TITUS
Gottfried von Strassburg, Tristan
Part No. 4
Previous part

Chapter: 4 
4: Die Entführung


Verse: 2149    In den zîten unde dô
Verse: 2150    kam ez von âventiure alsô,

Verse: 2151    daz von Norwaege über sê
Verse: 2152    ein koufschif unde dekeinez mê

Verse: 2153    in daz lant ze Parmenîe kam
Verse: 2154    und sîn gelende dâ genam

Verse: 2155    und ûz gestiez ze Canoêl
Verse: 2156    vür daz selbe castêl,

Verse: 2157    dâ der marschalc ze staete
Verse: 2158    sîn wesen ûfe haete

Verse: 2159    und sîn junchêrre Tristan.
Verse: 2160    nu daz die vremeden koufman

Verse: 2161    ir market haeten ûz geleit,
Verse: 2162    vil schiere wart ze hove geseit,

Verse: 2163    waz dâ koufrâtes waere.
Verse: 2164    hier under kâmen maere

Verse: 2165    Tristande z' unheile:
Verse: 2166    dâ waeren valken veile

Verse: 2167    und ander schoene vederspil.
Verse: 2168    und wart des maeres alsô vil,

Verse: 2169    biz zwei des marschalkes kint
Verse: 2170    ( wan kint der dinge vlîzec sint)

Verse: 2171    under in zwein wurden in ein,
Verse: 2172    daz sî Tristanden zuo z' in zwein,

Verse: 2173    ir wânbruoder, nâmen
Verse: 2174    und an ir vater kâmen

Verse: 2175    und bâten den bihanden,
Verse: 2176    daz er in durch Tristanden

Verse: 2177    der valken koufen hieze.
Verse: 2178    der edele Rûal lieze

Verse: 2179    und haete ez nôte verlân,
Verse: 2180    ez enmüese allez vür sich gân,

Verse: 2181    des sîn vriunt Tristan baete,
Verse: 2182    wan er in werder haete

Verse: 2183    und bôt ez baz im einem
Verse: 2184    dan aller der dekeinem

Verse: 2185    von lande oder von gesinde.
Verse: 2186    sîner eigenen kinde

Verse: 2187    was er sô vlîzec niht sô sîn.
Verse: 2188    dar an tete er der werlde schîn,

Verse: 2189    wie vollekomener triuwe er pflac,
Verse: 2190    waz tugende und êren an im lac.

Verse: 2191    Er stuont ûf unde nam zehant
Verse: 2192    sînen sun Tristanden an die hant

Verse: 2193    nâch vil vaterlîchem site.
Verse: 2194    sîn ander süne giengen mite

Verse: 2195    und dar zuo hovegesindes vil,
Verse: 2196    die sô durch ernest sô durch spil

Verse: 2197    in volgeten unz an den kiel.
Verse: 2198    und swaz ieman dâ geviel,

Verse: 2199    dâ in sîn wille zuo getruoc,
Verse: 2200    des vant er umbe kouf genuoc.

Verse: 2201    kleinoede, sîden, edele wât:
Verse: 2202    des was dâ rât über rât.

Verse: 2203    ouch was dâ schoene vederspil,
Verse: 2204    valken pilgerîne vil,

Verse: 2205    smirlîne und sperwaere,
Verse: 2206    habeche mûzaere

Verse: 2207    und ouch in rôten vederen:
Verse: 2208    von disen ietwederen

Verse: 2209    vant man vollen market dâ.
Verse: 2210    Tristande hiez man koufen sâ

Verse: 2211    valken unde smirlîn.
Verse: 2212    die sîne bruoder solten sîn,

Verse: 2213    den wart ouch dâ gekouft durch in.
Verse: 2214    man gewan in allen drin,

Verse: 2215    swes iegelîcher gerte.
Verse: 2216    Nu man sî dô gewerte

Verse: 2217    alles, des sî wolten,
Verse: 2218    und dannen kêren solten,

Verse: 2219    von âventiure ez dô geschach,
Verse: 2220    daz Tristan in dem schiffe ersach

Verse: 2221    ein schâchzabel hangen,
Verse: 2222    an brete und an den spangen

Verse: 2223    vil schône und wol gezieret,
Verse: 2224    ze wunsche gefeitieret.

