TITUS
Walther von der Vogelweide, Lieder
Part No. 3
Previous part

Song: 51 
Nement, frowe, disen cranz

(Cormeau 51)



Strophe: I 
Verse: 1    'Nement, frowe, disen cranz',
Verse: 2    alsô sprach ich zeiner wol getânen maget,
Verse: 3    'sô zieret ir den tanz
Verse: 4    mit den schœnen bluomen, als irs ûffe traget.
Verse: 5    Het ich vil edele gesteine,
Verse: 6    daz mües ûf iuwer houbet.
Verse: 7    sênt mîne triuwe, daz ich ez meine.

Strophe: II 
Verse: 1    [ ] Ir sît sô wol getân,
Verse: 2    daz ich iu mîn schappel gerne geben will,
Verse: 3    daz [ ] beste, daz ich hân.
Verse: 4    wîzer unde rôter bluomen weiz ich vil,
Verse: 5    Die stênt sô verre in jener heide.
Verse: 6    dâ si schône entspringent
Verse: 7    und die [ ] vogele singent,
Verse: 8    dâ suln wir si brechen beide.'

Strophe: III 
Verse: 1    Si nam, daz ich ir bôt,
Verse: 2    einem kinde vil gelîch, daz êre hât.
Verse: 3    ir wangen wurden rôt
Verse: 4    same diu rôse, dâ bî der liljen stât,
Verse: 5    Des erschamten sich ir liehten ougen.
Verse: 6    doch neic si mir vil schône.
Verse: 7    daz wart mir ze lône.
Verse: 8    wirt mirs iht mêre, daz trage ich tougen.

Strophe: IV 
Verse: 1    Mich dûhte, daz mir nie
Verse: 2    lieber wurde, danne mir ze muote was.
Verse: 3    die bluomen vielen ie
Verse: 4    von den boumen bî uns nider an daz gras.
Verse: 5    Seht, dô muoste ich von fröiden lachen,
Verse: 6    dô ich sô wunneclîche
Verse: 7    was in troume rîche,
Verse: 8    dô taget ez und muose ich wachen.

Strophe: V 
Verse: 1    Mir ist von ir geschehen,
Verse: 2    daz ich disen sumer allen meiden muoz
Verse: 3    vaste under diu ougen sehen.
Verse: 4    lîhte wirt mir eine, sô ist mir sorgen buoz.
Verse: 5    Waz obe si gêt an disem tanze?
Verse: 6    frowe, dur iuwer güete
Verse: 7    rucket ûf die hüete.
Verse: 8    owê, gesæhe ichs under cranze!


This text is part of the TITUS edition of Walther von der Vogelweide, Lieder.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.