TITUS
Gottfried von Strassburg, Tristan
Part No. 2
Previous part

Chapter: 2 
2: Riwalin und Blancheflur


Verse: 245    Ein hêrre in Parmenîe was,
Verse: 246    der jâre ein kint, als ich ez las.

Verse: 247    der was, als uns diu wârheit
Verse: 248    an sîner âventiure seit,

Verse: 249    wol an gebürte künege genôz,
Verse: 250    an lande vürsten ebengrôz,

Verse: 251    des lîbes schoene und wunneclîch,
Verse: 252    getriuwe, küene, milte, rîch;

Verse: 253    und den er vröude solte tragen,
Verse: 254    den was der hêrre in sînen tagen

Verse: 255    ein vröude berndiu sunne:
Verse: 256    er was der werlde ein wunne,

Verse: 257    der ritterschefte ein lêre,
Verse: 258    sîner mâge ein êre,

Verse: 259    sînes landes ein zuoversiht.
Verse: 260    an ime brast al der tugende niht,

Verse: 261    der hêrre haben solte,
Verse: 262    wan daz er ze verre wolte

Verse: 263    in sînes herzen luften sweben
Verse: 264    und niwan nâch sînem willen leben.

Verse: 265    daz ime ouch sît ze leide ergie,
Verse: 266    wan leider diz ist und was ie,

Verse: 267    ûfgêndiu jugent und vollez guot,
Verse: 268    diu zwei diu vüerent übermuot.

Verse: 269    vertragen, daz doch vil manic man
Verse: 270    in michelem gewalte kan,

Verse: 271    dar an gedâhte er selten.
Verse: 272    übel mit übele gelten,

Verse: 273    craft erzeigen wider craft:
Verse: 274    dar zuo was er gedanchaft.

Verse: 275    Nu enloufet ez die lenge niht,
Verse: 276    der allez daz, daz ime geschiht,

Verse: 277    mit Karles lôte gelten wil.
Verse: 278    weiz got, der man muoz harte vil

Verse: 279    an disem borge übersehen
Verse: 280    oder ime muoz dicke schade geschehen.

Verse: 281    swer keinen schaden vertragen kan,
Verse: 282    dâ wahsent dicke schaden an.

Verse: 283    und ist ein veiclîcher site,
Verse: 284    hie vâhet man den bern mite:

Verse: 285    der richet einzele schaden,
Verse: 286    unz er mit schaden wirt beladen.

Verse: 287    ich waene, ouch ime alsam geschach,
Verse: 288    wan er sich alse vil gerach,

Verse: 289    biz er den schaden dar an genam.
Verse: 290    daz aber er ie ze schaden kam,

Verse: 291    daz enkam von archeite niht,
Verse: 292    dâ von doch manegem schade geschiht.

Verse: 293    ez kam von dem geleite
Verse: 294    sîner kintheite.

Verse: 295    daz er in sîner blüenden jugent
Verse: 296    mit jugentlîcher hêrren tugent

Verse: 297    wider sîn selbes saelden streit,
Verse: 298    daz geschuof sîn spilndiu kintheit,

Verse: 299    diu mit ir übermuote
Verse: 300    in sînem herzen bluote.

Verse: 301    er tete vil rehte als elliu kint,
Verse: 302    diu selten vorbesihtic sint.

Verse: 303    er nam vür sich niht sorgen war,
Verse: 304    wan lebete und lebete und lebete êt dar.

Verse: 305    dô sîn leben ze lebene vienc,
Verse: 306    ûf alse der tagesterne gienc

Verse: 307    und lachende in die werlde sach,
Verse: 308    dô wânde er, des doch niene geschach,

Verse: 309    daz er iemer alsô solte leben
Verse: 310    und in der lebenden süeze sweben.

Verse: 311    nein, sînes lebenes begin
Verse: 312    der gie mit kurzem lebene hin;

Verse: 313    diu morgenlîche sunne
Verse: 314    sîner werltwunne,

Verse: 315    dô diu von êrste spiln began,
Verse: 316    dô viel sîn gaeher âbent an,

Verse: 317    der ime vor was verborgen,
Verse: 318    und laschte im sînen morgen.

Verse: 319    Wie er aber genennet waere,
Verse: 320    daz kündet uns diz maere.

Verse: 321    sîn âventiure tuot es schîn:
Verse: 322    sîn rehter name was Riwalîn,

Verse: 323    sîn ânam was Canêlengres.
Verse: 324    genuoge jehent und waenent des,

Verse: 325    der selbe hêrre er waere
Verse: 326    ein Lohnoisaere,

Verse: 327    künec über daz lant ze Lohnois:
Verse: 328    nu tuot uns aber Thômas gewis,

Verse: 329    der ez an den âventiuren las,
Verse: 330    daz er von Parmenîe was

Verse: 331    und haete ein sunderez lant
Verse: 332    von eines Britûnes hant

Verse: 333    und solte dem sîn undertân:
Verse: 334    der selbe hiez li duc Morgân.

Verse: 335    Nu daz der hêrre Riwalîn
Verse: 336    wol und nâch grôzen êren sîn

Verse: 337    wol driu jâr ritter was gewesen
Verse: 338    und haete wol hin heim gelesen

Verse: 339    ganzlîche kunst ze ritterschaft,
Verse: 340    ze urliuge volleclîche craft,

Verse: 341    ( er haete lant, liute unde guot)
Verse: 342    weder ez dô nôt alde übermuot

Verse: 343    geschüefe, des enweiz ich niht,
Verse: 344    wan als sîn âventiure giht,

Verse: 345    sô greif er Morgânen an
Verse: 346    als einen schuldegen man.

Verse: 347    er kam geriten in sîn lant
Verse: 348    mit alsô creftiger hant,

Verse: 349    daz er im mit gewalte
Verse: 350    genuoge bürge valte;

Verse: 351    die stete muosen sich ergeben
Verse: 352    und loesen ir guot unde ir leben,

Verse: 353    rehte alse liep als ez in was,
Verse: 354    unz er zesamene gelas

Verse: 355    gülte unde guotes die craft,
Verse: 356    daz er sîne ritterschaft

Verse: 357    sô starke gemêrte,
Verse: 358    swar er mit her kêrte,

Verse: 359    ez waeren bürge oder stete,
Verse: 360    daz er vil sînes willen tete.

Verse: 361    ouch nam er dicke schaden dar an:
Verse: 362    er galt mit manegem biderben man,

Verse: 363    wan Morgân was an sîner wer;
Verse: 364    der bestuont in ofte mit her

Verse: 365    und tete in dicke schadehaft;
Verse: 366    wan ze urliuge und ze ritterschaft

Verse: 367    hoeret verlust unde gewin:
Verse: 368    hie mite sô gânt urliuge hin;

Verse: 369    verliesen unde gewinnen
Verse: 370    daz treit die criege hinnen.

Verse: 371    ich waene, im Morgân alsam tete:
Verse: 372    er valte im ouch bürge unde stete

Verse: 373    und brach im underwîlen abe
Verse: 374    sîne liute und sîne habe

Verse: 375    und tete im, swaz er mohte,
Verse: 376    daz doch niht vil entohte,

Verse: 377    wan in tete iemer Riwalîn
Verse: 378    mit grôzem schaden wider în

Verse: 379    und treip des mit im also vil,
Verse: 380    unz er in brâhte ûf daz zil,

Verse: 381    daz er sich nihtes kunde erwern
Verse: 382    noch sich niender trûte ernern

Verse: 383    niwan in sînen vesten,
Verse: 384    den sterkesten und den besten.

Verse: 385    die selben besaz Riwalîn
Verse: 386    und gab ûz voller hant dar în

Verse: 387    bataljen unde strîten.
Verse: 388    er tete in z' allen zîten

Verse: 389    strackes rehte unz in diu tor.
Verse: 390    ouch haete er dicke dâ vor

Verse: 391    turneie und rîche ritterschaft.
Verse: 392    alsus lag er im obe mit craft

Verse: 393    und herete in in dem lande
Verse: 394    mit roube und mit brande,

Verse: 395    biz sich Morgân ze tage dô bôt
Verse: 396    und daz erwarp mit aller nôt,

Verse: 397    daz ez getaget wart under in zwein
Verse: 398    und ein jâr vride getragen in ein,

Verse: 399    und wart der von in beiden
Verse: 400    mit bürgen und mit eiden

Verse: 401    gestaetet, alse er solte sîn.
Verse: 402    hie mite sô kêrte Riwalîn

Verse: 403    mit den sînen heim rîch unde vrô.
Verse: 404    ûz milter hant lônde er in dô

Verse: 405    und machte si alle rîche.
Verse: 406    er lie sî vrôlîche

Verse: 407    und wol nâch sînen êren
Verse: 408    wider z' ir heimüete kêren.

Verse: 409    Nu daz Canêle alsus gelanc,
Verse: 410    nu was dar nâch vil harte unlanc,

Verse: 411    unz daz er aber einer vart
Verse: 412    durch banekîe in eine wart

Verse: 413    und er sich aber ûz reite
Verse: 414    mit grôzer rîcheite,

Verse: 415    alsô der êrengire tuot.
Verse: 416    al daz geraete und al daz guot,

Verse: 417    des er bedürfen wolte
Verse: 418    und ein jâr haben solte,

Verse: 419    daz wart im an ein schif getragen.
Verse: 420    er haete vil gehoeret sagen,

Verse: 421    wie höfsch und wie êrbaere
Verse: 422    der junge künic waere

Verse: 423    von Curnewâle Marke,
Verse: 424    des êre wuohs dô starke:

Verse: 425    der haete dô ze sîner hant
Verse: 426    Curnewal und Engelant.

Verse: 427    Curnwal was aber sîn erbe dô.
Verse: 428    umbe Engelanden stuond ez sô:

Verse: 429    daz haete er sît des mâles,
Verse: 430    daz die Sahsen von Gâles

Verse: 431    die Britûne dâ vertriben
Verse: 432    und sî dâ hêrren beliben,

Verse: 433    von den ez ouch den namen verliez
Verse: 434    daz lant, daz ê Britanje hiez,

Verse: 435    und wart ouch iesâ dô genant
Verse: 436    nâch den von Gâles Engelant.