Verse: 2225    dâ bî hienc ein gesteine
Verse: 2226    von edelem helfenbeine

Verse: 2227    ergraben wol meisterlîche.
Verse: 2228    Tristan der tugende rîche

Verse: 2229    der sach ez vlîzeclîchen an.
Verse: 2230    'ei' sprach er 'edelen koufman,

Verse: 2231    sô helfe iu got! und kunnet ir
Verse: 2232    schâchzabelspil? daz saget mir!'

Verse: 2233    und sprach daz in ir zungen.
Verse: 2234    nu sâhen sî den jungen

Verse: 2235    aber noch vlîzeclîcher an,
Verse: 2236    dô er ir sprâche reden began,

Verse: 2237    die lützel ieman kunde dâ.
Verse: 2238    sus begunden s' an dem jungen sâ

Verse: 2239    merken elliu sîniu dinc.
Verse: 2240    nun gedûhte sî nie jungelinc

Verse: 2241    sô saeleclîche sîn getân
Verse: 2242    noch alsô schoene site hân.

Verse: 2243    'jâ' sprach ir einer 'vriunt, ir ist
Verse: 2244    under uns genuoc, die disen list

Verse: 2245    wol kunnen; wellet ir 'z besehen,
Verse: 2246    sô mag ez harte wol geschehen.

Verse: 2247    wol her, sô wil ich iuch bestân!'
Verse: 2248    Tristan der sprach: 'diz sî getân!'

Verse: 2249    suz sâzen sî zwêne über daz spil.
Verse: 2250    der marschalc sprach: 'Tristan, ich wil

Verse: 2251    wider ûf ze herbergen gân.
Verse: 2252    wiltû, du maht wol hie bestân.

Verse: 2253    mîn ander süne die gên mit mir.
Verse: 2254    sô sî dîn meister hie bî dir,

Verse: 2255    der neme dîn war und hüete dîn.'
Verse: 2256    sus gie der marschalc wider în

Verse: 2257    und sîn liut al gemeine
Verse: 2258    niwan Tristan al eine

Verse: 2259    und sîn meister, der sîn pflac,
Verse: 2260    von dem ich iu wol sagen mac

Verse: 2261    vür wâr, als uns diz maere seit,
Verse: 2262    daz knappe nie von höfscheit

Verse: 2263    und von edeles herzen art
Verse: 2264    baz noch schôner geedelt wart;

Verse: 2265    und was der Curvenal genant.
Verse: 2266    er haete manege tugende erkant,

Verse: 2267    als er dem wol ze lêre zam,
Verse: 2268    der ouch von sîner lêre nam

Verse: 2269    vil manegiu tugentlîchiu dinc.
Verse: 2270    Der tugende rîche jungelinc,

Verse: 2271    der wol gezogene Tristan
Verse: 2272    saz unde spilte vür sich an

Verse: 2273    sô schône und sô höfschlîche,
Verse: 2274    daz in gemeinlîche

Verse: 2275    die vremeden aber an sâhen
Verse: 2276    und in ir herzen jâhen,

Verse: 2277    sine gesaehen nie dekeine jugent
Verse: 2278    gezieret mit sô maneger tugent.

Verse: 2279    swaz vuoge er aber an der stete
Verse: 2280    mit gebaerden oder mit spil getete,

Verse: 2281    daz was in dâ wider alse ein wint:
Verse: 2282    si nam des wunder, daz ein kint

Verse: 2283    sô manege sprâche kunde;
Verse: 2284    die vluzzen ime ze munde,

Verse: 2285    daz sî 'z ê nie vernâmen,
Verse: 2286    an swelhe stat sî ie kâmen.

Verse: 2287    der höfsche hovebaere
Verse: 2288    lie sîniu hovemaere

Verse: 2289    und vremediu zabelwortelîn
Verse: 2290    under wîlen vliegen în.

Verse: 2291    diu sprach er wol und kunde ir vil,
Verse: 2292    dâ mite sô zierte er in sîn spil.

Verse: 2293    ouch sang er wol ze prîse
Verse: 2294    schanzûne und spaehe wîse,

Verse: 2295    refloit und stampenîe.
Verse: 2296    alsolher cûrtôsîe

Verse: 2297    treip er vil und sô vil an,
Verse: 2298    biz aber die werbenden man

Verse: 2299    ze râte wurden under in:
Verse: 2300    kunden s' in iemer bringen hin

Verse: 2301    mit keiner slahte sinnen,
Verse: 2302    sî möhten sîn gewinnen

Verse: 2303    grôzen vrumen und êre.
Verse: 2304    und biten ouch dô nimêre:

Verse: 2305    sî gebuten ir ruoderaeren,
Verse: 2306    daz sî bereite waeren,

Verse: 2307    und zugen sî selbe ir anker în,
Verse: 2308    als ez der rede niht solte sîn.

