Verse: 6445    nû enmohte sis niht gelâzen.

Verse: 6446    nû sprach er aber zir:
Verse: 6447    ʽvrouwe, ir machet iu und mir

Verse: 6448    den jâmer al ze vesten
Verse: 6449    und mînen lieben gesten

Verse: 6450    die her durch vreuwen komen sint.
Verse: 6451    und enwæret ir niht ein kint,

Verse: 6452    ir möhtet iuwer klage lân,
Verse: 6453    und kundet ir iuch rehte entstân,

Verse: 6454    wie rehte schône in kurzer vrist
Verse: 6455    iuwer dinc gehœhet ist,

Verse: 6456    doch iuch lützel noch bedrôz.
Verse: 6457    ich gesach nie wunder sô grôz

Verse: 6458    daz ir niht enkunnet gedagen
Verse: 6459    und niht enmuget wol vertragen

Verse: 6460    daz iuwer dinc nû vil wol stât
Verse: 6461    unde sich verkêret hât

Verse: 6462    ze guoter handelunge.
Verse: 6463    swem alsô gelunge

Verse: 6464    als iu hie muoz gelingen,
Verse: 6465    er möhte baz gesingen

Verse: 6466    danne weinen unde klagen.
Verse: 6467    ich muoz doch die rihte sagen,

Verse: 6468    iuwer jâmer ist alze vester.
Verse: 6469    hiute wider gester

Verse: 6470    sô stât iuwer dinc doch ungelîch.
Verse: 6471    ê wâret ir arm, nû sît ir rîch:

Verse: 6472    vor wâret ir niemen wert,
Verse: 6473    nû hât iuch got êren gewert:

Verse: 6474    ê wâret ir vil unerkant,
Verse: 6475    nû sît ir gewaltic über ein lant:

Verse: 6476    ê in swacher schouwe,
Verse: 6477    nû ein rîchiu vrouwe:

Verse: 6478    vor muostet ir ûz der ahte sîn,
Verse: 6479    nû sît ir ein mehtic grævîn:

Verse: 6480    ê vuoret ir wîselôs,
Verse: 6481    unz iuwer sælde mich erkôs:

Verse: 6482    vor wâret ir aller genâden bar,
Verse: 6483    nû habet ir die êre gar:

Verse: 6484    ê litet ir michel arbeit,
Verse: 6485    dâ von hât iuch got geleit:

Verse: 6486    vor hetet ir ein swachez leben,
Verse: 6487    nû hât iu got den wunsch gegeben:

Verse: 6488    vor muoste iu vil gewerren,
Verse: 6489    nû lobet unsern herren

Verse: 6490    daz er iuchs hât übertragen
Verse: 6491    und lât iuwer tumbez klagen:

Verse: 6492    ê lebetet ir âne êre,
Verse: 6493    der habet ir nû mêre

Verse: 6494    dan dehein iuwer lantwîp.
Verse: 6495    ir kestiget den lîp,

Verse: 6496    welt ir wizzen, âne nôt.
Verse: 6497    iu ist ein arm man tôt:

Verse: 6498    des sît ir ergetzet mit mir.
Verse: 6499    den selben wehsel möhtet ir
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.