Verse: 437    dô die daz lant besâzen
Verse: 438    und ez under sich gemâzen,

Verse: 439    dô wolten si alle künegelîn
Verse: 440    und hêrren von in selben sîn:

Verse: 441    diz wart ir aller ungewin.
Verse: 442    sus begunden sî sich under in

Verse: 443    slahen unde morden starke
Verse: 444    und bevulhen ouch dô Marke

Verse: 445    sich und daz lant in sîne pflege:
Verse: 446    sît her diende ez im alle wege

Verse: 447    sô sêre und sô vorhtlîche,
Verse: 448    daz nie kein künicrîche

Verse: 449    eim künege mê gediende baz.
Verse: 450    ouch saget diu istôrje von im daz,

Verse: 451    daz allen den bîlanden,
Verse: 452    diu sînen namen erkanden,

Verse: 453    kein künec sô werder was als er.
Verse: 454    dâ hin was Riwalînes ger.

Verse: 455    aldâ dâhte er belîben,
Verse: 456    ein jâr mit ime vertrîben

Verse: 457    und von im werden tugenthaft
Verse: 458    und lernen niuwan ritterschaft

Verse: 459    und ebenen sîne site baz.
Verse: 460    sîn edelez herze seite im daz:

Verse: 461    erkante er vremeder lande site,
Verse: 462    dâ bezzert er die sîne mite

Verse: 463    und würde selbe erkant dervan.
Verse: 464    Mit disen sinnen huob er an:

Verse: 465    er bevalch sîn liut und sîn lant
Verse: 466    an sînes marschalkes hant,

Verse: 467    eines hêrren von dem lande,
Verse: 468    an dem er triuwe erkande,

Verse: 469    der hiez Rûal li foitenant.
Verse: 470    sus kêrte Riwalîn zehant

Verse: 471    mit zwelf gesellen über sê.
Verse: 472    er bedorfte dô dekeines mê,

Verse: 473    er haete her hie mite genuoc.
Verse: 474    nu sich diu zît alsô getruoc,

Verse: 475    daz er ze Curnewâle kam
Verse: 476    und ûf dem mer aldâ vernam,

Verse: 477    daz Marke der maere
Verse: 478    ze Tintajêle waere,

Verse: 479    dâ kêrte er sîne reise hin.
Verse: 480    dâ stiez er ûz, dâ vand er in

Verse: 481    und wart des inneclîche vrô.
Verse: 482    sich und die sîne cleite er dô

Verse: 483    rîlîche und alse im wol gezam.
Verse: 484    nu daz er dô ze hove kam,

Verse: 485    Marke der tugende rîche
Verse: 486    der enpfienc in tugentlîche

Verse: 487    und mit im al die sîne.
Verse: 488    man bôt dâ Riwalîne

Verse: 489    den anpfanc und die êre,
Verse: 490    daz ez ime dâ vor nie mêre

Verse: 491    ze keinen zîten anderswâ
Verse: 492    sô werde erboten wart sô dâ.

Verse: 493    hie spilten sîne gedanke mite;
Verse: 494    diz liebete ime den hovesite.

Verse: 495    er dâhte dicke wider sich:
Verse: 496    'binamen got selbe der hât mich

Verse: 497    ze diseme lantgesinde brâht!
Verse: 498    mîn saelde hât mich wol bedâht:

Verse: 499    swaz ich von Markes tugenden ie
Verse: 500    gehôrte sagen, deist allez hie.

Verse: 501    sîn leben daz ist höfsch unde guot.'
Verse: 502    sus seite er Marke sînen muot,

Verse: 503    war umbe er komen waere.
Verse: 504    nu Marke sîniu maere

Verse: 505    und sînen muot haete vernomen,
Verse: 506    er sprach: 'got und mir willekomen!

Verse: 507    lîp unde guot und swaz ich hân,
Verse: 508    daz sol z' iuwerem gebote stân.'

Verse: 509    Canêlengres der was dâ wol
Verse: 510    des hoves, der hof der was sîn vol.

Verse: 511    arme unde rîche haeten in
Verse: 512    liep unde werden under in

Verse: 513    und enwart nie gast geminnet baz.
Verse: 514    ouch kunde er wol geschulden daz:

Verse: 515    der tugenthafte Riwalîn
Verse: 516    der was und kunde wol gesîn

Verse: 517    mit lîbe und mit guote,
Verse: 518    mit geselleclîchem muote

Verse: 519    z' ir aller dienste gereit.
Verse: 520    also lebete er in der werdekeit

Verse: 521    und in der rehten güete,
Verse: 522    die er in sîn gemüete

Verse: 523    mit tegelîchen tugenden nam,
Verse: 524    unz Markes hôhgezît dô kam.

Verse: 525    die hôhzît haete Marke
Verse: 526    besetzet alsô starke

Verse: 527    sô mit gebote sô mit bete:
Verse: 528    swenne er in sînen boten tete,

Verse: 529    sô kam diu ritterschaft zehant
Verse: 530    von dem künicrîche z' Engelant

Verse: 531    in dem jâre z' einem mâle
Verse: 532    gevarn ze Curnewâle.

Verse: 533    die selben brâhten mit in dar
Verse: 534    mange süeze vrouwîne schar

Verse: 535    und ander manege schônheit.
Verse: 536    Nu was diu hôhgezît geleit,

Verse: 537    benennet unde besprochen
Verse: 538    die blüenden vier wochen,

Verse: 539    sô der vil süeze meie în gât
Verse: 540    unz an daz, dâ er ende hât,

Verse: 541    bî Tintajêl sô nâhen,
Verse: 542    daz sî sich undersâhen,

Verse: 543    in die schoenesten ouwe,
Verse: 544    die keines ougen schouwe

Verse: 545    ie überlûhte ê oder sît.
Verse: 546    diu senfte süeze sumerzît

Verse: 547    diu haete ir süeze unmüezekeit
Verse: 548    mit süezem vlîze an sî geleit.

Verse: 549    diu cleinen waltvogelîn,
Verse: 550    diu des ôren vröude sulen sîn,

Verse: 551    bluomen, gras, loup unde bluot
Verse: 552    und swaz dem ougen sanfte tuot

Verse: 553    und edeliu herze ervröuwen sol,
Verse: 554    des was diu sumerouwe vol:

Verse: 555    man vant dâ, swaz man wolte,
Verse: 556    daz der meie bringen solte:

Verse: 557    den schate bî der sunnen,
Verse: 558    die linden bî dem brunnen,

Verse: 559    die senften, linden winde,
Verse: 560    die Markes ingesinde

Verse: 561    sîn wesen engegene macheten.
Verse: 562    die liehten bluomen lacheten

Verse: 563    ûz dem betouwetem grase.
Verse: 564    des meien vriunt, der grüene wase

Verse: 565    der haete ûz bluomen ane geleit
Verse: 566    sô wunneclîchiu sumercleit,

Verse: 567    daz sî den lieben gesten
Verse: 568    in ir ougen widerglesten.

Verse: 569    diu süeze boumbluot sach den man
Verse: 570    sô rehte suoze lachende an,

Verse: 571    daz sich daz herze und al der muot
Verse: 572    wider an die lachende bluot

Verse: 573    mit spilnden ougen machete
Verse: 574    und ir allez widerlachete.

Verse: 575    daz senfte vogelgedoene,
Verse: 576    daz süeze, daz schoene,

Verse: 577    daz ôren unde muote
Verse: 578    vil dicke kumet ze guote,

Verse: 579    daz vulte dâ berge unde tal.
Verse: 580    diu saelege nahtegal,

Verse: 581    daz liebe süeze vogelîn,
Verse: 582    daz iemer süeze müeze sîn,

Verse: 583    daz kallete ûz der blüete
Verse: 584    mit solher übermüete,

Verse: 585    daz dâ manc edele herze van
Verse: 586    vröude unde hôhen muot gewan.

Verse: 587    Dâ haete diu geselleschaft
Verse: 588    vrô unde sêre vröudehaft

Verse: 589    gehütet ûf daz grüene gras,
Verse: 590    alse iegelîches wille was.

Verse: 591    dâ nâch alse iegelîches ger
Verse: 592    ze vröuden stuont, dâ nâch lag er:

Verse: 593    die rîchen lâgen rîche,
Verse: 594    die höfschen hovelîche;

Verse: 595    dise lâgen under sîden dâ,
Verse: 596    jene under bluomen anderswâ;

Verse: 597    diu linde was genuoger dach;
Verse: 598    genuoge man gehütet sach

Verse: 599    mit loupgrüenen esten.
Verse: 600    von gesinde noch von gesten

Verse: 601    wart geherberget nie
Verse: 602    sô wunneclîchen alse hie.

Verse: 603    ouch vant man dâ rât über rât,
Verse: 604    als man ze hôhgezîten hât,

Verse: 605    an spîse und edeler waete,
Verse: 606    des iegelîcher haete

Verse: 607    ze wunsche sich gewarnet dar.
Verse: 608    dar zuo sô nam ir Marke war

Verse: 609    sô grôze und alsô rîche,
Verse: 610    daz si alle rîlîche

Verse: 611    lebeten unde wâren vrô.
Verse: 612    sus huob diu hôhgezît sich dô.

Verse: 613    und swes der gerne sehende man
Verse: 614    ze sehene guoten muot gewan,

Verse: 615    daz lie diu state dâ wol geschehen;
Verse: 616    man sach dâ, swaz man wolte sehen:

Verse: 617    dise vuoren sehen vrouwen,
Verse: 618    jene ander tanzen schouwen;

Verse: 619    dise sâhen bûhurdieren,
Verse: 620    jene ander justieren.

Verse: 621    swâ zuo den man sîn wille truoc,
Verse: 622    des alles vand er dâ genuoc.

Verse: 623    wan alle, die dâ wâren
Verse: 624    von vröudebaeren jâren,

Verse: 625    die vlizzen sich inwiderstrît
Verse: 626    ze vröuden an der hôhgezît.

Verse: 627    Und Marke der guote,
Verse: 628    der höfsche hôhgemuote

Verse: 629    âne ander vrouwen schônheit,
Verse: 630    die er haete an sînen rinc geleit,

Verse: 631    sô haete er doch besunder
Verse: 632    ein sunderlîchez wunder,

Verse: 633    Blanscheflûr sîne swester dâ:
Verse: 634    ein maget, daz dâ noch anderswâ

Verse: 635    schoener wîp nie wart gesehen.
Verse: 636    wir hoeren von ir schoene jehen,

Verse: 637    sine gesaehe nie kein lebende man
Verse: 638    mit inneclîchen ougen an,

Verse: 639    ern minnete dâ nâch iemer mê
Verse: 640    wîp und tugende baz dan ê.

Verse: 641    Diu saelige ougenweide
Verse: 642    diu machete ûf der heide

Verse: 643    vil manegen man vrech unde vruot,
Verse: 644    manec edele herze hôhgemuot.