Verse: 2309    si stiezen an und vuoren dan:
Verse: 2310    sô lîse, daz es Tristan

Verse: 2311    noch Curvenal nie wart gewar,
Verse: 2312    biz sî si haeten von dem var

Verse: 2313    wol eine grôze mîle brâht.
Verse: 2314    wan jene die wâren verdâht

Verse: 2315    an ir spil sô sêre,
Verse: 2316    daz sî dô nihtes mêre

Verse: 2317    niwan ir spîles gedâhten.
Verse: 2318    nu sî 'z dô vollebrâhten,

Verse: 2319    sô daz Tristan daz spil gewan,
Verse: 2320    und er sich umbe sehen began,

Verse: 2321    dô sach er wol, wie 'z was gevarn.
Verse: 2322    nune gesâhet ir nie muoterbarn

Verse: 2323    sô rehte leidegen als in.
Verse: 2324    ûf sprang er und stuont under in.

Verse: 2325    'ach' sprach er 'edelen koufman,
Verse: 2326    durch got waz gât ir mit mir an?

Verse: 2327    saget, wâ welt ir mich hin?'
Verse: 2328    'seht, vriunt' sprach einer under in

Verse: 2329    'diz enmac nu nieman bewarn,
Verse: 2330    ir enmüezet hinnen mit uns varn.

Verse: 2331    gehabet iuch et wol und sît vrô!'
Verse: 2332    Tristan der arme der huop dô

Verse: 2333    sô jaemerlîchez clagen an,
Verse: 2334    daz Curvenal sîn vriunt began

Verse: 2335    mit ime von herzen weinen
Verse: 2336    und solhe clage erscheinen,

Verse: 2337    daz al daz kielgesinde
Verse: 2338    von ime und von dem kinde

Verse: 2339    unmuotic wart und sêre unvrô.
Verse: 2340    Curvenâlen satzten sî dô

Verse: 2341    in ein vil cleine schiffelîn
Verse: 2342    und leiten zuo z' ime dar în

Verse: 2343    ein ruoder unde ein cleine brôt
Verse: 2344    zer verte und zer hungers nôt

Verse: 2345    und sprâchen, daz er kêrte,
Verse: 2346    swar in sîn muot gelêrte.

Verse: 2347    Tristan der müese hin mit in.
Verse: 2348    mit der rede vuoren si hin

Verse: 2349    und liezen in dâ swebenden,
Verse: 2350    in manegen sorgen lebenden.

Verse: 2351    Curvenal swebete ûf dem sê.
Verse: 2352    in manegen wîs sô was im wê:

Verse: 2353    wê umbe daz michel ungemach,
Verse: 2354    daz er an Tristande sach;

Verse: 2355    wê umbe sîn selbes nôt,
Verse: 2356    durch daz er vorhte den tôt,

Verse: 2357    wan er niht varn kunde
Verse: 2358    noch es nie dâ vor begunde.

Verse: 2359    und clagende sprach er wider sich:
Verse: 2360    'got hêrre, wie gewirbe ich?

Verse: 2361    ine wart alsus besorget nie.
Verse: 2362    nu bin ich âne liute hie

Verse: 2363    und enkan ouch selbe niht gevarn.
Verse: 2364    got hêrre, dû solt mich bewarn

Verse: 2365    und mîn geverte hinnen sîn!
Verse: 2366    ich wil ûf die genâde dîn,

Verse: 2367    des ich nie began, beginnen.
Verse: 2368    wis mîn geleite hinnen!'

Verse: 2369    hie mite greif er sîn ruoder an.
Verse: 2370    in gotes namen vuor er dan

Verse: 2371    und kam in kurzer stunde,
Verse: 2372    als es im got gegunde,

Verse: 2373    wider heim und seite maere,
Verse: 2374    wie ez gevaren waere.

