TITUS
Novum Testamentum graece
Part No. 92
Previous part

Book: Act. 
ΠΡΑΞΕΙΣ ΑΠΟΣΤΟΛΩΝ

Actus_Apostolorum




Chapter: 1 
Verse: 1    Τὸν μὲν πρῶτον λόγον ἐποιησάμην περὶ πάντων, ὦ Θεόϕιλε, ὧν ἤρξατο ὁ ᾽Ιησοῦς ποιεῖν τε καὶ διδάσκειν
Verse: 2    ἄχρι ἧς ἡμέρας ἐντειλάμενος τοῖς ἀποστόλοις διὰ πνεύματος ἁγίου οὓς ἐξελέξατο ἀνελήμϕθη·
Verse: 3    οἷς καὶ παρέστησεν ἑαυτὸν ζῶντα μετὰ τὸ παθεῖν αὐτὸν ἐν πολλοῖς τεκμηρίοις, δι' ἡμερῶν τεσσαράκοντα ὀπτανόμενος αὐτοῖς καὶ λέγων τὰ περὶ τῆς βασιλείας τοῦ θεοῦ.
Verse: 4    καὶ συναλιζόμενος παρήγγειλεν αὐτοῖς ἀπὸ ῾Ιεροσολύμων μὴ χωρίζεσθαι, ἀλλὰ περιμένειν τὴν ἐπαγγελίαν τοῦ πατρὸς ἣν ἠκούσατέ μου·
Verse: 5    ὅτι ᾽Ιωάννης μὲν ἐβάπτισεν ὕδατι, ὑμεῖς δὲ ἐν πνεύματι βαπτισθήσεσθε ἁγίῳ οὐ μετὰ πολλὰς ταύτας ἡμέρας.
Verse: 6    Οἱ μὲν οὖν συνελθόντες ἠρώτων αὐτὸν λέγοντες, Κύριε, εἰ ἐν τῷ χρόνῳ τούτῳ ἀποκαθιστάνεις τὴν βασιλείαν τῷ ᾽Ισραήλ;
Verse: 7    εἶπεν δὲ πρὸς αὐτούς, Οὐχ ὑμῶν ἐστιν γνῶναι χρόνους ἢ καιροὺς οὓς ὁ πατὴρ ἔθετο ἐν τῇ ἰδίᾳ ἐξουσίᾳ·
Verse: 8    ἀλλὰ λήμψεσθε δύναμιν ἐπελθόντος τοῦ ἁγίου πνεύματος ἐϕ' ὑμᾶς, καὶ ἔσεσθέ μου μάρτυρες ἔν τε ᾽Ιερουσαλὴμ καὶ ἐν πάσῃ τῇ ᾽Ιουδαίᾳ καὶ Σαμαρείᾳ καὶ ἕως ἐσχάτου τῆς γῆς.
Verse: 9    καὶ ταῦτα εἰπὼν βλεπόντων αὐτῶν ἐπήρθη, καὶ νεϕέλη ὑπέλαβεν αὐτὸν ἀπὸ τῶν ὀϕθαλμῶν αὐτῶν.
Verse: 10    καὶ ὡς ἀτενίζοντες ἦσαν εἰς τὸν οὐρανὸν πορευομένου αὐτοῦ, καὶ ἰδοὺ ἄνδρες δύο παρειστήκεισαν αὐτοῖς ἐν ἐσθήσεσι λευκαῖς,
Verse: 11    οἳ καὶ εἶπαν, ῎Ανδρες Γαλιλαῖοι, τί ἑστήκατε βλέποντες εἰς τὸν οὐρανόν; οὗτος ὁ ᾽Ιησοῦς ὁ ἀναλημϕθεὶς ἀϕ' ὑμῶν εἰς τὸν οὐρανὸν οὕτως ἐλεύσεται ὃν τρόπον ἐθεάσασθε αὐτὸν πορευόμενον εἰς τὸν οὐρανόν.
Verse: 12    Τότε ὑπέστρεψαν εἰς ᾽Ιερουσαλὴμ ἀπὸ ὄρους τοῦ καλουμένου ᾽Ελαιῶνος, ὅ ἐστιν ἐγγὺς ᾽Ιερουσαλὴμ σαββάτου ἔχον ὁδόν.