Verse: 645    dar zuo was in der ouwe
Verse: 646    manec ander schoeniu vrouwe,

Verse: 647    der iegelîchiu mohte sîn
Verse: 648    von schoene ein rîchiu künigîn,

Verse: 649    die muot und vröude ouch bâren
Verse: 650    den allen, die dâ wâren,

Verse: 651    und macheten manic herze vrô.
Verse: 652    hie mite huob sich der bûhurt dô

Verse: 653    von gesinde und ouch von gesten:
Verse: 654    die werdesten und die besten,

Verse: 655    die riten dâ zuo wâ unde wâ.
Verse: 656    ouch was der werde Marke dâ

Verse: 657    und sîn geselle Riwalîn
Verse: 658    âne ander ingesinde sîn,

Verse: 659    die sich ouch gevlizzen haeten,
Verse: 660    wie sîz dâ sô getaeten,

Verse: 661    daz ez dâ sagebaere
Verse: 662    und wol ze lobene waere.

Verse: 663    man sach dâ zuo dem mâle
Verse: 664    von pfelle und von zendâle

Verse: 665    manc ors bedact ze vlîze,
Verse: 666    manege decke snêwîze,

Verse: 667    gel, brûn, rôt, grüene unde blâ;
Verse: 668    sô sach man ander anderswâ

Verse: 669    von edeler sîden wol gebriten,
Verse: 670    jene ander manege wîs zesniten,

Verse: 671    gevêhet und geparrieret,
Verse: 672    sus und sô gefeitieret.

Verse: 673    diu ritterschaft diu vuorte cleit
Verse: 674    mit wunderlîcher rîcheit

Verse: 675    zersniten und zerhouwen.
Verse: 676    ouch lie der sumer wol schouwen,

Verse: 677    daz er dâ mit Marke wolte sîn:
Verse: 678    manec wunneclîch schapelekîn

Verse: 679    von bluomen sach man an der schar,
Verse: 680    diu er im ze stiure brâhte dar.

Verse: 681    In dirre süezen sumercraft
Verse: 682    huop sich ein süeziu ritterschaft.

Verse: 683    diu schar sich dâ dicke underwar.
Verse: 684    si zogeten sich her unde dar

Verse: 685    und triben des vil und sô genuoc,
Verse: 686    biz sich der bûhurt dô getruoc,

Verse: 687    dâ Blanscheflûr diu werde,
Verse: 688    ein wunder ûf der erde,

Verse: 689    und manc ander schoeniu vrouwe
Verse: 690    sâzen an ir schouwe.

Verse: 691    wan dise die riten sô rîche,
Verse: 692    sô rehte keiserlîche,

Verse: 693    daz ez manic ouge gerne sach.
Verse: 694    swaz aber von ieman dâ geschach,

Verse: 695    sô was der höfsche Riwalîn
Verse: 696    und muose ez ouch binamen sîn,

Verse: 697    der ez des tages und an der stete
Verse: 698    ze wunsche vor in allen tete.

Verse: 699    ouch nâmen sîn die vrouwen war
Verse: 700    und jâhen des, daz in der schar

Verse: 701    nieman nâch ritterlîchem site
Verse: 702    alsô behendeclîchen rite,

Verse: 703    und lobeten elliu sîniu dinc.
Verse: 704    'seht' sprâchen sî 'der jungelinc

Verse: 705    der ist ein saeliger man:
Verse: 706    wie saeleclîche stêt im an

Verse: 707    allez daz, daz er begât!
Verse: 708    wie gâr sîn lîp ze wunsche stât!

Verse: 709    wie gânt im sô gelîche in ein
Verse: 710    diu sîniu keiserlîchen bein!

Verse: 711    wie rehte sîn schilt z' aller zît
Verse: 712    an sîner stat gelîmet lît!

Verse: 713    wie zimet der schaft in sîner hant!
Verse: 714    wie wol stât allez sîn gewant!

Verse: 715    wie stât sîn houbet und sîn hâr!
Verse: 716    wie süeze ist aller sîn gebâr!

Verse: 717    wie saeleclîche stât sîn lîp!
Verse: 718    ô wol si saeligez wîp,

Verse: 719    der vröude an ime belîben sol!'
Verse: 720    nu marcte ir aller maere wol

Verse: 721    Blanscheflûr diu guote,
Verse: 722    wan sî in ouch in ir muote,

Verse: 723    swaz ir dekeiniu taete,
Verse: 724    ze hôhem werde haete.

Verse: 725    sî haete in in ir muot genomen,
Verse: 726    er was ir in ir herze komen;

Verse: 727    er truoc gewalteclîche
Verse: 728    in ir herzen künicrîche

Verse: 729    den cepter und die crône:
Verse: 730    daz sî doch alsô schône

Verse: 731    und alsô tougenlîchen hal,
Verse: 732    daz sî 'z in allen vor verstal.

Verse: 733    Nu daz der bûhurt dô zergie
Verse: 734    und sich diu ritterschaft zerlie

Verse: 735    und iegelîcher kêrte,
Verse: 736    dar in sîn muot gelêrte,

Verse: 737    dô kam ez von âventiure alsô,
Verse: 738    daz Riwalîn gekêrte dô,

Verse: 739    dâ Blanscheflûr diu schoene saz.
Verse: 740    hie mite gesprancte er nâher baz

Verse: 741    und als er under ir ougen sach,
Verse: 742    vil minneclîche er zuo z' ir sprach:

Verse: 743    'â, dê vus saut, bêle!'
Verse: 744    'mercî!' dît la buzêle

Verse: 745    und sprach vil schemelîche:
Verse: 746    'hêrre got der rîche,

Verse: 747    der elliu herze rîche tuot,
Verse: 748    der rîche iu herze unde muot!

Verse: 749    und iu sî grôze genigen,
Verse: 750    und aber des rehtes unverzigen,

Verse: 751    des ich an iuch ze redene hân.'
Verse: 752    'ach süeze, waz hân ich getân?'

Verse: 753    sprach aber der höfsche Riwalîn.
Verse: 754    sî sprach: 'an einem vriunde mîn,

Verse: 755    dem besten den ich ie gewan,
Verse: 756    dâ habet ir mich beswaeret an.'

Verse: 757    'ja hêrre' dâhte er wider sich
Verse: 758    'waz maere ist diz? oder waz hân ich

Verse: 759    begangen wider ir hulden?
Verse: 760    waz gît sî mir ze schulden?'

Verse: 761    und wânde, daz er eteswen
Verse: 762    ir mâge, disen oder den,

Verse: 763    unwizzende an der ritterschaft
Verse: 764    gemachet haete schadehaft,

Verse: 765    dâ von ir herze swaere
Verse: 766    und ime erbolgen waere.

Verse: 767    nein, der vriunt, des sî gewuoc,
Verse: 768    daz was ir herze, in dem sî truoc

Verse: 769    von sînen schulden ungemach,
Verse: 770    daz was der vriunt, von dem sî sprach.

Verse: 771    iedoch enweste er niht hie mite.
Verse: 772    nâch sînem ellîchem site

Verse: 773    sprach er vil minneclîche z' ir:
Verse: 774    'schoene, ine wil niht, daz ir mir

Verse: 775    haz oder argen willen traget;
Verse: 776    wan ist ez wâr, als ir mir saget,

Verse: 777    sô rihtet selbe über mich:
Verse: 778    swaz ir gebietet, daz tuon ich.'

Verse: 779    diu süeze sprach: 'durch dise geschiht
Verse: 780    enhazze ich iuch ze sêre niht;

Verse: 781    ine minne iuch ouch nicht umbe daz.
Verse: 782    ich wil iuch aber versuochen baz,

Verse: 783    wie ir mir ze buoze wellet stân
Verse: 784    umbe daz, daz ir mir habet getân.'

Verse: 785    Sus neig er ir und wolte dan,
Verse: 786    und sî diu schoene ersûfte in an

Verse: 787    vil tougenlîchen unde sprach
Verse: 788    ûz inneclîchem herzen: 'ach,

Verse: 789    vriunt lieber, got gesegen dich!'
Verse: 790    dô alêrste huob ez sich

Verse: 791    mit gedanken under in.
Verse: 792    Canêlengres der kêrte hin

Verse: 793    in maneger slahte trahte:
Verse: 794    er trahte maneger slahte,

Verse: 795    waz Blanschefliure swaere
Verse: 796    und dirre maere waere.

Verse: 797    ir gruoz, ir rede betrahte er gâr,
Verse: 798    ir sûft, ir segen, al ir gebâr

Verse: 799    daz marcte er al besunder
Verse: 800    und begunde iedoch hier under

Verse: 801    ir siuften unde ir süezen segen
Verse: 802    ûf den wec der minne wegen:

Verse: 803    er kam binamen an den wân,
Verse: 804    diu zwei diu waeren getân

Verse: 805    durch niht niwan durch minne.
Verse: 806    daz enzunte ouch sîne sinne,

Verse: 807    daz sî sâ wider vuoren
Verse: 808    und nâmen Blanschefluoren

Verse: 809    und vuorten sî mit in zehant
Verse: 810    in Riwalînes herzen lant

Verse: 811    und crônden sî dar inne
Verse: 812    im z' einer küniginne.

Verse: 813    jâ Blanscheflûr und Riwalîn,
Verse: 814    der künec, diu süeze künigîn,

Verse: 815    die teilten wol gelîche
Verse: 816    ir herzen künicrîche:

Verse: 817    daz ir wart Riwalîne,
Verse: 818    dâ wider wart ir daz sîne;

Verse: 819    und wiste iedoch dewederz niht
Verse: 820    umbe des andern geschiht.

Verse: 821    si haeten sich wol under in zwein
Verse: 822    einmüeteclîche und rehte in ein

Verse: 823    mit ir gedanken undernomen.
Verse: 824    dâ was wol reht ze rehte komen:

Verse: 825    sî lag ouch ime ze herzen
Verse: 826    mit dem selben smerzen,

Verse: 827    den sî von sînen schulden leit.
Verse: 828    und wande er aber gewisheit

Verse: 829    ir willen niene haete,
Verse: 830    in welher wîs sî 'z taete,

Verse: 831    durch haz oder aber durch minne,
Verse: 832    daz machete sîne sinne

Verse: 833    in zwîvele wanken:
Verse: 834    er wancte mit gedanken

Verse: 835    wîlent abe und wîlent an.
Verse: 836    iezuo wolt er benamen dan

Verse: 837    und al zehant sô wolte er dar,
Verse: 838    unz er sich alsô gâr verwar

Verse: 839    in den stricken sîner trahte,
Verse: 840    daz er dannen niene mahte.