Verse: 2375    Der marschalc und sîn saelic wîp
Verse: 2376    diu beidiu leiten an ir lîp

Verse: 2377    sô jaemerlîche clagenôt,
Verse: 2378    und waere er vor ir ougen tôt,

Verse: 2379    daz in diu selbe swaere
Verse: 2380    niht nâher gangen waere.

Verse: 2381    sus giengen sî dô beide
Verse: 2382    in ir gemeinem leide

Verse: 2383    und al ir ingesinde
Verse: 2384    nâch ir verlornem kinde

Verse: 2385    weinen ûf des meres stat.
Verse: 2386    manec zunge dâ mit triuwen bat,

Verse: 2387    daz got sîn helfe waere.
Verse: 2388    dâ wart manic clagemaere.

Verse: 2389    ir clage was sus, ir clage was sô.
Verse: 2390    und alse ez an den abent dô

Verse: 2391    und an ein scheiden muose gân,
Verse: 2392    ir clage, diu ê was undertân,

Verse: 2393    diu wart dô gar einbaere.
Verse: 2394    si triben dô niwan ein maere,

Verse: 2395    si riefen hie, si riefen dort
Verse: 2396    niht anders wan daz eine wort:

Verse: 2397    'bêâs Tristant, cûrtois Tristant,
Verse: 2398    tun cors, ta vie a dê commant!

Verse: 2399    dîn schoener lîp, dîn süeze leben
Verse: 2400    daz sî hiute gote ergeben!'

Verse: 2401    In disen dingen vuorten in
Verse: 2402    die Norwaegen allez hin

Verse: 2403    und haeten ez alsô bedâht,
Verse: 2404    si haeten an im vollebrâht

Verse: 2405    ir willen allen unde ir ger.
Verse: 2406    dô widerschuof ez allez der,

Verse: 2407    der elliu dinc beslihtet,
Verse: 2408    beslihtende berihtet,

Verse: 2409    dem winde, mer und elliu craft
Verse: 2410    bibenende sint dienesthaft.

Verse: 2411    als der wolte unde der gebot,
Verse: 2412    dô huop sich ein sô michel nôt

Verse: 2413    von sturmwetere ûf dem sê,
Verse: 2414    daz s' alle samet in selben mê

Verse: 2415    enmohten niht ze staten gestân,
Verse: 2416    wan daz s' et ir schif liezen gân,

Verse: 2417    dar ez die wilden winde triben,
Verse: 2418    und si selbe âne trôst beliben

Verse: 2419    umbe ir lîp und umbe ir leben.
Verse: 2420    si haeten sich mitalle ergeben

Verse: 2421    an die vil armen stiure,
Verse: 2422    diu dâ heizet âventiure.

Verse: 2423    si liezen ez an die geschiht,
Verse: 2424    weder si genaesen oder niht.

Verse: 2425    wan ir dinges was nimê,
Verse: 2426    wan daz si mit dem wilden sê

Verse: 2427    ûf als in den himel stigen
Verse: 2428    und iesâ wider nider sigen

Verse: 2429    als in daz abgründe.
Verse: 2430    si triben die tobenden ünde

Verse: 2431    wîlent ûf und wîlent nider,
Verse: 2432    iezuo dar und iesâ wider.

Verse: 2433    ir aller keiner kunde
Verse: 2434    noch enmohte keine stunde

Verse: 2435    ûf sînen vüezen gestân.
Verse: 2436    alsus sô was ir leben getân

Verse: 2437    wol ahte tage und ahte naht.
Verse: 2438    hie von sô haeten s' alle ir maht

Verse: 2439    vil nâch verlorn unde ir sin.
Verse: 2440    Nu sprach ir einer under in:

Verse: 2441    'ir hêrren alle, sammir got,
Verse: 2442    mich dunket, diz sî gotes gebot

Verse: 2443    umbe unser angestlîchez leben.
Verse: 2444    daz wir sô kûme lebende sweben

Verse: 2445    in disen tobenden ünden,
Verse: 2446    deist niuwan von den sünden

Verse: 2447    und von den untriuwen komen,
Verse: 2448    daz wir Tristanden hân genomen

Verse: 2449    sînen vriunden rouplîche.'
Verse: 2450    'jâ' sprâchen s' al gelîche

Verse: 2451    'sich, dû hâst wâr, im ist alsô.'
Verse: 2452    hie mite berieten sî sich dô:

