TITUS
Gottfried von Strassburg, Tristan
Part No. 3
Previous part

Chapter: 3 
3: Rual li Foitenant


Verse: 1791    Riuwe unde staetiu triuwe
Verse: 1792    nâch vriundes tôde ie niuwe,

Verse: 1793    dâ ist der vriunt ie niuwe:
Verse: 1794    daz ist diu meiste triuwe.

Verse: 1795    Swer nâch dem vriunde riuwe hât,
Verse: 1796    nâch tôde triuwe an ime begât,

Verse: 1797    daz ist vor allem lône,
Verse: 1798    deist aller triuwe ein crône.

Verse: 1799    mit der selben crône was
Verse: 1800    gecroenet dô, als ich ez las,

Verse: 1801    der marschalc und sîn saelec wîp,
Verse: 1802    die beide ein triuwe unde ein lîp

Verse: 1803    got unde der werlde wâren,
Verse: 1804    des sî guot bilde bâren

Verse: 1805    beidiu der werlde unde gote,
Verse: 1806    wan sî wol nach gotes gebote

Verse: 1807    ganzlîcher triuwe wielten
Verse: 1808    und ouch die wol behielten

Verse: 1809    âne alle missewende
Verse: 1810    unz an ir beider ende.

Verse: 1811    solt ieman ûf der erden
Verse: 1812    von triuwen halben werden

Verse: 1813    künic oder künigîn,
Verse: 1814    binamen daz möhten sî wol sîn,

Verse: 1815    als ich iu von in beiden
Verse: 1816    waerlîche mag bescheiden,

Verse: 1817    wie er gevuor und sî gewarp.
Verse: 1818    dô Blanscheflûr, ir vrouwe, erstarp

Verse: 1819    und Riwalîn begraben was,
Verse: 1820    des weisen dinc, der dô genas,

Verse: 1821    das gevuor nâch ungenaden wol
Verse: 1822    als des, der vürbaz komen sol:

Verse: 1823    der marschalc und diu marschalkîn
Verse: 1824    nâmen daz cleine weiselîn

Verse: 1825    und burgen ez vil tougen
Verse: 1826    den liuten von den ougen.

Verse: 1827    si sageten unde hiezen sagen,
Verse: 1828    ir vrouwe haete ein kint getragen,

Verse: 1829    daz waere in ir und mit ir tôt.
Verse: 1830    von der gedrîeten nôt

Verse: 1831    wart aber des landes clage dô mê;
Verse: 1832    ir clage wart aber dô mê dan ê:

Verse: 1833    clage, daz Riwalîn erstarp,
Verse: 1834    clage, daz Blanscheflûr verdarp,

Verse: 1835    clage umbe ir beider kindelîn,
Verse: 1836    an dem ir trôst dô solte sîn,

Verse: 1837    daz daz verdorben waere.
Verse: 1838    zuo aller dirre swaere

Verse: 1839    gieng in diu starke vorhte,
Verse: 1840    die Morgân an in worhte,

Verse: 1841    als nâhen alse ir hêrren tôt.
Verse: 1842    wan diz daz ist diu meiste nôt,

Verse: 1843    die man zer werlde haben mac:
Verse: 1844    swâ sô der man naht unde tac

Verse: 1845    den tôtvînt vor ougen hât,
Verse: 1846    daz ist diu nôt, diu nâhen gât,

Verse: 1847    und ist ein lebelîcher tôt.
Verse: 1848    in aller dirre lebenden nôt

Verse: 1849    wart Blanscheflûr ze grabe getragen.
Verse: 1850    michel jâmer unde clagen

Verse: 1851    daz wart begangen ob ir grabe.
Verse: 1852    ir muget wol wizzen, ungehabe

Verse: 1853    der was dâ vil und alze vil.
Verse: 1854    nune sol ich aber noch enwil

Verse: 1855    iuwer ôren niht beswaeren
Verse: 1856    mit z' erbermeclîchen maeren,

Verse: 1857    wan ez den ôren missehaget,
Verse: 1858    swâ man von clage ze vil gesaget;

Verse: 1859    und ist vil lützel iht sô guot,
Verse: 1860    ez enswache, der 's ze vil getuot.

