TITUS
Lancelot und Ginover I: Prosalancelot
Part No. 49
Previous part

Page: (106) 
Sentence: 624    Die kúniginn jenever, die yn allermeist prúfete, sprach das im die brust nicht zu groß were, wann das hercz das darinn lag hett sin groß darnach das die brust was; und sprach me, were das groß hercz in eyner cleynen brust gewesen, so múst die brust zurißen und zurbrechen, da das hercz nit volliclich statt inne hett, da es gemechelich und zu synem recht inne lege.
Sentence: 625    »Wer ich gott«, sprach sie, »so hett ich Lanceloten wedder mynner noch me gemacht dann er ist.« Sin arm waren lang und recht und wol zu maßen groß, die hend schlecht und lang als einer jungfrauwen hende, wern im die finger ein wenig mynner gewesen.
Sentence: 626    Die syten waren im langk zu guter maßen.
Sentence: 627    Sin beyn waren im schlecht und zu guter maßen lang, die fuß waren im schlecht und hol, langk und hoch.
Sentence: 628    Ußermaßen sang er wol, so ers wolt thun; darzu was nicht dicke das er in umbederbe fro was, wann er zu recht freud solt machen.
Sentence: 629    So enwart nie man geborn der frauwen und rittern als wol freud kund machen als er kunde.
Sentence: 630    Als Lancelot dick in syner freud saß, so sprach er das sin hercz kein dingk getorst gedencken, er enwönde es wol uberkomen mit dem libe, wolt ers mit ernst understan.
Sentence: 631    So sere ließ er sich an sin groß freude so er recht frölich wesen wolt.
Sentence: 632    Das dete yn sither menige groß abentur zu ende komen und wol mit eren vollenbringen.
Sentence: 633    Menge lute, die yn horten so herlich sprechen, wonden das ers off rum spreche, das er nicht endete.
Sentence: 634    Er sprach es alles von großen freuden die er in sym herczen hette.
Sentence: 635    Lancelot was schön und wolgeschaffen.
Sentence: 636    Sin sitten waren als hubsch und als gut darzu.
Sentence: 637    Er was ein das gútest kint und das miltest da man zu recht gut solt wesen.
Sentence: 638    Alles das er gewinnen mocht das deilt er under syn gesellen als gern als sies namen.
Sentence: 639    Frye lut erte er gerne und edel, das was aller syn gedanck.
Sentence: 640    Noch nye wart kint gesehen von syner art.
Sentence: 641    Nye keyn man gesah yne keyne schalckeyt gethun, er enwurde dann mit unrecht darzu getriben.
Sentence: 642    Als er darzu getriben wart das er zurnen must, so was er mit großer pin und mit arbeit wiedder guts muͦts zu machen.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.