Verse: 2453    möhten sî stille vinden
Verse: 2454    an wazzer unde an winden,

Verse: 2455    daz sî ze stade gestiezen,
Verse: 2456    daz sî 'n vil gerne liezen

Verse: 2457    vrîliche, swar er wolte, gân.
Verse: 2458    und iesâ dô diz was getân,

Verse: 2459    daz diz ir aller wille wart,
Verse: 2460    dô wart ir kumberlîchiu vart

Verse: 2461    gesenftet an der stunde.
Verse: 2462    wint unde wac begunde

Verse: 2463    sich sâ zerloesen und zerlân,
Verse: 2464    daz mer begunde nider gân,

Verse: 2465    diu sunne schînen liehte als ê.
Verse: 2466    hie mite enbiten s' ouch dô nimê,

Verse: 2467    wan der wint haete sî geslagen
Verse: 2468    innerthalp den ahte tagen

Verse: 2469    in daz lant ze Curnewâle
Verse: 2470    und wâren zuo dem mâle

Verse: 2471    bî dem stade sô nâhen,
Verse: 2472    daz sî 'n bereite sâhen,

Verse: 2473    und stiezen ûz ze lande aldâ.
Verse: 2474    Tristanden nâmen si sâ

Verse: 2475    und satzten den ûz an daz lant
Verse: 2476    und gâben ime brôt an die hant

Verse: 2477    und anderre ir spîse ein teil.
Verse: 2478    'vriunt' sprâchen sî 'got gebe dir heil

Verse: 2479    und müeze dînes lîbes pflegen!'
Verse: 2480    hie mite sô buten s' im alle ir segen

Verse: 2481    und kêrten iesâ wider dan.
Verse: 2482    Nu wie gewarp dô Tristan?

Verse: 2483    Tristan der ellende? jâ,
Verse: 2484    dâ saz er unde weinde aldâ;

Verse: 2485    wan kint kunnen anders niht
Verse: 2486    niwan weinen, alse in iht geschiht.

Verse: 2487    der trôstlôse ellende
Verse: 2488    der vielt ûf sîne hende

Verse: 2489    ze gote vil inneclîche:
Verse: 2490    'ei' sprach er 'got der rîche,

Verse: 2491    sô rîche dû genâden bist,
Verse: 2492    sô vil güete als an dir ist,

Verse: 2493    vil süezer got, sô bite ich dich,
Verse: 2494    daz dû genâde wider mich

Verse: 2495    und dîne güete noch begâst,
Verse: 2496    sît daz du des verhenget hâst,

Verse: 2497    daz ich alsus vervüeret bin.
Verse: 2498    und wîse mich doch noch dâ hin,

Verse: 2499    dâ ich bî liuten müge gesîn!
Verse: 2500    nu warte ich allenthalben mîn

Verse: 2501    und sihe niht lebendes umbe mich.
Verse: 2502    dise grôze wilde die vürht ich.

Verse: 2503    swar ich mîn ougen wende,
Verse: 2504    da ist mir der werlde ein ende.

Verse: 2505    swâ ich mich hin gekêre,
Verse: 2506    dane sihe ich ie nimêre

Verse: 2507    niwan ein toup gevilde
Verse: 2508    und wüeste unde wilde,

Verse: 2509    wilde velse und wilden sê.
Verse: 2510    disiu vorhte tuot mir wê.

Verse: 2511    über daz allez sô vürhte ich,
Verse: 2512    wolve unde tier diu vrezzen mich,

Verse: 2513    swelhen enden ich gekêre.
Verse: 2514    ouch sîget der tac sêre

Verse: 2515    gegen der abentzîte.
Verse: 2516    swaz ich nu mê gebîte,

Verse: 2517    daz ich von hinnen niht engân,
Verse: 2518    daz ist vil übele getân.

Verse: 2519    ich enîle hinnen balde,
Verse: 2520    ich benahte in disem walde

Verse: 2521    und enwirt mîn danne niemer rât.
Verse: 2522    nu sihe ich, daz hie bî mir stât

Verse: 2523    hôher velse und berge vil.
Verse: 2524    ich waene, ich ûf ir einen wil

Verse: 2525    climmen, ob ich iemer mac,
Verse: 2526    und sehen, die wîle ich hân den tac,

Verse: 2527    ob keiner slahte bû hie sî
Verse: 2528    eintweder verre oder nâhen bî,

Verse: 2529    dâ ich liute vinde,
Verse: 2530    ze den ich mich gesinde,

Verse: 2531    mit den ich aber vürbaz genese,
Verse: 2532    in swelher wîse ez danne wese.'