Verse: 1861    von diu sô lâzen langez clagen
Verse: 1862    und vlîzen uns, wie wir gesagen

Verse: 1863    umbe daz verweisete kint,
Verse: 1864    von dem diu maere erhaben sint.

Verse: 1865    Sich treit der werlde sache
Verse: 1866    vil ofte z' ungemache

Verse: 1867    und aber von ungemache
Verse: 1868    wider ze guoter sache.

Verse: 1869    Reht in den noeten sol der vrome,
Verse: 1870    ze swelhem ende ez danne kome,

Verse: 1871    bedenken, wie sîn werde rât.
Verse: 1872    die wîle und er daz leben hât,

Verse: 1873    sô sol er mit den lebenden leben,
Verse: 1874    im selben trôst ze lebene geben.

Verse: 1875    als tete der marschalc Foitenant.
Verse: 1876    wan ez ime ze sorgen was gewant,

Verse: 1877    dô bedâhte er mitten in der nôt
Verse: 1878    des landes schaden, sîn selbes tôt.

Verse: 1879    wan ime diu wer niht tohte
Verse: 1880    noch sich mit wer enmohte

Verse: 1881    wider den vînt gevristen,
Verse: 1882    dô vriste er sich mit listen.

Verse: 1883    er sprach die hêrren al zehant
Verse: 1884    über allez sînes hêrren lant

Verse: 1885    und brâhte sî ze suone.
Verse: 1886    wan in was niht ze tuone

Verse: 1887    wan vlêhen unde sich ergeben.
Verse: 1888    sie ergâben guot unde leben

Verse: 1889    an Morgânes hulde.
Verse: 1890    die hazlîchen schulde

Verse: 1891    under Morgâne und under in
Verse: 1892    die legeten sî mit listen hin

Verse: 1893    und nerten ir liut unde ir lant.
Verse: 1894    Der getriuwe marschalc Foitenant

Verse: 1895    vuor heim und sprach sîn saelic wîp
Verse: 1896    und bevalch ir verre und an den lîp,

Verse: 1897    daz sî sich in leite
Verse: 1898    nâch der gewonheite,

Verse: 1899    als ein wîp kindes inne lît,
Verse: 1900    und daz sî nâch der selben zît

Verse: 1901    jaehe unde jehende waere,
Verse: 1902    daz sî daz kint gebaere,

Verse: 1903    daz ir junchêrre solte sîn.
Verse: 1904    diu saelege marschalkîn,

Verse: 1905    diu guote, diu staete,
Verse: 1906    diu reine Floraete,

Verse: 1907    diu wîbes êre ein spiegelglas
Verse: 1908    und rehter güete ein gimme was,

Verse: 1909    diu was des lîhte gemant,
Verse: 1910    daz ir doch z' êren was gewant.

Verse: 1911    sie stalte ir muot und al ir lîp
Verse: 1912    ze clage und rehte alse ein wîp,

Verse: 1913    diu eines kindes sol genesen.
Verse: 1914    si hiez ir kamere unde ir wesen

Verse: 1915    stellen unde machen
Verse: 1916    ze heinlîchen sachen.

Verse: 1917    und wande s' ouch erkande wol,
Verse: 1918    wie man hie zuo gebâren sol,

Verse: 1919    dô nam si 'r willeclage hier abe.
Verse: 1920    si gelîchsente grôz ungehabe

Verse: 1921    an muote unde an lîbe
Verse: 1922    gelîch einem wîbe,

Verse: 1923    diu ze solhen noeten gât,
Verse: 1924    diu al ir dinc gestellet hât

Verse: 1925    ze sus getâner arbeit.
Verse: 1926    sus wart daz kint zuo z' ir geleit

Verse: 1927    vil tougenlîche unde alsô,
Verse: 1928    daz ez vil lützel ieman dô

Verse: 1929    âne eine ir ammen bevant.
Verse: 1930    hie wart ein maere sâ zehant,

Verse: 1931    diu guote marschalkinne
Verse: 1932    laege eines sunes inne.