Verse: 841    Der gedanchafte Riwalîn
Verse: 842    der tete wol an im selben schîn,

Verse: 843    daz der minnende muot
Verse: 844    rehte alse der vrîe vogel tuot,

Verse: 845    der durch die vrîheit, die er hât,
Verse: 846    ûf daz gelîmde zwî gestât:

Verse: 847    als er des lîmes danne entsebet
Verse: 848    und er sich ûf ze vlühte hebet,

Verse: 849    sô clebet er mit den vüezen an;
Verse: 850    sus reget er vedern und wil dan;

Verse: 851    dâ mite gerüeret er daz zwî
Verse: 852    an keiner stat, swie kûme ez sî,

Verse: 853    ez enbinde in unde mache in haft;
Verse: 854    sô sleht er danne ûz aller craft

Verse: 855    dar unde dar und aber dar,
Verse: 856    unz er ze jungeste gar

Verse: 857    sich selben vehtende übersiget
Verse: 858    und gelîmet an dem zwîge liget.

Verse: 859    rehte in der selben wîse tuot
Verse: 860    der unbetwungene muot:

Verse: 861    sô der in senede trahte kumet
Verse: 862    und liebe an ime ir wunder vrumet

Verse: 863    mit senelîcher swaere,
Verse: 864    sô wil der senedaere

Verse: 865    ze sîner vrîheite wider;
Verse: 866    sô ziuhet in diu süeze nider

Verse: 867    der gelîmeten minne.
Verse: 868    dâ verwirret er sich inne

Verse: 869    sô sêre, daz er sich von dan
Verse: 870    noch sus noch sô verrihten kan.

Verse: 871    als ergieng ez Riwalîne,
Verse: 872    den ouch die trahte sîne

Verse: 873    verwurren in der minne
Verse: 874    sînes herzen küniginne.

Verse: 875    in haete wol beworrenheit
Verse: 876    in wunderlîch pârât geleit;

Verse: 877    wan er enwiste, weder ir muot
Verse: 878    wider in waere übel oder guot;

Verse: 879    ern erkante dannoch diz noch daz,
Verse: 880    weder ir minne noch ir haz.

Verse: 881    ern sach noch trôst noch zwîvel an,
Verse: 882    daz enliez ouch in noch dar noch dan.

Verse: 883    trôst unde zwîvel vuorten in
Verse: 884    unendeclîchen under in.

Verse: 885    trôst seite im minne, zwîvel haz.
Verse: 886    durch disen criec und umbe daz

Verse: 887    sone mohte er sînen vesten wân
Verse: 888    an ir dewederez verlân,

Verse: 889    an haz noch ouch an minne.
Verse: 890    sus swebeten sîne sinne

Verse: 891    in einer ungewissen habe:
Verse: 892    trôst truog in an und zwîvel abe.

Verse: 893    ern vant niht staetes an in zwein.
Verse: 894    sin gehullen sô noch sus inein:

Verse: 895    sô zwîvel kam und seite im daz,
Verse: 896    sîn Blanscheflûr waere ime gehaz,

Verse: 897    sô wancte er und wolte dan.
Verse: 898    zehant kam trôst und truog in an

Verse: 899    ir minne und einen lieben wân:
Verse: 900    sus muose er aber dâ bestân.

Verse: 901    mit diseme criege enwiste er war:
Verse: 902    ern mohte weder dan noch dar.

Verse: 903    sô er ie serre dannen ranc,
Verse: 904    sô minne ie vaster wider twanc.

Verse: 905    sô er ie harter dannen vlôch,
Verse: 906    sô minne ie vaster wider zôch.

Verse: 907    sus treip ez minne mit im an,
Verse: 908    biz doch der trôst den sige gewan

Verse: 909    und er den zwîvel gâr vertreip
Verse: 910    und Riwalîn gewis beleip,

Verse: 911    sîn Blanscheflûr diu minnet in:
Verse: 912    des was sîn herze und al sîn sin

Verse: 913    einbaerelîche an sî geleit,
Verse: 914    daz nieman dô dâ wider streit.

Verse: 915    Nu daz diu süeze minne
Verse: 916    sîn herze und sîne sinne

Verse: 917    al nâch ir willen haete brâht,
Verse: 918    dannoch was ime vil ungedâht,

Verse: 919    daz herzeliebe waere
Verse: 920    sô nâhe gênde ein swaere.

Verse: 921    do er dô sîn âventiure
Verse: 922    von sîner Blanschefliure

Verse: 923    von ende her betrahtete
Verse: 924    und allez sunder ahtete:

Verse: 925    ir hâr, ir stirne, ir tinne,
Verse: 926    ir wange, ir munt, ir kinne,

Verse: 927    den vröuderîchen ôstertac,
Verse: 928    der lachende in ir ougen lac,

Verse: 929    dô kam diu rehte minne,
Verse: 930    diu wâre viuraerinne

Verse: 931    und stiez ir seneviuwer an,
Verse: 932    daz viur, dâ von sîn herze enbran,

Verse: 933    daz sînem lîbe sâ zestunt
Verse: 934    schînbaerelîche tete kunt,

Verse: 935    waz nâhe gêndiu swaere
Verse: 936    und senediu sorge waere.

Verse: 937    wan er greif in ein ander leben;
Verse: 938    ein niuwe leben wart ime gegeben:

Verse: 939    er verwandelte dâ mite
Verse: 940    al sîne sinne und sîne site

Verse: 941    und wart mitalle ein ander man;
Verse: 942    wan allez daz, des er began,

Verse: 943    daz was mit wunderlîchen siten
Verse: 944    und mit blintheit undersniten.

Verse: 945    sîne ane geborne sinne
Verse: 946    die wâren von der minne

Verse: 947    als wilde und alse unstaete,
Verse: 948    als er s' erbeten haete.

Verse: 949    sîn leben begunde swachen:
Verse: 950    von rehtem herzen lachen,

Verse: 951    des er dâ vor was wol gewon,
Verse: 952    dâ zôch er sich mitalle von;

Verse: 953    swîgen unde wesen unvrô
Verse: 954    daz was sîn beste leben dô.

Verse: 955    wan elliu sîn gemuotheit
Verse: 956    was gâr in senede nôt geleit.

Verse: 957    Ouch vergie sîn senelîch geschiht
Verse: 958    die seneden Blanschefliure niht:

Verse: 959    diu was ouch mit dem selben schaden
Verse: 960    durch in als er durch sî beladen.

Verse: 961    diu gewaltaerinne Minne
Verse: 962    diu was ouch in ir sinne

Verse: 963    ein teil ze sturmelîche komen
Verse: 964    und haete ir mit gewalte genomen

Verse: 965    den besten teil ir mâze.
Verse: 966    sine was an ir gelâze

Verse: 967    ir selber noch der werlt niht mite
Verse: 968    nâch ir gewonlîchem site.

Verse: 969    swaz sî sich vröuden an genam,
Verse: 970    swaz schimpfes ir ê wol gezam,

Verse: 971    daz missestuont ir allez dô.
Verse: 972    ir leben enschuof sich niuwan sô,

Verse: 973    als ez ir an der nôt gewac,
Verse: 974    diu nâhen an ir herzen lac.

Verse: 975    und alles des, des sî geleit
Verse: 976    von senelîcher arbeit,

Verse: 977    sone wiste sî niht, waz ir war.
Verse: 978    wan sî enwart nie dâ vor gewar,

Verse: 979    waz sus getâniu swaere
Verse: 980    und herzesorge waere.

Verse: 981    Und sprach vil dicke wider sich:
Verse: 982    'owê got hêrre, wie leb ich!

Verse: 983    wie unde waz ist mir geschehen?
Verse: 984    ich hân doch manegen man gesehen,

Verse: 985    von dem mir nie kein leit geschach.
Verse: 986    und sît ich disen man gesach,

Verse: 987    sît wart mîn herze niemer mê
Verse: 988    noch vrî noch vröudehaft als ê.

Verse: 989    diz sehen, daz ich in hân getân,
Verse: 990    daz ist ein dinc, dâ von ich hân

Verse: 991    erworben nâhe gêndiu leit.
Verse: 992    mîn herze, daz nie nôt erleit,

Verse: 993    daz ist dâ von versêret;
Verse: 994    ez hât mich gâr verkêret

Verse: 995    an muote und an dem lîbe.
Verse: 996    sol iegelîchem wîbe,

Verse: 997    diu in gehoeret unde gesiht,
Verse: 998    geschehen, alse mir geschiht,

Verse: 999    und ist ez danne an ime geborn,
Verse: 1000    so ist michel schoene an ime verlorn

Verse: 1001    und ist unnütze lebende ein man.
Verse: 1002    ist aber daz er von lêre kan

Verse: 1003    dekeiner slahte zouberlist,
Verse: 1004    dâ von diz vremede wunder ist

Verse: 1005    und disiu wunderlîche nôt,
Verse: 1006    sô waere er maneges bezzer tôt

Verse: 1007    und ensolte in niemer wîp gesehen.
Verse: 1008    durch got, wiest mir von ime geschehen

Verse: 1009    sô leide und alsô swâre!
Verse: 1010    nune gesach ich doch zewâre

Verse: 1011    noch in noch nie dekeinen man
Verse: 1012    mit vîntlîchen ougen an

Verse: 1013    noch engetruoc nie nieman haz:
Verse: 1014    wâ mite mag ich geschulden daz,

Verse: 1015    daz mir von ieman leit geschehe,
Verse: 1016    den ich mit vriundes ougen sehe?

Verse: 1017    Waz wîze ich aber dem guoten man?
Verse: 1018    er ist hie lîhte unschuldic an.

Verse: 1019    swaz herzesorge ich mir von im
Verse: 1020    und ouch durch sînen willen nim,

Verse: 1021    daz wizze got, deist allermeist
Verse: 1022    mîn selbes herzen volleist.

Verse: 1023    ich sach dâ manegen man und in.
Verse: 1024    waz mag er mir des, daz mîn sin

Verse: 1025    von den andern allen
Verse: 1026    an in einen ist gevallen?

Verse: 1027    dô ich sô vil manic edele wîp
Verse: 1028    den sînen keiserlîchen lîp

Verse: 1029    und sînen ritterlîchen prîs
Verse: 1030    mit lobe gehôrte in ballen wîs

Verse: 1031    alse umbe trîben unde tragen
Verse: 1032    und sînes lobes sô vil gesagen

Verse: 1033    und ich mit ougen selbe sach
Verse: 1034    die tugende, der man von im jach,

Verse: 1035    und allez in mîn herze las,
Verse: 1036    swaz lobelîches an im was.

Verse: 1037    dâ von ergouchete mîn sin,
Verse: 1038    hie von geviel mîn herze an in.

Verse: 1039    entriuwen daz erblante mich,
Verse: 1040    daz was daz zouber, dâ von ich

Verse: 1041    mîn selber sus vergezzen hân.
Verse: 1042    ern hât mir leides niht getân,

Verse: 1043    der liebe man, von dem ich clage,
Verse: 1044    den ich mit clage ze maere trage.