Verse: 2533    Sus stuont er ûf und kêrte dan.
Verse: 2534    roc unde mantel haete er an

Verse: 2535    von einem pfelle, der was rîch
Verse: 2536    und an gewürhte wunderlîch.

Verse: 2537    er was von Sarrazînen
Verse: 2538    mit cleinen bortelînen

Verse: 2539    in vremedeclîchem prîse
Verse: 2540    nâch heidenischer wîse

Verse: 2541    wol underworht und underbriten
Verse: 2542    und was der alsô wol gesniten

Verse: 2543    nâch sînem schoenem lîbe,
Verse: 2544    daz von manne noch von wîbe

Verse: 2545    enwurden edeler cleider nie
Verse: 2546    baz gesniten danne die.

Verse: 2547    dar zuo seit uns daz maere,
Verse: 2548    der selbe pfelle er waere

Verse: 2549    ingrüener danne ein meiesch gras,
Verse: 2550    und dâ mit er gevüllet was,

Verse: 2551    daz was sô rehte wîz hermîn,
Verse: 2552    daz ez niht wîzer kunde sîn.

Verse: 2553    hie mite bereitet er sich dô
Verse: 2554    weinende unde sêre unvrô

Verse: 2555    ûf sîne kumberlîche vart,
Verse: 2556    dô ime diu vart unwendic wart.

Verse: 2557    under sînen gürtel zôher
Verse: 2558    sînen roc ein lützel hôher.

Verse: 2559    den mantel wand er in ein
Verse: 2560    und leite in ûf sîn ahselbein

Verse: 2561    und streich ûf gein der wilde
Verse: 2562    durch walt und durch gevilde.

Verse: 2563    ern haete weder wec noch pfat,
Verse: 2564    wan alse er selbe getrat.

Verse: 2565    mit sînen vüezen wegeter,
Verse: 2566    mit sînen handen stegeter.

Verse: 2567    er reit sîn arme und sîniu bein.
Verse: 2568    über stoc und über stein

Verse: 2569    wider berc er allez clam,
Verse: 2570    unz er ûf eine hoehe kam.

Verse: 2571    dâ vand er von geschihte
Verse: 2572    einen waltstîc âne slihte

Verse: 2573    mit grase verwahsen unde smal.
Verse: 2574    den kêrte er anderhalp ze tal:

Verse: 2575    er trüege in eine rihte hin.
Verse: 2576    in kurzer wîle brâhte er in

Verse: 2577    ûf eine schoene strâze,
Verse: 2578    diu was ze guoter mâze

Verse: 2579    breit unde geriten hin unde her.
Verse: 2580    An dem selben wege saz er

Verse: 2581    durch ruowe weinende nider.
Verse: 2582    nu truog in ie sîn herze wider

Verse: 2583    zen vriunden und zem lande,
Verse: 2584    dâ er die liute erkande.

Verse: 2585    diz truog in grôzen jâmer an.
Verse: 2586    vil jaemerlîche er aber began

Verse: 2587    ze gote clagen sîn ungemach;
Verse: 2588    ze himel er inneclîche sach:

Verse: 2589    'got' sprach er 'hêrre guoter,
Verse: 2590    mîn vater und mîn muoter

Verse: 2591    wie hânt si mich alsus verlorn!
Verse: 2592    owê wie wol haete ich verborn

Verse: 2593    mîn veigez schâchzabelspil,
Verse: 2594    daz ich iemer hazzen wil!

Verse: 2595    sperwaere, valken, smirlîn
Verse: 2596    die lâze got unsaelic sîn!

Verse: 2597    die hânt mich mînem vater benomen,
Verse: 2598    von der schulden bin ich komen

Verse: 2599    von vriunden und von kunden.
Verse: 2600    und alle, die mir gunden

Verse: 2601    gelückes unde guotes,
Verse: 2602    die sint nu swaeres muotes

Verse: 2603    und sêre trûric umbe mich.
Verse: 2604    â süeziu muoter, wie du dich

Verse: 2605    mit clage nu quelest, daz weiz ich wol.
Verse: 2606    vater, dîn herze ist leides vol.