Verse: 1933    ez was ouch wâr, sie tete alsô:
Verse: 1934    si lag des sunes inne dô,

Verse: 1935    der ir sunlîcher triuwe pflac
Verse: 1936    unz an ir beider endetac.

Verse: 1937    daz selbe süeze kint truoc ir
Verse: 1938    als süezelîche kindes gir,

Verse: 1939    als ein kint sîner muoter sol.
Verse: 1940    und was daz billîch unde wol.

Verse: 1941    si leite ouch allen ir sin
Verse: 1942    mit muoterlîcher liebe an in

Verse: 1943    und was des alsô staete,
Verse: 1944    als ob sî 'n selbe ie haete

Verse: 1945    under ir brüsten getragen.
Verse: 1946    als wir daz maere hoeren sagen,

Verse: 1947    sone geschach ez weder sît noch ê,
Verse: 1948    daz ein man unde ein wîp ie mê

Verse: 1949    mit solher liebe ir hêrren zugen.
Verse: 1950    als wir her nâch erkennen mugen

Verse: 1951    an disem selben maere,
Verse: 1952    wie veterlîche swaere

Verse: 1953    und wie vil manege arbeit
Verse: 1954    der getriuwe marschalc durch in leit.

Verse: 1955    Nu daz diu guote marschalkîn
Verse: 1956    der noete genesen solte sîn

Verse: 1957    und nâch ir sehs wochen,
Verse: 1958    als den vrouwen ist besprochen,

Verse: 1959    des suns ze kirchen solte gân,
Verse: 1960    von dem ich her gesaget hân,

Verse: 1961    si selbe in an ir arm nam
Verse: 1962    und truog in suoze, als ir gezam,

Verse: 1963    mit ir zem gotes hûse alsô.
Verse: 1964    und als si ir înleite dô

Verse: 1965    gotelîche haete enpfangen
Verse: 1966    und was von opfer gangen

Verse: 1967    mit schoenem ingesinde,
Verse: 1968    dô was dem cleinen kinde

Verse: 1969    der heilege touf bereit,
Verse: 1970    durch daz ez sîne cristenheit

Verse: 1971    in gotes namen enpfienge,
Verse: 1972    swie 'z ime dar nâch ergienge,

Verse: 1973    daz ez doch cristen waere.
Verse: 1974    nu daz sîn toufaere

Verse: 1975    alles sînes dinges was bereit,
Verse: 1976    nâch touflîcher gewonheit

Verse: 1977    er vrâgete umb daz kindelîn,
Verse: 1978    wie sîn name solte sîn.

Verse: 1979    diu höfsche marschalkîn gie dan
Verse: 1980    und sprach vil tougenlîche ir man

Verse: 1981    und vrâgete in, wie er wolte,
Verse: 1982    daz man ez nennen solte.

Verse: 1983    der marschalc der sweic lange.
Verse: 1984    er trahte ange und ange,

Verse: 1985    waz namen ime gebaere
Verse: 1986    nâch sînen dingen waere.

Verse: 1987    hier under sô betrahte er
Verse: 1988    des kindes dinc von ende her,

Verse: 1989    rehte alse er haete vernomen,
Verse: 1990    wie sîn dinc allez dar was komen:

Verse: 1991    'seht' sprach er 'vrouwe, als ich vernam
Verse: 1992    von sînem vater, wie 'z dem kam

Verse: 1993    umbe sîne Blanschefliure,
Verse: 1994    mit wie vil maneger triure

Verse: 1995    ir gernder wille an ime ergie,
Verse: 1996    wie sî diz kint mit triure enpfie,

Verse: 1997    mit welher triure sî 'z gewan,
Verse: 1998    sô nenne wir in Tristan.'

Verse: 1999    nu heizet triste triure,
Verse: 2000    und von der âventiure

Verse: 2001    sô wart daz kint Tristan genant,
Verse: 2002    Tristan getoufet al zehant.