Verse: 1045    mîn tumber meisterlôser muot
Verse: 1046    der ist, der mir dâ leide tuot,

Verse: 1047    der ist, der mînen schaden wil.
Verse: 1048    er wil und wil joch al ze vil,

Verse: 1049    des er niht wellen solte,
Verse: 1050    ob er bedenken wolte,

Verse: 1051    waz vuoge waere und êre.
Verse: 1052    nune siht aber er niht mêre

Verse: 1053    niwan sîn selbes willen an
Verse: 1054    an disem saeligen man,

Verse: 1055    an den er in sô kurzer vrist
Verse: 1056    sô rehte gâr gevallen ist.

Verse: 1057    und semmir got, ich waene wol,
Verse: 1058    ob ich 's mit êren waenen sol

Verse: 1059    und sol ich mich der rede niht schamen
Verse: 1060    durch mînen magetlîchen namen,

Verse: 1061    sô dunket mich, diu herzeclage,
Verse: 1062    die ich durch in ze herzen trage,

Verse: 1063    diu ensî niwan von minnen.
Verse: 1064    des wirde ich hier an innen,

Verse: 1065    daz ich ime sô gerne waere bî.
Verse: 1066    und swaz sô dirre maere sî,

Verse: 1067    mir wahset eteswaz hier an,
Verse: 1068    daz minne meinet unde man.

Verse: 1069    wan swaz ich allen mînen lîp
Verse: 1070    umbe rehte minnendiu wîp

Verse: 1071    und umbe liebe hân vernomen,
Verse: 1072    daz ist mir in mîn herze komen:

Verse: 1073    der süeze herzesmerze,
Verse: 1074    der vil manic edele herze

Verse: 1075    quelt mit süezem smerzen,
Verse: 1076    der liget in mînem herzen.'

Verse: 1077    Nu daz diu höfsche guote
Verse: 1078    mit ganzlîchem muote

Verse: 1079    sich in ir herzen des enstuont,
Verse: 1080    als die minnenden alle tuont,

Verse: 1081    daz ir geselle Riwalîn
Verse: 1082    ir herzen vröude müese sîn,

Verse: 1083    ir meister trôst, ir beste leben:
Verse: 1084    sî begunde im ouge und ouge geben

Verse: 1085    und sach in, swâ sî 'n mohte sehen.
Verse: 1086    swenne ez diu vuoge lie geschehen,

Verse: 1087    sô gruozte sî 'n vil tougen
Verse: 1088    mit inneclîchen ougen.

Verse: 1089    ir senelîche blicke
Verse: 1090    die sâhen in vil dicke

Verse: 1091    lange unde minneclîchen an.
Verse: 1092    dô daz der minnende man,

Verse: 1093    ir vriunt, begunde merken,
Verse: 1094    alrêrste begunde in sterken

Verse: 1095    diu minne und ouch sîn trôst an ir;
Verse: 1096    alrêrste enbran sîn herzegir,

Verse: 1097    und sach der süezen allez sider
Verse: 1098    baltlîcher unde süezer wider,

Verse: 1099    dan er ie dâ vor getaete.
Verse: 1100    swenne er die state haete,

Verse: 1101    sô gruozte ouch er mit ougen dar.
Verse: 1102    nu sîn diu schoene wart gewar,

Verse: 1103    daz er si meinde als si in,
Verse: 1104    dô was ir meistiu sorge hin;

Verse: 1105    wan sî wânde allez ê, daz er
Verse: 1106    hin z' ir enhaete keine ger.

Verse: 1107    nu wiste aber sî wol, daz sîn muot
Verse: 1108    hin z' ir was süeze und alse guot,

Verse: 1109    als liebes muot ze liebe sol.
Verse: 1110    daz selbe wiste er an ir wol.

Verse: 1111    daz selbe enzunte ir beider sin.
Verse: 1112    dâ von begunden s' under in

Verse: 1113    sich meinen unde minnen
Verse: 1114    mit herzenlîchen sinnen.

Verse: 1115    ez ergienc in rehte, als man giht:
Verse: 1116    swâ liep in liebes ouge siht,

Verse: 1117    daz ist der minnen viure
Verse: 1118    ein wahsendiu stiure.

Verse: 1119    Nu Markes hôhgezît ergie
Verse: 1120    und sich diu hêrschaft gar zerlie,

Verse: 1121    dô kâmen Marke maere,
Verse: 1122    daz ein sîn vîent waere,

Verse: 1123    ein künec, geriten in sîn lant
Verse: 1124    mit alsô creftiger hant,

Verse: 1125    der in niht schiere taete wider,
Verse: 1126    er braeche im allez daz dernider,

Verse: 1127    daz er berîten kunde.
Verse: 1128    zehant und an der stunde

Verse: 1129    besande Marke ein michel her
Verse: 1130    und kam in an mit starker wer.

Verse: 1131    er vaht mit ime und sigete im an
Verse: 1132    und sluog und vienc sô manegen man,

Verse: 1133    daz ez von grôzen saelden was,
Verse: 1134    der dannen kam oder dâ genas.

Verse: 1135    dâ wart der werde Riwalîn
Verse: 1136    mit eime sper zer sîten în

Verse: 1137    gestochen und sô sêre wunt,
Verse: 1138    daz in die sîne sâ zestunt

Verse: 1139    vür einen halptôten man
Verse: 1140    mit manegem jâmer vuorten dan

Verse: 1141    hin heim ze Tintajêle wider.
Verse: 1142    dâ leiten sî 'n tôtsiechen nider.

Verse: 1143    zehant erschullen maere,
Verse: 1144    Canêlengres der waere

Verse: 1145    tôtwunt und in dem strîte erslagen.
Verse: 1146    des wart ein jaemerlîchez clagen

Verse: 1147    in dem hove und in dem lande.
Verse: 1148    swer sîne tugende erkande,

Verse: 1149    dem was sîn schade von herzen leit.
Verse: 1150    sî clageten, daz sîn vrümekeit,

Verse: 1151    sîn schoener lîp, sîn süeziu jugent,
Verse: 1152    sîn wol gelobetiu hêrren tugent

Verse: 1153    sô schiere solte an ime zergân
Verse: 1154    und ein sô vrüejez ende hân.

Verse: 1155    sîn vriunt der künic Marke
Verse: 1156    der clagete in alsô starke,

Verse: 1157    daz er durch nie dekeinen man
Verse: 1158    sô nâhe gênde clage gewan.

Verse: 1159    in weinde manic edele wîp,
Verse: 1160    manc vrouwe clagete sînen lîp.

Verse: 1161    und swer in ie dâ vor gesach,
Verse: 1162    den erbarmete sîn ungemach.

Verse: 1163    Swaz aber ir aller swaere
Verse: 1164    umbe sînen schaden waere,

Verse: 1165    sô was ez iemer eine
Verse: 1166    sîn Blanscheflûr, diu reine,

Verse: 1167    diu höfsche, diu guote,
Verse: 1168    diu mit durnehtem muote,

Verse: 1169    mit ougen und mit herzen
Verse: 1170    ir herzeliebes smerzen

Verse: 1171    beclagete und ouch beweinete;
Verse: 1172    und aber, dô sî vereinete

Verse: 1173    und sî ze clagene state gewan,
Verse: 1174    dô gie si sich mit handen an:

Verse: 1175    die sluoc si tûsent stunde dar
Verse: 1176    und niuwan dar, da 'z ir dâ war;

Verse: 1177    da engegen, dâ daz herze lac,
Verse: 1178    dar tete diu schoene manegen slac.

Verse: 1179    sus quelte daz vil süeze wîp
Verse: 1180    ir jungen, schoenen, süezen lîp

Verse: 1181    mit alsô clegelîcher nôt,
Verse: 1182    daz s' einen anderen tôt,

Verse: 1183    der niht von minnen waere komen,
Verse: 1184    dô haete vür ir leben genomen;

Verse: 1185    und waere iedoch verdorben
Verse: 1186    und in dem leide erstorben,

Verse: 1187    wan daz sî der trôst labete
Verse: 1188    und der gedinge ûf habete,

Verse: 1189    daz sî 'n binamen wolte sehen,
Verse: 1190    swie sô 'z möhte geschehen;

Verse: 1191    und alse sî 'n gesaehe,
Verse: 1192    swaz ir dar nâch geschaehe,

Verse: 1193    daz sî daz allez gerne lite.
Verse: 1194    hie vriste sî daz leben mite,

Verse: 1195    biz daz sî wider ze sinnen kam
Verse: 1196    und in ir trahte dô genam,

Verse: 1197    wie sî 'n gesehen möhte,
Verse: 1198    als ez ir leide töhte.

Verse: 1199    Sus kam ir in ir sinne
Verse: 1200    umbe eine ir meisterinne,

Verse: 1201    diu s' alle zît und alle wege
Verse: 1202    haete in ir lêre und in ir pflege

Verse: 1203    und s' ûz ir huote nie verlie:
Verse: 1204    die nam sî sunder unde gie,

Verse: 1205    dâ nieman was niwan sî zwô,
Verse: 1206    und huop ir clage hin z' ir alsô,

Verse: 1207    als sî ie tâten und noch tuont,
Verse: 1208    den ir dinc stât, als ez ir stuont:

Verse: 1209    ir ougen über wielen,
Verse: 1210    die heizen trehene vielen

Verse: 1211    gedîhteclîche und ange
Verse: 1212    über ir vil liehtiu wange;

Verse: 1213    ir hende sî zesamene vielt,
Verse: 1214    vlêhlîche sî die vür sich hielt:

Verse: 1215    'ach mînes lîbes!' sî dô sprach
Verse: 1216    'ach' sprach si 'mînes lîbes ach!

Verse: 1217    ach herzeliebiu meisterîn,
Verse: 1218    nu tuo mir dîner triuwe schîn,

Verse: 1219    der vil und wunder an dir ist!
Verse: 1220    und sît du nû sô saelic bist,

Verse: 1221    daz al mîn saelde und al mîn rât
Verse: 1222    niwan an dîme râte stât,

Verse: 1223    sô clage ich dir mîn herzeleit
Verse: 1224    ûf alle dîne saelekeit:

Verse: 1225    dune helfes mir, sô bin ich tôt!'
Verse: 1226    'nu vrouwe, waz ist iuwer nôt

Verse: 1227    und iuwer clegelîchez clagen?'
Verse: 1228    'ei trût, getar ich dir 'z gesagen?'

