TITUS
Wirnt von Grafenberg, Wigalois
Part No. 198
Previous part

Verse group: (198) 
Verse: 9540    Dar umb enweiz ich anders niht
Verse: 9541    wan als diu âventiure giht

Verse: 9542    diu mirz kunt hât getân:
Verse: 9543    diu sagt uns daz der werde man

Verse: 9544    vrouwen Lârîen pflæge alsô
Verse: 9545    daz si der pflege wære vrô.

Verse: 9546    er volzôch ir muote
Verse: 9547    mit lîbe und mit guote;

Verse: 9548    des was ir schoener lîp wol wert.
Verse: 9549    dô er die vürsten hêt gewert

Verse: 9550    ir lêhen als si an gezôch,
Verse: 9551    ir deheines muot dâ von envlôch

Verse: 9552    sine swüeren im alle hulde dâ.
Verse: 9553    dô gebôt er den vürsten sâ

Verse: 9554    daz si behielten Karles reht
Verse: 9555    und diu gerihte machten sleht

Verse: 9556    über allez sin rîche
Verse: 9557    daz wart dô stæticlîche

Verse: 9558    gevestent, als er in gebôt.
Verse: 9559    sus hêt daz lant sîne nôt

Verse: 9560    mit vreuden überwunden.
Verse: 9561    an den selben stunden

Verse: 9562    kom min her Gâwein geriten
Verse: 9563    vür die burc nâch sînen siten;

Verse: 9564    die wären harte rîterlîch
Verse: 9565    wand er was wert unde rîch

Verse: 9566    als ez an sînem geverte schein.
Verse: 9567    sus kom min her Gâwein

Verse: 9568    selbe vierde in daz lant:
Verse: 9569    die vuorten werlîche hant

Verse: 9570    êrec und mîn her Gawein,
Verse: 9571    Lanzelet und her îwein

Verse: 9572    ir geselleschaft und ir muot
Verse: 9573    was âne valsch mit triuwen guot.

Verse: 9574    si kâmen dar mit rîchheit
Verse: 9575    wol geriten und gekleit,

Verse: 9576    als ez ir Aren wol gezam;
Verse: 9577    ir severte daz was âne scham.

Verse: 9578    Ze si vuorten ingesindes vil.
Verse: 9579    busûnen unde seitspil

Verse: 9580    vor in ûf der strâze hal.
Verse: 9581    von vreuden was dâ grôzer schal

Verse: 9582    ûf dem hûse und dâ vor.
Verse: 9583    die riter giengen vür daz tor

Verse: 9584    und enpfiengen wol die geste.
Verse: 9585    dâne was dehein gebreste

Verse: 9586    des guotes noch der êren;
Verse: 9587    daz begunde man allez kêren

Verse: 9588    in ze liebe und ze guote
Verse: 9589    mit herzen und mit muote.

Verse: 9590    ir harnasch man vor in zôch.
Verse: 9591    aht ors starc und hôch

Verse: 9592    zôch man den soumen nâch,
Verse: 9593    diu man vil wol verdecket sach

Verse: 9594    mit samite der was rôt,
Verse: 9595    der ouch den schilten decke bôt

Verse: 9596    daz si dâ bî iht wærn bekant
Verse: 9597    swâ si riten durch diu lant.

Verse: 9598    Sus kâmen si ze Korntîn
Verse: 9599    der künic und diu künigîn

Verse: 9600    oo enpfiengen si mit triuwen wol,
Verse: 9601    als sun sînen vater sol.

Verse: 9602    her Gâwein in umbe vie;
Verse: 9603    vor vreuden er die zäher lie

Verse: 9604    ûf sîne wât vallen.
Verse: 9605    mit triuwen âne gallen

Verse: 9606    si sich underkusten;
Verse: 9607    des mohte si wol lusten:

Verse: 9608    si wârn ze sehen einander vrô.
Verse: 9609    vrouwe Lârîe kuste dô

Verse: 9610    die geste, als si der künic bat.
Verse: 9611    die vürsten giengen von ir stat

Verse: 9612    und enpfiengen si alle besunder.
Verse: 9613    daz was niht ein wunder

Verse: 9614    war umb si kômen in daz lant:
Verse: 9615    her Gwîgâlois der hât gesant

Verse: 9616    einen brief dem herren Gâwein,
Verse: 9617    daran ein ingesigel schein

Verse: 9618    daz er sîner muoter lie
Verse: 9619    dô er mit jâmer von ir gie

Verse: 9620    und si sît nimmer mê gesach;
Verse: 9621    dar an im doch ein leit geschach
Verse: 9622    daz sînes herzen vreude brach.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.