Verse: 2607    ich weiz wol, ir sît beide
Verse: 2608    sêre überladen mit leide.

Verse: 2609    und ouwê hêrre, wiste ich doch,
Verse: 2610    daz ir daz wistet, daz ich noch

Verse: 2611    mit wol gesundem lîbe lebe,
Verse: 2612    daz waere ein michel gotes gebe

Verse: 2613    iu beiden unde dâ nâch mir.
Verse: 2614    wan zwâre ich weiz vil wol, daz ir

Verse: 2615    kûme oder niemer werdet vrô,
Verse: 2616    ezn gevüege danne got alsô,

Verse: 2617    daz ir bevindet, daz ich lebe.
Verse: 2618    aller sorgaere râtgebe,

Verse: 2619    got hêrre, nû gevüege daz!'
Verse: 2620    Under diu dô er sô saz

Verse: 2621    clagende, als ich gesaget hân,
Verse: 2622    dô gesach er zuo von verren gân

Verse: 2623    zwêne alte wallaere.
Verse: 2624    die wâren gote gebaere,

Verse: 2625    getaget unde gejâret.
Verse: 2626    gebartet unde gehâret,

Verse: 2627    alsô diu wâren gotes kint
Verse: 2628    und wallaere dicke sint.

Verse: 2629    die selben wallenden man
Verse: 2630    die truogen unde haeten an

Verse: 2631    lînkappen unde solhe wât,
Verse: 2632    diu wallaeren rehte stât,

Verse: 2633    und ûzen an ir waete
Verse: 2634    mermuschelen genaete

Verse: 2635    und vremeder zeichen genuoc.
Verse: 2636    ir ietwederer der truoc

Verse: 2637    einen wallestap an sîner hant.
Verse: 2638    ir hüete unde ir beingewant

Verse: 2639    daz stuont wol nâch ir rehte.
Verse: 2640    die selben gotes knehte

Verse: 2641    die truogen an ir schenkelen
Verse: 2642    lînhosen, die ob ir enkelen

Verse: 2643    wol einer hende erwunden,
Verse: 2644    nâhe an ir bein gebunden.

Verse: 2645    vüeze und enkele wâren blôz
Verse: 2646    vür den trit und vür den stôz.

Verse: 2647    ouch truogen s' über ir ruckebein,
Verse: 2648    dar an ir riuwic leben schein,

Verse: 2649    geistlîche stênde palmen.
Verse: 2650    ir gebet unde ir salmen

Verse: 2651    und swaz si guotes kunden,
Verse: 2652    daz lâsen s' an den stunden.

Verse: 2653    Tristan dâ mite und er s' ersach,
Verse: 2654    vorhtlîche er wider sich selben sprach:

Verse: 2655    'genaedeclîcher trehtîn,
Verse: 2656    welch rât gewirdet aber nu mîn?

Verse: 2657    jene zwêne man, die dort her gânt,
Verse: 2658    ist daz sî mich ersehen hânt,

Verse: 2659    die mugen mich aber wol vâhen.'
Verse: 2660    Nu s' ime begunden nâhen

Verse: 2661    und er ir dinc erkande
Verse: 2662    an staben und an gewande,

Verse: 2663    zehant erkande er wol ir leben
Verse: 2664    und begunde im selben herze geben.

Verse: 2665    sîn gemüete wart ein lützel vrô.
Verse: 2666    ûz vollem herzen sprach er dô:

Verse: 2667    'lop dich, hêrre trehtîn!
Verse: 2668    diz mugen wol guote liute sîn;

Verse: 2669    ine darf kein angest von in haben.'
Verse: 2670    vil schiere wart, daz sî den knaben

Verse: 2671    vor in sitzen sâhen.
Verse: 2672    nu s' ime begunden nâhen,

Verse: 2673    höfschlîche er ûf gein in spranc,
Verse: 2674    sîne schoene hende er vür sich twanc.

Verse: 2675    nu begunden in die zwêne man
Verse: 2676    vil vlîzeclîche sehen an

Verse: 2677    und nâmen sîner zühte war.
Verse: 2678    guotlîche giengen si dar

Verse: 2679    und gruozten in vil suoze
Verse: 2680    mit disem süezen gruoze:

Verse: 2681    'dêu sal, bêâs amîs!
Verse: 2682    vil lieber vriunt, swer sô du sîs,

Verse: 2683    got müeze dich gehalten.'
Verse: 2684    Tristan geneic den alten:

Verse: 2685    'ei' sprach er 'dê benîe
Verse: 2686    si sainte companîe!

