TITUS
Lancelot und Ginover I: Prosalancelot
Part No. 205
Previous part

Page: (17) 
Sentence: 713    Desselben nachtes lag der knapp so er allerrechtest mocht geyn konig Artus hof geryten.
Sentence: 714    Des andern tages stund er frú off und reyt syn straß so er baldest mocht, und begegent im Alibons, der der koniginn fuͦrt huͦt.
Sentence: 715    Er fraget yn ware er so bald ritte, ob er botschafft furte.
Sentence: 716    »Ja ich«, sprach der knapp, »ich fúre dem konig Artus die wúnderlichsten botschafft die ye kein man vernam.«
Sentence: 717    »Was ist das?« sprach er.
Sentence: 718    »Die Dolorose Garte ist gewuͦnnen«, sprach er.
Sentence: 719    »Das enmocht nymer geschehen«, sprach Alibons.
Sentence: 720    »Es ist werlich war«, sprach der knappe, »ich sah es mit beiden mynen augen das ein ritter alleyn durch beide porten reyt und sie gewann und alle die ritter die dainn waren.«
Sentence: 721    »Wie waren sin wapen gethan?« sprach Alibons.
Sentence: 722    »Syn wapen waren wiß«, sprach der knappe, »und sin roß wiß.«
Sentence: 723    »Viel lieber frunt«, sprach Alibons, »rytent bald zu hof und sagent diße mere!
Sentence: 724    Da ist manig stolcz man inne der sie gern höret und der mere fast fro ist.«
Sentence: 725    Der knapp reyt so lang das er zu Karlion kam und fant den konig da.
Sentence: 726    Er ging zu im und knyet fur yn: »Konig Artus«, sprach er, »got halt dich als den getruwesten man der in der welt lebet!
Sentence: 727    Ich bring dir guͦte mere und die wúnderlichsten die ye me in dinen hoff kamen.«
Sentence: 728    »Was ist das, lieber frunt?« sprach er, »man mag es gern hören das als wunderlich ist als ir gesprochen hant.«
Sentence: 729    »Ich sage uch furware, herre, das die Dolorosegarde gewuͦnnen ist«, sprach er, »ich sahe es mit mynen augen das ein ritter durch beid porten fur mit gewalt.«
Sentence: 730    »Das enmocht númmer war werden«, sprach yglicher.
Sentence: 731    »Es ist werlich ware«, sprach der knappe.
Sentence: 732    »Knapp«, sprach der konig, »du solts uns nit sagen, es sy dann ware!«
Sentence: 733    »Herre«, sprach er, »ist es unware, so wil ich das ir mich henckent!«
Sentence: 734    Des knappen bruder Aiglins kam darzu gande und sah wo syn bruder vor dem konig knyet.
Sentence: 735    Er lieff zu im und sprach: »Lieber bruͦder, biß wilkuͦmme!
Sentence: 736    Was not hatt dich herre zu hof bracht?«
Sentence: 737    Er stund off und sagt im die mere.
Sentence: 738    »Aiglins«, sprach der konig, »ist das din bruder?«
Sentence: 739    »Ja er, herre«, sprach er, »er ist sicherlich myn bruder.«
Sentence: 740    »So mag man im wol glauben des er gesaget«, sprach der konig.
Sentence: 741    »Er getörst uch keyn unwarheit sagen, herre«, sprach Aiglins, »wann diß ist so ungleublich das es ymant kum gegleuben mag, er hatt es selb gesehen.«
Sentence: 742    »Wie waren des ritters wapen gethan?« sprach der konig.
Sentence: 743    »Herre«, sprach er, »syn wapen waren wiß und syn roß was wiß.«
Sentence: 744    »Werlich«, sprach myn herre Gawan, »das ist der nuͦw ritter den ir ritter machtet.«
Sentence: 745    Da sprachen die andern ritter allsampt die da by stunden, sie wolten dar farn und besehen obs war were.
Sentence: 746    »Das wer nicht gut«, sprach myn herre Gawan, »das ir alle dar fúret mit ein, es ist gnuͦng mit zehen rittern die dar farn.«
Sentence: 747    »Also duncket mich guͦt«, sprach der konig und nant sie allsampt.
Sentence: 748    Myn herre Gawan was der erst und myn herre Ywan der ander, der dritt was Glaleguentins de Galois, der vierde was Galescundes, der funfft was Torz, Arez suͦne, der sehst Caredosbrebras, der siebend Ywains Liavoltres, der acht Goscans von Strangot, der núnd was Ligais Galentins, der zehend was Aiglins de Vaus.


Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.