Verse: 1229    'jâ liebiu vrouwe, sprechet an!'
Verse: 1230    'mich toetet dirre tôte man,

Verse: 1231    von Parmenîe Riwalîn:
Verse: 1232    den saehe ich gerne, möhte ez sîn

Verse: 1233    und wiste ich, wie ich 'z erwürbe,
Verse: 1234    ê danne er volle erstürbe;

Verse: 1235    wan leider ern mac niht genesen.
Verse: 1236    maht dû mir dar zuo guot gewesen,

Verse: 1237    ich engan dir niemer nihtes abe,
Verse: 1238    die wîle und ich daz leben habe.'

Verse: 1239    Diu meisterinne gedâhte dô:
Verse: 1240    'gestate ich dirre dinge alsô,

Verse: 1241    waz mag dâ schaden gewahsen an?
Verse: 1242    wan dirre halptôte man

Verse: 1243    der stirbet morgen oder noch:
Verse: 1244    sô hân ich mîner vrouwen doch

Verse: 1245    gevristet lîp und êre
Verse: 1246    und bin ir iemer mêre

Verse: 1247    lieber danne ein ander wîp.'
Verse: 1248    'trût vrouwe' sprach sî 'lieber lîp,

Verse: 1249    iur clage ist mir von herzen leit
Verse: 1250    und swâ ich iuwer arbeit

Verse: 1251    mit mînem lîbe erwenden kan,
Verse: 1252    dane gezwîvelt niemer an.

Verse: 1253    ich sol selbe gân dar nider
Verse: 1254    und in gesehen und iesâ wider.

Verse: 1255    ich sol die state erkunnen dâ,
Verse: 1256    wie er dâ lige oder wâ,

Verse: 1257    und ouch der liute nemen war.'
Verse: 1258    sus kam s' in den gebaerden dar,

Verse: 1259    als sî sîn angest wolte clagen
Verse: 1260    und begunde im tougenlîche sagen,

Verse: 1261    ir vrouwe wolte in gerne sehen,
Verse: 1262    daz er ez lieze geschehen

Verse: 1263    nâch vuogen und nâch êren.
Verse: 1264    sus begunde sî dô kêren

Verse: 1265    mit disen maeren wider dan.
Verse: 1266    si nam die maget und leite ir an

Verse: 1267    eines armen betewîbes cleit;
Verse: 1268    ir antlützes schônheit

Verse: 1269    mit dicken rîsen sî verbant
Verse: 1270    und nam ir vrouwen an ir hant

Verse: 1271    und kam ze Riwalîne.
Verse: 1272    nu haete ouch er die sîne

Verse: 1273    al besunder ûz getriben
Verse: 1274    und was al eine beliben.

Verse: 1275    er sagete in allen unde jach,
Verse: 1276    einoete waere sîn gemach.

Verse: 1277    ouch jach diu meisterinne,
Verse: 1278    sî braehte ein arzaetinne,

Verse: 1279    und erwarp, daz man si zuo z' im liez.
Verse: 1280    daz slôz sî vür die tür dô stiez.

Verse: 1281    'nu vrouwe' sprach si 'sehet in!'
Verse: 1282    und sî, diu schoene, diu gie hin

Verse: 1283    und dô sî 'm under ougen sach,
Verse: 1284    'ach' sprach si 'hiute und iemer ach!

Verse: 1285    owê daz ich ie wart geborn:
Verse: 1286    wie ist mîn trôst alsus verlorn!'

Verse: 1287    Alsus neig ir dô Riwalîn
Verse: 1288    vil kûme, als ez dô mohte sîn

Verse: 1289    von eime tôtsiechem man.
Verse: 1290    ouch sach sî daz vil lützel an

Verse: 1291    und nam es harte cleine war,
Verse: 1292    wan saz et blintlîchen dar

Verse: 1293    und leite Riwalîne
Verse: 1294    ir wange an daz sîne,

Verse: 1295    biz daz ir aber dô beide
Verse: 1296    von liebe und ouch von leide

Verse: 1297    ir lîbes craft dâ von gesweich.
Verse: 1298    ir rôsevarwer munt wart bleich,

Verse: 1299    ir lîch diu kam vil garwe
Verse: 1300    von der viel liehten varwe,

Verse: 1301    diu dâ vor an ir lîbe lac.
Verse: 1302    ir clâren ougen wart der tac

Verse: 1303    trüebe unde vinster als diu naht.
Verse: 1304    sus lac si in der unmaht

Verse: 1305    und âne sinne lange,
Verse: 1306    ir wange an sînem wange,

Verse: 1307    gelîche als ob si waere tôt.
Verse: 1308    Nu daz sî dô von dirre nôt

Verse: 1309    ein lützel wider ze crefte kam,
Verse: 1310    ir trût si an ir arm dô nam

Verse: 1311    und leite ir munt an sînen munt
Verse: 1312    und kuste in hundert tûsent stunt

Verse: 1313    in einer cleinen stunde,
Verse: 1314    unz ime ir munt enzunde

Verse: 1315    sinne unde craft zer minne,
Verse: 1316    wan minne was dar inne:

Verse: 1317    ir munt der tete in vröudehaft,
Verse: 1318    ir munt der brâhte im eine craft,

Verse: 1319    daz er daz keiserlîche wîp
Verse: 1320    an sînen halptôten lîp

Verse: 1321    vil nâhe und inneclîche twanc.
Verse: 1322    dar nâch sô was vil harte unlanc,

Verse: 1323    unz daz ir beider wille ergienc
Verse: 1324    und daz vil süeze wîp enpfienc

Verse: 1325    ein kint von sînem lîbe.
Verse: 1326    ouch was er von dem wîbe

Verse: 1327    und von der minne vil nâch tôt;
Verse: 1328    wan daz im got half ûz der nôt,

Verse: 1329    sône kunde er niemer sîn genesen:
Verse: 1330    sus genas er, wan ez solte wesen.

Verse: 1331    Sus was, daz Riwalîn genas
Verse: 1332    und Blanscheflûr diu schoene was

Verse: 1333    von ime entladen unde beladen
Verse: 1334    mit zweier hande herzeschaden:

Verse: 1335    grôz leit lie sî bî dem man
Verse: 1336    unde truoc daz groezer dan;

Verse: 1337    sî lie dâ senede herzenôt
Verse: 1338    und truoc mit ir von dan den tôt:

Verse: 1339    die nôt sî mit der minne lie,
Verse: 1340    den tôt sî mit dem kinde enpfie.

Verse: 1341    und iedoch swie sô sî genas,
Verse: 1342    in swelher wîse sô sî was

Verse: 1343    von ime entladen unde beladen
Verse: 1344    sô mit vrumen sô mit schaden,

Verse: 1345    sone sach sî doch niht anders an
Verse: 1346    wan liebe liebe und lieben man.

Verse: 1347    weder kint noch tôdes ungeschiht
Verse: 1348    enwiste s' an ir lîbe niht:

Verse: 1349    minne unde man wiste si wol
Verse: 1350    und tete reht als der lebende sol

Verse: 1351    und als der minnende tuot:
Verse: 1352    ir herze, ir sin, ir gernder muot

Verse: 1353    lac niwan an Riwalîne.
Verse: 1354    dâ wider lac ouch der sîne

Verse: 1355    an ir und an ir minnen.
Verse: 1356    si haeten in ir sinnen

Verse: 1357    beide eine liebe und eine ger.
Verse: 1358    sus was er sî und sî was er.

Verse: 1359    er was ir und sî was sîn.
Verse: 1360    dâ Blanscheflûr, dâ Riwalîn,

Verse: 1361    dâ Riwalîn, dâ Blanscheflûr,
Verse: 1362    dâ beide, dâ lêal amûr.

Verse: 1363    ir leben was vil gemeine dô,
Verse: 1364    sî wâren mit ein ander vrô

Verse: 1365    und hôhten ir gemüete
Verse: 1366    mit vil gemeiner güete.

Verse: 1367    und swenne sî mit vuogen
Verse: 1368    ir state in ein getruogen,

Verse: 1369    sô was ir werltwunne vol,
Verse: 1370    sô was in sanfte und alsô wol,

Verse: 1371    daz sî enhaeten niht ir leben
Verse: 1372    umb kein ander himelrîche gegeben.

Verse: 1373    Doch werte daz unlange.
Verse: 1374    wan in ir anevange,

Verse: 1375    dô s' allerbeste lebeten
Verse: 1376    und in dem wunsche swebeten,

Verse: 1377    dô kâmen Riwalîne boten:
Verse: 1378    Morgân sîn vînt haete geboten

Verse: 1379    eine starke samenung in sîn lant.
Verse: 1380    mit disem maere und al zehant

Verse: 1381    wart Riwalîne ein schif bereit
Verse: 1382    und al sîn dinc dar an geleit;

Verse: 1383    spîse unde ros, daz allez wart
Verse: 1384    zehant bereitet an die vart.

Verse: 1385    Diu minneclîche Blanschefluor,
Verse: 1386    dô sî diu leiden maere ervuor

Verse: 1387    umbe den vil herzelieben man,
Verse: 1388    alrêrste gienc ir kumber an.

Verse: 1389    von herzeleide ir aber geschach,
Verse: 1390    daz sîne gehôrte noch gesach.

Verse: 1391    ir lîch wart an ir lîbe
Verse: 1392    als eime tôten wîbe.

Verse: 1393    ûz ir munde gie niemê
Verse: 1394    wan daz vil arme wort 'owê!'

Verse: 1395    daz eine sprach s' und ouch niemê.
Verse: 1396    'owê!' sprach sî vil lange 'owê!

Verse: 1397    owê nu minne und ouwê man!
Verse: 1398    wie sît ir mich gevallen an

Verse: 1399    mit alsô maneger arbeit!
Verse: 1400    minne, al der werlde unsaelekeit,

Verse: 1401    sô kurziu vröude als an dir ist,
Verse: 1402    sô rehte unstaete sô du bist,

Verse: 1403    waz minnet al diu werlt an dir?
Verse: 1404    ich sihe doch wol, du lônest ir,

Verse: 1405    als der vil valschafte tuot.
Verse: 1406    dîn ende daz ist niht sô guot,

Verse: 1407    als dû der werlde geheizest,
Verse: 1408    sô dû sî von êrste reizest

Verse: 1409    mit kurzem liebe ûf langez leit.
Verse: 1410    dîn gespenstigiu trügeheit,

Verse: 1411    diu in sô valscher süeze swebet,
Verse: 1412    diu triuget allez, daz der lebet.

Verse: 1413    daz ist an mir wol worden schîn.
Verse: 1414    daz al mîn vröude solte sîn,

Verse: 1415    dâ von hân ich nû niht mêre
Verse: 1416    wan tôtlîch herzesêre.