Verse: 2687    sus heilege geselleschaft
Verse: 2688    die gesegene got mit sîner craft!'

Verse: 2689    Aber sprâchen ime die zwêne zuo:
Verse: 2690    'vil liebez kint, wannen bist duo

Verse: 2691    oder wer hât dich dâ her brâht?'
Verse: 2692    Tristan der was vil wol bedâht

Verse: 2693    und sinnesam von sînen tagen,
Verse: 2694    er begunde in vremediu maere sagen:

Verse: 2695    'saelegen hêrren' sprach er z' in
Verse: 2696    'von disem lande ich bürtic bin

Verse: 2697    und solte rîten hiute,
Verse: 2698    ich und ander liute,

Verse: 2699    jagen ûf disem walde alhie.
Verse: 2700    do entreit ich, ine weiz selbe wie,

Verse: 2701    den jegeren unde den hunden.
Verse: 2702    die die waltstîge kunden,

Verse: 2703    die gevuoren alle baz dan ich.
Verse: 2704    wan âne stîc verreit ich mich,

Verse: 2705    unz daz ich gar verirret wart.
Verse: 2706    sus traf ich eine veige vart,

Verse: 2707    diu truoc mich unz ûf einen graben,
Verse: 2708    dane kunde ich mîn pfert nie gehaben,

Verse: 2709    ezn wolte allez nider vür sich.
Verse: 2710    ze jungest gelac pfert und ich

Verse: 2711    beidiu z' einem hûfen nider.
Verse: 2712    done kunde ich nie sô schiere wider

Verse: 2713    ze mînem stegereife komen,
Verse: 2714    ezn haete mir den zügel genomen

Verse: 2715    und lief allez den walt în.
Verse: 2716    sus kam ich an diz pfedelîn,

Verse: 2717    daz hât mich unz her getragen.
Verse: 2718    nu enkan ich nieman gesagen,

Verse: 2719    wâ ich bin oder war ich sol.
Verse: 2720    nu guoten liute, tuot sô wol

Verse: 2721    und saget mir, wâ welt ir hin?'
Verse: 2722    'vriunt' sprâchen sî dô wider in

Verse: 2723    'geruochet unser trehtîn,
Verse: 2724    sô welle wir noch hînaht sîn

Verse: 2725    ze Tintajêle in der stat.'
Verse: 2726    Tristan guotlîche sî dô bat,

Verse: 2727    daz sî 'n mit in dar liezen gân.
Verse: 2728    'vil liebez kint, daz sî getân '

Verse: 2729    sprâchen die wallenden man
Verse: 2730    'wil dû dâ hin, sô kêre dan.'

Verse: 2731    Tristan der kêrte mit in hin.
Verse: 2732    hie mite sô huop sich under in

Verse: 2733    maneger slahte maere.
Verse: 2734    Tristan der hovebaere

Verse: 2735    der was mit rede alsô gewar,
Verse: 2736    si vrâgeten her oder dar,

Verse: 2737    daz er des alles antwurt bôt
Verse: 2738    niwan ze staten und ze nôt.

Verse: 2739    er haete sîne mâze
Verse: 2740    an rede und an gelâze

Verse: 2741    sô wol, daz es die wîsen,
Verse: 2742    die getageten und die grîsen

Verse: 2743    ze grôzen saelden jâhen
Verse: 2744    und aber ie baz besâhen

Verse: 2745    sîne gebaerde und sîne site
Verse: 2746    und sînen schoenen lîp dâ mite;

Verse: 2747    sîniu cleider, diu er an truoc,
Verse: 2748    diu gemarcten sî genuoc,

Verse: 2749    durch daz si wâren sêre rîch
Verse: 2750    und an gewürhte wunderlîch.

Verse: 2751    und sprâchen in ir muote:
Verse: 2752    'â hêrre got der guote,

Verse: 2753    wer oder wannen ist diz kint,
Verse: 2754    des site sô rehte schoene sint?'

Verse: 2755    sus giengen sî 'n betrahtende
Verse: 2756    und allez sîn dinc ahtende

Verse: 2757    ( diz was ir kurzewîle)
Verse: 2758    wol eine welsche mîle.




Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.