TITUS
Lancelot und Ginover I: Prosalancelot
Part No. 48
Previous part

Page: (104) 
Sentence: 611    Nu wil ich allen den sagen die gern von schönen luten boten sprechen, wie schon aller syn lip was:
Sentence: 612    sin lip was sere wiß under synen cleydern, nicht zu vil wiß noch zu vil schwarcz, von beyden gemenget, das man heißt liecht brun, syn antlicz wol erluchtet mit schoner farbe so wol zu maß, das got von hymel nye schöner farb zusamen gemenget als an Lancelot was gemenget under synen augen, von wißer farb und von bruner und von roter, so das die rot farb erlucht die andern die gemenget was wiß und brun uber all syn antlicz.
Sentence: 613    Sin munt was im kleyn, lachend und rott als ein rose, ein wenig dick, die zene cleyn und wiß glich nah by einander.
Sentence: 614    Sin kinne stunt im wol mit eim cleynen tal.
Sentence: 615    Sin nase was im zu maßen lang und enmitten ein wenig hoch, gra augen großlachende die wil das er gutes mütes was; wann als er sere zornig was, so luchtens im als ein fuer in eim ofene, so das alle die ducht die yn sahen das im durch die sehen von den augen kemen blutes tropffen geschossen, und gebart mit der nasen als ein roß das sere ist gerant, und heiß die zene zuhauff das sie krachten.
Sentence: 616    Sin athem der ußer sim mund ging der scheyn als rot als ein blut, und sprach dann so herticlich und so groß als ein busune, und was er dann begreiff das zurteiß er alles mit den zenen und mit den henden.
Sentence: 617    So sin zorn groß was, so vergaß im alles das er willen hett zu thun und alles das im ye geschah, biß an das dingk allein da er umb gezurnet hett; das wart sitther wol schin an meniger stat.
Sentence: 618    Die stirn was im hoch zu guter maß und sin augbrawen liecht brun, das hare was im kleyn und liecht blut, dwil das er kint was.
Sentence: 619    Da er zum wapen kam, da wart es im brun, wann alleweg was es im liecht und kruß zu guter maßen.
Sentence: 620    Sin halß was im wiß und lang.
Sentence: 621    Die schultern warn im recht und breit wol zu maß.
Sentence: 622    Sin lichnam was im wol geschaffen, zu guter maß lang, wedder zu schmal noch zu dick.
Sentence: 623    Sin brust was groß und starck und breit und dick, das missestunt im allermeist an sirn libe; und alle die yn sahen sprachen, wer im die brust ein wenig mynner gewesen, das sie nye so wol geschaffen man gesehen und so schön.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.