TITUS
Wirnt von Grafenberg, Wigalois
Part No. 194
Previous part

Verse group: (194) 
Verse: 9308    Die vürsten und ir dienestman
Verse: 9309    die in wâren undertân

Verse: 9310    enpfiengen wol den werden degen,
Verse: 9311    der des landes solde pflegen,

Verse: 9312    und ir rehte vrouwen.
Verse: 9313    man mohte wunder schouwen

Verse: 9314    von der vreude die man dâ vant.
Verse: 9315    dâ was mit vreuden gar daz lant,

Verse: 9316    iegelîch volc nâch sînem sit.
Verse: 9317    dâ bliesen busûnære mit

Verse: 9318    in vier enden ûf der plân.
Verse: 9319    dâ wart diu rîterschaft getân

Verse: 9320    die man wol prisen mohte;
Verse: 9321    dehein zage niht entohte

Verse: 9322    under der tugenthaften schar,
Verse: 9323    wan dâ wârn die besten gar

Verse: 9324    von allem dem rîche.
Verse: 9325    die enpfiengen rîterlîche

Verse: 9326    den herren und die künigîn.
Verse: 9327    Sus brâhte man si ze Korntîn

Verse: 9328    mit rîterlîchem schalle.
Verse: 9329    des vreuten si sich alle

Verse: 9330    die zem lande hôrten;
Verse: 9331    mit vreuden si dô stôrten

Verse: 9332    ir vil jæmerlîche tage,
Verse: 9333    die si mit riuwiclîcher klage

Verse: 9334    hâten gehabt wol zehen jâr;
Verse: 9335    die verkrten sich nu gar

Verse: 9336    ze vreuden von ir zweier ê.
Verse: 9337    dône wart dâ niht gebiten mê,

Verse: 9338    diu vrouwe vuor an ir gemach.
Verse: 9339    her Gwîgâlois zen gesten sprach

Verse: 9340    sinen gruoz vil minniclîche
Verse: 9341    und bat si alle gelîche

Verse: 9342    im dâ willekornen sîn.
Verse: 9343    sus besaz dô Korntîn

Verse: 9344    her Gwîgâlois mit rîcheit.
Verse: 9345    dâ was solch wirtschaft bereit

Verse: 9346    die ich niht wol kan gesagen.
Verse: 9347    nach sînem willen zuo zwelf tagen

Verse: 9348    beliben die vürsten dâ.
Verse: 9349    zwei herhorn blies man sâ

Verse: 9350    vil krefticlîche vor dem tor.
Verse: 9351    alle die dâ wâren vor,

Verse: 9352    die kômen ûf den palas.
Verse: 9353    vrouwe Lârîe ouch komen was,

Verse: 9354    gekroenet als ein keiserîn.
Verse: 9355    ein ander kröne guldîn

Verse: 9356    truoc vor ir vrouwe Marine,
Verse: 9357    diu in rîters schîne

Verse: 9358    hât vil reinen magetuom,
Verse: 9359    wan daz diu vrouwe durch ir ruom

Verse: 9360    wolde versuochen rîters leben.
Verse: 9361    si kunde wol nâch êren geben

Verse: 9362    und mit zühten wesen vrô.
Verse: 9363    ir kiusche behielt si alsô

Verse: 9364    daz diu nie besprochen wart;
Verse: 9365    Sus was ir wîpheit bewart

Verse: 9366    âne valsch unz an die zît
Verse: 9367    daz si zer ê sich habte sît;
Verse: 9368    des was ir ganzez lop vil wît.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.