Verse: 1417    mîn trôst vert hin und lât mich hie!'
Verse: 1418    In disem clagemaere gie

Verse: 1419    ir trûtgeselle Riwalîn
Verse: 1420    mit weinendem herzen în

Verse: 1421    und wolte nemen urloup von ir.
Verse: 1422    'vrouwe' sprach er 'gebietet mir,

Verse: 1423    ich sol und muoz ze lande varn;
Verse: 1424    iuch, schoene, müeze got bewarn:

Verse: 1425    weset iemer saelec unde gesunt!'
Verse: 1426    alsus geswant ir anderstunt,

Verse: 1427    aber viel sî von der herzenôt
Verse: 1428    vor ime in unmaht und vür tôt

Verse: 1429    in ir meisterinne schôz.
Verse: 1430    der ir getriuwe senegenôz

Verse: 1431    dô der daz michel ungemach
Verse: 1432    an sîme herzeliebe ersach,

Verse: 1433    er leiste ir wol gesellekeit;
Verse: 1434    wan er nam sich ir senede leit

Verse: 1435    vil inneclîche mit ir an.
Verse: 1436    sîn varwe und al sîn craft began

Verse: 1437    an sînem lîbe swachen.
Verse: 1438    nâch clegelîchen sachen

Verse: 1439    gesaz er riuweclîchen nider
Verse: 1440    und erbeite kûme, daz si wider

Verse: 1441    und alsô vil ze creften kam,
Verse: 1442    daz er sî dô mit handen nam

Verse: 1443    und hiels daz vröudelôse wîp
Verse: 1444    vil suozeclîche an sînen lîp

Verse: 1445    und kuste ie z' eteslîcher stunt
Verse: 1446    ir wange, ir ougen unde ir munt

Verse: 1447    und trûte sî sus unde sô,
Verse: 1448    biz sî ze jungeste dô

Verse: 1449    z' ir selber kam baz unde baz
Verse: 1450    und ûfreht von ir selber saz.

Verse: 1451    Nu Blanscheflûr z' ir selber kam
Verse: 1452    und aber ir vriundes war genam,

Verse: 1453    sî sach in jaemerlîchen an:
Verse: 1454    'ach' sprach sî 'saeliger man,

Verse: 1455    wie ist mir sô leide an iu geschehen!
Verse: 1456    hêrre, wie hân ich iuch gesehen

Verse: 1457    ze sô vil maneger herzeclage,
Verse: 1458    als ich an mînem herzen trage

Verse: 1459    von iu, von iuwern schulden!
Verse: 1460    getörste ich ez mit hulden

Verse: 1461    hin z' iu gereden, sô möhtet ir
Verse: 1462    vriuntlîcher tuon und baz ze mir.

Verse: 1463    hêrre unde vriunt, ich hân von iu
Verse: 1464    manc leit und vor den allen driu,

Verse: 1465    diu toedic unde unwendic sint.
Verse: 1466    daz eine ist, daz ich trage ein kint,

Verse: 1467    des entrûwe ich niemer genesen,
Verse: 1468    got enwelle mîn gehelfe wesen.

Verse: 1469    daz ander deist noch mêrre:
Verse: 1470    mîn bruoder und mîn hêrre

Verse: 1471    sô der an mir dise ungeschiht
Verse: 1472    und ouch sîn selbes laster siht,

Verse: 1473    der heizet mich verderben
Verse: 1474    und lesterlîche ersterben.

Verse: 1475    daz dritte ist aber diu meiste nôt
Verse: 1476    und maneges erger danne der tôt:

Verse: 1477    ich weiz wol, ob daz wol ergât,
Verse: 1478    daz mich mîn bruoder leben lât

Verse: 1479    und er mich niht ersterbet,
Verse: 1480    daz er mich aber enterbet

Verse: 1481    und nimet mir guot und êre.
Verse: 1482    sô muoz ich iemer mêre

Verse: 1483    unwert und swaches namen sîn.
Verse: 1484    dar zuo muoz ich mîn kindelîn,

Verse: 1485    daz einen lebenden vater hât,
Verse: 1486    ziehen âne vater rât.

Verse: 1487    Und enwolte ich daz niemêr geclagen,
Verse: 1488    solt ich daz laster eine tragen,

Verse: 1489    daz mîn vil hôch geslehte
Verse: 1490    und der künic mîn bruoder mehte

Verse: 1491    des itewîzes unde mîn
Verse: 1492    mit êren ledec und âne sîn.

Verse: 1493    swenne aber alle, die nu sint,
Verse: 1494    diu maere sagent, ich habe ein kint

Verse: 1495    erworben kebeslîche,
Verse: 1496    deist disem und jenem rîche,

Verse: 1497    Curnwâle und Engelande
Verse: 1498    ein offenbaeriu schande.

Verse: 1499    und ouwê, swenne daz geschiht,
Verse: 1500    daz man mich mit den ougen siht,

Verse: 1501    daz zwei lant von den schulden mîn
Verse: 1502    genidert unde geswechet sîn,

Verse: 1503    sô waere ich eine bezzer tôt.
Verse: 1504    seht hêrre' sprach si 'deist diu nôt,

Verse: 1505    daz ist diu wernde herzeclage,
Verse: 1506    in der ich alle mîne tage

Verse: 1507    mit lebendem lîbe sterben muoz.
Verse: 1508    hêrre, iuwer helfe diu entuoz

Verse: 1509    und got envüege ez danne alsô,
Verse: 1510    sone wirde ich niemer mêre vrô.'

Verse: 1511    'Trût vrouwe' sprach er dô ze ir
Verse: 1512    'habet ir dekeine nôt von mir,

Verse: 1513    die sol ich büezen, ob ich mac,
Verse: 1514    und ouch bewarn vür disen tac,

Verse: 1515    daz iu durch mîne schulde iht mê
Verse: 1516    leit oder laster ûf erstê.

Verse: 1517    ich hân, swaz her nâch süle geschehen,
Verse: 1518    sô lieben tac an iu gesehen,

Verse: 1519    daz ez unbillîch waere,
Verse: 1520    ob ir dekeine swaere

Verse: 1521    mit mînem willen soltet tragen.
Verse: 1522    vrouwe, ich wil iu rehte sagen

Verse: 1523    mîn herze und allen mînen muot.
Verse: 1524    leit unde liep, übel unde guot

Verse: 1525    und allez daz, daz iu geschiht,
Verse: 1526    dâ von enscheide ich mich niht.

Verse: 1527    dâ wil ich iemer wesen bî,
Verse: 1528    swie kumberlîch ez danne sî,

Verse: 1529    und biute iu zweier dinge kür,
Verse: 1530    diu leget iuwerm herzen vür:

Verse: 1531    weder ich belîbe oder var.
Verse: 1532    hier under nemet selbe war.

Verse: 1533    welt ir, daz ich hie bestê
Verse: 1534    und sehe, wie iuwer dinc ergê,

Verse: 1535    daz sî, geruochet aber ir
Verse: 1536    heim unde hinnen varn mit mir,

Verse: 1537    ich selbe und allez, daz ich hân,
Verse: 1538    daz ist iu iemer undertân.

Verse: 1539    ir erbietet mir ez hie sô wol,
Verse: 1540    daz ich es wol gedenken sol

Verse: 1541    mit aller slahte guote.
Verse: 1542    swes iu nu sî ze muote,

Verse: 1543    vrouwe, des bewîset mich,
Verse: 1544    wan swaz ir wellet, daz wil ich.'

Verse: 1545    'Genâde hêrre' sprach si dô
Verse: 1546    'ir redet und bietet mir 'z alsô,

Verse: 1547    als iu got lônen müeze
Verse: 1548    und alse ich iuwer vüeze

Verse: 1549    iemer gerne suochen sol.
Verse: 1550    vriunt unde hêrre, ir wizzet wol,

Verse: 1551    belîbens mac hie niht gesîn:
Verse: 1552    mîn angest umb min kindelîn

Verse: 1553    die enmag ich leider niht verheln.
Verse: 1554    wan möhte et ich mich hin versteln!

Verse: 1555    daz waere nû der beste rât
Verse: 1556    nâch dem dinge, als ez mir stât.

Verse: 1557    vriunt hêrre, dar zuo râtet ir.'
Verse: 1558    'nû vrouwe' sprach er 'volget mir:

Verse: 1559    ze naht als ich ze schiffe gê,
Verse: 1560    sô vüeget ir daz, daz ir ê

Verse: 1561    vil tougenlîche dar sît komen
Verse: 1562    ( biz daz hân ich urloup genomen),

Verse: 1563    daz ich iuch danne vinde
Verse: 1564    bî mînem ingesinde.

Verse: 1565    sus werbet! alsô muoz ez sîn.'
Verse: 1566    mit dirre rede kam Riwalîn

Verse: 1567    ze Marke und seite im maere,
Verse: 1568    waz ime enboten waere

Verse: 1569    umbe sîn liut und umb sîn lant.
Verse: 1570    urloup nam er von ime zehant,

Verse: 1571    dâ nâch von al den sînen.
Verse: 1572    die clageten Riwalînen,

Verse: 1573    daz er die clage ê nie gesach,
Verse: 1574    diu dô und dâ nâch ime geschach.

Verse: 1575    manc segen wart im nâch gegeben,
Verse: 1576    daz got sîn êre und sîn leben

Verse: 1577    geruohte in sînem schirme hân.
Verse: 1578    nu 'z an die naht begunde gân

Verse: 1579    und er ze sînem schiffe kam
Verse: 1580    und al sîn dinc dar an genam,

Verse: 1581    dô vand er sîne vrouwen dâ,
Verse: 1582    die schoenen Blanschefliure. ie sâ

Verse: 1583    sô wart daz schif gestôzen an.
Verse: 1584    alsus sô vuoren sî von dan.

Verse: 1585    Nû Riwalîn ze lande kam
Verse: 1586    und die vil grôze nôt vernam,

Verse: 1587    die Morgân haete ûf in gewant
Verse: 1588    mit übercrefteclîcher hant,

Verse: 1589    sînen marschalc er besande,
Verse: 1590    an dem er triuwe erkande,

Verse: 1591    an dem sîn meister trôst dô lac,
Verse: 1592    der aller sîner êren pflac

Verse: 1593    über sîn liut und über sîn lant:
Verse: 1594    daz was Rûal li foitenant,

Verse: 1595    der êren unde der triuwe ein habe,
Verse: 1596    der nie gewancte an triuwen abe.

Verse: 1597    der seite im aller hande,
Verse: 1598    als er ez wol erkande,

Verse: 1599    waz engeslîcher swaere
Verse: 1600    dem lande erstanden waere.

