TITUS
Novum Testamentum graece
Part No. 121
Previous part

Chapter: 2 
Verse: 1    Διὸ ἀναπολόγητος εἶ, ὦ ἄνϑρωπε πᾶς ὁ κρίνων· ἐν ᾧ γὰρ κρίνεις τὸν ἕτερον, σεαυτὸν κατακρίνεις, τὰ γὰρ αὐτὰ πράσσεις ὁ κρίνων.
Verse: 2    οἴδαμεν δὲ ὅτι τὸ κρίμα τοῦ ϑεοῦ ἐστιν κατὰ ἀλήϑειαν ἐπὶ τοὺς τὰ τοιαῦτα πράσσοντας.
Verse: 3    λογίζῃ δὲ τοῦτο, ὦ ἄνϑρωπε ὁ κρίνων τοὺς τὰ τοιαῦτα πράσσοντας καὶ ποιῶν αὐτά, ὅτι σὺ ἐκϕεύξῃ τὸ κρίμα τοῦ ϑεοῦ;
Verse: 4    ἢ τοῦ πλούτου τῆς χρηστότητος αὐτοῦ καὶ τῆς ἀνοχῆς καὶ τῆς μακροϑυμίας καταϕρονεῖς, ἀγνοῶν ὅτι τὸ χρηστὸν τοῦ ϑεοῦ εἰς μετάνοιάν σε ἄγει;
Verse: 5    κατὰ δὲ τὴν σκληρότητά σου καὶ ἀμετανόητον καρδίαν ϑησαυρίζεις σεαυτῷ ὀργὴν ἐν ἡμέρᾳ ὀργῆς καὶ ἀποκαλύψεως δικαιοκρισίας τοῦ ϑεοῦ,
Verse: 6    ὃς ἀποδώσει ἑκάστῳ κατὰ τὰ ἔργα αὐτοῦ,
Verse: 7    τοῖς μὲν καϑ' ὑπομονὴν ἔργου ἀγαϑοῦ δόξαν καὶ τιμὴν καὶ ἀϕϑαρσίαν ζητοῦσιν, ζωὴν αἰώνιον·
Verse: 8    τοῖς δὲ ἐξ ἐριϑείας καὶ ἀπειϑοῦσι τῇ ἀληϑείᾳ πειϑομένοις δὲ τῇ ἀδικίᾳ, ὀργὴ καὶ ϑυμός
Verse: 9    ϑλῖψις καὶ στενοχωρία ἐπὶ πᾶσαν ψυχὴν ἀνϑρώπου τοῦ κατεργαζομένου τὸ κακόν, ᾽Ιουδαίου τε πρῶτον καὶ ῞Ελληνος·
Verse: 10    δόξα δὲ καὶ τιμὴ καὶ εἰρήνη παντὶ τῷ ἐργαζομένῳ τὸ ἀγαϑόν, ᾽Ιουδαίῳ τε πρῶτον καὶ ῞Ελληνι·
Verse: 11    οὐ γάρ ἐστιν προσωπολημψία παρὰ τῷ ϑεῷ.
Verse: 12    ὅσοι γὰρ ἀνόμως ἥμαρτον, ἀνόμως καὶ ἀπολοῦνται· καὶ ὅσοι ἐν νόμῳ ἥμαρτον, διὰ νόμου κριϑήσονται·
Verse: 13    οὐ γὰρ οἱ ἀκροαταὶ νόμου δίκαιοι παρὰ τῷ ϑεῷ, ἀλλ' οἱ ποιηταὶ νόμου δικαιωϑήσονται.
Verse: 14    ὅταν γὰρ ἔϑνη τὰ μὴ νόμον ἔχοντα ϕύσει τὰ τοῦ νόμου ποιῶσιν, οὗτοι νόμον μὴ ἔχοντες ἑαυτοῖς εἰσιν νόμος·
Verse: 15    οἵτινες ἐνδείκνυνται τὸ ἔργον τοῦ νόμου γραπτὸν ἐν ταῖς καρδίαις αὐτῶν, συμμαρτυρούσης αὐτῶν τῆς συνειδήσεως καὶ μεταξὺ ἀλλήλων τῶν λογισμῶν κατηγορούντων ἢ καὶ ἀπολογουμένων,
Verse: 16    ἐν ᾗ ἡμέρᾳ κρίνει ὁ ϑεὸς τὰ κρυπτὰ τῶν ἀνϑρώπων κατὰ τὸ εὐαγγέλιόν μου διὰ ᾽Ιησοῦ Χριστοῦ.
Verse: 17    Εἰ δὲ σὺ ᾽Ιουδαῖος ἐπονομάζῃ καὶ ἐπαναπαύῃ νόμῳ καὶ καυχᾶσαι ἐν ϑεῷ
Verse: 18    καὶ γινώσκεις τὸ ϑέλημα καὶ δοκιμάζεις τὰ διαϕέροντα κατηχούμενος ἐκ τοῦ νόμου,
Verse: 19    πέποιϑάς τε σεαυτὸν ὁδηγὸν εἶναι τυϕλῶν, ϕῶς τῶν ἐν σκότει,
Verse: 20    παιδευτὴν ἀϕρόνων, διδάσκαλον νηπίων, ἔχοντα τὴν μόρϕωσιν τῆς γνώσεως καὶ τῆς ἀληϑείας ἐν τῷ νόμῳ
Verse: 21    ὁ οὖν διδάσκων ἕτερον σεαυτὸν οὐ διδάσκεις; ὁ κηρύσσων μὴ κλέπτειν κλέπτεις;
Verse: 22    ὁ λέγων μὴ μοιχεύειν μοιχεύεις; ὁ βδελυσσόμενος τὰ εἴδωλα ἱεροσυλεῖς;
Verse: 23    ὃς ἐν νόμῳ καυχᾶσαι, διὰ τῆς παραβάσεως τοῦ νόμου τὸν ϑεὸν ἀτιμάζεις;
Verse: 24    τὸ γὰρ ὄνομα τοῦ ϑεοῦ δι' ὑμᾶς βλασϕημεῖται ἐν τοῖς ἔϑνεσιν, καϑὼς γέγραπται.
Verse: 25    περιτομὴ μὲν γὰρ ὠϕελεῖ ἐὰν νόμον πράσσῃς· ἐὰν δὲ παραβάτης νόμου ᾖς, ἡ περιτομή σου ἀκροβυστία γέγονεν.
Verse: 26    ἐὰν οὖν ἡ ἀκροβυστία τὰ δικαιώματα τοῦ νόμου ϕυλάσσῃ, οὐχὶ ἡ ἀκροβυστία αὐτοῦ εἰς περιτομὴν λογισϑήσεται;
Verse: 27    καὶ κρινεῖ ἡ ἐκ ϕύσεως ἀκροβυστία τὸν νόμον τελοῦσα σὲ τὸν διὰ γράμματος καὶ περιτομῆς παραβάτην νόμου.
Verse: 28    οὐ γὰρ ὁ ἐν τῷ ϕανερῷ ᾽Ιουδαῖός ἐστιν, οὐδὲ ἡ ἐν τῷ ϕανερῷ ἐν σαρκὶ περιτομή·
Verse: 29    ἀλλ' ὁ ἐν τῷ κρυπτῷ ᾽Ιουδαῖος, καὶ περιτομὴ καρδίας ἐν πνεύματι οὐ γράμματι, οὗ ὁ ἔπαινος οὐκ ἐξ ἀνϑρώπων ἀλλ' ἐκ τοῦ ϑεοῦ.

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.