Verse: 2003    von triste Tristan was sîn nam.
Verse: 2004    der name was ime gevallesam

Verse: 2005    und alle wîs gebaere.
Verse: 2006    daz kiesen an dem maere.

Verse: 2007    sehen wir trûreclîch ez was,
Verse: 2008    dâ sîn sîn muoter genas.

Verse: 2009    sehen wie vruo im arbeit
Verse: 2010    und nôt ze rucke wart geleit.

Verse: 2011    sehen wie trûreclîch ein leben
Verse: 2012    ime ze lebene wart gegeben.

Verse: 2013    sehen an den trûreclîchen tôt,
Verse: 2014    der alle sîne herzenôt

Verse: 2015    mit einem ende beslôz
Verse: 2016    daz alles tôdes übergenôz

Verse: 2017    und aller triure ein galle was.
Verse: 2018    diz maere, der daz ie gelas,

Verse: 2019    der erkennet sich wol, daz der nam
Verse: 2020    dem lebene was gehellesam.

Verse: 2021    er was reht alse er hiez ein man
Verse: 2022    und hiez reht alse er was: Tristan.

Verse: 2023    und swer nu gerne haete erkant,
Verse: 2024    durch welhe liste Foitenant

Verse: 2025    daz hieze sagen ze maere,
Verse: 2026    daz Tristan daz kint waere

Verse: 2027    von der gebürteclîchen nôt
Verse: 2028    in sîner tôten muoter tôt,

Verse: 2029    den suln wir ez wizzen lân:
Verse: 2030    ez wart durch triuwe getân.

Verse: 2031    der getriuwe tete ez umbe daz:
Verse: 2032    er vorhte Morgânes haz.

Verse: 2033    ob er daz kint dâ wiste,
Verse: 2034    daz er ez sô mit liste

Verse: 2035    sô mit gewalt verdarpte,
Verse: 2036    daz lant an ime entarpte.

Verse: 2037    durch daz nam der getriuwe man
Verse: 2038    ze kinde sich den weisen an

Verse: 2039    und zôch ez alsô schône,
Verse: 2040    daz ime diu werlt ze lône

Verse: 2041    des gotes genâden wünschen sol.
Verse: 2042    daz verdiente er an dem weisen wol.

Verse: 2043    Nu daz daz kint getoufet wart,
Verse: 2044    nâch cristenlîchem site bewart,

Verse: 2045    diu tugende rîche marschalkîn
Verse: 2046    nam aber ir liebez kindelîn

Verse: 2047    in ir vil heinlîche pflege.
Verse: 2048    si wolte wizzen alle wege

Verse: 2049    und sehen, ob ime sîn sache
Verse: 2050    stüende ze gemache.

Verse: 2051    sîn süeziu muoter leite an in
Verse: 2052    mit alsô süezem vlîze ir sin,

Verse: 2053    daz s' ime des niht engunde,
Verse: 2054    daz er ze keiner stunde

Verse: 2055    unsanfte nider getraete.
Verse: 2056    Nu sî daz mit im haete

Verse: 2057    getriben unz an sîn sibende jâr,
Verse: 2058    daz er wol rede und ouch gebâr

Verse: 2059    vernemen kunde und ouch vernam,
Verse: 2060    sîn vater der marschalc in dô nam

Verse: 2061    und bevalch in einem wîsen man.
Verse: 2062    mit dem sante er in iesâ dan

Verse: 2063    durch vremede sprâche in vremediu lant.
Verse: 2064    und daz er aber al zehant

Verse: 2065    der buoche lêre an vienge
Verse: 2066    und den ouch mite gienge

Verse: 2067    von aller slahte lêre.
Verse: 2068    daz was sîn erstiu kêre

Verse: 2069    ûz sîner vrîheite.
Verse: 2070    dô trat er in daz geleite

Verse: 2071    betwungenlîcher sorgen,
Verse: 2072    die ime dâ vor verborgen

Verse: 2073    und vor behalten wâren.
Verse: 2074    in den ûf blüenden jâren,

Verse: 2075    dô al sîn wunne solte enstân,
Verse: 2076    dô er mit vröuden solte gân

Verse: 2077    in sînes lebenes begin,
Verse: 2078    dô was sîn beste leben hin.

