TITUS
Wirnt von Grafenberg, Wigalois
Part No. 197
Previous part

Verse group: (197) 
Verse: 9443    Dô disiu rede verendet was,
Verse: 9444    dô huop sich ûf dem palas

Verse: 9445    von vreuden harte grôzer schal.
Verse: 9446    die tische wâren über al

Verse: 9447    geriht nâch küniclîchem sit.
Verse: 9448    den truhsæzen giengen mit

Verse: 9449    busûner die in bliesen vor.
Verse: 9450    man warf die tambûr

Verse: 9451    enbor mit slegen daz der wîte sal
Verse: 9452    dem gedoene engegen hal.

Verse: 9453    man gap dâ grôze wirtschaft
Verse: 9454    und aller vreuden überkraft

Verse: 9455    sâhen si die wîle man az.
Verse: 9456    her Gwîgalois der künic vergaz

Verse: 9457    alles sînes leides hie.
Verse: 9458    dô er von dem tische gie,

Verse: 9459    die maget nam er bî der hant.
Verse: 9460    mit vreuden giengen si zehant

Verse: 9461    von den liuten an ir gemach.
Verse: 9462    ob ie rîter baz geschach von wîbe

Verse: 9463    dez liez er âne haz;
Verse: 9464    geschach ouch ie vrouwen baz

Verse: 9465    von manne, dez lie si âne nît;
Verse: 9466    daz erzeicten si einander sît

Verse: 9467    mit herzenlîcher minne,
Verse: 9468    wand ir zweier sinne

Verse: 9469    mit ganzen triuwen wurden enein
Verse: 9470    sô daz diu herze under in zwein

Verse: 9471    hêten beidiu einen muot;
Verse: 9472    swaz si wolde, daz dûhte in guot;

Verse: 9473    ouch was sîn wille der vrouwen jâ.
Verse: 9474    sus versigelt diu minne dâ

Verse: 9475    mit herzeliebe ir herze enein
Verse: 9476    sô daz diu liebe under in zwein

Verse: 9477    eines willen pflâgen.
Verse: 9478    niemen darf des vrâgen

Verse: 9479    ob si die naht iht wæren vrô.
Verse: 9480    jâ si, deiswâr, ir vreude was sô

Verse: 9481    daz ich der niht gelîchen mac.
Verse: 9482    mit herzeliebe unz an den tac

Verse: 9483    si sich underviengen.
Verse: 9484    dar nâch si beidiu giengen

Verse: 9485    wol nâch mittem morgen
Verse: 9486    mit vreuden âne sorgen

Verse: 9487    dâ man in eine messe sanc.
Verse: 9488    sich huop dâ harte grôz gedranc

Verse: 9489    dô si gekroenet giengen vür.
Verse: 9490    die kamerære bî der tür

Verse: 9491    wielken ez mit starken slegen,
Verse: 9492    nu hêt her Gwîgâlois der degen

Verse: 9493    ze Glois in die burc gesant
Verse: 9494    dâ man die juncvrouwen vant

Verse: 9495    und den getriuwen grâven Adân.
Verse: 9496    die vuorte man mit einander dan

Verse: 9497    bi der naht ze Korntîn;
Verse: 9498    si wolden ouch zer messe sîn

Verse: 9499    dâ der helt gekroenet gie.
Verse: 9500    ein bischof die bredige vie

Verse: 9501    mit sô süezen Worten an
Verse: 9502    daz der getriuwe grâve Adân

Verse: 9503    sine sünde begunde klagen.
Verse: 9504    er entslôz in die wîssagen

Verse: 9505    und die ewangêlisten
Verse: 9506    unz er mit gotes listen

Verse: 9507    und mit der rehten wârheit
Verse: 9508    ir gelouben überstreit

Verse: 9509    daz si der toufe wâren vrô.
Verse: 9510    nâch ir bet toufte man dô

Verse: 9511    vrouwen Marînen und grâven Adân,
Verse: 9512    dar nâch die magde wol getân

Verse: 9513    die vrouwe Marine brâhte dar.
Verse: 9514    dô Si getoufet waren gar

Verse: 9515    und kristen ê enpfiengen,
Verse: 9516    mit vreuden si dô giengen

Verse: 9517    vür den künic ûf den sal
Verse: 9518    dâ die vürsten über al

Verse: 9519    sâzen und die künegîn,
Verse: 9520    Rîâl der künic von Jeraphîn

Verse: 9521    sîn lant aldâ von im enpfie;
Verse: 9522    dar nâch vil manic vürste gie,

Verse: 9523    die sînes ortes wâren geil.
Verse: 9524    iedoch bleip im der bezzer teil:

Verse: 9525    dise vrouwen und diu lant
Verse: 9526    bejagt sin ellenthaftiu hant

Verse: 9527    und sînes herzet' manheit.
Verse: 9528    swer je sô grôze, nôt erleit

Verse: 9529    durch vrouwen, dem erteile ich daz
Verse: 9530    er si habe mit vlîze baz

Verse: 9531    dan einer der da heime lît
Verse: 9532    unz man im eine vrouwen gît

Verse: 9533    der eigen er wol möhte sin.
Verse: 9534    daz nim ich ûf die triuwe mîn

Verse: 9535    daz der sô wol niht wirt gepflegen
Verse: 9536    noch sô süeze bi erlegen

Verse: 9537    als der durch die man kumber hât
Verse: 9538    und diu ze hôhem gwinne stât;
Verse: 9539    ich wæn der minne nâhen gât.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.