TITUS
Wirnt von Grafenberg, Wigalois
Part No. 199
Previous part

Verse group: (199) 
Verse: 9623    Der brief sagt im diu mære
Verse: 9624    wie er worden wære

Verse: 9625    künic über zwei lant
Verse: 9626    und wie sin ellenthaftiu hant

Verse: 9627    die âventiure hêt erstriten.
Verse: 9628    derselbe brief begunde in biten

Verse: 9629    und manen herzenlîche
Verse: 9630    daz er die väterlîche triuwe

Verse: 9631    an im behielte
Verse: 9632    und kæme dâ er wielte

Verse: 9633    zweir lande und ir krône;
Verse: 9634    die wæren im ze lône

Verse: 9635    gegeben umb sîn arbeit
Verse: 9636    und ein künigin gemeit

Verse: 9637    der schoene man niht gelîcht vant.
Verse: 9638    sus kam her Gâwein in daz lant

Verse: 9639    ze sînes sunes hôchvart,
Verse: 9640    dâ er vil wol enpfangen wart.

Verse: 9641    dar nâch er den wirt gevie
Verse: 9642    bî der hant unde gie

Verse: 9643    an eine heimlîche stat,
Verse: 9644    dâ er in mit jâmer bat

Verse: 9645    von sîner lieben muoter sagen.
Verse: 9646    dô huop sich êrste grôzez klagen

Verse: 9647    und herzenlîchiu swære
Verse: 9648    dô er diu gewissen mære

Verse: 9649    vernam von der muoter sîn
Verse: 9650    er sprach 'owê, künigîn,

Verse: 9651    daz ich dînwe minne enbern muoz
Verse: 9652    dîn handelunge unde dîn gruoz

Verse: 9653    was miner vreuden ôstertac,
Verse: 9654    swen ich an dînem arme lac

Verse: 9655    und dînen lîp umbe vie,
Verse: 9656    owê, sô was mir rehte wie

Verse: 9657    ich wær in dem pardîse!
Verse: 9658    dîner minne spîse

Verse: 9659    nam mir dicke mînen sin.
Verse: 9660    der jâmer gît mir ungewin.

Verse: 9661    wol der wünniclichen zît
Verse: 9662    der ich mit grôzem jâmer sît

Verse: 9663    vil herzenlîche hân gedâht,
Verse: 9664    sô diu winterlange naht

Verse: 9665    mîner swære was ze lanc
Verse: 9666    und mich diu grôze liebe twanc

Verse: 9667    diu nâhen in mînem herzen saz;
Verse: 9668    dâ von ich nimmer mê vergaz

Verse: 9669    dîner reinen güete
Verse: 9670    irn gedæhte mîn gemüete.

Verse: 9671    sus hân ich immer jâmers vil.
Verse: 9672    durch mîner vrouwen êre

Verse: 9673    ich wil allen wîben wesen holt
Verse: 9674    und si liutern als ein golt

Verse: 9675    mit worten swâ ich immer kan.
Verse: 9676    ich wil ir aller dienestman

Verse: 9677    und ir kempfe immer wesen,
Verse: 9678    wan niemen mac ân si genesen

Verse: 9679    der ir güete erkennen kan;
Verse: 9680    in solden wesen undertân

Verse: 9681    von rehte alle kröne,
Verse: 9682    wan sich ir süezem lône

Verse: 9683    nimmer niht gelîhen mac.
Verse: 9684    owê, gelebte ich noch den tac

Verse: 9685    daz ich mîn trût müese sehen,
Verse: 9686    sône möhte mir lieber niht geschehen!

Verse: 9687    daz wizze, lieber sun mîn,
Verse: 9688    nu solt ab dû mîn vreude sîn,

Verse: 9689    Sit dich mir got hât gegeben;
Verse: 9690    dîn werdicheit ist gar mîn leben.

Verse: 9691    des lobe ich unsern herren Krist
Verse: 9692    daz dir sô wol gelungen ist

Verse: 9693    und wil sîn immer wesen vrô.'
Verse: 9694    nâch der rede giengen si dô

Verse: 9695    wider zir geselleschaft.
Verse: 9696    dâ was von vreuden grôziu kraft

Verse: 9697    und minniclîcher vrouwen vil,
Verse: 9698    der schoene ist gar der vreuden zil

Verse: 9699    und werltlîchiu wünne.
Verse: 9700    der in niht guotes günne,

Verse: 9701    der müez von in gescheiden sîn.
Verse: 9702    si gebent vreude und hôhen pin,

Verse: 9703    dem herzen senlîche nôt.
Verse: 9704    wan ir gnâde, wir wæren tôt

Verse: 9705    an vreuden und an muote.
Verse: 9706    ze liebe und ze guote

Verse: 9707    geschuof si got der werlte gar.
Verse: 9708    ô wol der wünniclîchen schar

Verse: 9709    die got alsô gekroenet hât
Verse: 9710    daz gar der werlte vreude stât

Verse: 9711    an ir vil reinen güete!
Verse: 9712    si nidernt hôch gemüete

Verse: 9713    und hoehent dicke nidern muot.
Verse: 9714    wol im der nâch ir willen tuot!
Verse: 9715    ir trôst der ist nâch leide guot.


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.