Verse: 1601    'doch' sprach er 'sît daz ir enzît
Verse: 1602    ze trôste uns allen komen sît

Verse: 1603    und iuch got wider gesendet hât,
Verse: 1604    sô sol sîn alles werden rât

Verse: 1605    und mugen vil harte wol genesen.
Verse: 1606    wir suln nu hôhes muotes wesen,

Verse: 1607    unser angest sol nu cleine sîn.'
Verse: 1608    Hier under sagete im Riwalîn

Verse: 1609    die lieben âventiure
Verse: 1610    umbe sîne Blanschefliure.

Verse: 1611    des wart er inneclîche vrô.
Verse: 1612    'ich sihe wol, hêrre' sprach er dô

Verse: 1613    'iuwer êre wehset alle wîs,
Verse: 1614    iuwer werdekeit und iuwer prîs,

Verse: 1615    iuwer vröude und iuwer wunne
Verse: 1616    diu stîget als diu sunne.

Verse: 1617    irne möhtet ûf der erden
Verse: 1618    von wîbe niemer werden

Verse: 1619    sô hôhes namen als von ir.
Verse: 1620    von danne, hêrre, volget mir.

Verse: 1621    habe sî wol ze iu getân,
Verse: 1622    des sult ir sî geniezen lân.

Verse: 1623    sô wir unser dinc nu genden,
Verse: 1624    die nôt von uns gewenden,

Verse: 1625    diu uns nu sô ze rucke lît,
Verse: 1626    sô gebietet eine hôhgezît

Verse: 1627    wol hêrlîche unde rîche:
Verse: 1628    dâ nemet sî offenlîche

Verse: 1629    vor mâgen und vor mannen ze ê.
Verse: 1630    und râte zwâre, daz ir ê

Verse: 1631    ze kirchen ir geruochet jehen,
Verse: 1632    da ez pfaffen unde leien sehen,

Verse: 1633    der ê nach cristenlîchem site.
Verse: 1634    dâ saeleget ir iuch selben mite.

Verse: 1635    und wizzet waerlîchen daz,
Verse: 1636    iuwer dinc sol iemer deste baz

Verse: 1637    ze êren und ze guote ergân.'
Verse: 1638    Nu daz geschach, daz was getân,

Verse: 1639    daz er des alles vollekam.
Verse: 1640    und alse er sî dô ze ê genam,

Verse: 1641    er bevalch si hant von hande
Verse: 1642    dem getriuwen Foitenande.

Verse: 1643    der vuorte sî ze Canoêl
Verse: 1644    ûf daz selbe castêl,

Verse: 1645    nâch dem sîn hêrre, als ich ez las,
Verse: 1646    Canêlengres genennet was,

Verse: 1647    Canêl nach Canoêle.
Verse: 1648    ûf dem selben castêle

Verse: 1649    haete er dô sîn selbes wîp,
Verse: 1650    ein wîp, diu muot unde lîp

Verse: 1651    mit wîplîcher staete
Verse: 1652    der werlt gewerldet haete.

Verse: 1653    der bevalch er sîne vrouwen dô
Verse: 1654    und schuof ir ir gemach alsô,

Verse: 1655    als ez ir namen wol gezam.
Verse: 1656    Nu Rûal wider zem hêrren kam,

Verse: 1657    do wurden sî zwêne under in zwein
Verse: 1658    umbe ir angest in ein,

Verse: 1659    alse ez in dô was gewant.
Verse: 1660    si sanden über al ir lant

Verse: 1661    und samenten ir ritterschaft;
Verse: 1662    alle ir state und alle ir craft

Verse: 1663    die kêrten sî niwan ze wer.
Verse: 1664    alsus kâmen sî mit her

Verse: 1665    Morgâne engegene geriten.
Verse: 1666    ouch wart ir harte wol gebiten

Verse: 1667    von Morgâne und von den sînen:
Verse: 1668    sî enpfiengen Riwalînen

Verse: 1669    mit einer herten vehte.
Verse: 1670    hei waz dâ guoter knehte

Verse: 1671    gevellet unde geveiget wart!
Verse: 1672    wie lützel der dâ wart gespart!

Verse: 1673    wie manic man kam dâ ze nôt,
Verse: 1674    und wie vil maneger lac dâ tôt

Verse: 1675    und wunt von ietwederm her!
Verse: 1676    an dirre veigen lantwer

Verse: 1677    wart der vil clagebaere erslagen,
Verse: 1678    den al diu werlt wol solte clagen,

Verse: 1679    ob clegelîchiu swaere
Verse: 1680    nâch tôde nütze waere.

Verse: 1681    Canêlengres der guote,
Verse: 1682    der ritterlîchem muote

Verse: 1683    noch hêrren tugende an keiner stete
Verse: 1684    nie vuoz noch halben wanc getete,

Verse: 1685    der lac dâ jaemerlîchen tôt.
Verse: 1686    iedoch in aller dirre nôt

Verse: 1687    kâmen die sînen über in
Verse: 1688    und brâhten in mit noeten hin.

Verse: 1689    mit maneger clage vuorten si 'n dan
Verse: 1690    und bestatten in als einen man,

Verse: 1691    der minner noch mêre
Verse: 1692    niwan ir aller êre

Verse: 1693    mit ime dô vuorte hin ze grabe.
Verse: 1694    daz ich nu vil von ungehabe

Verse: 1695    und von ir jâmer sagete,
Verse: 1696    waz iegelîcher clagete,

Verse: 1697    waz solte daz? es waere unnôt.
Verse: 1698    si wâren alle mit im tôt

Verse: 1699    an êren unde an guote,
Verse: 1700    an allem dem muote,

Verse: 1701    der guoten liuten solte geben
Verse: 1702    saelde und saeleclîchez leben.

Verse: 1703    Diz ist geschehen, ez muoz nu sîn.
Verse: 1704    er ist tôt der guote Riwalîn.

Verse: 1705    dane hoeret nû niht mêre zuo
Verse: 1706    wan eine, daz man umbe in tuo

Verse: 1707    als mit rehte umb einen tôten man.
Verse: 1708    da enist doch nû niht anders an:

Verse: 1709    man sol und muoz sich sîn bewegen,
Verse: 1710    und sol sîn got von himele pflegen,

Verse: 1711    der edeler herzen nie vergaz!
Verse: 1712    und sul wir sprechen vürbaz,

Verse: 1713    wie 'z umbe Blanschefliure kam.
Verse: 1714    dô diu vil schoene vernam

Verse: 1715    diu clagebaeren maere,
Verse: 1716    wie dô ir herzen waere,

Verse: 1717    got hêrre, daz solt dû bewarn,
Verse: 1718    daz wir daz iemer ervarn!

Verse: 1719    ich enhân dâ keinen zwîvel an,
Verse: 1720    gewan ie wîp durch lieben man

Verse: 1721    tôtlîchen herzesmerzen,
Verse: 1722    dern waere ouch in ir herzen.

Verse: 1723    daz was tôtlîches leides vol.
Verse: 1724    sî bewârte al der werlde wol,

Verse: 1725    daz ir sîn tôt ze herzen gie.
Verse: 1726    ir ougen diu enwurden nie

Verse: 1727    in allem disem leide naz.
Verse: 1728    jâ got hêrre, wie kam daz,

Verse: 1729    daz dâ niht wart geweinet?
Verse: 1730    dâ was ir herze ersteinet.

Verse: 1731    da enwas niht lebenes inne
Verse: 1732    niwan diu lebende minne

Verse: 1733    und daz vil lebelîche leit,
Verse: 1734    daz lebende ûf ir leben streit.

Verse: 1735    geclagete s' aber ir hêrren iht
Verse: 1736    mit clageworten? nein sî niht.

Verse: 1737    sî erstummete an der stunde,
Verse: 1738    ir clage starp in ir munde.

Verse: 1739    ir zunge, ir munt, ir herze, ir sin,
Verse: 1740    daz was allez dô dâ hin.

Verse: 1741    diu schoene enclagete dô niemê.
Verse: 1742    sine sprach dô weder ach noch wê.

Verse: 1743    si seic et nider unde lac
Verse: 1744    quelende unz an den vierden tac

Verse: 1745    erbermeclîcher danne ie wîp;
Verse: 1746    si want sich unde brach ir lîp

Verse: 1747    sus unde sô, her unde dar
Verse: 1748    und treip daz an, biz sî gebar

Verse: 1749    ein sünelîn mit maneger nôt.
Verse: 1750    seht, daz genas und lac sî tôt.

Verse: 1751    Owê der ougenweide,
Verse: 1752    dâ man nâch leidem leide

Verse: 1753    mit leiderem leide
Verse: 1754    siht leider ougenweide!

Verse: 1755    Der êre an Riwalîne lac,
Verse: 1756    der er nâch grôzen êren pflac,

Verse: 1757    die wîle ez got wolte,
Verse: 1758    daz er ir pflegen solte,

Verse: 1759    der leit was leider alze grôz
Verse: 1760    und alles leides übergenôz.

Verse: 1761    wan al ir trôst und al ir craft,
Verse: 1762    ir tuon und al ir ritterschaft,

Verse: 1763    ir êre und al ir werdekeit,
Verse: 1764    daz allez was dô hin geleit.

Verse: 1765    sîn tôt was aber wol lobelîch,
Verse: 1766    der ir ze sêre erbermeclîch.

Verse: 1767    swie schedelîch diu swaere
Verse: 1768    liute unde lande waere,

Verse: 1769    diu von ir hêrren tôde kam,
Verse: 1770    ezn was doch niht sô clagesam,

Verse: 1771    sô daz man dise quelende nôt
Verse: 1772    und den erbermeclîchen tôt

Verse: 1773    an dem vil süezen wîbe sach.
Verse: 1774    ir jâmer unde ir ungemach

Verse: 1775    beclage ein ieclîch saelec man.
Verse: 1776    und swer von wîbe ie muot gewan

Verse: 1777    oder iemer wil gewinnen,
Verse: 1778    der trahte in sînen sinnen,

Verse: 1779    wie lîhte misselinge
Verse: 1780    an sus getânem dinge

Verse: 1781    guoten liuten ûf erstât,
Verse: 1782    wie lîhte ez in ze leide ergât

Verse: 1783    an vröuden unde an lîbe,
Verse: 1784    und sî dem reinen wîbe

Verse: 1785    genâden wünschende umbe got,
Verse: 1786    daz sîn güete und sîn gebot

Verse: 1787    ir helfe, ir trôst geruoche sîn!
Verse: 1788    und sagen wir umbe daz kindelîn,

Verse: 1789    daz vater noch muoter haete,
Verse: 1790    waz got mit deme getaete.




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.