Verse: 13    καὶ ὅτε εἰσῆλθον, εἰς τὸ ὑπερῷον ἀνέβησαν οὗ ἦσαν καταμένοντες, ὅ τε Πέτρος καὶ ᾽Ιωάννης καὶ ᾽Ιάκωβος καὶ ᾽Ανδρέας, Φίλιππος καὶ Θωμᾶς, Βαρθολομαῖος καὶ Μαθθαῖος, ᾽Ιάκωβος ῾Αλϕαίου καὶ Σίμων ὁ ζηλωτὴς καὶ ᾽Ιούδας ᾽Ιακώβου.
Verse: 14    οὗτοι πάντες ἦσαν προσκαρτεροῦντες ὁμοθυμαδὸν τῇ προσευχῇ σὺν γυναιξὶν καὶ Μαριὰμ τῇ μητρὶ τοῦ ᾽Ιησοῦ καὶ τοῖς ἀδελϕοῖς αὐτοῦ.
Verse: 15    Καὶ ἐν ταῖς ἡμέραις ταύταις ἀναστὰς Πέτρος ἐν μέσῳ τῶν ἀδελϕῶν εἶπεν [ἦν τε ὄχλος ὀνομάτων ἐπὶ τὸ αὐτὸ ὡς ἑκατὸν εἴκοσι],
Verse: 16    ῎Ανδρες ἀδελϕοί, ἔδει πληρωθῆναι τὴν γραϕὴν ἣν προεῖπεν τὸ πνεῦμα τὸ ἅγιον διὰ στόματος Δαυὶδ περὶ ᾽Ιούδα τοῦ γενομένου ὁδηγοῦ τοῖς συλλαβοῦσιν ᾽Ιησοῦν,
Verse: 17    ὅτι κατηριθμημένος ἦν ἐν ἡμῖν καὶ ἔλαχεν τὸν κλῆρον τῆς διακονίας ταύτης.
Verse: 18    Οὗτος μὲν οὖν ἐκτήσατο χωρίον ἐκ μισθοῦ τῆς ἀδικίας, καὶ πρηνὴς γενόμενος ἐλάκησεν μέσος, καὶ ἐξεχύθη πάντα τὰ σπλάγχνα αὐτοῦ.
Verse: 19    καὶ γνωστὸν ἐγένετο πᾶσι τοῖς κατοικοῦσιν ᾽Ιερουσαλήμ, ὥστε κληθῆναι τὸ χωρίον ἐκεῖνο τῇ [ἰδίᾳ] διαλέκτῳ αὐτῶν ᾽Ακελδαμάχ, τοῦτ' ἔστιν, Χωρίον Αἵματος.
Verse: 20    Γέγραπται γὰρ ἐν βίβλῳ ψαλμῶν, Γενηθήτω ἡ ἔπαυλις αὐτοῦ ἔρημος καὶ μὴ ἔστω ὁ κατοικῶν ἐν αὐτῇ, καί, Τὴν ἐπισκοπὴν αὐτοῦ λαβέτω ἕτερος.
Verse: 21    δεῖ οὖν τῶν συνελθόντων ἡμῖν ἀνδρῶν ἐν παντὶ χρόνῳ ᾧ εἰσῆλθεν καὶ ἐξῆλθεν ἐϕ' ἡμᾶς ὁ κύριος ᾽Ιησοῦς,
Verse: 22    ἀρξάμενος ἀπὸ τοῦ βαπτίσματος ᾽Ιωάννου ἕως τῆς ἡμέρας ἧς ἀνελήμϕθη ἀϕ' ἡμῶν, μάρτυρα τῆς ἀναστάσεως αὐτοῦ σὺν ἡμῖν γενέσθαι ἕνα τούτων.
Verse: 23    καὶ ἔστησαν δύο, ᾽Ιωσὴϕ τὸν καλούμενον Βαρσαββᾶν, ὃς ἐπεκλήθη ᾽Ιοῦστος, καὶ Μαθθίαν.
Verse: 24    καὶ προσευξάμενοι εἶπαν, Σὺ κύριε, καρδιογνῶστα πάντων, ἀνάδειξον ὃν ἐξελέξω ἐκ τούτων τῶν δύο ἕνα
Verse: 25    λαβεῖν τὸν τόπον τῆς διακονίας ταύτης καὶ ἀποστολῆς, ἀϕ' ἧς παρέβη ᾽Ιούδας πορευθῆναι εἰς τὸν τόπον τὸν ἴδιον.
Verse: 26    καὶ ἔδωκαν κλήρους αὐτοῖς, καὶ ἔπεσεν ὁ κλῆρος ἐπὶ Μαθθίαν, καὶ συγκατεψηϕίσθη μετὰ τῶν ἕνδεκα ἀποστόλων.

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.