Verse: 2079    dô er mit vröuden blüen began,
Verse: 2080    dô viel der sorgen rîfe in an,

Verse: 2081    der maneger jugent schaden tuot,
Verse: 2082    und darte im sîner vröuden bluot.

Verse: 2083    in sîner êrsten vrîheit
Verse: 2084    wart al sîn vrîheit hin geleit.

Verse: 2085    der buoche lêre und ir getwanc
Verse: 2086    was sîner sorgen anevanc.

Verse: 2087    und iedoch dô er ir began,
Verse: 2088    dô leite er sînen sin dar an

Verse: 2089    und sînen vlîz sô sêre,
Verse: 2090    daz er der buoche mêre

Verse: 2091    gelernete in sô kurzer zît
Verse: 2092    danne ie kein kint ê oder sît.

Verse: 2093    Under disen zwein lernungen
Verse: 2094    der buoche unde der zungen

Verse: 2095    sô vertete er sîner stunde vil
Verse: 2096    an iegelîchem seitspil.

Verse: 2097    dâ kêrte er spâte unde vruo
Verse: 2098    sîn emezekeit sô sêre zuo,

Verse: 2099    biz er es wunder kunde.
Verse: 2100    er lernete alle stunde

Verse: 2101    hiute diz, morgen daz,
Verse: 2102    hiure wol, ze jâre baz.

Verse: 2103    über diz allez lernet er
Verse: 2104    mit dem schilte und mit dem sper

Verse: 2105    behendeclîche rîten,
Verse: 2106    daz ors ze beiden sîten

Verse: 2107    bescheidenlîche rüeren,
Verse: 2108    von sprunge ez vreche vüeren,

Verse: 2109    turnieren und leisieren,
Verse: 2110    mit schenkeln sambelieren

Verse: 2111    rehte und nâch ritterlîchem site.
Verse: 2112    hie bankete er sich ofte mite.

Verse: 2113    wol schirmen, starke ringen,
Verse: 2114    wol loufen, sêre springen,

Verse: 2115    dar zuo schiezen den schaft,
Verse: 2116    daz tete er wol nâch sîner craft.

Verse: 2117    ouch hoere wir diz maere sagen,
Verse: 2118    ezn gelernete birsen unde jagen

Verse: 2119    nie kein man sô wol sô er,
Verse: 2120    ez waere dirre oder der.

Verse: 2121    aller hande hovespil
Verse: 2122    diu tete er wol und kunde ir vil.

Verse: 2123    ouch was er an dem lîbe,
Verse: 2124    daz jungelinc von wîbe

Verse: 2125    nie saeleclîcher wart geborn.
Verse: 2126    sîn dinc was allez ûz erkorn

Verse: 2127    beide an dem muote und an den siten.
Verse: 2128    nu was aber diu saelde undersniten

Verse: 2129    mit werndem schaden, als ich ez las,
Verse: 2130    wan er leider arbeitsaelic was.

Verse: 2131    Nu sîn vierzehende jâr vür kam,
Verse: 2132    der marschalc in hin heim dô nam

Verse: 2133    und hiez in z' allen zîten
Verse: 2134    varn unde rîten,

Verse: 2135    erkunnen liute unde lant,
Verse: 2136    durch daz im rehte würde erkant,

Verse: 2137    wie des landes site waere.
Verse: 2138    diz tete der lobebaere

Verse: 2139    sô lobelîchen unde alsô,
Verse: 2140    daz in den zîten unde dô

Verse: 2141    in allem dem rîche
Verse: 2142    nie kint sô tugentlîche

Verse: 2143    gelebete alse Tristan.
Verse: 2144    al diu werlt diu truog in an

Verse: 2145    vriundes ouge und holden muot,
Verse: 2146    als man dem billîche tuot

Verse: 2147    des muot niwan ze tugende stât,
Verse: 2148    der alle untugende unmaere hât.





Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.